KJOAʼMIYA XI CHOTʼAYA 2
KJOAJNDA 132 Jetojngo yao mañá ndʼaibi
Jchaxkón je yánchjínno
“Jon, xi xʼion [ . . . ]. Jchachjotao yánchjínno” (1 PED. 3:7).
XI TÍNCHJA̱NI
I̱ kjoaʼmiya jebi kui chótʼayajiaan jméni xi tjínnele sʼin je xi xʼin kʼoa jótso én sichjén nga skoe̱xkón chjoónle.
1. Jmé xá kitsjoani Jeobá je kjoabixan.
JE Jeobá tsjoa tjín kon kʼoa kui xi mele nga kʼoati tsjoa katasatío tokoán tsanda ñá (1 Tim. 1:11). Nkjín koya jmeni xi tsjoáná nga ndasʼin biyoaa (Sant. 1:17). Jolani je kjoabixan. Kʼianga bixankao xínkjín jngo chjoón kao jngo xʼin, kʼoatso nga tsjoake koa̱n xínkjín, nga skoe̱xkónngañá xínkjín kʼoa nga sikuinda. Kʼianga kʼoasʼín je xi bixan nda batiokao xínkjín (Prov. 5:18).
2. Jósʼin tjíokao kʼa xínkjín xi jechixan.
2 Nkjín xi tsínni sítjoson jmeni xi tsole xínkjín kʼianga bixan kʼoa tsínni tsjoa satío kon. Je Organización Mundial de la Salud kʼoatso nga tjínkʼa chjota xi totaon be yánchjínle, xi toxkia fákao kʼoa síkiʼaon kjoafaʼaitsjenle. Tsakui nichxin nda síkao xínkjín ya jinle chjota tonga tsa totaonni be xínkjín kʼianga toje tjío. Kʼoati nkjín xi tsín nda batiokao xínkjín nga pornografía kotsenle je xi xʼin.
3. Ánni nga totaon beni chjota je yánchjínle.
3 Nkjín chjota xi totaon be yánchjínle. Tsakui nichxin kui kʼoasʼínni nga kʼoakisʼin xijchále kʼoa kʼoasʼin síkjaʼaitsjen nga tsín chʼaotjín nga kʼoanʼia. Tjín ʼnde jñani kʼoasʼin ngale chjota nga je xi xʼin batéxoma ya yaniʼyale. Tsakui nichxin tjíokʼa xi tokitjoʼndele nga sʼa koanjchínga nga yaole kisijtile kʼoa kuinga tsín manile kjoéxkó yaole ndʼaibi. Kʼoati tjín xi pornografía kotsenle kʼoa yaa nroani nga tsínti bechjíni yánchjínle. Je chjota xi kui kotʼayason xi tʼatsʼe jebi kʼoatso nga totaon tsabe yánchjínle chjota nga koan chʼin COVID-19 kʼoa ngisaa tikjimangáni ndʼaibi. Tonga alikui koa̱n nga totjín totjen xi kʼoangini je xi xʼin nga totaon skoe̱ chjoónle.
4. Jméni xi tjínnele sikuindale yaole je chjotale Cristo, kʼoa ánni.
4 Je chjotale Cristo tjínnele sikuindale yaole nga tsín kʼoatisʼin sikjaʼaitsjen josʼin síkjaʼaitsjen chjota xi tʼatsʼe yánchjín. a Ánni. Kuinga tokui fini chjota josʼin síkjaʼaitsjen kʼoa kui kʼoasʼín jotjío kon. Je Pablo i kitsole chjotale Cristo xi Roma tsʼe, xi ya ngʼajmi koatexomakao Jesús: “Ali kʼoajinsʼin mangínkao yaono jo tjín kjoa sonʼndebi” (Rom. 12:1, 2). Kuinga kʼoakitsonile Pablo nga̱ tjíokʼa xi tojo kʼoatjíosʼín josʼín je chjota xi tsín be Énle Niná. Kʼoakitsole nga tjínnele sikʼantjaiya yaole kao josʼin síkjaʼaitsjen. Nichxin xi tiyoaa ndʼaibi kʼoati machjénle kjoafaʼaitsjen jebi xi jechixan. Tjínkʼa chjotale Cristo xi kʼoati sʼín josʼín je chjota xi tsín kotʼaya Énle Niná kʼoa totaon be yánchjínle. Tonga jósʼin mele Jeobá nga skoe̱kon yánchjínle je xi xʼin. b Yaa tsoyaná xi tʼatsʼe jebi jmeni xi tso je texto xi yʼangini kjoaʼmiya jebi.
