1. Kʼianga kui nikjaʼaitsjain jókji je Jeobá, jméni xi chaniyai jkui.

 A SA jekichaniyai jkui jókji je Jeobá. Jósʼin nikjaʼaitsjain kʼianga bʼetsʼoalai. Ningalani tsín matsen je Jeobá nkjín koya josʼin síkʼaxki̱ Biblia. Tobʼelañá, kʼoatso nga “jngoní tsʼuí kʼoa jngoní escudo” kʼoa yaa mangóson jngo “lʼí” xi síkjeson (Sal. 84:11; Heb. 12:29). Kʼianga kisakole sén je profeta Ezequiel, kʼoakitso nga je Jeobá yaa mangóson jngo la̱jao̱ xi zafiro ʼmi, xi nʼio mafate kʼoa yaa mangóson josʼin mafate je ʼya̱ (Ezeq. 1:​26-28). Tomaxkónná nga kʼoasʼin chaniyaa jkoaa xi tʼatsʼe Jeobá kʼoa tsakui nichxin nokjoaan.

2. Ánni nga ñʼai ma kʼanile nga síchriantʼale Niná.

² Nga tsín ñaki xkoaan ʼyañá jokji Jeobá, tsakui nichxin kui nikjaʼaitsjeen tsa tsjoake kjoaixiná. Tsa tsín tsjoake koanná je nʼainá kʼoa tsa tse kjoa kitjatojiaan, tsakui nichxin kʼoakuixoán nga tsínkʼia tsjoake koa̱nná Niná. Je Jeobá majinle josatío tokoán kʼoa ánni nga kʼoasʼin nikjaʼaitsjen sakʼoañá. Kʼianga koa̱njinná nga tsjoakená, yaa Biblia bakóyaná jokjoan je Jeobá.

3. Ánni nga kui chótʼayajinñá xi tʼatsʼe Jeobá kao josʼin bakóná kjoatsjoacha.

³ Je Biblia kʼoatso nga kjoatsjoacha Jeobá (1 Juan 4:8). Kui jebi xi ngisa nda bakóyaná jokjoan, nga̱ tojmeni xi sʼín kuinga kʼoasʼínni nga tsjoakená. Je Jeobá saʼnda tsjoake je chjota xi tsín tsjoake je (Mat. 5:​44, 45). I̱ kjoaʼmiya jebi kui chótʼayajiaan tʼatsʼe Jeobá kao josʼin bakóná kjoatsjoacha. Ngisaa tsjoachaa koaan kʼianga ngisa nda jchaxkoaan.

 JE JEOBÁ NʼIO TSJOAKENÁ

4. Jósʼe tokuin nga kui nikjaʼaitsjain nga nʼio tjao bená Jeobá (kʼoati chótsenlai sén xi faʼaitʼa).

⁴ “Je Jeobá nʼio tjao bená” (Sant. 5:​11, TNM). Ya Biblia kui síngósonkao Jeobá josʼín jngo na̱ xi nʼio tjao be je ʼndíle (Is. 66:​12, 13). Nga nʼio tsjoake ʼndíle, yaa xkóle síkʼéjnason kʼoa ngasin nganda fákao. Kʼianga kjiʼndá je ʼndíleele kjitʼanangi finrʼoe. Tikʼoasʼinni xi kao Jeobá, jé koasenkaoná kʼianga ba sʼe tokoán. Kuinga i̱ kitsoni jngo xi kiski salmo: “Kʼianga nʼio kisikjáojian, ji kininʼiojin tokoan kʼoa kinikinjenyʼánjin ni̱ma̱na” (Sal. 94:19).

