1. Jósʼín ndʼaibi je chjota.

 NICHXIN xi tiyoaa ndʼaibi to yaole fini chjota. Tjínkʼa xi kui redes sociales síchjén nga katabe chjota jmeni xi sʼín. Kʼoa tokʼaa chjota xi je Jeobá bʼasjengʼa. I̱ kjoaʼmiya jebi kui chótʼayajiaan jósʼin tíjna nga chʼasjengʼaa Jeobá kʼoa ánni nga chʼasjengʼañá. Kʼoati kui chótʼayajiaan jósʼiaan nga chʼa̱sjengʼaa kʼoa jósʼin kʼoasjejeya jaʼaínle nichxin xi nroa.

JÓSʼIN TÍJNA NGA CHʼASJENGʼAA JEOBÁ

 2. Jósʼin tsakakó Jeobá ya nindo Sinaí jokji jeya tíjna (kʼoati chótsenlai sén xi faʼaitʼa ya portada).

² Ya Biblia kʼoatso nga nʼio jeya tíjna Jeobá. Kʼianga tosʼa choa nichxin jaʼato nga kisikatíondái je chjota israelita, je Jeobá tsakakó jokji jeya tíjna. Si̱kjaʼaitsjenla jokoan kʼianga millón mani chjota israelita tsakatiojtín ya nindo Sinaí nga kinrʼoé jmeni xi kitsole Jeobá. Kisʼejna njio njio yojbi, chʼao̱n jane kʼoa nʼio jane kʼoa ñaki koanfate lʼíle ya jinniʼndi̱ xi kitjo jñani séjna je nindo kʼoa jo ninda koan xi jane (Éx. 19:​16-18; 24:17; Sal. 68:8). Ñaki tokʼoajin koanle chjota israelita nga tsabe jokji jeya tíjna Jeobá.

 3. Jósʼin tíjna nga chʼasjengʼaa Jeobá.

³ Kʼoati koa̱n chʼa̱sjengʼaa tsanda ñá je Jeobá. Koaan kui chja̱kaonajmíñá chjota jokjoan kʼoa jokji nganʼio tjínle. Kʼoati je Jeobá chʼasjengʼaa kʼianga tsín to yaoná mangínñá, nga̱ jé basenkaoná nga bitjosonná jmeni xi  nʼia (Is. 26:12). Nda choa̱ tsakʼéjnaná je rey David josʼin tsakʼasjengʼa Jeobá. Ñandia nga i̱ kitso kʼianga tsakʼétsʼoa ngixko̱n chjota israelita: “Ji Jeobá, tsiní je kjoajeya kao nganʼio, kao xi nʼio naskátjín, nʼio ngʼa tijnai kʼoa nʼio jeya tijnai, nga̱ tsiní ngayeje jmeni xi tjín sonʼnde kao ngʼajmi”. Kʼianga jetsakʼétsʼoa, tsakʼasjengʼa Jeobá ngatsʼi chjota israelita (1 Crón. 29:​11, 20).

 4. Jósʼin tsakʼasjengʼa Jesús je Jeobá.

⁴ Kʼianga jaʼai Jesús i̱ Sonʼnde nkjín koya tjínni josʼin tsakʼasjengʼa Jeobá. Kʼianga tsakatío kjoaxkón kʼoakitso nga je Jeobá kitsjoale nganʼio (Mar. 5:​18-20). Kʼoati je Jeobá tsakʼasjengʼa kʼianga kitsoya kʼoa josʼin tsabekon chjota. Ñandia kʼianga títsoya ya yo̱ngo̱, jngo ʼndíchjoón tsabe xi jexjaʼaonjan nó nga sénnichxin xi chʼaokjoan tíjnajinle. To findsitinsa kʼoa tsee kjoañʼai tífaʼá. Je Jesús koanmake kʼoa kʼoakitsole nga koanndayani. Xijekoan, je Jesús tsakáne ntsja kʼoa koankixi yátsʼi̱n ʼndíchjoón jebi. Kʼianga jekoanndaya tsakʼasjengʼa Niná (Luc. 13:​10-13). Jé Jeobá tsakʼasjengʼa ʼndíchjoón jebi nga jekoanndaya kʼoa nga nda kisʼeni kon. Kʼoa ñá, kʼoati nkjín koya tjínni anni nga chʼasjengʼañá je Jeobá.

