KJOAʼMIYA XI CHOTʼAYA 1
“Je xi Jeobá básjai alijme xi jchale”
TEXTO XI TSʼE NÓ 2022: “Je xi Jeobá básjai alijme xi jchale” (SAL. 34:10).
KJOAJNDA 4 Jéní Jeobá xi koʼndana
XI TÍNCHJA̱NI *
Ningalani ñʼai tjín kjoa jaʼatojin David, kʼoakitso nga tsín jme xi kichale (Chótsenlai párrafo 1-3) *
1. Jmé kjoa xi ñʼai tjín jaʼatojin je David.
JE REY Saúl nʼio jtike koan je David kʼoa koanmele kisikʼien, kuinga kitokachjingani je David. Kʼianga títokachjinga, yaa kicho ya naxinandá xi Nob ʼmi kʼoa nga tsínle jme xi ski̱ne aon nioxtila kisijé (1 Sam. 21:1, 3). Xijekoan, jngoo ngijao kichokationgi kao chjota xi tjenkao (1 Sam. 22:1). Ánni nga kui kjoa tsakʼejnajinni je David.
2. Ánni nga xkón sʼin tsakʼejnani je Saúl (1 Samuel 23:16, 17).
2 Kʼianga nʼio nda tsabekon chjota je David kʼoa nga nkjín kjoajchán kinjele, je Saúl koanxinkonke. Kʼoati be je Saúl nga tsín kisasenle Jeobá jmeni xi kisʼin kʼoa nga je David kiskoejin nga je koatexoma ya naxinandá Israel (tʼexkiai 1 Samuel 23:16, 17). * Nga tojo je Saúl tíbatéxoma nga kʼia, nʼio nkjín chjotakjoajchán kisʼele kʼoa kuinga kitokachjingani David. A kʼoasʼin kisikjaʼaitsjen Saúl nga koa̱n kʼoechjoa josʼin jetjínndajinle Jeobá nga rey koa̱n je David (Is. 55:11). Je Biblia alikui kʼoatso tsa kʼoasʼin kisikjaʼaitsjen. Tonga je xi ʼyaa kuinga tsín ndasʼin batio je xi kontra batiole Jeobá.
3. Jókisʼe kon David ningalani tse kjoa jaʼatojin.
3 Nangitokon koan je David. Ali tsa jejin tsakásjai xá, jé Jeobá kiskoejin nga koatexoma (1 Sam. 16:1, 12, 13). Je Saúl nʼio koanjtike je David. Tonga je David alikui je Jeobá tsakánele je kjoa xi jaʼatojin. Kʼoa alikui jokitso ninga tochoa tsojmi kisʼele xi kiskine kʼoa nga ngijao tsakʼejnangi. Kʼianga tíjnaʼmangi ngijao je David tsakui nichxin kʼia kise je kjoajnda xi yʼangini kjoaʼmiya jebi, jñani tso: “Je xi Jeobá básjai alijme xi jchale” (Sal. 34:10).
4. Jmé xi chótʼayajiaan i̱ kjoaʼmiya jebi, kʼoa ánni nga nʼio tjínnile kjoandosin.
4 Nkjín choʼndale Niná xi tochoa tsojmi sokóle. * Ngisaa kʼianga chʼintáo koan. Sa ñʼai sa ñʼai koa̱nchon nga jemachrianle kjoañʼai xi nʼio tse (Mat. 24:21). Kuinga ño koya tjínni xi chótʼayajiaan i̱ kjoaʼmiya jebi. Xi títjon, ánni kʼoabixónsíñá nga tsín jme xi kichale je David. Xi majaoni, ánni nga tokatamaniná jmeni xi tjínná. Xi majanni, ánni nga tjínjngoni tokoán nga je Jeobá sikuindaná. Kʼoa xi mañoni, jósʼin kuiyondalee ndʼaibi jmeni xi sʼa kʼoakoa̱n.