5. Tojo tso 1 Pedro 3:7, jósʼin tjínnele skoe̱kon je chjoónle xi xʼin.
5 (Tʼexkiai 1 Pedro 3:7). c Kui xi mele Jeobá nga skoe̱xkón chjoónle je xi xʼin. Je chjota xi bexkón chjoónle kʼoasʼin bakóni nga nda síkao kʼoa nga tsjoake. I̱ kjoaʼmiya jebi kui chótʼayajin kʼa jméni xi tjínnele sʼin je xi xʼin nga skoe̱xkón chjoónle. Tonga kuila títjon kataʼyaa jmeni xi tsín tjínnele kʼoasʼin.
ALIKUIJIN KʼOANʼIAO JMENI XI SIKIʼAON JE YÁNCHJÍNNO
6. Jósʼin bekon Jeobá je chjota xi totaon be yánchjínle (Colosenses 3:19).
6 Ali totaonjin ʼyai chjoónli. Je Jeobá jtike chjota xi tsʼen (Sal. 11:5). Kʼoa tsín sasénle nga totaon be yánchjínle xi jechixan (Mal. 2:16; tʼexkiai Colosenses 3:19 d). Tojo tso ya 1 Pedro 3:7, je texto xi yʼangini kjoaʼmiya jebi, alikui nda bʼejna ngixko̱n Jeobá jngo chjota xi totaon be chjoónle kʼoa tsakui nichxin tsín kjuinrʼoé Niná kʼianga kʼoetsʼoale.
7. Tojo tso Efesios 4:31, 32, jméni xi tsín tjínnele sʼin xi jechixan (kʼoati chótsenlai jñani tso “Jósʼin tsoyanile”).
7 Ali nokjoatikaojin je chjoónli. Tjínkʼa chjota xi toxkia fákao yánchjínle kʼianga jtile, kʼoa jmeni xi tso síkiʼaon kjoafaʼaitsjenle yánchjínle. Je Jeobá jtike “kjoajti, kjoajticha, xi nʼio nchja̱ti, kao xi nchja̱ʼaon” e (tʼexkiai Efesios 4:31, 32). f Je Jeobá nrʼoe kʼoa kuenta sʼín josʼin bekon chjoónle je xi xʼin, ninga kʼia nga toje tjío ya yaniʼyale. Je chjota xi totaon be chjoónle kʼoa xi toxkia fákao alikui ndasʼin batiokao xínkjín kʼoa kʼoati tsín ndasʼin batio ngixko̱n Niná (Sant. 1:26).
8. Jósʼin síkjaʼaitsjen Jeobá nga pornografía kotsenle chjota, kʼoa ánni.
8 Ali pornografíajin chotsenlai. Je Jeobá jtikee pornografía. Je xi kui kotsenle xi chʼaotjín alikui tinda bationi ngixko̱n Jeobá, alikui tibexkónni chjoónle kʼoa nangi síkʼéjna nga kʼoasʼín. g Kui xi mele Jeobá nga tsín katabʼanachale chjoónle je xi xʼin, tonga tsakui skaniya jko̱ xi chʼaotjín jeni tíbʼanachale ya jinkjoafaʼaitsjenle. Je Jesús kʼoakitso kʼiatsa jngo chjota xi jngo chjoón tíkotsenle nga mele koájnakao joxi jeni tísíchajngi ya jinni̱ma̱le (Mat. 5:28, 29). h
9. Ánni nga tsín sasénnile Jeobá nga kjoanʼio sʼínle chjoónle je xi xʼin nga kui kʼoakatasʼín jmeni xi tsín mele.
9 Ali kjoanʼiojin nʼialai chjoónli nga kui kʼoakatasʼín jmeni xi tsín mele. Tjínkʼa chjota xi kjoanʼio sʼínle yánchjínle nga fayokao ninga tsín mele. Nga kʼoamatʼain je xi chjoón chʼao sʼe kon kʼoa kʼoasʼin síkjaʼaitsjen nga tíʼyataon. Je Jeobá likui sasénle nga kʼoasʼín je chjota, tosaa kui xi mele nga tsjoake katama chjoónle xi xʼin, nga kuenta katasʼín jotjín kon kʼoa josʼin síkjaʼaitsjen (Efes. 5:28, 29). Jmé xi tjínnele sʼin je ndsʼee xi jechixan kʼiatsa kui kʼoatísʼín jmeni xi tiʼyaa i̱bi. Jmé xi koa̱n sʼin nga sindaya yaole kʼoa josʼin síkjaʼaitsjen.