ÁNNI NGA CHʼASJENGʼAÑÁ JEOBÁ

 5. Ánni nga ʼyaxkónñá Jeobá.

⁵ Chʼasjengʼañá je Jeobá nga̱ ʼyaxkónñá. Nkjín koya tjínni anni nga ʼyaxkónñá Jeobá. Nʼio tse nganʼio tjínle kʼoa alikʼia bijtale (Sal. 96:​4-7). Jmeni xi kisinda yaa bakóná nga nʼio chjine. Jé títsjoáná kjoabijnachon kʼoa jé tsjoáná jmeni xi machjénná (Apoc. 4:11). Kixi je Niná (Apoc. 15:4). Nda bichómani ngayeje jmeni xi sʼín kʼoa sítjoson ngantsjai jmeni xi tso (Jos. 23:14). Je profeta Jeremías i kitso xi tʼatsʼe Niná: “Jotjín mani ngatsʼi chjota xi chjine xi tjín ngakjijnda naxinandá, niʼyajinla xi mangóson xi kao ji” (Jer. 10:​6, 7). Nʼio nkjín koya tjínni anni nga ʼyaxkónñá Jeobá. Tonga ali tsa toʼyaxkónjián, kʼoati tsjoachaa.

 6. Ánni nga tsjoachañá je Jeobá.

⁶ Chʼasjengʼañá je Jeobá nga̱ tsjoachañá. Kuinga tsjoachañá nga̱ ʼyañá jokjoan. Tobʼelañá, bakóná kjoamatokon (Sal. 103:13; Is. 49:15). Majinle josatío tokoán kʼianga kjoañʼai chjaʼá kʼoa kʼoati aon male (Zac. 2:8). Kui xi mele nga si̱chriantʼalee kʼoa si̱miyoaa, kʼoa tijé basenkaoniná nga kʼoanʼia (Sal. 25:14; Hech. 17:27). Nangitokon Jeobá, “fajteen nga kotsenle ngʼajmi kao sonʼnde, kʼoa kjomitjeen je xi nangitokon” (Sal. 113:​6, 7). Kuinga chʼasjengʼañá Jeobá nga nda chjota (Sal. 86:12).

 7. Jméni xi sʼiaan nga ʼyaa jokjoantjínni xi tʼatsʼe Niná.

⁷ Chʼasjengʼañá je Jeobá nga̱ kui xi mená nga katabe chjota xi tʼatsʼe. Nkjín chjota xi tsín majinle jokjoantjínni tʼatsʼe Niná, nga̱ je Na̱i énndiso kaníbason xi tʼatsʼe kʼoa bʼéchjoangi kjoafaʼaitsjenle chjota (2 Cor. 4:4). Makjainle chjota je énndiso xi kaníbason Na̱i kʼianga kʼoatso nga tsín mandosinle Niná xi tʼatsaan kʼoa nga je tjínle jée jmeni xi maná. Tonga ñá ʼyañá jokjoantjínni xi tʼatsʼe Niná, kʼoa kʼoasʼin chʼasjengʼañá kʼianga ʼmiyalee chjota jokjoantjínni  xi tʼatsʼe (Is. 43:10). Ya Salmo 96 kui nchja̱ni nga bakinle kuitjongʼa Jeobá. Kʼianga chótʼayajiaan salmo jebi jchañá jméni xi sʼiaan nga chʼa̱sjengʼaa Niná.