“ALIKUI JME XI JCHANA”
5, 6. Jósʼin basenkaoná Salmo 23:1-6 nga majinná josʼin tsoyanile nga kʼoakitso je David nga tsín jme xi jchale je choʼndale Jeobá.
5 Jmé xi kinchja̱ni David nga kʼoakitso nga tsín jme xi jchale je choʼndale Niná. Nga koa̱njinná jme xi kinchja̱ni kʼiaa nga chótʼayajiaan jmeni xi tso Salmo 23 (tʼexkiai Salmo 23:1-6). * Kʼianga fitsʼiani salmo jebi i kitso je David: “Jé Jeobá xi koʼndana. Alikui jme xi jchana”. Jmesani xi tso salmo jebi, kui nchja̱ni David jmeni xi ngisa tjínle kjoandosin. Jolani je kjoanichikontʼain xi kitsjoale Jeobá nga je kisinʼiotʼa yaole. Jé Jeobá tsakándiaale josʼin tsakʼamje, kʼoa tsakasenkao nga nda tsakʼejna kʼoa nga kjoa jaʼatojin. Je David koanjinle nga tsín tsakui xi tsonile nga tsín jme kjoa kjoaʼatojin nga choʼndale Jeobá ma. Sakʼoajin kisikinroajen kon joni tsa ya tsoʼba jñani njio chon, kʼoa kʼoakitso nga chjota kitjenngike. Tonga nga je Jeobá kisinʼiotʼa je David kʼoakitso nga tsín jme xi tso̱kjonle.
6 Je David ndasʼin tsakʼejna ngixko̱n Jeobá, kuinga kʼoakitsoni nga tsín jme xi kichale. Ali tsakuijin xi tsjoa tsakáya kon nga nkjín tsojmi sʼe̱le, tokoanjngoni kon jmeni xi kitsjoale Jeobá. Kui xi ngisa chjí tsabe je David nga je Jeobá sikuinda kʼoa koasenkao.
7. Tojo tso Lucas 21:20-24, jmé kjoa xi jaʼatojin chjotale Cristo xi Judea tsʼe.
7 Je choa̱le David kui bakóyaná nga tsínkui si̱metokoán nga nʼio nkjín tsojmi sʼe̱ná. Ningalani nkjín tsojmi tjínná alikui koa̱n nga kui ngisa kʼoailee kjoandosin. Kʼoakisʼin je chjotale Cristo xi Judea tsʼe xi tsakatio nga siglo 1 (tʼexkiai Lucas 21:20-24). * Je Jesús kʼoakitsole nga tjínnele kuitjo ya naxinandá kʼianga jekuichokationdai je sondado ya Jerusalén. Tsa kisitjoson jme xi kitsole Jesús kinjengile yaole, tonga tjínnele kitsjionkon jmeni xi tjínle. Jngo revista La Atalaya xi i̱ kitso: “Kitsjionkon niʼyale, nangile kao tsojmi xi kisʼele. Tosaa je Jeobá kisinʼiotʼa yaole, nga̱ koankjainle nga je koasenkao kʼoa nga je tsjoále jme xi koa̱nchjénle”.
8. Jmé xi bakóyaná jokisʼin je chjotale Cristo xi Judea tsʼe.
8 Jmé xi bakóyaná jokisʼin je chjotale Cristo xi Judea tsʼe. Je revista La Atalaya xi sa jekanikʼaxkiaa i̱ kitsosa: “Tsakui nichxin chótʼayakaoná nichxin xi sʼa nroa tʼatsʼe jme xi ngisa chjí jchatokoán. A kui ngisa chjí jchatokoán je tsojmi xi tjínná axo kui ngisa chjí jchatokoán nga kixi kjuintʼalee Niná nga̱ ʼyañá nga je kʼoasjentjainá. Kʼianga kʼoakoa̱n, tsakui nichxin ñʼai koa̱nná je tsojmi xi si̱chjén, tonga tjínnele kuiyondaa tojo kisʼin je chjotale Cristo xi Judea tsʼe”. *