JMÉNI XI TJÍNNELE SʼIN JE XI XʼIN NGA SKOE̱XKÓN JE CHJOÓNLE
10. Jósʼin koa̱n skénngi choa̱le Jesús je xi xʼin.
10 Tjínnele kui choa̱le Jesús koaitjenngi je ndsʼee nga tsín tikui kʼoasʼinni xi nangi sikʼéjna chjoónle kʼoa xi chʼao kʼoe kon. Ningalani tsín chixan Jesús, tonga josʼin tsabekon chjotatjenngile nʼio nda choa̱ bʼéjnale je ndsʼee xi jechixan (Efes. 5:25). Kataʼyala jósʼin koa̱n skénngi xi xʼin je choa̱le Jesús josʼin tsakjákao je chjotatjenngile kʼoa josʼin tsabekon.
11. Jósʼin tsabekon Jesús je chjotatjenngile.
11 Je Jesús tjao koanle chjotatjenngile, alikui toxkia tsakjákao kʼoa tsabexkón. Ningalani tse nganʼio kisʼele Jesús alikui totaon tsabe chjotatjenngile, tosaa nangitokon koan kʼoa tsakasenkao (Juan 13:12-17). I kitsole: “Chótʼayao xi tsʼan, nga ndʼénía, kʼoa yo̱ma̱ kjiakoan. Kʼoa sa̱kóno kjoanikjáya xi tʼatsʼe ni̱ma̱no” (Mat. 11:28-30). Jngo chjota xi ndʼé male kjoéxkó yaole kʼoa tsín tokui fini josʼe kon.
12. Jótso én xi kisichjén Jesús nga tsakjákao chjota.
12 Je Jesús nda tso én tsakjákao chjota kʼoa nda kisatio kon je xi kinrʼoéle. Alikuikʼia kiskankao je chjotatjenngile (Luc. 8:47, 48). Kʼianga kinokjoaʼaonle alikui yaole kisijtile kʼoa tsín kisijndangajaoni (1 Ped. 2:21-23). Sakʼoa tojyó tsakʼejna kʼianga jme xi tsakʼinle (Mat. 27:12-14). Je Jesús nʼio nda choa̱ tsakʼéjnale je ndsʼee xi jechixan.
13. Jósʼin koakoni xi xʼin nga tjaole chjoónle (Mateo 19:4-6; kʼoati chótsenlai sén xi faʼaitʼa).
13 Je Jesús kʼoakitso nga tsín koa̱n kʼoanachale chjoónle xi jechixan. Kʼoati kui én kisikʼaxki̱ jokitso je Nʼaile nga i̱ kitso: “Tojngo kʼoéjnakao chjoónle, kʼoa tokoa̱njngoni yaole” (tʼexkiai Mateo 19:4-6). i Kʼianga “tokoa̱njngoni yaole” tso kui nchja̱ni nga nʼio tsjentʼale xínkjín xi jechixan. Tsa jngo xi kjoañʼai kjoaʼa kʼoati faʼá kjoañʼai xi ijngo. Je xi tsjoake chjoónle alikuijin kui kʼoasʼin jmeni xi chʼao kʼoe kon chjoónle kʼoa tsínjin pornografía skótsenle (Sal. 119:37). Kʼoajin tisʼin jokisʼin je Job nga tsín kjaʼaí yánchjín kisimekon (Job 31:1).
Je chjota xi tsjoake chjoónle alikui bʼanachale kʼoa tsín pornografía kotsenle (Chótsenlai párrafo 13) k
