1, 2. Ánni nga xki̱ nó nikjaʼaitsjenyañá je Kjoabiyale Cristo.

 JEME 2,000 nó tjínle nga kitsjoa kjoabijnachonle Jesús xi totʼatsaan. Nga kʼoakisʼin kui kjoanda tjínná nga koa̱n kuiyoaa ngantsjai nichxin. Nitje̱n nga kjesa nikʼienjin nga tsakjen kao pastrole, nioxtila kao vino kisichjén kʼoa kʼoakitsole je chjotatjenngile nga tosi tonda kʼoakatasʼín, ánni kjoaʼaítsjennile kjoatsjoacha xi tsakakó (1 Cor. 11:23-26).

² Xi chjotatjenngile Cristo maa kuinga tsjoachaa je Jesús nga nitjosonñá jmeni xi kitso (Juan 14:15). Nga kʼoasʼin xki̱ nó nikjaʼaitsjenyá Kjoabiyale Cristo kʼoasʼin bakoñá nga chjí ʼyaa jmeni xi kisʼin. Tobʼelañá, nikʼayañá nichxin nga bʼetsʼoaa kʼoa nga nikjaʼaitsjenjiaan je kjoanda xi tjenkao nga kʼoasʼin tsakʼéchjíntjainá. Xi ijngo koya jmeni xi nʼia kuinga fajinkoaan je chjota, nga̱ kui xi mená nga nkjín chjota katabichó nga faʼaitsjenya je Kjoabiyale Cristo kʼoa kʼoati tsín mená tsanda ñá nga si̱chaa kjoajtín jebi.

3. Jmé xi chótʼayajiaan i̱ kjoaʼmiya jebi.

³ Xi choʼndale Jeobá maa, mangínñá nga faʼaitsjenya Kjoabiyale Cristo. I̱ kjoaʼmiya jebi, jan koya tjínni xi chótʼayajiaan jmeni xi nʼia. Xi títjon, kʼoasʼin nikjaʼaitsjenyá kjoabiyale tojo kitso je Jesús. Xi majaoni, kʼoaʼmile je chjota nga katafi nga nikjaʼaitsjenyá Kjoabiyale Cristo. Kʼoa xi majanni, nikjaʼaitsjenyañá ninga ñʼai ma sakʼoaná.

4. 1) Jméni xi ʼmiyaná kʼianga faʼaitsjenya Kjoabiyale Cristo (Lucas 22:19, 20). 2) Ánni nʼio chjínile nga majinná je kjoanda xi tjenkao nga tsakʼéchjíntjainá Jesús.

⁴ Kʼianga nikjaʼaitsjenyá Kjoabiyale Cristo, jngo kjoanokjoaya faʼa kʼoa nkjín koya jmeni xi sakóyaná. Tobʼelañá,  ánni tsakʼéchjíntjaininá kʼoa jókoa̱nnile nga tojngo chjota kuiyántjainá nga jchatʼa je jéená xi millón mañá, kʼoati sakóyaná ʼyáni xi ʼbi je vino kʼoa ʼyáni xi kjen je nioxtila, kʼoa jmé xi tsoyanile nioxtila kao vino (tʼexkiai Lucas 22:19, 20). b Kʼianga faʼa je kjoanokjoaya kui nikjaʼaitsjenjiaan je kjoanda xi sʼe̱le je xi i̱ Sonʼnde koatio (Is. 35:5, 6; 65:17, 21-23). Nʼio chjíle nga majinná jokji kjoanda tjenkao je kjoabʼechjíntjaile Jesucristo, nga̱ millón mani je chjota xi tsín majinle kʼoa alikui chjí bekon kjoanda jebi. Xi ijngosani, alikui kʼoasʼin síkjaʼaitsjenya je kjoabiyale tojo kitso je Jesús. Kataʼyala ánni kʼoasʼínni.