JMÉ XI SʼIAAN NGA CHʼA̱SJENGʼAA JEOBÁ

 8. Jméni xi sʼiaan nga chʼa̱sjengʼaa Jeobá (Salmo 96:​1-3).

⁸ (Tʼexkiai Salmo 96:​1-3). a Kʼoasʼin chʼasjengʼañá Jeobá kao jmeni xi bixoán xi tʼatsʼe. Je texto jebi itso én xi síkʼaxki̱ “tijndálao Jeobá”, “tichikontʼaon jaʼaínle”, “tinókjoayao je én xi nda tso” kʼoa “tʼeyanajmílao ngatsʼi jme xi kisinda Niná”. Kʼiatsa kʼoasʼiaan jotso texto jebi kʼoasʼin tichʼasjengʼañá je Jeobá. Je chjota judío xi kixi kitʼale Niná kao chjotale Cristo xi tsakatio nga siglo 1, tojñani kisatejin chjota kitsoyale jokjoantjínni xi tʼatsʼe Niná kʼoa josʼin tsakinyakao (Dan. 3:​16-18; Hech. 4:29). Jósʼiaan nga chjénngilee jokisʼin.

9, 10. Jmé xi bakóyaná jokisʼin Angelina (kʼoati chótsenlai sén xi faʼaitʼa).

⁹ Kataʼyala jokisʼin jngo tichjaa xi Angelina ʼmi, b xi Estados Unidos tsʼe. Tichjaa jebi nʼiojin koan kʼoa kitsoyale xi ñatjen síxá jokjoantjínni xi tʼatsʼe Jeobá. Kʼoatsakʼinle ngatsʼi xi tokʼia jaʼasʼen nga katabʼéyanajmí xi tʼatsʼe ánni nga skoe̱xkonsíni xi ngikʼa. Je tichjaa foto tsakakó nga kʼoakitso nga testigole Jeobá ma. Tonga nga kjesa bʼakaojinle nga kuinchja̱ je tichjaa, je chjota xi kʼoati ya sixá kʼoakitso nga testigole Jeobá ma je xijchále, tonga to tsabesin josʼin makjainle je testigole Jeobá. Je Angelina itso: “Kitsokjonña nga kʼoakitso. Tonga kʼoati kisikjaʼaitsjen: A totsjoaʼndeña nga énndiso tíbané Jeobá axo kʼoaxián jokjoantjínni xi tʼatsʼe”.

¹⁰ Kʼianga jekinchja̱ je chjota xi totsabesin je testigole Jeobá, je Angelina tsakʼétsʼoale Jeobá kʼoa i kitsole je chjota xi ya tjío: “Kʼoati testigole Jeobá ma tsanda an saʼnda nga sʼa ʼndía”. Ningalani  tsín kisasenle je chjota, je Angelina ngasin nganda kitsoya. Tsakakó kʼa foto jñani tjíotʼa kao xti miyole nga tjíosíxále Niná kʼoa kitsoyaa josʼin makjainle (1 Ped. 3:15). Nga jekoan, je chjota xi totsabesin tsakai je testigole Jeobá kʼoakitso nga kʼoati faʼaitsjenle jmeni xi kisʼin nga sʼa koanjchínga nga testigole Jeobá xijchále. Je Angelina itso: “Machjén nga kuinókjoantjé Jeobá”. Kʼoati tse kjoanda tjínná tsanda ñá nga chʼasjejeyaa Jeobá kʼoa nga nokjoantjé kʼianga ʼya xi chʼaosʼin síkʼaxki̱.