5. Jósʼin tíjna nga bakóná xi ñaki kjoatsjoacha je Jeobá.

⁵ Kixi je Jeobá (Sal. 103:8). Je Jeobá tosi tonda tsjoake maná ninga sakʼoa tsín nda nʼia. Nkjín kʼa nga tsín kisitjoson chjota israelita jmeni xi kitsole Jeobá, tonga nga kʼoakoannile jme xi kisʼin, tosi tonda tsjoake koan. Ñandia nga i̱ kitsole naxinandále: “Nga ndasʼin tijnai ngixkoan, chjí tiʼbele kʼoa tsjoakele” (Is. 43:​4, 5). Je Jeobá alikui bʼantjaiya, kuinga tjínjngoni tokoán nga kʼoati tsjoakená tsanda ñá. Ningalani ai tíjna je jée xi kuijnyá alikui tsjiónkonná. Tosi tonda tsjoake koa̱nná tsa kʼoakoa̱nniná kʼoa tsa si̱jélee kjoanichatʼa, nga̱ tíjnandaa nga sichatʼaná (Is. 55:7). Je Biblia kʼoatso nga jé Jeobá xosʼín nga nda satío tokoán kʼianga síchatʼaná (Hech. 3:19).

6. Jmé xi bakóyaná Zacarías 2:8 xi tʼatsʼe Jeobá.

⁶ (Tʼexkiai Zacarías 2:8). a Je Jeobá kʼoatso nga ya mangósoán je tolʼíxko̱n. Nga nʼio xkón je xkoaan kʼoa nga nʼio machjénná, joxi ini tsoná je Jeobá: “Kʼianga ʼya xi josíkaono, kui tísíkiʼaon xi nʼio chjí ʼbe”. Nga tsjoakená Jeobá mandosinle josatío tokoán kʼoa kui xi mele nga koasenkaoná. Kʼianga kjoañʼai chjaʼá, kʼoati ba sʼe kon. Kuinga koa̱n i̱ kʼuínnilee: “Kʼoasʼin tikuindanái joni je tolʼíxkuin” (Sal. 17:8).

7. Ánni machjénni nga ñaki kʼoéjngoaa tokoán nga tsjoakená Jeobá.

⁷ Kui xi mele Jeobá nga ñaki sʼe̱jngo tokoán nga tsjoakená. Tonga sakʼoa kʼoasʼin  nikjaʼaitsjeen nga tsín tsjoakená kʼianga tse kjoa bitjatojiaan. Je Jeobá kʼoati majinle nga kʼoasatío sakʼoa tokoán. Kuinga machjénni nga ñaki kʼoéjngoaa tokoán nga tsjoakená. Jmé xi koa̱n sʼiaan. Koaan chótʼayajiaan jósʼin bakó Jeobá nga tsjoake je Jesús, nga tsjoake je chjotale Cristo xi ya ngʼajmi koai kʼoa nga tsjoakená ñá. Chótʼayajinla xi tʼatsʼe jebi.

JÓSʼIN BAKÓ JEOBÁ KJOATSJOACHA

8. Ánni ñaki tsakʼéjngoni kon je Jesús nga nʼio tjaole je Nʼaile.

⁸ Je Jeobá kao Jesús nʼio nkjín nó nga ñatjen tjío ya ngʼajmi, kuinga nʼio tjaonile xínkjín kʼoa tojé nga jao xi jenʼio nkjín millón nó nga ñatjen tjío. Tojo tso ya Mateo 17:​5, je Jeobá kʼoakitso nga nʼio tjaole je Jesús. Ali tsa toʼi̱jin kitso: “Jonda sʼekoan xi tʼatsʼe”. Je Jeobá kui xi mele nga jchaa nga nʼio tjaole je ʼNdíle, nga ndatjín kon xi tʼatsʼe kʼoa nga mele jchaa jmeni xi jeme sʼin. Kuinga i̱ kitsoni je Jeobá: “Jebi ʼndína xi tsjoake̱” (Efes. 1:7). Ñaki tsakʼéjngo kon je Jesús nga nʼio tjaole je Nʼaile kʼoa kjitʼa kjitʼaa kʼoakitso (Juan 3:35; 10:17; 17:24).

