KJOAʼMIYA XI CHOTʼAYA 4
KJOAJNDA 18 Kʼoailee kjoanda Niná tʼatsʼe kjoabʼechjíntjai
Jmé xi bakóyaná nga koanchjíntjé
“Kʼoasʼin koanchoyale ni̱ma̱ná josʼin nga Niná tjaokená” (1 JUAN 4:9).
XI TÍNCHJA̱NI
Jmé xi bakóyaná tʼatsʼe Jeobá kao Jesús nga tsakʼéchjíntjainá.
1. Jmé xi tsín chajinná kʼianga xki̱ nó nikjaʼaitsjenya je Kjoabiyale Cristo.
TSEE kjoanda so̱koná nga kʼoasʼin koanchjíntjé (2 Cor. 9:15). Kʼianga kʼienntjainá Jesús koaan nda kuiyoaa ngixko̱n Niná kʼoa koaan kuiyoaa ngantsjai nichxin. Kuinga kisikasénni Jeobá je ʼNdíle nga kʼienntjainá nga nʼio tsjoakená (Rom. 5:8). Je Jesús kʼoakitso nga tjínnele si̱kjaʼaitsjenyá je kjoabiyale nga xki̱ nó ánni nga tsín jchajinniná jókji chjíle nga kʼoasʼin tsakʼéchjíntjainá (Luc. 22:19, 20).
2. Jmé xi chótʼayajiaan i̱ kjoaʼmiya jebi.
2 Nó jebi kʼiaa kjoaʼaítsjenya Kjoabiyale Cristo nga xoto 12 sá abril. Si̱kjaʼaitsjenyañá ngatsʼiaa je kjoabiyale Jesús kʼoa koaan si̱kʼayaa nichxin nga si̱kjaʼaitsjenjiaan a jmeni xi kisʼin Jeobá kao Jesús xi tʼatsaan. I̱ kjoaʼmiya jebi kui chótʼayajiaan jmé xi tsoyaná xi tʼatsʼe Jeobá kao Jesús nga kʼoasʼin tsakʼéchjíntjainá. Kʼoa xi ijngo kjoaʼmiya kui kuitsoyaná jmé kjoanda xi so̱koná nga tsakʼéchjíntjainá je Jeobá kao Jesús kʼoa jósʼin koakoá nga chjí ʼyatokoán nga kʼoakisʼin.
JMÉNI XI BAKÓYANÁ TʼATSʼE JEOBÁ NGA TSAKʼÉCHJÍNTJAINÁ
3. Ánni nga tojngo chjota tsakʼéchjíntjaini ngatsʼi chjota (kʼoati chótsenlai sén xi faʼaitʼa).
3 Nga tsakʼéchjíntjainá Jeobá yaa ʼyañá nga ñaki kixi jmeni xi sʼín (Deut. 32:4). Kʼianga tsakajngijée Adán kʼoati chjotajée koan kʼoa kuinga biyañá (Rom. 5:12). Kuinga je Jesús kisikasénni Niná i̱ Sonʼnde nga tsakʼéchjíntjainá ánni nga ndái kuiyonilee je jée kao kjoabiya. Kʼoa je Pablo kui kitsoya jósʼin tíjna nga koa̱n tojngo chjota kʼoechjíntjai je chjota xi millón mani. I kitso: “Josʼin nga kjaínga nkjín xi chjotajée koan xi totʼatsʼe nga jngo chjota xi tsín kisitjoson [Adán], kʼoatisʼin kjaínga nkjín xi chjotakjoakixi koa̱n xi totʼatsʼe nga jngo chjota xi kisitjoson [Jesús]” (Rom. 5:19; 1 Tim. 2:6). Jebi kui xi tsonile nga tojngo koanni chjotatsje xi tsín kisitjosonle Niná xi tsakajngijée kuinga chjotajée mañá tsanda ñá kʼoa biyañá. Kuinga kʼoati tojngo koanni je chjotatsje xi koanchjén nga tsakʼéchjíntjainá xi kisitjosonle Niná.
