1, 2. Jmé kjoa xi bitjatojiaan xi choʼndale Jeobá maa.

 TSAKUI nichxin toxijña kjoa kjoaʼaínená kʼoa tsín tikʼoasʼin kuiyoñá josʼin tiyoaa tsakai. Kataʼyala kʼa choa̱. Ñandia nga jngo chjinexki kʼoakitsole jngo ndsʼee xi Luis ʼmi a nga cáncer tjínle kʼoa nga tochoatsesa kʼoéjnakon. Jngo tichjaa xi Monika ʼmi nda tjíosíxále tsakai je Jeobá kao xʼinle xi chjotajchínga sʼin tíjna ya jtín, tonga toxijña kisʼejinle nga jeni nkjín nó nga tíbʼanachale je xʼinle. Ijngo tichjaa xi tíjnatoje xi Olivia ʼmi kitjoo ndʼiale kʼianga kisʼejinle nga jngo huracán kjoaʼa jñani tsʼe. Kʼoa nga kicho ijngokʼani ndʼiale tsabe nga kixoya ngayeje. Ngatsʼi xi jekanikʼaxkiaa, toxijña tsʼantjaiya josʼin tjío tsakai. A sa jekʼoakoain ji.

² Tojo ma ngatsʼi chjota, xi choʼndale Jeobá maa kʼoati kjoa bitjatojiaan kʼoa sakʼoa chʼin bʼetʼaná. Xi ijngosani, kʼoati je fitjenngike sakʼoaná chjota xi jtike naxinandále Niná. Ningalani tsjoáʼnde Jeobá nga kʼoama, jé koasenkaoná tsakui kjoa kuitjátojiaan (Is. 41:10). Nga ya tjen tíjnakaoná je Jeobá tsjoa sʼe̱ tokoán, nda chjoéjiaan jmeni xi sʼiaan kʼoa koaan kixi kjuintʼalee ninga tse kjoa kuitjátojiaan. I̱ kjoaʼmiya jebi ño koya tjínni xi chótʼayajiaan tʼatsʼe josʼin basenkaoná je Jeobá tsa toxijña kjoa kjoaʼaínená. Kʼoati jchaa jmé xi machjén nga sʼiaan nga koasenkaoná.

 JÉ JEOBÁ SIKUINDANÁ

3. Jméni xi ñʼai koa̱nná kʼoasʼiaan tsa jme kjoa tibitjatojiaan.

³ Tsa tse kjoa tibitjatojiaan, tsakui nichxin ñʼai koa̱nná nga kui chjoéjiaan xi ndatjín. Kʼianga kjoa bitjatojiaan alikui nda sʼe tokoán kʼoa alikui tiʼyañá jmeni xi nʼia. Kʼoakoan nga jao tichjaa xi jenása kanikʼaxkiaa ya párrafo 1. Je Olivia itso: “Kʼianga huracán jaʼa chixoya ndʼiana, ñaki tokʼoakoanna kʼoa alikui titsaʼbeña jmeni xi kisʼian”. Kʼoa je Monika itso: “Kʼianga kisʼejinna nga tíbʼanachana je xʼinna, nʼio aon kisʼe tokoan kʼoa saʼnda tsín tikʼoakoannina nga kʼoakisʼian jmeni xi sʼian tsakai nga nyaon nyaon. Alikuikʼia kʼoasʼin kisikjaʼaitsjen tsakui kjoa jebi kjoaʼatojian”. Jósʼin basenkaoná Jeobá kʼianga tse kjoa bitjatojiaan.

4. Jósʼin koasenkaoná Jeobá tojo tso Filipenses 4:​6, 7.

⁴ Josʼin basenkaoná Jeobá. Je Biblia kʼoatso nga kui “kjoanyʼántakonle Niná” tsjoáná (tʼexkiai Filipenses 4:​6, 7). b Nga kui kjoanyʼántokonle Niná tsjoáná, kui xi tsonile nga nda sʼe tokoán kʼianga miyoná mani je Jeobá. Nijngojin chjota majinle jokjoansʼin tíjna je kjoanyʼán xi tsjoáná Niná. Tobʼelañá, kʼianga tsakʼetsʼoalai Niná nga kjoa tibitjatojin, tsakui nichxin tiji tokʼoakoannili nga nda kisʼe tokuin kʼianga jetsakʼetsʼoai. Nga kʼoasʼe tokoán kui “kjoanyʼántakonle Niná” tsjoáná.