9. Jméni xi ningósonkao jokji tsjoake Jeobá je chjotale Cristo xi ya ngʼajmi koai (Romanos 5:5).

⁹ Je Jeobá kʼoati nʼio tjaole je chjotale Cristo xi ya ngʼajmi koai (tʼexkiai Romanos 5:5). b Jngo diccionario xi tʼatsʼe Biblia nchja̱ni xi kʼoatso nga je texto jebi yaa síngósonkao jngo xo̱ngá je kjoatsjoacha xi bakóle Jeobá je chjotale Cristo xi ya ngʼajmi koai. Kuinga kui síngósonkaoni nga nʼio tjaole. Je chjotale Cristo jebi be nga tsjoake Niná (Jud. 1). Ñaki kʼoatjío kon tojo kitso je pastro Juan, nga kitso: “Kʼoatjín kjoatjaocha xi kitsjoaná Nʼainá, jméni nga ʼndíle Niná ʼmisíniná” (1 Juan 3:1). Tonga ali tsa tojejin xi ya ngʼajmi koai xi tsjoake Jeobá, tsjoakená ngatsʼiaa.

10. Jósʼin tsakakó Jeobá nga nʼio tsjoakená.

¹⁰ Kʼianga tsakʼéchjíntjainá Jeobá kʼoasʼin tsakakóni nga nʼio tsjoakená. Alikui jme xi mangósonkao jokji kjoatsjoacha tsakakóná Jeobá (Juan 3:16; Rom. 5:8). Je Jeobá kisikasén ʼNdíle i̱ Sonʼnde kʼoa kitsjoaʼnde nga kʼienntjainá ánni nga koa̱n jchatʼani je jéená kʼoa nga koa̱n miyole koaan (1 Juan 4:10). Nga si̱kjaʼaitsjenjiaan jokji kjoama̱ tsakʼéngi je Jeobá kao Jesús nga tsakʼéchjíntjainá, ngisaa sʼe̱jngo tokoán nga nʼio tsjoakená nga jngó jngoá (Gál. 2:​20, TNM). Ali tsa tokuijin kʼoakisʼinni Jeobá nga kʼoatso kjoatéxomale nga tjínnele koa̱nchjíntjé, kuinga kʼoakisʼinni nga tsjoakená. Nʼio chjí bekon Jeobá je Jesús, tonga kitsjoaʼnde nga kjoañʼai tsakjaʼá kʼoa nga kʼienntjainá. Nga kʼoakisʼin, kʼoasʼin tsakakóni nga tsjoakená.

11. Jmé xi bakóyaná Jeremías 31:3.

¹¹ Tojosʼin tiʼyaa, je Jeobá ñaki bakó nga tsjoakená (tʼexkiai Jeremías 31:3). c Jé Jeobá xi kʼoasʼin koanmele nga naxinandále tiyojiaan (tingósonkoai Deuteronomio 7:​7, 8). Alikui ʼya kʼoa alikui jme xi kʼoechjoa nga tsjoake koa̱nná Jeobá (Rom. 8:​38, 39). Jósʼe tokuin kʼianga kui nikjaʼaitsjenjin jebi. Kataʼyala jmeni xi tso Salmo 23, kʼoa kuenta sʼiaan jokisʼe kon je David nga tsjoake koan Jeobá kʼoa jósʼin koasenkaoná tsanda ñá.

 JÓSʼE TOKUIN NGA KUI NIKJAʼAITSJAIN NGA NʼIO TSJOAKELI JEOBÁ

12. Jmé xi nchja̱ni Salmo 23.

¹² (Tʼexkiai Salmo 23:​1-6). d Tojo tso Salmo 23, je David ñaki tsakʼéjngo kon nga tsjoake koan je Jeobá kʼoa nga je kisikuinda. Kʼoakitso nga miyole koanni kʼoa i kitso: “Jé Jeobá xi koʼndana”. Alikui kitsokjon je David nga̱ be nga je Jeobá tsakándiaale kʼoa jé kisinʼiotʼa. Koanjinle nga tsjoake koa̱n Jeobá ngantsjai. Kataʼyala ánni nga nʼio kisinʼiotʼani Niná.

13. Ánni tsakʼéjngoni kon David nga je Jeobá kisikuinda.

¹³ “Alikui jme xi jchana”. Ñaki kisʼejngo kon je David nga je Jeobá kisikuinda nga̱ tsín jme xi kichale. Kʼoati koanjinle nga miyole koanni kʼoa nga nda tsakʼejna ngixko̱n, kuinga tsakʼéjngoni kon nga je Jeobá tsjoále jme xi koa̱nchjénle tojmeni xi koa̱n. Alikui jao kisʼele David nga tsjoake Jeobá kʼoa nga je sikuinda, kuinga tsín jme xi nʼio kisikjáojinni, tosaa tsjoa tsakʼé kon (Sal. 16:11).