Tojngoo chjota kisikakinná je jée kao kjoabiya kʼoa tojngoo chjota koanchjén xi tsakʼasjentjainá (Chótsenlai párrafo 3)
4. Ánni nga tsín koanni nga to jekui kjoanda kitsjoale Jeobá ngatsʼi chjota xi sitjoson nga koa̱n koatio ngantsjai nichxin.
4 Tsakui nichxin i̱ bixoán. A kjoanʼiokjoan koanchjén nga je Jesús tsakʼéchjíntjainá nga ndái kuiyolee je jée kao kjoabiya. A tsí koan nga kui kjoanda kitsjoale Jeobá ngatsʼi chjota xi sitjoson nga koa̱n koatio ngantsjai nichxin. ʼYañá nga ñaki kixi jmeni xi sʼín Jeobá, kuinga tsín tokisichajinni jmeni xi kisʼin Adán.
5. Ánni tjínjngoni tokoán nga kui kʼoasʼín ngantsjai je Jeobá xi kixi tíjna.
5 Tsa tsínlani tsakʼéchjíntjainá Jeobá, alikuijin kixi tíjna jmeni xi kisʼin tsa to kitsjoaʼndelaniná nga koa̱n kuiyoaa ngantsjai nichxin ninga chjotajée maa. Kʼoa tjínjinkʼa xi to jaosa sa̱tío kon tsa sitjoson Jeobá jmeni xi tso. Tonga kixi tíjna jmeni xi kisʼin Jeobá, kuinga kisikasénni ʼNdíle i̱ Sonʼnde nga kʼienntjainá kʼoa kuinga tjínjngoni tokoán nga kui kʼoasʼín ngantsjai xi kixi tíjna.
6. Jókji tsjoakená Jeobá nga kʼoasʼin tsakʼéchjíntjainá (1 Juan 4:9, 10).
6 Kʼianga tsakʼéchjíntjainá Jeobá kʼoasʼin tsakakóni nga kixi jmeni xi sʼín. Tonga kʼoati tsakakó nga nʼio tsjoakená (Juan 3:16; tʼexkiai 1 Juan 4:9, 10 b). Kui xi mele Jeobá nga kuiyoaa ngantsjai nichxin kʼoa nga ya kuiyojinlee familiale, kui xá kisikasénni je ʼNdíle i̱ Sonʼnde. Kʼianga tsakajngijée Adán alikui tiya tsakʼejnajinni familiale Niná kʼoa tsín tiya tsakiyojinñá tsanda ñá. Tonga nga jetsakʼéchjíntjainá Niná, ngatsʼi chjota xi koa̱nkjainle tʼatsʼe kʼoa xi sitjosonle koaan ya koatiojin ijngokʼa familiale Niná kʼianga kuicho nichxin. Nichxin xi tiyoaa ndʼai síchatʼaná je Jeobá, koaan nda kuiyoaa ngixko̱n kʼoa koaan nda kuiyoaa kao je ndsʼee. Ngayeje jebi kui bakóná nga nʼio tsjoakená Jeobá (Rom. 5:10, 11).
7. Ánni ngisa nda majinniná jokji tsjoakená Jeobá kʼianga nikjaʼaitsjenjiaan je kjoañʼai xi tsakjaʼá Jesús.