5. Kʼianga tongi jngo jaosa ma je pastro, jósʼin kisikjaʼaitsjenya chjota je kjoabiyale Jesús.

⁵ Nga tongi jngo jaosa pastro tjío, nkjín koanni je xi chjotale Cristo kitsole yaole xi kjaʼaísʼin kitsoya ya jinjtín (Mat. 13:24-27, 37-39). Alikui kʼoatjín jmeni xi kitsoya, chjota jebi kui xi koanmele nga “koaikao chjota xi je koaitʼale” (Hech. 20:29, 30). Jngo koya xi tsín kʼoatjín josʼin kitsoya, kuinga kʼoakitso nga je Jesús tsín “tojngo kʼa kitsʼaitʼa nga tsakʼa je jéele xi tsʼe xi nkjín mani”, chjota jebi kʼoakitso nga nkjín kʼa kʼoechjíntjainá je Cristo, tonga ya Biblia alikui kʼoatso (Heb. 9:27, 28). Tjínkʼa chjota xi tojo kʼoasʼin makjainle ndʼaibi. Tobʼelañá, tjínkʼa xi jinjin nichxin fi kʼoa xi nyaon nyaon fi mixa̱. c Tjínkʼa religión xi tsín kjitʼa síkjaʼaitsjenya Kjoabiyale Cristo, kʼoa je chjota xi bichó ya yo̱ngo̱le, alikui majinle josʼin tsoyanile je kjoabʼechjíntjaile Jesús. Tsakui nichxin tjínkʼa xi i̱ tso: “A jchatʼa kjoaixi je jéena nga kʼoasʼin kʼien je Jesús”. Tjínkʼa xi kui kʼoasʼin síkjaʼaitsjenni, nga̱ kʼoasʼin sakóyale nga tsín josʼin basenkaoná je kjoabʼechjíntjaile Jesús. Tonga jméni xi sʼín xi ñaki chjotale Cristo ma.

6. Kʼianga nó 1872, jméni xi koanjinle je chjota xi jngojtín koanni xi tsakásjaiya jotso je Biblia.

⁶ Kʼianga nó 1870, jngojtín chjota xi tsakásjaiya jotso je Biblia kʼoa jé tsakándiaale Charles Russell. Koanmele tsabe josʼin tíjna je kjoabʼechjíntjaile Jesús kʼoa jósʼin tjínnele kjoaʼaítsjenya kjoabiyale. Kʼianga nó 1872, koanjinle nga kʼoatso Biblia, nga je Jesús tsakʼéchjíntjainá ngatsʼiaa. Jmeni xi koanjinle kitsoyale xi kjaʼaí, tsakʼasje libro, periódico kao revista. Tochoatse jaʼato kʼoa xki̱ nó kisikjaʼaitsjenya Kjoabiyale Cristo, tojo kisʼin je chjotale Cristo xi tsakatio nga siglo 1.

7. Jósʼin basenkaoná ndʼaibi jmeni xi koanjinle je chjota xi jngojtín koanni xi tsakásjaiya jotso je Biblia.

⁷ Jósʼin basenkaoná ndʼaibi jmeni xi koanjinle je chjota xi jngojtín koanni xi tsakásjaiya jotso je Biblia. Jé Jeobá kisichikontʼain chjota jebi, kui majinniná ndʼaibi josʼin tsoyanile je kjoabʼechjíntjaile Jesús kʼoa jme kjoanda xi tjenkao (1 Juan 2:1, 2). Kʼoati majinná ndʼaibi nga kʼoatso je Biblia jme kjoachoya xi sʼe̱le je chjota xi sitjosonle je Niná. Tjínkʼa xi kui kjoachoya tjínle nga ya ngʼajmi koai kʼoa millón mani je chjota xi kui kjoachoya tjínle nga i̱ Sonʼnde koatio ngantsjai nichxin. Nga kui nikjaʼaitsjenjiaan je kjoabʼechjíntjaile Jesús kʼoa kao jokji tsjoakená je Jeobá ngisaa machriantʼalee (1 Ped. 3:18; 1 Juan 4:9). Tojo kisʼin je choʼndale Niná xi tsakatio  nichxin kjoatse, kʼoati fajinkoaan chjota nga katasíkjaʼaitsjenya Kjoabiyale Cristo tojo kitso je Jesús.