9. Jósʼin basenkaoli je kjoafaʼaitsjen xi kitsjoale Pablo je chjotale Cristo.
9 Si̱kjaʼaitsjenla jokji ñʼai koanle je chjotale Cristo xi Judea tsʼe nga xin naxinandá kikatio, nga kisikatío ngayeje xi kisʼele. Tjínnele kʼoatsakatío kon nga je Jeobá tsjoále jme xi koa̱nchjénle. Aon nó tongini nga kjesa bichókationdaijin ya Jerusalén je sondado romano, je pastro Pablo kʼoakitsole je chjotale Cristo jme xi tjínnele sʼin. I kitsole: “Ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle. Kʼoasʼin nga kʼoakuixónnía nga nʼiotakoán: Jé Nainá xi basenkaona, likui tsakjonnia. Jmé xi koa̱n sikaona chjota” (Heb. 13:5, 6). Je chjotale Cristo xi kisitjoson je kjoafaʼaitsjen xi kitsjoale Pablo ngisajin choa ñʼai koanle nga xin naxinandá kikatio. Ñaki kʼoatsakatío kon nga je Jeobá tsjoále jme xi koa̱nchjénle. Jmeni xi kitso Pablo kʼoati basenkaoná nga kʼoabʼé tokoán nga je Jeobá tsjoáná jmeni xi koa̱nchjénná.
TSJOA KʼOÉ TOKOÁN JOKJI TJÍNNÁ
10. Jmé kjoafaʼaitsjen kitsjoa Pablo xi basenkaoná.
10 Kʼoati me tso je kjoafaʼaitsjen xi kitsjoale Pablo je Timoteo, kʼoa kʼoati basenkaoná kjoafaʼaitsjen jebi. I kitso: “Tsa tjínná xi chinee kao najño xi chʼakjá, tokʼoasʼin kʼoéjngotakoán” (1 Tim. 6:8). Ali tsakuijin xi kitsonile Pablo nga tsín koa̱n nda kuichaa, nga tsín koa̱n si̱ndachoan ndʼianá kʼoa nga tsín koa̱n kuindá sakʼoa najño xi chʼakjá. Kui xi kitsonile nga tokatamajngoni tokoán jmeni xi tjínná (Filip. 4:12). Kʼoakisʼin je Pablo, je xi ngisa chjíle kuinga miyoná mani je Jeobá, ali tsakuijin je tsojmi xi tjínná (Hab. 3:17, 18).
Je chjota israelita alijme xi kichale je xi 40 nó tsakʼema ya ʼndekixí. Kʼoa ñá a tomajngoni tokoán jmeni xi tjínná (Chótsenlai párrafo 11) *
11. Jmé xi bakóyaná jokitsole Moisés je chjota israelita.
11 Jé Jeobá xi ngisa nda be jmeni xi machjénná. Kataʼyala jokitsole Moisés je chjota israelita kʼianga jeñachan nó tjíotsoma ya ʼndekixí. I kitsole: “Jé Jeobá Nináli tísíchikontʼainli ngayeje jmeni xi tinʼiai. Kuenta tísʼínli josʼin titomjai i̱ ʼndekixí. Je xi 40 nó tífaʼato, jé Jeobá Nináli tísíkuindali kʼoa tsín jme xi tíchali” (Deut. 2:7). Je xi 40 nó tsakʼetsoma ya ʼndekixí maná kitsjoale je Jeobá xi kiskine. Kʼoa je najño xi yʼakjá nga kitjoni ya Egipto alikuikʼia je (Deut. 8:3, 4). Tsakui nichxin tjíokʼa chjota israelita xi kʼoakitso nga tsín jme xi kisʼele, tonga je Moisés kʼoakitso nga kisʼele ngayeje xi koanchjénle. Je Jeobá tsjoa sʼe̱ kon tsa tokoa̱njngoni tokoán jmeni xi tjínná, tsa chjí jchatokoán jmeni xi tsjoáná, tsa kʼoasʼin si̱kjaʼaitsjeen nga je tísíchikontʼainná kʼoa kʼoailee kjoanda.