7 Ngisaa nda koa̱njinná jokji tsjoakená Jeobá tsa si̱kjaʼaitsjenjiaan jokji aon koanle nga tsakʼéchjíntjainá. Je Na̱i kʼoakitso nga nijngojin choʼndale Niná xi kixi koaitʼale tsa kjoa kjoaʼatojin. Tonga nga kitsjoaʼnde Jeobá nga kjoañʼai jaʼá je ʼNdíle saʼnda nga kinikʼien kʼoasʼin tsakakóni nga tsín kʼoatjín jmeni xi kitso je Na̱i (Job 2:1-5; 1 Ped. 2:21). Tsabe Jeobá nga totaon tsaʼya je ʼNdíle, nga tsaʼyasin, nga tsakichon kʼoa nga yá kisʼetʼa. Kʼoati tsabe nga tse kjoañʼai kinikjaʼá nga kinikʼien (Mat. 27:28-31, 39, TNM). Koanjin tsakʼéchjoa Jeobá nga kʼoatínikao ʼNdíle. Koanjin tsakʼasjentjai kʼianga i̱ kitso chjota: Katabʼasjentjai Niná tsa mele koasenkao (Mat. 27:42, 43, TNM). Tonga tsa kʼoalani kisʼin alikuijin josʼin tsakʼéchjíntjaininá kʼoa alijmejin kjoachoya tjínná. Kuinga tjínniná kjoachoya nga kitsjoaʼnde Jeobá nga kjoañʼai tsakjaʼá ʼNdíle kʼoa nga kinikʼien.
8. Jósʼin ʼyañá nga aon koanle Jeobá kʼianga kjoañʼai kinikjaʼá ʼNdíle (kʼoati chótsenlai sén xi faʼaitʼa).
8 Ningalani nʼio tse nganʼio tjínle Jeobá kitsjoaʼnde nga totaon tsaʼya ʼNdíle kʼoa alikui tsakʼéchjoa nga kʼoakinikao. Tonga ali tsakuijin xi tsonile nga tsín tsen male Niná kʼianga ʼya xi kjoañʼai faʼá. Je Jeobá kʼoati aon male kʼianga ʼya xi kjoañʼai faʼá tojo maná ñá nga aon maná nga ʼyaa tsa ʼyani xi totaon tíʼya. Ya Biblia kʼoatso nga ba kisʼe kon kʼoa aon koanle jmeni xi kisʼin je chjota (Sal. 78:40, 41). Si̱kjaʼaitsjenla jokoan je Abrahán kao Isaac. Je Jeobá kʼoakitsole Abrahán nga katatsjoátʼa je ʼndíle (Gén. 22:9-12; Heb. 11:17-19). Jóxótse kisʼe kon Abrahán kʼianga to jetíjnanda nga sikʼien ʼndíle. Kʼoati majinná jokisʼe kon Jeobá kʼianga tsabe ʼNdíle nga totaon tsaʼya nga kinikʼien, nʼiojin aon koanle kʼoa nʼiojin ba kisʼe kon (chótʼai ya jw.org je video xi ʼmi Ejemplos de fe: Abrahán [parte 2]).
Nʼio aon koanle Jeobá nga tsabe ʼNdíle jokji kjoañʼai kinikjaʼá (Chótsenlai párrafo 8)
9. Tojo tso Romanos 8:32, 38, 39, jókji tsjoake Jeobá ngatsʼi choʼndale.
9 Kʼianga tsakʼéchjíntjainá Jeobá kʼoasʼin bakóniná nga nʼio tsjoakená. Tsʼato kʼoakji tsjoakená jokji tsjoakená jngo miyoná kʼoa tsa je xíngiaa (tʼexkiai Romanos 8:32, 38, 39). c Ngisaa tsjoakená je tikʼoajinni jokji tsjoachaa yaoná. Tsa mená nga kuiyoaa ngantsjai nichxin, je Jeobá kʼoati mele nga kuiyoaa ngantsjai, tsa mená nga jchatʼa je jéená, je Jeobá kʼoati mele nga sichatʼaná. Tokuikjoán xi tsoná nga si̱tjosonlee, nga koa̱nkjainná xi tʼatsʼe kʼoa chjí jchatokoán nga kʼoasʼin tsakʼéchjíntjainá. Nga kʼoakisʼin, kʼoasʼin bakoni nga nʼio tsjoakená kʼoa kʼianga jeʼndenaxó koa̱n Sonʼnde ngisaa tinda koa̱njinngániná jokji tsjoakená Jeobá (Ecl. 3:11).