14. Jótjínnele sʼin je xi xʼin nga nda kʼoéjna ijngokʼani ngixko̱n Jeobá kʼoa nga nda kʼoéjna ijngokʼani kao chjoónle.
14 Tsa ʼyani xi totaon be chjoónle kʼoa xi toxkia fákao, jaon koya tjínni xi koa̱n kʼoasʼin tsa mele nga nda kʼoéjna ijngokʼani ngixko̱n Jeobá kʼoa nga nda kʼoéjna ijngokʼani kao chjoónle. Xi títjon, tjínnele koa̱njinle nga tsín nda tísʼín, nga̱ je Jeobá be ngayeje jmeni xi nʼia (Sal. 44:21; Ecl. 12:14; Heb. 4:13). Xi majaoni, tjínnele sikʼantjaiya yaole kʼoa tsínti totaon skoe̱ni chjoónle (Prov. 28:13). Xi majanni, tjínnele sijéle kjoanichatʼa je chjoónle kʼoa kao Jeobá (Hech. 3:19). Tjínnele kʼoakuitsole Jeobá nga katabasenkao nga sindaya yaole, josʼin síkjaʼaitsjen, jotso én nchja̱ kʼoa jmeni xi sʼín (Sal. 51:10-12; 2 Cor. 10:5; Filip. 2:13). Xi mañoni, tjínnele sitjoson jmeni xi kuitsole Jeobá nga kʼoetsʼoale, nga tsínti toxkia kuinchja̱ni kʼoa nga tsín tikui kʼoasʼinni jmeni xi kjoatsʼen tjenkao (Sal. 97:10). Xi maʼaonni, koaan sijéle nganʼio xi chjotajchínga sʼin tjío ya jinjtín (Sant. 5:14-16). Kʼoa xi majaonni, koaan kʼoendajin jmeni xi sʼin ánni nga tsín tikui xi chʼaotjín kʼoasʼinni. Tobʼelañá, je xi pornografía kotsenle kʼoati kui kjoafaʼaitsjen jebi tjínnele koaitjenngi. Tsa kʼoasʼin, jé Jeobá koasenkao nga sindaya yaole (Sal. 37:5). Machjén nga tsín tikui kʼoasʼinni je xi xʼin jmeni xi tsín nda kʼoe kon chjoónle, tonga kʼoati machjén nga skoe̱xkón. Kataʼyala jótjínnele sʼin nga skoe̱xkón chjoónle.
JÓSʼIN KOAKO XI XʼIN NGA BEXKÓN JE CHJOÓNLE
15. Jósʼin koako je xi xʼin nga tsjoake chjoónle.
15 Tsjoacha katamai je chjoónli. Tjínkʼa ndsʼee xi kʼoasʼin ngale nga ntsjaintsjai kʼoatsole je yánchjínle jokji tsjoake. Nga kʼoasʼín, nda batiokao xínkjín (1 Juan 3:18). Je ndsʼee xi jechixan koaan koakole jokji tsjoake chjoónle, jolani tsa ntsja skoé kʼoa tsa tsoa̱kjá xínkjín. Kʼoati koa̱n jngo xo̱n skí nga kʼoakuitsole jokji tsjoake kʼoa tsa maije̱ kui koatsele jmeni xi tsjoake chjoónle. Kʼianga kʼoasʼín je xi xʼin, kʼoasʼin bakóni nga tsjoake chjoónle, nga bexkón kʼoa ngisaa nda batiokao xínkjín.
16. Ánni tjínnenile chjí skoe̱kon chjoónle xi xʼin.
16 Kʼoatʼinlai je chjoónli nga chjí ʼyai jme xi sʼín. Je xi bexkón chjoónle nda tso én fákao kʼoa sínʼio kon. Tobʼelañá, ntsjaintsjai kʼoatsole nga nʼio nda sʼín nga basenkao kʼoa tsjoále kjoanda (Col. 3:15). Kʼianga kʼoasʼín je xi xʼin, je chjoón nda sʼe kon, majinle nga tjao ʼya kʼoa nga tísakóle kjoaxkóntokon (Prov. 31:28).
17. Jósʼin je xi xʼin nga koakole kjoaxkóntokon je chjoónle.
17 Takolai kjoaxkóntokon je chjoónli. Je ndsʼee xi tsjoake chjoónle chjí be kʼoa kʼoasʼin síkjaʼaitsjen nga jngo kjoatjao xi je Jeobá kitsjoale (Prov. 18:22; 31:10). Kuinga síkuindani, tjao be kʼoa bakóle kjoaxkóntokon ninga kʼia nga toje tjíokao xínkjín. Alikui bʼénele chjoónle nga kui kʼoakatasʼín jmeni xi tsín mele kʼoasʼin kʼoa xi chʼao kʼoe kon. j Kʼoa tsínkui kʼoasʼín jmeni xi chʼaosʼin sikʼéjna ngixko̱n Jeobá (Hech. 24:16).