ÑAKI KʼOAKʼOÉ TOKOÁN NGA JE JEOBÁ SIKUINDANÁ
12. Jósʼin ʼyañá nga je Jeobá kisinʼiotʼa David kʼoa nga tsín to yaole kini.
12 Je David be nga tsínkʼia tsjiónkon Jeobá je choʼndale. Ningalani ñʼai tjín kjoa tíjnajin je David kʼianga kʼoakitso jmeni xi faʼaitʼa ya Salmo 34, nʼio kisʼejna je kjoamakjainle. Ñaki kʼoatsakʼé kon nga joxi je ánkjele Jeobá tísíkuinda jngotjondai (Sal. 34:7). Je David kui kisingósonkao je ánkjele Jeobá jngo sondado xi tísíkuinda ʼndeʼnde tsa totsejinni kontrale kjoaʼaí. Ningalani nʼio nda koanle kiskan kjoajchán je David kʼoa ninga kʼoakitsole Jeobá nga je koatexoma, alikui to yaole kini. Alikui tokui kini nga nʼio nda koanle tsakasén la̱jao̱ kʼoa nga nʼio nda koanle kisichjén espada (1 Sam. 16:13; 24:12). Tosaa je Niná kisinʼiotʼa kʼoa ñaki kʼoatsakʼé kon nga je ánkjele Niná basenkao je xi kixi fitʼale. Ningalani tsín ñaki xkoaan jchañá ndʼaibi nga jngo ánkje kjoaʼaíkʼasjentjainá, tsa je Jeobá si̱nʼiotʼaa tojme kjoa xi kuitjátojiaan kʼoa ninga kuiyá, ʼyañá nga je Jeobá tsjoá ijngokʼaniná kjoabijnachon.
Kʼianga jetíjna kjoañʼai xi nʼio tse tsakui nichxin ya ndʼianá kuichokʼetʼaná je Gog xi tsʼe Magog. Tonga je Jesús kao ánkje sitoánntjainá kʼoa tsín toñá sikatíoná (Chótsenlai párrafo 13)
13. Kʼianga kʼoetʼaná je Gog xi tsʼe Magog, ánni nga kʼoasʼin sikjaʼaitsjenni nga ngotjo sikjesonniná, kʼoa ánni nga tsín kuinókjonñá (chótsenlai sén xi faʼaitʼa ya portada).
13 Nichxin xi machrianle yaa koakoá tsa je Jeobá ninʼiotʼaa kʼoa tsa makjainná nga je sikuindaná. Kʼianga kʼoetʼaná je Gog xi tsʼe Magog, xi tsonile, je naxinandá xi jngo jtín mani, tsakui nichxin kʼoasʼin si̱kjaʼaitsjeen nga sikjesonná. Machjén nga ñaki kʼoakʼoé tokoán nga je Jeobá koasenkaoná. Je chjota kʼoasʼin sikjaʼaitsjen nga tsín ʼya xi koasenkaoná (Ezeq. 38:10-12). Alikui skoe̱ jmeni xi ʼyaa ñá, nga̱ ʼyañá nga je ánkjele Jeobá sitoánntjainá. Alikui majinle chjota xi tʼatsʼe jebi nga̱ tsín makjainle xi tʼatsʼe Jeobá. Tokʼoajin koa̱nle nga skoe̱ josʼin sitoánntjainá je ánkjele Jeobá (Apoc. 19:11, 14, 15).