JMÉ XI BAKÓYANÁ TʼATSʼE JESÚS NGA TSAKʼÉCHJÍNTJAINÁ
10. 1) Jméni xi koankjáojinle Jesús kʼianga tojeme ni̱kʼien. 2) Jósʼin tsakʼasjengʼa Jesús je jaʼaínle Nʼaile (chótsenlai je recuadro “ Je Jesús tsakʼasjengʼaa jaʼaínle Niná nga kixi kitʼale”).
10 Kui koankjáojinle Jesús nga ndasʼin kʼoaxki̱ je Nʼaile (Juan 14:31). Kui kisikjáojin tsa chʼaosʼin kʼoaxki̱ je Nʼaile kʼianga kʼoatsakʼinle nga Niná kinchja̱ʼaonle. Kuinga i̱ kitsonile je Nʼaile: “Nʼaina, tsa koa̱nni chjaʼaxinnái je kjoañʼaibi” (Mat. 26:39). Je Jesús kixi kitʼale Niná saʼnda nga kinikʼien kʼoa kʼoasʼin tsakʼasjengʼani je jaʼaínle Jeobá.
11. Jósʼin tsakakó Jesús nga nʼio tsjoake chjota (Juan 13:1).
11 Kʼianga tsakʼéchjíntjainá Jesús kʼoasʼin tsakakóni nga mandosinle je chjota, kʼoa ngisaa timandosinngánile je xi chjotatjenngile ma (Prov. 8:31; tʼexkiai Juan 13:1 d). Kʼianga jaʼai Jesús i̱ Sonʼnde tsee kjoañʼai jaʼá kʼoa kinikʼien. Kʼoa nga kitsoyason ali tsa tokuijin xá kʼoakisʼinni nga tjínnele kuitsoyason, kuinga koanndosinle chjota nga kitsoyanile kʼoa nga tsakasenkaoni. Nichxin nga kinikʼien, tsakanéjon ndso̱ko̱ chjotatjenngile, kitsjoanganʼiole kʼoa nʼio chjíle jme xi kitsoyale (Juan 13:12-15). Kʼoa kʼianga jekjitʼa yá kitsjoale kjoachoya je chjota xi kʼoati yá kisʼetʼa nga kʼia. Kʼoati kitsole je Juan nga katasíkuinda je na̱le (Luc. 23:42, 43, TNM; Juan 19:26, 27). Kʼianga kitsoyason je Jesús kʼoa nga kʼienntjainá kʼoasʼin tsakakóni nga nʼio tsjoakená.
12. Jmé xi tísʼín ndʼaibi je Jesús nga tosi tonda tíbasenkaoná.
12 Kʼianga kʼien Jesús toñandia kʼien nga kitsjoa kjoabijnachonle xi totʼatsaan (Rom. 6:10). Tonga tojo tísíxá nga tíbasenkaoná. Tsee kjoanda tísokóná ndʼaibi nga tsakʼéchjíntjainá Jesús. Rey sʼin tíjna, Naʼmitítjon ma kʼoa jko̱ sʼin tíjnale jtín (1 Cor. 15:25; Efes. 5:23; Heb. 2:17). Jé tísíkatíoxkó chjotale xi ya ngʼajmi koai kao chjotankjín xi i̱ Sonʼnde koatio, tosi tonda kʼoatísʼín ndʼaibi kʼoa kʼiaa tsín tikʼoasʼinni kʼianga tojeme kjoetʼa je kjoañʼai xi nʼio tse (Mat. 25:32; Mar. 13:27). e Kʼoati je títsjoáná jmeni xi basenkaoná nga tosi tonda je Jeobá tinixálee (Mat. 24:45). Tosi tonda koasenkaoná kʼianga koatexoma xi jngo jmi nó. Ali tokuijin xá kitsjoani Jeobá je ʼNdíle nga kʼienntjainá, kʼoati nkjínsa koya josʼin tíbasenkaoná.