14. Jósʼin bakóná nga tjao bená Jeobá.

¹⁴ Jé Jeobá síkuindaná ngantsjai, ngisaa kʼianga kjoa bitjatojiaan. Kataʼyala jokoan je Claire, e xi jetsʼato 20 nó nga ya Betel tísíxá. Kʼoatso nga tsín koan josʼin tsakasenkao je xínkjín kʼianga tse kjoa  jaʼatojin. Je Nʼaile chʼin kiskatʼale xokoajko̱, jngo ndichja xi tsakichonsjejin naxinandále Niná, tsakʼéchjoa je negocio xi tjínle familiale nga̱ tsínti kiskenndiaanile kʼoa je banco tsakjáʼale je ndʼiale. Jósʼin tsakakóle Jeobá nga je kisikuinda. Je Claire itso: “Jé Jeobá kitsjoale familiana ngayeje xi koanchjénle nga nyaon nyaon. Ali tokuijin tsjoáná jmeni xi machjénná, tsʼato kʼoakji tsjoáná. Kjitʼaa sikjaʼaitsjenjian jósʼin bakóna Jeobá nga tsjoakena. Kui xi basenkaona nga tosi tonda kao kjoatsjoa sixále kʼianga kjoa faʼatojian”.

15. Jósʼin kitjonganʼio ijngokʼanile je David (kʼoati chótsenlai sén xi faʼaitʼa).

¹⁵ “Tsjoánganʼiona”. Sakʼoa nʼio kisikjáojin je David kʼianga tse kjoa jaʼatojin (Sal. 18:​4-6). Xi tsakasenkao kuinga kui kisikjaʼaitsjen josʼin tsakakóle Jeobá nga tjao be. Je David miyole koanni je Jeobá kʼoa i kitso xi tʼatsʼe: “Yaa fikaona jñani kijna xkoén xkoén jñá; yaa fikaona jñani tjín nandá nga sikjáya”. Nga kui jebi kisikjaʼaitsjen je David, kitjonganʼio ijngokʼanile kʼoa tosi tonda tsjoa kisʼe kon nga kisixále Jeobá (Sal. 18:​28-32).

16. A tiʼyaní jósʼin títsjoánganʼioli je Jeobá.

¹⁶ Kʼianga kjoa bitjatojiaan kʼoati koa̱n i̱ kuixoán: “Totʼatsʼe kjoatsjoachale Jeobá nga kjesa fesonjián” (Lam. 3:22; Col. 1:11). Kataʼyala jokoan je Rachel. Nʼio aon koanle nga ki je xʼinle kʼoa nga tsín tije Jeobá kisixánile kʼianga koan chʼin COVID-19. Jósʼin tsakasenkao Jeobá je tichjaa. Itso: “Tsaʼbeña nga tjao bena je Jeobá. Nkjín mani je miyona xi jaʼaikonna, jaʼaikaona xi tsakje̱nña, kisikasénna mensaje kao textole Biblia. Tsjoa tjíole nga tsakjákaonajmína kʼoa kʼoakitsona nga je Jeobá tísíkuindana. Tsjoale kjoanda je Jeobá nga nʼio nkjín mani je ndsʼee xi binyakaoná kʼoa xi tjao bená”.

17. Ánni nga i̱ kitsoni je David: “Alikui tsokjoan tsa jme xi koa̱nna”.

¹⁷ “Alikui tsokjoan tsa jme xi koa̱nna, nga̱ yaa tjen tijnakaonái”. Nkjín chjota kitjenngike je David kʼoa nkjín kʼa nga xkón tsakʼejna. Tonga nga koanjinle nga tsjoake je Jeobá alikui kitsokjon, nga̱ ñaki kʼoatsakʼé kon nga ya tjen tíjnakao Jeobá. Kuinga i̱ kitsoni nga kise: “Jé tsakjaʼáxinna ngayeje jmeni xi kitsokjonle” (Sal. 34:4). Ningalani kitsokjon je David  nga tse kjoa jaʼatojin, tsakasenkao nga kui kisikjaʼaitsjen nga tsjoake Jeobá.

