KJOAʼMIYA XI CHOTʼAYA 5
KJOAJNDA 108 Je kjoatsjoachale Jeobá
Jmé kjoanda xi tjínná nga tsjoakená Jeobá
“Cristo Jesús jaʼai i̱ sonʼndebi, jaʼaikʼasjentjai chjotajée” (1 TIM. 1:15).
XI TÍNCHJA̱NI
Jmé kjoanda xi tjínná nga tsakʼéchjíntjainá Niná kʼoa jósʼin koakolee nga chjí ʼyaa nga kʼoakisʼin.
1. Jméni xi sʼiaan nga tsjoa kʼoé kon Jeobá.
SI̱KJAʼAITSJENLA jósʼe̱ tokoán tsa jngo najño kʼoaikjoatjaolee xíngiaa tonga tsa to kʼoejnatjaoni kʼoa tsa tsínni sichjén. Tonga tsa jchaa nga tísíchjén tsjoajin sʼe̱ tokoán nga̱ kʼoajinsʼin tíbakóni nga chjí be jmeni xi tsakʼailee. Tikʼoasʼinni, jngoyale jngo kjoatjao xi kitsjoaná Jeobá kʼianga kisikasén ʼNdíle nga kʼienntjainá. Tsjoajin sʼe kon Jeobá nga chjí ʼyaa nga tsakʼéchjíntjainá nga̱ kʼoasʼin tsakakóni nga tsjoakená (Juan 3:16; Rom. 5:7, 8).
2. Jmé xi chótʼayajiaan i̱ kjoaʼmiya jebi.
2 Nga jenkjín nó tífaʼato, tsakui nichxin tsínti chjí jchañá jmeni xi kisʼin Niná nga tsakʼéchjíntjainá, joxi yajinni mangóson nga to tibʼejnatjoá je kjoatjao xi kitsjoaná. Nga tsín kʼoakatamaa, tjínnele ntsjaintsjai si̱kjaʼaitsjenjiaan jmeni xi kisʼin Jeobá kao Jesús xi tʼatsaan. Kui tʼatsʼe jebi chótʼayajiaan i̱ kjoaʼmiya jebi. Jchañá jmé kjoanda xi tjínná ndʼaibi nga tsakʼéchjíntjainá Niná kʼoa jmé kjoanda xi sʼe̱ná nichxin xi sʼa nroa. Kʼoati jchaa jméni xi tjínnele sʼiaan kʼianga faʼaitsjenya Kjoabiyale Cristo nga kʼoailee kjoanda Jeobá jokji kjoatsjoacha tsakakóná.
JMÉ KJOANDA XI TJÍNNÁ NDʼAIBI NGA KOANCHJÍNTJÉ
3. Jmé kjoanda xi tjínná ndʼaibi nga kʼienntjainá Jesús.
3 Tsee kjoanda tjínná ndʼaibi nga kʼienntjainá Jesús. Tobʼelañá, je Jeobá síchatʼaa jéená kʼoa kuinga tsjoakená nga síchatʼaniná, ali tsakuijin nga tjínnele kʼoasʼin. Kʼianga kisele Niná je David, i kitso nga kitsjoale kjoanda: “Ji, Jeobá, nda chjotai kʼoa tijnandaní nga nichatʼai” (Sal 86:5; 103:3, 10-13).
4. ʼYá chjotani xi tsakʼéchjíntjai Jeobá (Lucas 5:32; 1 Timoteo 1:15).
4 Tjínkʼa xi kʼoasʼin síkjaʼaitsjen nga tsín bakinná nga sichatʼaná Jeobá, kʼoa kjoaixi nga tsín bakinná. Je Pablo kʼoakitso nga tsín bakinle nga pastro kʼuín, tonga tokao “kjoandale Niná” nga pastro koan (1 Cor. 15:9, 10). Síchatʼaná Jeobá kʼianga kʼoamaniná je jéená. Alikui tjínnele nga sichatʼaná tonga kui kʼoasʼínni nga tsjoakená. Kʼiatsa kʼoasʼin nikjaʼaitsjeen nga tsín bakinná nga sichatʼaná Jeobá, kuenta sʼiaan nga je tsakʼéchjíntjai chjota xi kʼoamanile jéele (tʼexkiai Lucas 5:32; a 1 Timoteo 1:15 b).