5. Jósʼin síkuinda ni̱ma̱ná kao kjoafaʼaitsjenná je kjoanyʼán xi tsjoá Niná.

⁵ Ya Filipenses 4:​6, 7 kʼoati i̱ tso: “Je kjoanyʼántakonle Niná [ . . . ], sikuinda ni̱ma̱no kao kjoafaʼaitsjenno”. Je én xi “sikuinda” sʼin faʼatoya, kui nchja̱ni jokisʼin je sondado nichxin kjoatse nga kisikuinda naxinandá ánni nga tsín ʼya xi tsakʼetʼanile. Kʼoa je chjota xi ya tsʼe naxinandá alijme xi síkjáojin nga̱ be nga je sondado tjíosíkuinda. Kʼoatisʼinni, nga tsjoáná Niná je kjoanyʼán xi tʼatsʼe tínroani nda sʼe tokoán kʼoa alikui nokjoaan (Sal. 4:8). Ningalani tsín ndi̱to̱n tjóxinná je kjoa xi tibitjatojiaan nda sʼe tokoán tojo koan je Ana (1 Sam. 1:​16-18). Kʼoa ngisaa choa ñʼai maná nga nikjaʼaitsjeen kʼoa nga kui chjoéjiaan xi ndatjín.

6. Jmé xi machjén nga sʼiaan nga tsjoáná Jeobá je kjoanyʼánle (kʼoati chótsenlai sén xi faʼaitʼa).

 ⁶ Xi tjínnele sʼiaan. Tojo sʼín chjota nga kʼoatsole sondado nga katasíkuinda, kʼoati koa̱n kʼoakʼuínlee je Jeobá nga katasíkuindaná. Ntsjaintsjai kʼoétsʼoalee josaʼnda nga nda sʼe̱ tokoán (Luc. 11:9; 1 Tes. 5:17). Kʼianga kʼoatsakʼinle je Luis nga tochoatsesa kʼoéjnakon, ntsjaintsjai tsakʼétsʼoa kao chjoónle. Je Luis i kitso: “Nʼio ñʼai maná nga chjoejiaan josʼin koa̱nxkiná kʼoa tsa jmesani xi koa̱nchjénná kʼianga kui kjoa jebi bitjatojiaan. Tonga nga ntsjaintsjai tsakʼetsʼoaijin kui xi tsakinyakaonajin”. Nga jao ntsjaintsjai tsakʼétsʼoale Jeobá nga katatsjoále kjoanyʼán, nga nda katasatío kon kʼoa nga katatsjoále kjoachjine nga koa̱nle kui skoéjin xi ndatjín. Nga kʼoakisʼin tsakasenkao Jeobá. Tsa ñʼai tjín kjoa tibitjatojin, ntsjaintsjai tʼetsʼoai. Jé Jeobá sikuinda ni̱ma̱li kao kjoafaʼaitsjenli (Rom. 12:12).

JÉ JEOBÁ KOASENKAONÁ NGA NDA SʼE̱ TOKOÁN

7. Jósʼe tokoán kʼianga tse kjoa bitjatojiaan.

⁷ Kʼianga tse kjoa bitjatojiaan, ñʼai maná nga kui nikjaʼaitsjeen xi ndatjín kʼoa nga kʼoanʼia jonʼia tsakai ngantsjai. Alikui tinda sʼeni tokoán kʼoa alikui tinda nikjaʼaitsjenñá. Yaa mangóson joma jngo chitso nga tsín tifi kixi kixini. Kʼoakoan je tichjaa kʼianga jekʼien xʼinle. Itso: “Ñaki toʼan tijna koanna. Tonga sakʼoa kʼoati nʼio kisijtile yaona nga tsínti tíjnakonni xʼinna. Kʼoati tjín nichxin nga tsín nda sʼe tokoan, nga̱ an kʼoasʼian ndʼaibi jmeni xi sʼín Luis tsakai. Nʼio ñʼai koanna nga toʼan kʼoakisʼian”. Jósʼin basenkaoná Jeobá kʼianga kjoa bitjatojiaan kʼoa nga tsín tinda sʼeni tokoán.