KUIYONDALEE JMENI XI KOA̱N NICHXIN XI SʼA NROA
14. Jméni xi sʼiaan ndʼaibi nga kuiyondalee nichxin xi sʼa nroa.
14 Jméni xi sʼiaan nga kuiyondalee ndʼaibi jokoa̱n nichxin xi sʼa nroa. Xi títjon, kuinga tsín nʼio chjí jchatokoán je tsojmi xi tjínná nga̱ kjoaʼaí nichxin nga tosi̱katioá. Xi ijngosani, tokʼoéjngoaa tokoán jokji tjínná kʼoa tsjoa kʼoé tokoán nga miyoná mani je Jeobá. Nga ngisasa nda jchaxkoaan Niná ngisaa sʼe̱jngo tokoán nga je sikuindaná kʼianga kʼoetʼaná je Gog xi tsʼe Magog.
15. Jósʼin tsabeni je David nga tsínkʼia tsjiónkon je Jeobá.
15 Kataʼyala jmesani xi tsakasenkao David nga kichokjoajinle je kjoa xi jaʼatojin. I kitso: “Chótʼao kʼoa kataʼyao nga nda chjota je Jeobá; tsjoa tjínle je chjota xi je sínʼiotʼa” (Sal. 34:8). Jmeni xi tso salmo jebi kui bakóná ánni nga ñaki kʼoatsakʼéni kon David nga je Jeobá koasenkao. Ngantsjai nga je Jeobá kisijéle nganʼio, kʼoa je Jeobá alikuikʼia kitsjionkon. Kʼianga sʼa xti je David, kao jngo sondado xi nʼio ngʼa kji kiskan xi Goliat tsakʼin. I kitsole: “Nichxin jebi, jé Jeobá xosʼin nga ska̱yai ndsa̱” (1 Sam. 17:46). Kʼianga choʼndale koan je rey Saúl, nkjín kʼa me kisikʼien. Tonga jé Jeobá tsakasenkao je David (1 Sam. 18:12). Nga tsabe David josʼin tsakasenkao Jeobá nga sʼa xti, be nga tosi tonda je koasenkao. Kʼoati kui xi koasenkaoná nga kuiyondalee je kjoa xi kuitjátojiaan nichxin xi nroa.
16. Jósʼin jchañá nga nda chjota je Jeobá.
16 Kʼianga si̱nʼiotʼaa ndʼaibi je Jeobá, ngisaa sʼe̱jngo tokoán nga je koasenkaoná nichxin xi sʼa nroa. Tobʼelañá, jé Jeobá ninʼiotʼaa nga je koasenkaoná kʼianga si̱jékjoalee je nainá nga koanngián kjoajtíntse, nga tsjoáʼndená nga koa̱n koanngián kjoajtín kʼoa nga ngisasa tse kʼuínyasoán. Tonga tsa tsínlani tsjoáʼndená kʼoa tsín titsjoáxániná, a tjínjngoo tokoán nga je Jeobá sikuindaná kʼoa nga je tsjoáná jme xi koa̱nchjénná (Heb. 13:5). Nkjín ndsʼee xi ñaki to xále Niná tjíosʼín xi koa̱n kuitsoyaná josʼin tsakinyakao Jeobá kʼianga nganʼio koanchjénle. Je Jeobá sítjoson kʼianga kʼoatsoná nga sikuindaná.
17. Jñánile texto xi tsʼe nó 2022, kʼoa ánni nga nʼio basenkaoniná texto jebi.
17 Nga je Jeobá koasenkaoná alikui koa̱n kuijkónlee jmeni xi koa̱n nichxin xi sʼa nroa. Tsa je títjon Jeobá kuenta sʼiaan, alikuikʼia tsjiónkonná. Nga nʼio machjén nga kuiyondalee jmeni xi koa̱n nichxin xi sʼa nroa kʼoa nga kʼoéjngoaa tokoán nga tsínkʼia tsjiónkonná je Jeobá, je Cuerpo Gobernante kui Salmo 34:10 kiskoejin je texto xi tsʼe nó 2022, xi tso: “Je xi Jeobá básjai alijme xi jchale”.