5. Ánni tsín koa̱n kʼoakuixónsíñá nga tjínnele sichatʼaná Jeobá.
5 Ninga jenkjín nó tinixálee Jeobá alikui koa̱n kʼoasʼin si̱kjaʼaitsjeen nga tjínnele sichatʼaná. Je Jeobá chjí be jmeni xi nʼia nga je tinixálee (Heb. 6:10). Kuinga tsjoakená Jeobá nga kisikasénni ʼNdíle nga kʼienntjainá, ali tsakuijin síchatʼaniná nga je tinixálee. Kʼiatsa kʼoasʼin si̱kjaʼaitsjeen nga kuinga síchatʼaniná Jeobá nga je tinixálee kʼoajinni tibixoán nga tsín machjénná nga je Jesús kʼienntjainá (tingósonkoai Gálatas 2:21).
6. Ánni nga nʼio nda kisixánile Niná je Pablo.
6 Je Pablo ali tsakuijin xá kisixánile Niná nga katachatʼa jéele. Kui kʼoakisʼinni nga kitsjoale kjoanda nga tsakakóle kjoamatokon (Efes. 3:7). Tikʼoasʼinni tsanda ñá, ali tsakuijin xá nixánilee Jeobá nga tokui xi mená nga katasíchatʼaná, kuinga je nixánilee nga bʼailee kjoanda jmeni xi tísʼín xi tʼatsaan.
7. Jmésa kjoanda xi tjínná ndʼaibi nga tsakʼéchjíntjainá Niná (Romanos 5:1; Santiago 2:23).
7 Je kjoanda xi kʼoati tjínná nga tsakʼéchjíntjainá Niná kuinga nda biyoaa ngixko̱n. c Tojosʼin tsaʼyaa ya kjoaʼmiya xi jaʼato, kʼianga sʼa tsiaan alikui miyole Niná maa. Tonga nga tsakʼéchjíntjainá Niná nda biyoaa ngixko̱n kʼoa machriantʼalee (tʼexkiai Romanos 5:1; d Santiago 2:23 e).
8. Ánni nga chjí jchatokonñá je kjoanda xi tjínná nga ma bʼetsʼoalee Jeobá.
8 Nga miyoná mani Jeobá maa bʼetsʼoalee. Nrʼoéná kʼianga bʼetsʼoalee nga satíoná kjoajtín, tonga kʼoati nrʼoéná kʼianga bʼetsʼoalee nga jngó jngoá. Nda sʼe tokoán nga bʼetsʼoalee, tonga xi ngisa chjíle kuinga sa machriantʼa sa machriantʼalee kʼianga kʼoanʼia (Sal. 65:2; Sant. 4:8; 1 Juan 5:14). Kʼianga tsakʼejna Jesús i̱ Sonʼnde, ntsjaintsjai tsakʼétsʼoale Nʼaile nga̱ be nga kjuinrʼoéle, kʼoa kuinga kʼoakisʼinni nga nda kʼoéjna ngixko̱n (Luc. 5:16). Bʼailee kjoanda Jesús nga kʼienntjainá, nga̱ maa bʼetsʼoalee Jeobá kʼoa miyoná mani.