8. Jósʼin koasenkaoná je Jeobá tojo tso 1 Pedro 5:10.

⁸ Josʼin basenkaoná Jeobá. Kʼoatsoná nga koasenkaoná nga nda sʼe̱ tokoán (tʼexkiai 1 Pedro 5:10). c Kʼianga jtsíntjao̱ bʼanele je chitso fijen fikjá. Nga tsín kʼoakatama, je chitso tjínle xi bʼejnanʼioni kʼoa je chjota xi ya tjíoya alikui nʼio síkjáojin. Kʼoati tjín ki̱cha̱ xi nda binyakao je chitso kʼianga tjíofi. Tikʼoasʼinni tsanda ñá, jé Jeobá koasenkaoná kʼianga kjoa kuitjátojiaan tsa tosi tonda je si̱xálee kʼoa kixi kjuintʼalee.

9. Jósʼin basenkaoná nga nda sʼe tokoán je xo̱n kao video xi bʼasje naxinandále Jeobá (kʼoati chótsenlai sén xi faʼaitʼa).

 ⁹ Xi tjínnele sʼiaan. Tsa tsín tinda tjínni tokoán machjén nga tosi tonda si̱xálee Jeobá. Tsakui nichxin tsín tikʼoakoa̱nniná nga kʼoakji si̱xálee jonʼia tsakai, tonga ʼyañá nga majinle Jeobá jokji tjen kʼoamaná (tingósonkoai Lucas 21:​1-4). Tjínnele si̱kʼayaa nichxin nga chótʼayá nga toñá kʼoa si̱kjaʼaitsjenjiaan jmeni xi kachotʼayá. Je naxinandále Niná nkjín xo̱n kao video bʼasje xi basenkaoná nga nda sʼe tokoán. Nga koa̱nsjaili jmeni xi machjénli koaan si̱chjain JW Library^®, Índice de las publicaciones Watch Tower, kao Xo̱n xi síchjén je testigole Jeobá nga jme xi básjaiya. Je Monika xi sa jená kanikʼaxkiaa, kʼoatso nga kui síchjén xo̱n jebi kʼianga tsín nda sʼe kon. Kui básjai én xi kui tínchja̱ni tʼatsʼe “kjoajti”, “kjoachʼanacha”, nga “kixi kjuintʼalee Niná”, kʼoa kui bʼéxkiaa josaʼnda nga nda sʼe kon. Itso: “Xitso xiská kjia, tonga xijemani nda sʼe tokoan, joni tsa je Jeobá tsoakjána. Nga tibʼexkia majinna nga be Jeobá jotjín tokoan kʼoa nga basenkaona”. Kʼoati koasenkaoli Jeobá nga nda sʼe̱ tokuin kʼianga kjoa bitjatojin (Sal. 119:​143, 144).

JE JEOBÁ TSJOÁNGANʼIONÁ

10. Jósʼe tokoán kʼianga kjoa bitjatojiaan.

¹⁰ Kʼianga kjoa bitjatojiaan tjín nichxin nga kʼoasʼe tokoán nga tsínná nganʼio kʼoa nga tsín tichókjoajinniná. Kʼoajin sʼe tokoán joni jngo chjota xi toka kʼoa miʼaon, nga tsín tima tokani kʼoa to chjiʼngésa sʼín. Sakʼoajin tsín tikʼoakoa̱nniná nga kʼoasʼiaan jmeni xi nʼia tsakai. Kʼoa tsínjin tikoa̱nmeniná nga kui kʼoasʼiaan jmeni xi tsjoachaa tsakai. Tojo koan Elías, tsakui nichxin tokui xi koa̱nmená nga tosi̱kjáyaa kʼoa tosójnafesa (1 Rey. 19:​5-7). Jósʼin koasenkaoná Jeobá kʼianga tsín tinda sʼeni tokoán.