8. Jméni xi tjíosʼín je choʼndale Jeobá nga tjíobájinkon je chjota kʼianga faʼaitsjenya Kjoabiyale Cristo (chótsenlai sén xi faʼaitʼa).

⁸ Xi choʼndale Jeobá maa jenʼio kjoatse nga kʼoasʼin fajinkoaan je chjota kʼianga faʼaitsjenya je Kjoabiyale Cristo. Je revista xi kitjo kʼianga nó 1881, tsakájinkon je ndsʼee xi tjío ya Estados Unidos nga ya katasíkjaʼaitsjenya je Kjoabiyale Cristo ya ndʼia xi tíjna ya Allegheny (Pensilvania). Xijekoan, chaan kisikjaʼaitsjenya Kjoabiyale Cristo nga jngó jngó jtín xi kisatio. Kʼianga sá marzo nó 1940, kʼoatsakʼinle je ndsʼee nga katabájinkon je chjota xi koa̱nndosinle je Énle Niná. Kʼoa kʼianga nó 1960, kʼiaa tsakʼasje títjon Betel je xo̱n xi bʼailee je chjota kʼianga faʼaitsjenya Kjoabiyale Cristo kʼoa kisikasénle je jtín xi tjío. Saʼnda nga kʼia, xi testigole Jeobá maa jejmi millón invitación tinikʼabílee chjota. Ánni nga kʼoasikji kjoandosin bʼainilee xá jebi.

9, 10. ʼYásani xi binyakao kʼianga fajinkoaan je chjota kʼianga faʼaitsjenya Kjoabiyale Cristo (Juan 3:16).

⁹ Jngo koya anni fajinkonñá je chjota kʼianga faʼaitsjenya Kjoabiyale Cristo, kuinga mená nga katabe jmeni xi kisʼin je Jeobá kao Jesús xi tʼatsaan (tʼexkiai Juan 3:16). d Kui xi mená nga kuinyakao jmeni xi kjuinrʼoé nga kui nichxin nga ngisa koa̱nmele skoe̱xkon je Jeobá kʼoa nga choʼndale  katama. Kʼianga fajinkoaan je chjota kʼianga faʼaitsjenya Kjoabiyale Cristo, ali tsa tojejin chjota xi binyakao.

¹⁰ Nga fajinkoaan je chjota kʼianga faʼaitsjenya Kjoabiyale Cristo kʼoati binyakao xi jekisikatío xále Niná. Kʼoaʼmilee nga tojo tsjoake Niná. Tsjoa sʼe tokoán nga nkjín mani xi bichó nga faʼaitsjenya Kjoabiyale Cristo. Kʼianga bichó kui faʼaitsjenle jokji tsjoa kisatio kon nga kisixále je Jeobá. Kataʼyala jokoan Mónica. e Kʼianga kjima chʼin COVID-19, kʼiaa kitsoyason ijngokʼa. Kʼianga ki nga jaʼaitsjenya Kjoabiyale Cristo nga nó 2021 i kitso: “Alikuijin cha̱jinna jokji tsjoa kisʼe tokoan nga jaʼaitsjenya Kjoabiyale Cristo nó jebi, jekan nó tjínle nga tsín tixinyanile je chjota kʼoa nga kʼoaxinle nga katafi nga faʼaitsjenya Kjoabiyale Cristo. Ñaki kao kjoatsjoa kʼoakisʼian, nga̱ tsín bʼe josʼin tsjoanile kjoanda je Jeobá kao Jesús jmeni xi tjíosʼín xi tʼatsʼan” (Sal. 103:1-4). Ni koai kʼoa ni tsín koai je chjota nga kʼoaʼmilee, tonga fajinkonñá toʼyani nga̱ ʼyañá nga je Jeobá chjí be jmeni xi nʼia.