JMÉ KJOANDA XI SʼE̱NÁ NICHXIN XI NROAJÁN
9. Jmé kjoanda xi sʼe̱ná nichxin xi nroaján nga jekoanchjíntjé.
9 Nga jekoanchjíntjé tsee kjoanda sʼe̱ná nichxin xi nroaján nga̱ koaan kuiyoaa ngantsjai nichxin. Nga kjoabiya choʼndá xi chjota, nkjín xi tsín makjainle nga koa̱n kuiyoaa ngantsjai nichxin. Je Jeobá kʼoasʼin kisindaná nga koa̱n kuiyoaa ngantsjai. Ningalani ñʼai maná nga majinná nga koa̱n kuiyoaa ngantsjai nichxin, kuenta sʼiaan nga je Jeobá jekisikasén ʼNdíle nga tsakʼéchjíntjainá ánni nga koa̱n kuiyosíñá ngantsjai nichxin (Rom. 8:32).
10. Jméni xi koyale je chjotale Cristo xi ya koai ngʼajmi kao xi i̱ Sonʼnde koatio.
10 Je Jeobá kui xi mele nga si̱kjaʼaitsjenjiaan je kjoanda xi sʼe̱ná nichxin xi nroaján nga koa̱n kuiyoaa ngantsjai nichxin. Je chjotale Cristo xi toxá kitjoéjinni nga ya ngʼajmi koai kui tjíokoyale nga ya koatexomakao Jesús (Apoc. 20:6). Kʼoa je chjotale Cristo xi ngikʼa kui tjíokoyale nga i̱ Sonʼnde koatio kʼianga jeʼndenaxó koa̱n (Apoc. 21:3, 4). Jmeni xi tichoyalee ñaki kuitjosonní nga̱ kui xá kisindaniná Niná nga koa̱n kuiyoaa ngantsjai nichxin. Nga ʼyaa jebi tsjoa sʼe tokoán.
11, 12. Jmé kjoanda xi sʼe̱ná kʼianga jeya sonʼndenaxó kuiyoaa (kʼoati chótsenlai sén xi faʼaitʼa).
11 Si̱kjaʼaitsjenla josʼin kuiyoaa kʼianga jeʼndenaxó koa̱n Sonʼnde nga tsín tisʼeni chʼin kʼoa nga tsínti kuiyañá (Is. 25:8; 33:24). Jé Jeobá tsjoáná ngayeje jmeni xi tsjoa kʼoe tokoán. Tobʼelañá, tsakui nichxin koa̱nmená nga kui chótʼayá jotjín koya cho̱ tjín kʼoa jotjín koya nise tjín. Kʼoati koa̱n chótʼayá jmeni xi mená si̱kjanee kʼoa tsa jme xi mená si̱kʼiaa. Ya ʼndenaxó kʼoati koa̱nchjén je chjota xi male bʼénda ndʼia, xi tsojmintje kʼoentje, xi naxó kʼoentje kʼoa kao xi kʼoenda tsojmi xi ma chine. Kʼoati koa̱nchjén chjota xi male sínda ki̱cha̱ xi maxákao kʼoa tsa jmesa xá xi male sʼín (Is. 35:1; 65:21). Kʼianga kuiyoaa ngantsjai nichxin koaan chótʼayá tojme xáni xi mená sʼiaan.
12 Nʼiojin tsjoa sa̱tío tokoán nga chjoéyaa je xi kjoaʼáyanile (Hech. 24:15). Kʼoajinti tsjoa sa̱tío tokoán nga tosi tonda jchasaa xi tʼatsʼe Jeobá kʼoa nga ngisa nda jchaa jokjoan xi kisinda (Sal. 104:24; Is. 11:9). Nga kui nichxin, alikui tichʼao sa̱tíoni tokoán nga̱ tsínti kuijnyíjéeñá kʼoa nda si̱xálee Jeobá. Nga ʼyaa nga ndasʼin kuiyoaa nichxin xi nroaján alikuijin kui kʼoasʼiaan jmeni xi tsín sasénle Niná (Heb. 11:25). Ninga tse kjoama̱ kʼoéngiaa ndʼaibi ñaki tjínjngo tokoán nga kuitjoson jmeni xi tichoyalee, nga̱ kuicho nichxin nga ya sonʼndenaxó kuiyoaa kʼoa tsín tsa titokʼoasʼin chóyanilee jotinʼia ndʼaibi. Kuinga tjínjngoni tokoán nga kuitjoson jmeni xi tso Jeobá nga̱ jekisikasén ʼNdíle nga tsakʼéchjíntjainá.