11. Jokji tífaʼato nichxin, jósʼin tjíofitjenngi choʼndale Jeobá jmeni xi tso Salmo 96:8.

¹¹ (Tʼexkiai Salmo 96:8). c Kʼoasʼin chʼasjengʼañá Jeobá kʼianga bʼailee jmeni xi tjínná. Xi choʼndale maa bʼailee Jeobá jmeni xi tjínná (Prov. 3:9). Je chjota israelita kitsjoaa tao̱n kao jmesani xi koanchjén kʼianga kisʼenda yo̱ngo̱ kʼoa nga kisʼendaya (2 Rey. 12:​4, 5; 1 Crón. 29:​3-9). Tjínkʼa chjotale Cristo xi kitsjoa jmeni xi tjínle nga tsakinyakao je Jesús kao pastrole (Luc. 8:​1-3). Je chjotale Cristo xi tsakatio nga siglo 1 kitsjoale jmeni xi koanchjénle ndsʼe̱ kʼianga kjinrá koan (Hech. 11:​27-29). Nichxin xi tiyoaa ndʼai kʼoasʼin chʼasjengʼañá Jeobá kʼianga nikatioá tao̱n.

12. Jósʼin chʼasjengʼañá Jeobá kʼianga batioá tao̱n (kʼoati chótsenlai sén xi faʼaitʼa).

¹² Kataʼyala jngo choa̱ xi bakó nga je Jeobá chʼasjengʼaa kʼianga bʼé tao̱n. Kʼianga nó 2020 tsee nga tsín titsakʼani jtsí kʼoa tsínti koanjcháni tsojmintje ya Zimbabue. Nga kʼoakoan, millón chjota xi nʼio ñʼai koanle nga kisokole jme xi kiskine. Ningalani kʼoakoan, je tichjaa xi Prisca ʼmi ntsjaintsjai kitsoyason nga mixkue kao nga bixine, ninga kʼia nga kicho cha̱nle nga sixá nangile. Kʼoa je chjotandaindʼiale totsabesin nga kʼoatísʼín ʼndele nga nangile sixá. I kitsole: “To kjinrájin kuiyái nga kʼoatinʼiai”. Tonga je tichjaa i kitsole: “Je Jeobá alikʼia tsjionkon choʼndale”. Je naxinandále Niná kisikasénle tichjaa jmeni xi kiskine kʼoa jmeni xi koanchjénle. Nga batioá tao̱n kʼoasʼin  binyakaoñá je ndsʼee xi tjío jngo tjíjtsa sonʼnde. Tjínkʼa je chjotandaindʼiale xi tokʼoakoanle kʼoa i kitsole: “Basenkaoli ngantsjai je Niná. Kʼoati menajin jchaijin xi tʼatsʼe”. Ñato koanni chjota xi ki kjoajtín.

13. Tojo tso Salmo 96:​9, jméni xi sʼiaan nga chʼa̱sjengʼaa Jeobá.

¹³ (Tʼexkiai Salmo 96:9). d Kʼoasʼin chʼasjengʼañá Jeobá kʼianga nda nʼia. Tjínnele nʼio tsje kisʼin je naʼmi kʼianga ya kisixá ya yo̱ngo̱le Jeobá kao ya ndʼianajño (Éx. 40:​30-32). Kʼoati tsje nʼia tsanda ñá, kʼoa xi ngisa chjíle kuinga nda nʼia ngixko̱n Jeobá (Sal. 24:​3, 4; 1 Ped. 1:​15, 16). Bʼenelee yaoná nga kui kʼoanʼia jmeni xi sasénle, kʼoa tsín tikui kʼoanʼiañá jmeni xi chʼaotjín kinʼia ngasʼa. Kʼoasʼin si̱kjaʼaitsjeen josʼin síkjaʼaitsjen Jeobá kʼoa chjenngilee jokjoan (Col. 3:​9, 10). Jé Niná basenkao chjota nga síndaya yaole, ninga nʼio chʼao kisʼin ngasʼa kʼoa ninga nʼio tsʼen koan.