11. Jmésa xi sʼín Jeobá nga basenkaoná (Salmo 94:18).

¹¹ Josʼin basenkaoná Jeobá. Je Jeobá kʼoatso nga tsjoánganʼioná (tʼexkiai Salmo 94:18). d Tojo ma kʼianga miʼaon jngo chjota xi toka, nga machjén kʼianga  tjín xi koasenkao. Kʼoati maa tsanda ñá, machjén nga je Jeobá koasenkaoná nga tosi tonda nda si̱xálee. Itsoná: “An Jeobá Nináli, an titsoanʼioa je ndsai ngakixi; an xi i̱ tixinle: Ali nokjonjin. An koasenkaole” (Is. 41:13). Kʼianga kjoa jaʼatojin je rey David kʼoa nga chjota kitjenngike tsabe nga ya tíjnakao Jeobá. Kuinga i̱ kitsonile: “Jé ndsai ngakixi basenkaona” (Sal. 18:35). Jósʼin tsjoánganʼioná Jeobá.

12. Kʼianga ba sʼe tokoán, ʼyáni xi sakʼoa síchjén Jeobá nga basenkaoná.

¹² Nga tsjoánganʼioná Jeobá nga nda sʼe tokoán sakʼoa kjaʼaí chjota síchjén. Tobʼelañá, ñandia kʼianga ba kisʼe kon je rey David, jé kichokonle Jonatán xi miyole koanni nga kisinʼio kon (1 Sam. 23:​16, 17). Kʼoa jé Eliseo kisichjén Jeobá nga tsakasenkao je Elías nga kitsjoanganʼiole (1 Rey. 19:​16, 21; 2 Rey. 2:2). Kʼoa ndʼaibi, nga koasenkaoná je Jeobá tsakui nichxin je sichjén xi tjío yaniʼyaná, je miyoná kʼoa tsa jeje̱ xi chjotajchínga sʼin tjío. Tonga kʼianga ba tjín tokoán sakʼoa tsín mená nga ʼya xi kjoakaoná. Tonga jmé xi tjínnele sʼiaan nga koasenkaoná je Jeobá.

13. Jmé xi tjínnele sʼiaan nga kuinyakaoná je xi síchjén Jeobá nga tsjoánganʼioná (kʼoati chótsenlai sén xi faʼaitʼa).

¹³ Xi tjínnele sʼiaan. Sakʼoa likui kuenta nʼia xi ngikʼa kʼoa to yaoná mangínñá, tokui nʼio nikjaʼaitsjeen je kjoa xi tjínná kʼoa kui xosíkaoná nga kui kʼoanʼia je xi tsín kixi tíjna (Prov. 18:1). Toxá machjén sakʼoani nga toñá kuiyoaa, ngisaa kʼiatsa kjoa tibitjatojiaan. Tonga tsa si̱kʼatoné choa̱le jokjitse nga toñá kuiyoaa alikuijin kʼoaiʼndelee Jeobá nga koasenkaoná. Ningalani ñʼai koa̱nná nga kʼoaiʼndee nga kuinyakaoná je xi tjío yaniʼyaná, miyoná kao xi chjotajchínga sʼin tjío. Kʼoasʼin si̱kjaʼaitsjeen nga je tjíosíchjén Jeobá nga tíbasenkaoná (Prov. 17:17; Is. 32:​1, 2).