Jméni xi nʼio choyalai nga sʼiain ya sonʼndenaxó (Chótsenlai párrafo 11, 12)
KʼOAILEE KJOANDA JEOBÁ NGA TSJOAKENÁ
13. Jósʼin kʼoailee kjoanda Jeobá nga tsjoakená (2 Corintios 6:1).
13 Kʼiatsa kui xále Jeobá ngisa kʼoailee kjoandosin kʼoasʼin koakoñá nga bʼailee kjoanda nga tsakʼéchjíntjainá (Mat. 6:33). Nga kʼoasʼin kʼienntjainá Jesús tʼatsʼe nga tiyochoán, alikui titoñá kichʼañá yaoná (2 Cor. 5:15). Alikui si̱chajiaan je kjoanda xi tsakakóná Jeobá nga tsakʼéchjíntjainá (tʼexkiai 2 Corintios 6:1). f
14. Jósʼin bakoñá nga je Jeobá ninʼiotʼaa kʼoa nga nitjosoán jmeni xi tsoná.
14 Ijngosa koya josʼin bakoñá nga bʼailee kjoanda Jeobá nga tsjoakená kʼiaa nga je ninʼiotʼaa kʼoa nitjosoán jmeni xi tsoná. Tobʼelañá, kʼiatsa kui tinikjaʼaitsjenjiaan jókji tjen chótʼayá skuela kʼoa tsa xá tifasjee, kuenta nʼia jósʼin síkjaʼaitsjen Jeobá kʼoa nitjosonñá jmeni xi tsoná (1 Cor. 10:31; 2 Cor. 5:7). Kʼianga kui kʼoanʼia jmeni xi sasénle ngisaa nʼio sʼejna kjoamakjainná, ngisaa mamiyoaa kʼoa ngisaa sʼejngo tokoán nga kuitjoson jmeni xi tichoyalee (Rom. 5:3-5; Sant. 2:21, 22).
15. Jméni xi sʼiaan nga kʼoailee kjoanda Jeobá kʼianga faʼaitsjenya Kjoabiyale Cristo.
15 Kʼoati kʼoasʼin bakoñá nga bʼailee kjoanda Jeobá nga tsakakóná kjoatsjoacha kʼoa nga tsakʼéchjíntjainá kʼianga ngisasa tse nixálee nga faʼaitsjenya Kjoabiyale Cristo. Kʼoati koa̱n kʼoakʼuínlee xi kjaʼaí nga katafi nga faʼaitsjenya Kjoabiyale Cristo (1 Tim. 2:4). Kʼianga kjoájinkoaan chjota kʼoakʼuínlee jméni xi ma nga kui nichxin. Koaan koakolee je video xi faʼaitʼa ya jw.org, xi ʼmi Ánni nga kʼiensíni Jesús kao Si̱kjaʼaitsjenyá je kjoabiyale Jesús. Je xi chjotajchínga sʼin tjío kʼoakuitsole je ndsʼee xi jekisikatío xále Niná nga katafi nga faʼaitsjenya Kjoabiyale Cristo. Nʼio tsjoa sa̱tío kon je ánkje kao je ndsʼee nga kuicho ijngokʼa xi jekisikatío xále Niná (Luc. 15:4-7). Kʼianga faʼaitsjenya Kjoabiyale Cristo koaan nda chjoéyaa je xi tokʼia kuichotítjon kʼoa tsa jeje̱ xi jekjoatse nga tsínti bichóni ánni nga nda sa̱tíoni kon (Rom. 12:13).
16. Ánni nga ngisa tse si̱xásínilee Jeobá nga faʼaitsjenya Kjoabiyale Cristo.