18. Kʼianga kjoa bitjatojiaan, jósʼin basenkaoná nga ʼyaa nga tjao bená je Jeobá.

¹⁸ Kʼianga tse kjoa bitjatojiaan, jósʼin basenkaoná nga kui nikjaʼaitsjeen nga tsjoakená Jeobá. Jngo tichjaa xi precursora sʼin tísíxá xi Susi ʼmi kʼoatso jokisatio kon kao xʼinle kʼianga tije kisikʼienni yaole tile. Itso: “Kʼianga kʼoama nʼio síkiʼaonná kʼoa tsín tiʼyañá jonʼia. Tonga nga kui nikjaʼaitsjainjin nga tjao bená je Jeobá kʼoa nga je síkuindaná nda satío tokuinjin”. Je Rachel, xi jesa kanikʼaxkiaa ya párrafo 16, itso: “Ñandia kʼianga nʼio ba tjín tokoan kʼoa nga titsokjoan, ñaki tikjiʼndákaoña nga tsakʼetsʼoale Jeobá. Kʼianga tibʼetsʼoa, tsaʼbeña josʼin tsakasenkaona Jeobá, tojo sʼín jngo na̱ nga báyandsome je ʼndíleele. Kʼoa xijekoan, koaan tsakajnafe. Alikuikʼia sichajian josʼin tsakasenkaona Jeobá nga kʼia”. Jngo xi chjotajchínga sʼin tíjna xi Tasos ʼmi, ño nó nga ndoyá tsakʼejnaʼya xi totʼatsʼe nga tsín koanmele sondado koan. Je ndsʼee kʼoatso josʼin tsakasenkao Jeobá. Itso: “Tsʼato kʼoakji kitsjoana Jeobá jmeni xi koanchjénna kʼoa ngisaa koannʼiotʼa. Kui nganʼiotsjele tsakasenkaona nga tsjoa kisʼe tokoan ningalani ndoyá tijnaʼya. Koanjinna nga ngisasa nda skoe josʼin bakóna Jeobá nga tjao bena kʼiatsa tosi tonda je sinʼiotʼa. Kuinga precursor regular sʼin kisixáña kʼianga ndoyá tijnaʼya”.

SI̱CHRIANTʼALEE JE NINÁNÁ

19. 1) Jméni xi koa̱n kʼuínlee je Jeobá nga kʼoétsʼoalee kʼianga ʼyaa nga tsjoakená. 2) Jmé textoni xi kui nchja̱ni nga tsjoakená je Jeobá xi ngisa basenkaoli (chótsenlai je recuadro “ Texto xi kʼoatso nga tsjoakená Jeobá”).

¹⁹ Jmeni xi kaʼyaa kui bakóná nga Niná “xi tsʼe kjoatjaocha” je Jeobá (2 Cor. 13:11). Mandosinle xi tʼatsaan nga jngó jngoá. Tjínjngoo tokoán nga bakóná “xi ñaki kjoatsjoacha” (Sal. 32:10). Kʼianga si̱kjaʼaitsjenjiaan josʼin bakóná nga tsjoakená, ngisasa nda jchaa josʼin síkuindaná kʼoa ngisaa koa̱nchriantʼalee. Kuinga koa̱n kʼoétsʼoanilee kʼoa kʼoakʼuínlee nga tosi tonda katabakóná kjoatsjoacha. Koaan kʼoéyanajmílee tojmeni xi makjáojinná, nga̱ majinle josʼe tokoán kʼoa mele koasenkaoná (Sal. 145:​18, 19).

20. Jósʼin machriantʼalee Jeobá kʼianga ʼyaa nga tsjoakená.

²⁰ Nga tsjoakená je Jeobá yaa mangóson tojo ma je lʼí nga sísoná kʼianga nyʼán chon. Basenkaoná kʼianga kjoa bitjatojiaan, tsjoánganʼioná kʼoa nda satío tokoán. Kuinga koa̱n i̱ kuixónñá ngatsʼiaa: “Tsjoake̱ña je Jeobá” (Sal. 116:1).