JE JEOBÁ SINʼIO TOKOÁN

14. Jmé kjoani xi sakʼoa nʼio bijkonlee.

¹⁴ Tjínjin nichxin nga sakʼoa nʼio kuinókjoaan. Ya Biblia kʼoati faʼaitʼa kʼa choa̱ nga nʼio kitsokjon kʼa choʼndale Niná nga chjota kitjenngike kʼoa tsa jmesa kjoa xi jaʼatojin (Sal. 18:4; 55:​1, 5). Tsakui nichxin kʼoati kui kjoa tibitjatojiaan nga batiochjoaná je xi tjío ya yaniʼyaná, xi ñatjen mangián skuela, xi ñatjen nixá, kʼoa  tsa jeje̱ chjotaxá. Tsakui nichxin táo chʼin tíbʼetʼaná kʼoa tsa jekʼoatsakʼinná nga jekuiyá. Kʼianga kui kjoa bitjatojiaan tsakui nichxin kʼoasʼe tokoán josʼe kon jngo tiʼndí nga tsínle nganʼio. Jmé xi sʼín Jeobá nga basenkaoná.

15. Tojo tso ya Salmo 94:19 jósʼin basenkaoná je Jeobá.

¹⁵ Josʼin basenkaoná Jeobá. Sínʼio tokoán kʼoa basenkaoná (tʼexkiai Salmo 94:19). e Si̱kjaʼaitsjenla jokji tsokjón jngo tsotiʼndí nga jtsí bʼa kʼoa nga lʼí chʼao̱n faʼa kaoni. Tonga nga bichókonle nʼaile kʼoatsole nga tsín katatsokjón kʼoa tsoakjá josaʼnda nga sʼefe. Ninga tojo kʼoakjima jtsí kao chʼao̱n, je tsotiʼndí alikui titsokjónni nga̱ yaa tíjnakao nʼaile. Tojo sʼín jngo nʼai nga tsoakjá tsotiʼndíle josaʼnda nga nda sʼe kon. Kʼoati sʼín je Jeobá kʼianga nokjoaan, basenkaoná josaʼnda nga nda sʼe tokoán. Jméni xi sʼiaan kʼianga sinʼio tokoán je Jeobá.

16. Jmé xi tjínnele sʼiaan tsa mená sinʼio tokoán je Jeobá (kʼoati chótsenlai sén xi faʼaitʼa).

¹⁶ Xi tjínnele sʼiaan. Machjén nga ntsjaintsjai kʼoétsʼoalee je Jeobá kʼoa nga kʼoéxkiaa Énle (Sal. 77:​1, 12-14). Kʼiatsa nʼio tinikjáojiaan kjitʼanangi je Jeobá kʼoétsʼoalee. Kʼoakʼuínlee jotjín tokoán kʼoa kʼoaiʼndee nga je katabándiaaná kʼoa nga katasínʼio tokoán kʼianga kʼoéxkiaa Biblia (Sal. 119:28). Tjíokʼa choa̱ xi koasenkaoná kʼianga kui kjoa tibitjatojiaan, jolani tsakui kʼoéxkiaa libro xi tsʼe Job, Salmos, Proverbios kʼoa kao jmeni xi kitso Jesús ya capítulo 6 xi tsʼe Mateo. Kʼiatsa kʼoétsʼoalee Jeobá kʼoa kʼoéxkiaa je Énle jchañá josʼin sinʼio tokoán.

17. Jmé xi tjínnele kuenta sʼiaan.

¹⁷ Kuenta sʼiaan nga tsínkʼia tsjiónkonná je Jeobá, jé koasenkaoná ninga nʼio tse kjoa tibitjatojiaan (Sal. 23:4; 94:14). Si̱kjaʼaitsjenjiaan nga kʼoatsoná Jeobá nga sikuindaná, nga koasenkaoná nga nda sʼe tokoán, nga tsjoánganʼioná kʼoa nga sinʼio tokoán. Je Isaías i kitsole Jeobá: “Si̱kuindaní xi ñaki ji sínʼiotʼali, kʼoai ʼndeʼndelai kjoanyʼán, nga̱ ji tjíosínʼiotʼali” (Is. 26:3). Je Jeobá si̱nʼiotʼaa kʼoa kuenta sʼiaan ngayeje xi síchjén nga tsjoánganʼioná. Tsa kʼoasʼiaan, kui xi koasenkaoná nga chókjoajinná tojmeni kjoa xi kuitjátojiaan.