18. Jméni xi tjínnele sʼin je xi xʼin (kʼoati chótsenlai je recuadro “ Ño koya xi sʼiain nga jchaxkuín chjoónli”).
18 Je Jeobá be kʼoa kuenta sʼín josʼin ʼyaxkón je yánchjínno. Alikuijin kʼoanʼiao jmeni xi chʼao kʼoe kon, tosa takolao kjoaxkóntokon, nda tikao kʼoa takolao nga tsjoachao. Tsa kʼoasʼiaon, kʼoasʼin koakoño nga chjí ʼyao kʼoa nga tsjoachao je yánchjínno. Kʼiatsa jchaxkón je yánchjínno nda kuiyo ngixko̱n Jeobá (Sal. 25:14).
KJOAJNDA 131 “Je xi Niná tsakʼékjao”
a Je xi xʼin koaan kʼoexkia je Xo̱n xi Bájinkonná xi tsʼe sá enero 2024, jñani tso “A kʼoasʼin ʼyatokuin je yánchjín josʼin bekon Jeobá”.
b Kʼiatsa totaon beli je xʼinli koasenkaoli nga kʼoéxkiai je kjoaʼmiya xi faʼaitʼa ya jw.org, tjasjai jñani “Xi nchja̱sani” tso, kʼoa xijekoa̱n, jñani “Kjoafaʼaitsjen xi koasenkao xi totaon ʼya ya yaniʼya” tso. Kʼoati faʼaitʼa ya JW Library®.
c 1 Pedro 3:7: “Jon, xi xʼion, kʼoatisʼin tiyokao yánchjínno josʼin nga nda machoyano. Jchachjotao yánchjínno joni tsa jngo cho̱tsín xi ngisa xjoe, nga̱ tojngo tjínno kjoatjao xi kjoabijnachon, jméni nga je xi bʼetsʼoao likui sa̱téchjoasíni”.
d Colosenses 3:19: “Jon xi xʼion xi chixaon, tjaocha katamao yánchjínno, ali tsʼenkaojin mao”.
e JÓSʼIN TSOYANILE: Je “xi nchja̱ʼaon” kui kʼoatso jmeni xi síkiʼaon xi kjaʼaí. Toxá sʼínni nga chʼaosʼin síkʼaxki̱ xi kjaʼaí nga̱ kui xi mele nga chʼao katasʼe kon.
f Efesios 4:31, 32: “Ngayije kjoajnra, kjoajti, kjoajticha, xi nʼio nchja̱ti, kao xi nchja̱ʼaon, katatjoxinno, kao ngayije kjoatsʼen. 32 Tosa nda tikao xíngio. Katasʼeno kjoamatakon. Tichatʼalao xíngio, josʼin nga Niná kisichatʼano nga tiyokao Cristo”.
g Tjasjai ya jw.org kao ya JW Library je kjoaʼmiya xi ʼmi “La pornografía puede destruir su matrimonio”.
h Kʼiatsa pornografía kotsenle je xʼinli, koasenkaoli jmeni xi tso je Xo̱n xi Bájinkonná xi tsʼe sá agosto 2023 jñani tso “Jósʼiain tsa pornografía kotsenle xʼinli”.
i Mateo 19:4-6: “Kʼoa Jesús kitsole: A kje bʼexkiajion nga je xi kisindale saʼnda nga títjon, xi xʼin kao xi chjoón kisindale. 5 Kʼoa Niná kitso: Tokui kjoa je xʼin sikatío nʼaile kao na̱le, kʼoa tojngo kʼoéjnakao chjoónle, kʼoa tokoa̱njngoni yaole. 6 Kʼoasʼin nga tsín tijao mangisani, tojngo yao mani. Tokui je xi Niná tsakʼékjao, ali bʼasjexinjin chjota”.
j Je Biblia alikui kʼoatso jméni xi koa̱n kʼoasʼin kʼoa jméni xi mai xi jechixan nga kjoáyokao xínkjín. Nga jao nga kjaoyani jméni xi sʼin nga skoe̱xkón Jeobá, nga tsjoa koaya kon xínkjín kʼoa nga tsín chʼao sa̱tío kon. Tonga alikui koa̱n nga ʼya xi kʼoeyanajmíle jmeni xi sʼín.
k XI TÍNCHJA̱NI SÉN XI FAʼAITʼA: Jngo ndsʼee xi ya tíjna jñani síxá, kʼoa je chjota xi ñatjen síxá kui bakóle je revista xi pornografía faʼaitʼa.