TOSI TONDA KATAʼYASAA
13. Jósʼiaan nga ngisa nda koa̱njinná jokji tsjoakená je Jeobá kao Jesús.
13 Kʼianga si̱kjaʼaitsjenjiaan ngisaa nda koa̱njinná jokji tsjoakená je Jeobá kao Jesús. Koaan tsa jngo kʼoa tsa nkjínsa Evangelio kʼoéxkiaa tongini nga kjesa faʼaitsjenyajin je Kjoabiyale Cristo kʼoa kʼianga jekjoaʼato nichxin nga kjoaʼaítsjenya. Tochoa choa capítulo kʼoéxkiaa kʼianga jngó jngó kʼa chótʼayá. Tsa kʼoasʼiaan, koa̱njinná ánni nga tsjoacha koa̱nñá je Jeobá kao Jesús, kʼoa kʼoéyanajmílee xi kjaʼaí jmeni xi koa̱njinná kʼianga chótʼayá.
14. Tojo tso Salmo 119:97, jméni xi sʼiaan nga tosi tonda koa̱njinná tʼatsʼe kjoabʼechjíntjai kʼoa nga koa̱njinná jmesani xi bakóya je Biblia (kʼoati chótsenlai sén xi faʼaitʼa).
14 Ninga jekjoatsená nga tichotʼayá Énle Niná nkjínsa koya xi majinná nga chotʼayajiaan tʼatsʼe nga kixi jmeni xi sʼín Niná nga tsjoakená kʼoa nga tsakʼéchjíntjainá. Kʼianga tosi tonda koa̱njinná xi tʼatsʼe jebi, chótʼayajiaan jotso je xo̱n xi síkasénná naxinandále Niná. Kʼiatsa tsín koa̱njinná jngo texto kjoásjaiyaa jme xi tínchja̱ni, xijekoa̱n, si̱kjaʼaitsjenjiaan jmeni xi koa̱njinná tʼatsʼe Jeobá, tʼatsʼe ʼNdíle kʼoa tʼatsʼe jokji tsjoakená nga jao (tʼexkiai Salmo 119:97). f
Ninga jekjoatsená nga tichotʼayá Énle Niná tosi tonda kʼoailee kjoanda Niná nga tsakʼéchjíntjainá (Chótsenlai párrafo 14)
15. Ánni machjénni nga tosi tonda chótʼayá je Biblia.
15 Kʼianga chótʼayá Biblia sakʼoajin tsín tokʼia koa̱njin chjotsená tsa jmeni. Kʼianga chotʼayá yaa mangóson joma nga oro básjai chjota. Jngo chjota xi oro básjai nichxin bʼéngi kʼianga masjaile kʼoa tosi tonda básjai nga̱ be nga nʼio chjíle ninga toʼi̱natjín oro koa̱nsjaile. Jmeni xi majinná kʼianga chotʼayá Biblia ngisaa chjíle tikʼoajinni je oro (Sal. 119:127; Prov. 8:10). Kuinga machjénni nga ntsjaintsjai kʼoéxkiaa kʼoa chótʼayá je Biblia (Sal. 1:2).
16. Jméni xi sʼiaan nga chjénngilee je Jeobá kao Jesús.
16 Si̱kjaʼaitsjenjiaan jósʼin koa̱nchjénná jmeni xi kjimajinná kʼianga tichotʼayá. Koaan chjénngilee Jeobá nga ñaki kixi jmeni xi sʼín kʼianga tsín ʼya xi chja̱ʼajiaan. Nga tsjoake Jesús je Nʼaile kʼoa nga tsjoake je chjota tsee kjoañʼai tsakjaʼá. Koaan chjénngilee jokisʼin je Jesús, ninga tse kjoa kuitjátojiaan nga je Niná tinixálee, koaan kuinyakoaa je ndsʼee ninga ñʼai koa̱nná kʼoa kʼuínyalee chjota ánni nga skoe̱ni jme kjoanda xi tjínná nga je Jeobá tsakʼéchjíntjainá.