16 Kʼiatsa ngisasa tse kʼuínyasoán kʼianga faʼaitsjenya Kjoabiyale Cristo kʼoasʼin koakoñá nga bʼailee kjoanda Jeobá kao Jesús jmeni xi kisʼin xi tʼatsaan. Kʼianga ngisa tse kʼuínyasoán jchañá josʼin basenkaoná Jeobá kʼoa ngisaa koa̱nnʼiotʼaa (1 Cor. 3:9). Kʼoati koa̱n kʼoéxkiaa texto xi faʼaitʼa je folleto Nyaon nyaon chótʼayajiaan je Biblia kao xi faʼaitʼa je Xo̱n xi tjítʼa jme xi chotʼayá. Koaan kui texto jebi si̱chjén nga chótʼayá.
17. Ánni nga tsjoa sʼeni kon Jeobá xi tʼatsaan (kʼoati chótsenlai je recuadro “ Jósʼin kʼoailee kjoanda Jeobá nga tsakakóná kjoatsjoacha”).
17 Alikui koa̱n nga nʼio si̱kjáojiaan kʼiatsa tsín kʼoakjoansʼin kuitjosonná jotso je kjoafaʼaitsjen xi tsjoá kjoaʼmiya jebi. Kuenta sʼiaan nga tsín ʼya xi síngósonkaoná Jeobá, tosaa kui fini jotjín tokoán kʼoa tsjoa sʼe kon nga be kʼianga bʼailee kjoanda nga tsakʼéchjíntjainá (1 Sam. 16:7; Mar. 12:41-44).
18. Ánni nga bʼainilee kjoanda je Jeobá kao Jesús.
18 Totʼatsʼee nga jekoanchjíntjé nga chatʼani je jéená, nga nda biyoaa ngixko̱n Niná kʼoa nga tjínná kjoachoya nga koa̱n kuiyoaa ngantsjai nichxin. Ntsjaintsjai koakolee Jeobá nga chjí ʼyaa nga kʼoasikji kjoanda tsakakóná (1 Juan 4:19). Kʼoati kʼoailee kjoanda je Jesús nga̱ kʼoasʼin tsakakóni nga nʼio tsjoakená kʼianga kʼienntjainá (Juan 15:13).
KJOAJNDA 154 Je kjoatsjoacha nikʼiajin kjoetʼa
a Lucas 5:32: “Likui jaʼai nchjale xi tjínle kjoakixi, tojé chjota xi jée tjínle nga sikʼantjaiya kjoafaʼaitsjenle”.
b 1 Timoteo 1:15: “Je énbi xi ñaki kʼoatjín, xi bakinle nga chjóbé ngatsʼiaa: Cristo Jesús jaʼai i̱ sonʼndebi, jaʼaikʼasjentjai chjotajée. An nía xi chjotajéetítjoan”.
c Je Jeobá kisichatʼale je choʼndale xi kʼia tsakatio nga kjesa bʼéchjíntjaijinná je Jesús. Kui kʼoakisʼinni Jeobá nga̱ be nga kixi koa̱n ʼNdíle saʼnda nga kuiyá ánni nga koa̱n kʼoasjentjaini chjota (Rom. 3:25).
d Romanos 5:1: “Kui nga jetʼa jéená xi totʼatsʼe nga makjainná, tjínná kjoa xi nyʼán tjín tʼatsʼe Niná, xi totʼatsʼe Nainá Jesucristo”.
e Santiago 2:23: “Kʼoasʼin jitjoson xo̱n Escritura xi tso: Abraham koankjainle tʼatsʼe Niná. Kʼoasʼin koanxki̱kao kjoakixi. Miyole Niná tsakʼinle”.
f 2 Corintio 6:1: “Kʼoasʼin nga jinjin, xi tojngo nixáijin kao Cristo, bʼenelaijin nga tsín toyani chjóao je kjoandale Niná”.