KJOAJNDA 38 Jé Jeobá sikuindali
^ Je texto xi tsʼe nó 2022 kui Salmo 34:10 jñani tso: “Je xi Jeobá básjai alijme xi jchale”. Ánni kʼoabixónsíñá nga tsín jme xi jchale je choʼndale Jeobá, ningalani tjínkʼa xi tsín nʼio nkjín tsojmi tjínle. I̱ kjoaʼmiya jebi kui jchaa jme xi tínchja̱ni texto jebi kʼoa jósʼiaan nga kuiyondalee jmeni xi koa̱n nichxin xi sʼa nroa.
^ 1 Samuel 23:16, 17: “Je Jonatán je tile Saúl kinrʼoe je David ya Hores nga kitsjoánganʼiole nga je Jeobá katasínʼiotʼa. 17 I kitsole: Ali tsa nokjonjin, nga̱ je Saúl, je nʼaina, alikui koa̱nsjaile jñani tijnai. Ji xi rey sʼin kuijnai ya Israel, kʼoa an koa̱njaonile. Kʼoa je nʼaina Saúl nanda be kʼianga kʼoakoa̱n”.
^ Chótʼai jñani “Tjínkʼa xi kjonangi” tso, xi faʼaitʼa Xo̱n xi Bájinkonná xi tsʼe 1 sá octubre nó 2014.
^ Salmo 23:1-6: “Jé Jeobá xi koʼndana. Alikui jme xi jchana. 2 Yaa fikaona jñani kijna xkoén xkoén jñá; yaa fikaona jñani tjín nandá nga sikjáya. 3 Tsjoánganʼiona. Yaa ndiaa xi kixi fikaona xi totʼatsʼe jaʼaínle. 4 Ninga ya bʼamje̱ ya konga jña nʼio njio chon, alikui tsokjoan tsa jme xi koa̱nna, nga̱ yaa tjen tijnakaonái; je xi sínʼio tokoan kui je yájtili kʼoa kao yániseli. 5 Jngoo yámixa̱ nikasénndanái ya ngixko̱n kontrana. Njenyʼánjon jkoa nga siti̱ bʼejtenjuin; tjíkitse je cho̱tsínna. 6 ʼBeña nga koakonái kjoanda kao xi ñaki kjoatsjoacha jokjitse koatejnakoan; yaa ndʼiale Jeobá koatejna ngantsjai”.
^ Lucas 21:20-24: “Kʼia nga jchao Jerusalén, nga tjíochjoandaile sondado, jchaoʼni nga kuixo̱ya xítí. 21 Kʼia je chjota xi tjío ya Judea, katamanga ya jinjñá, kʼoa je xi tjío ngabasenle Jerusalén, kʼoati katafixin, kʼoa je xi ya tjío ngichao, ali ya faʼasʼenjin naxinandá. 22 Nga̱ je nichxinle kjoangajao, jméni nga kuitjosonni ngayije kjoa xi tjítʼa xo̱n. 23 Ma̱xóni je xi ʼndí yʼa, kʼoa je xi síkaki kui nichxinbe, nga̱ sʼee kjoañʼai xi nʼio i̱ sonʼndebi, kʼoa kjoañʼai kjoaʼa je naxinandábi xi totʼatsʼe kjoajtile Niná. 24 Ñaki ki̱cha̱ndo kuiyáni, kʼoati preso koaikao ngakijnda naxinandáyʼai, kʼoa kuinyanetaon Jerusalén chjotale naxinandáyʼai xi li judíojin, jo saʼnda nga nichxinle je chjota xi li judíojin koa̱njngo”.
^ Chótʼai je revista La Atalaya xi tsʼe 1 de mayo de 1999, página 19.