17. Jmé xi chótʼayajiaan ya kjoaʼmiya xi ijngo.
17 Ngisaa tsjoacha koaan je Jeobá kao Jesús kʼianga koa̱njinná josʼin tíjna nga tsakʼéchjíntjainá (Juan 14:21; Sant. 4:8). Kuinga machjénni nga tosi tonda chótʼayá je Biblia kao xo̱n xi síkasénná naxinandále Niná ánni nga tosi tonda koa̱njinniná josʼin tíjna nga koanchjíntjé. Ya kjoaʼmiya xi ijngo kui chótʼayajiaan jmé kjoanda xi tjínná nga koanchjíntjé kʼoa jósʼin koakoá kjoanda nga kʼoasikji tsjoakená Jeobá.
KJOAJNDA 107 Koakoá kjoatsjoacha josʼín Niná
a JÓSʼIN TSOYANILE: Nga “si̱kjaʼaitsjenjiaan” ngisaa nda koa̱nchoyaná jmeni xi tichotʼayá.
b 1 Juan 4:9, 10: “Kʼoasʼin koanchoyale ni̱ma̱ná josʼin nga Niná tjaokená, nga̱ kisikasén i̱ sonʼndebi je ʼndíle xi tojngo mani, jméni nga kuiyochonsínía xi totʼatsʼe. 10 Kʼuisʼin tjín xi kjoatjaocha: Ali kuijin nga ñá xi koantsjoachaa Niná, tonga je Niná xi koantsjoakená nga ñá. Kisikasén ʼndíle xi jéentjainá koanle”.
c Romanos 8:32, 38, 39: “Je xi likui tsakʼéchjoale nga kisʼele kjoañʼai, nda tsa titsʼeni ʼndíle, tonga kitsjoatʼa xi tʼatsaan ngatsʼiaa, a tsín kʼoati tsjoákjoatjaoná ngayije kjoa kao Cristo. 38 Tokui jebi ñaki tjíjngole koan, nga nikjoabiyajin, nikjoabijnachonjin, niʼánkjejin, ni xi ngʼajko̱lejin, nijejin xi tjínle nganʼio, ni xi ndʼaibijin, nije xi sʼa nroajin, 39 ni xi ngʼajin, ni xi nangijin, nitojngojinsa xi xá kisʼendani xi koa̱n kjoaʼaxinná je kjoatjaochale Niná nga tiyokoaa Cristo Jesús Nainá”.
d Juan 13:1: “Kje bitjojinsa sʼuí paxko. Tjínjinle Jesús nga jenroachrian orale nga kuitjoni sonʼnde, nga koaikonle Nʼainá. Jesús tjaoke koan ngatsʼi xi tsʼe xi tjío i̱ sonʼndebi, kʼoasʼin tjaoke koan saʼnda xi jetʼani”.
e Ya Efesios 1:10, je Pablo kui nchja̱ni nga sʼe̱xkó “tsojmi xi tjío ngʼajmi”. Ya Mateo 24:31 kao Marcos 13:27, je Jesús kui nchja̱ni nga “kʼoexkó chjotale xi tsakjaʼájin”. Kjaʼaí kjaʼaínile jmeni xi kinchja̱ni. Je Pablo kui kinchja̱ni nga kao nganʼiotsjele Jeobá kjoejinni je chjotale Cristo xi ya koatexomakao Jesús ya ngʼajmi. Kʼoa je Jesús kui kinchja̱ni nichxin nga kjoaʼaíkʼá je chjotale xi ya ngʼajmi koatexomakao kʼianga jetíjna je kjoañʼai xi nʼio tse.
f Salmo 119:97: “Nʼio tsjoake̱ je kjoatéxomali. Kui sikjaʼaitsjenjian bʼajnda nichxin”.