11. Jósʼin tísíchikontʼain Jeobá je xá xi nʼia kʼianga fajinkoaan je chjota nga faʼaitsjenya Kjoabiyale Cristo (Ageo 2:7).

¹¹ Je Jeobá tísíchikontʼain je xá xi nʼia nga fajinkoaan je chjota kʼianga faʼaitsjenya Kjoabiyale Cristo. Tobʼelañá, kʼianga nó 2021, ningalani chʼin COVID-19 koan 21,367,603 chjota kisikjaʼaitsjenya Kjoabiyale Cristo. Tsʼato jaoya tjínnile jotjín ma je testigole Jeobá xi tjío jngo tjíjtsa Sonʼnde. Ninga kʼoalani, je xi mandosinle je Jeobá jéní chjota, ali tsakuijin jokji nkjín koa̱n je chjota xi koa̱nña (Luc. 15:7; 1 Tim. 2:3, 4). Kʼianga fajinkoaan je chjota nga faʼaitsjenya Kjoabiyale Cristo, jé Jeobá basenkaoná nga kajiaan je chjota xi mele skoe̱ xi tʼatsʼe (tʼexkiai Ageo 2:7). f

12. Jmé kjoa xi kʼoechjoa sakʼoaná nga si̱kjaʼaitsjenyá Kjoabiyale Cristo (chótsenlai sén xi faʼaitʼa).

¹² Je Jesús tongini kʼoakitso kʼianga jetífikjetʼa xi chon sonʼnde nkjín koya kjoa kuitjátojiaan, jolani nga xíngiaa koatiochjoaná, nga chjota koaitjenngikená, nga sʼe̱ kjoajchán kao chʼinʼbi (Mat. 10:36; Mar. 13:9; Luc. 21:10, 11). Kuijin kjoa jebi xi kʼoechjoa sakʼoaná nga si̱kjaʼaitsjenyá Kjoabiyale Cristo. Jósʼín kʼa je ndsʼee kʼianga kjoa faʼatojin kʼoa jósʼin tíbasenkao je Jeobá.

13. Jósʼin kisichikontʼain Jeobá je Artiom nga nʼiojin koan kʼianga kisikjaʼaitsjenya Kjoabiyale Cristo ya yandoyá.

¹³ Ndoyá. Je ndsʼee xi ndoyá tjíoʼya xi totʼatsʼe kjoamakjainle síkjaʼaitsjenya Kjoabiyale Cristo ninga ñʼai male. Kataʼyala jmeni xi kisʼin je Artiom. Kʼianga jaʼaitsjenya Kjoabiyale Cristo nga nó 2020, ʼndí kji ndoyá jñani kinikʼéjnaʼya kʼoa sakʼoa saʼnda aon chjota nikatíoʼya. Ninga kʼoalani, kisokole jmeni xi kisichjén kʼianga kisikjaʼaitsjenya Kjoabiyale Cristo kʼoa tsakʼéjnanda je kjoanokjoaya xi tsjoá nga kʼia. Tonga je chjota xi ñatjen tsakatioʼya ndoyá, to énchi̱nga̱ nchja̱ kʼoa ñaki to na̱jno̱ kjen. Jméni xi kisʼin Artiom. Kʼoakitsole chjota jebi tsa koa̱n ninga tojngo hora nga tsín énchi̱nga̱ kuinchja̱ kʼoa nga tsín na̱jno̱ skén. Tokʼoakoanle nga kisijyo jme xi kitsole, itso je ndsʼee: “Kʼoakixinle nga xínyale jonʼia nga nikjaʼaitsjenyá je Kjoabiyale Cristo”. Ningalani kʼoakitso chjota jebi nga tsín mandosinle, tonga  nga jejetʼa, kʼiaa koanmesale tsabe jokjoantjínni xi tʼatsʼe Kjoabiyale Cristo.