14. Jmé xi bakóyaná je choa̱le Jack (kʼoati chótsenlai sén xi faʼaitʼa).

¹⁴ Kataʼyala jokoan jngo chjota xi ndoyá tsakʼejnaʼya, xi Jack ʼmi, sénnichxin xi chʼaokjoan sʼin tsakʼaijaʼaínle nga̱ nʼio tsʼen koan kʼoa nʼio chʼao kisʼin. Nga tse jée tsakajngi kʼoatsakʼinle nga ni̱kʼien. Tonga nga kjesa nikʼienjin kiskotʼaya Biblia ya yandoyá. Ningalani nʼio chʼao kisʼin je Jack ngasʼa, kʼianga jetsabe jotso Énle Niná kisindayaa yaole kʼoa kisʼenngindá nga jekoanni. Saʼnda je chjota xi síkuinda ndoyá kiskiʼndá kʼianga to jeni̱kʼien Jack. Jngo xi i̱ kitso: “Jé Jack xi ngisasa nʼio tsʼen koan ngasʼa, tonga ndʼaibi jé xi ngisa ndasʼín”. Kʼianga jejngo xomana jaʼato nga kinikʼien, kichongáni ndsʼee nga kichokʼéjna kjoajtín ya yandoyá kʼoa jngo chjota kicho xi kʼoati ya tíjna. Kuinga nga ya kichoni nga tsabe josʼin kisindaya yaole je Jack kʼoa kʼoati koanmele tsabe jméni xi sʼin nga je Jeobá sixále. Jebi kui bakóyaná nga je Jeobá bitjongʼa kʼianga nda nʼia (1 Ped. 2:12).

 JÓSʼIN KʼOASJEJEYA JAʼAÍNLE JEOBÁ NICHXIN XI NROAJÁN

15. Jméni xi sʼin Jeobá nichxin xi nroaján nga kʼoasjejeya jaʼaínle (Salmo 96:​10-13).

¹⁵ (Tʼexkiai Salmo 96:​10-13). e Ya Salmo 96 kʼoatso nga je Jeobá jngoo Rey xi ñaki kixi josʼin bʼendajin kjoa. Kʼoa nichxin xi machrianle kʼiaa kʼoasjengʼa jaʼaínle kʼianga kʼoendajinle kjoa je chjota. Tojeme sikjeson Jeobá je Babilonia xi nʼioje nga chʼaosʼin tíbʼasje jaʼaínle (Apoc. 17:​5, 16; 19:​1, 2). Tjínjinkʼa xi kʼia koanmele skoe̱xkón Jeobá kʼianga skoe̱ nga ni̱kjeson ngatsʼi religión ndiso. Kʼoa xi jekjoaʼato Armagedón kʼiaa sikjeson Jeobá ngayeje jmeni xi chonle je Na̱i. Sikjeson ngatsʼi xi jtike kʼoa xi chʼaosʼin bʼasje jaʼaínle, tonga kʼoasjentjai ngatsʼi xi tsjoake, xi sítjosonle kʼoa xi nʼio tsjoa tjío kon nga bʼasjengʼa Niná (Mar. 8:38; 2 Tes. 1:​6-10). Kʼianga jekjoaʼato xi jngo jmi nó koatexoma Cristo, kʼianga jechótʼayakao ngatsʼi chjota xi to fetʼani, kʼiaa tondiaa kuitjotsje je jaʼaínle Jeobá (Apoc. 20:​7-10). Nga kui nichxin tojé Jeobá kuitjojeya jngo tjíjtsa Sonʼnde (Hab. 2:14).

16. Jméni xi meli sʼiain (kʼoati chótsenlai sén xi faʼaitʼa).

¹⁶ Nʼiojin ndasʼin kuiyoaa kʼianga toje Jeobá kʼoasjengʼa ngatsʼi chjota. Nga kjesa kʼoamajin tosi tonda kjoásjailee josʼin chʼa̱sjengʼaa Niná. Kʼoa nga nʼio tjínle kjoandosin jebi, kuinga kui Salmo 96:8 kiskoejinni Cuerpo Gobernante xi tsʼe nó 2025, jñani tso: “Chʼa̱sjengʼao jaʼaínle Jeobá josʼin bakinle”.