14. Jméni xi kisʼin je naxinandále Jeobá nga kisikjaʼaitsjenya Kjoabiyale Cristo ningalani chʼin COVID-19 koan.

¹⁴ Chʼin COVID-19. Kʼianga kui chʼin koan, je testigole Jeobá alikui koan nga ñatjen tsakatiojtín ngatsʼi nga kisikjaʼaitsjenya je Kjoabiyale Cristo. Ninga kʼoalani, alikui kui chʼin jebi tsakʼéchjoale. g Je ndsʼee xi tjínle Internet, to videoconferencia kisichjén kʼianga tsakatiojtín. Tonga jókoanni ngatsʼi je ndsʼee xi tsínle Internet. Tjínkʼa naxinandá jñani televisión kisichjén je ndsʼee kʼoa xi radio kinrʼoénile je kjoanokjoaya xi jaʼa nga kui nichxin. Xi ijngosani, je sucursal tsʼato 500 én kisikʼatoya je kjoanokjoaya xi jaʼa nga kui nichxin ánni nga koa̱n sikjaʼaitsjenyasíni je Kjoabiyale Cristo je chjota xi kjintʼa tjío. Kʼoa tjínkʼa je ndsʼee xi kui xá kisʼin nga je kikao grabación jebi.

15. Jméni xi bakóyaná jokisʼin jngo tsoti xi sʼa tíkotʼaya Biblia xi Sue ʼmi.

¹⁵ Nga xíngiaa batiochjoaná. Nga xínkjín batiochjoale je ndsʼee kui xi ngisa  ñʼai male kʼianga síkjaʼaitsjenya Kjoabiyale Cristo. Kʼoakoan jngo tsoti xi sʼa tíkotʼaya Biblia xi Sue ʼmi. Kʼianga nó 2021, jngo nichxin tongini nga kjesa faʼaitsjenyajin Kjoabiyale Cristo, je Sue kʼoakitsole je xi tsoyale Biblia nga tsín kʼoakoa̱nle nga sikjaʼaitsjenya Kjoabiyale Cristo nga xínkjín batiochjoa. Je tichjaa xi tsoyale Biblia kui Lucas 22:44 tsakʼéxkiale, kʼoakitsole nga nʼio chjíle nga kui choa̱le Jesús mangíntjenngiaa kʼianga kjoa bitjatojiaan kʼoa nga ñaki kʼoakʼoé tokoán nga koasenkaoná je Jeobá kʼianga kʼoétsʼoalee. Nga jekoannyaonni je Sue kisikatíondaa je nioxtila kao vino kʼoa yaa jw.org kiskotsennile je texto xi maxkia nga tanjio nga faʼaitsjenya Kjoabiyale Cristo. Xijekoan, yaa cuartole tsakʼejnaʼya kʼoa yaa tjen teléfonole kinrʼoénile nga jaʼaitsjenya Kjoabiyale Cristo. Xijekoan, itso xi kiskile je tichjaa xi tsoyale Biblia: “Nʼio tsakʼainganʼionái ngojña, kasikjaʼaitsjenyaña Kjoabiyale Cristo kʼoa jé Jeobá kabasenkaona kʼoa tsjoa tjín tokoan”. Tsa kʼoati kui kjoa tibitjatojin, jósingái, a koaanle je Jeobá nga kʼoati koasenkaoli.

16. Ánni tjínjngoni tokoán nga je Jeobá sichikontʼainná nga si̱kjaʼaitsjenyá Kjoabiyale Cristo ninga ñʼai koa̱nná (Romanos 8:31, 32).

¹⁶ Je Jeobá nʼio chjí be kʼianga nikjaʼaitsjenyá je kjoabiyale ʼNdíle ninga ñʼai maná. Tjínjngoo tokoán nga sichikontʼainná je Jeobá kʼiatsa koakoá nga chjí ʼyaa jmeni xi kisʼin xi totʼatsaan (tʼexkiai Romanos 8:31, 32). h Alijme xi katabʼéchjoaná nga si̱kjaʼaitsjenyá je Kjoabiyale Cristo nó jebi. Ngisa nda si̱xálee je Jeobá tongini kʼoa nga jekjoaʼaítsjenya Kjoabiyale Cristo.