KJOAʼMIYA XI CHOTʼAYA 3
KJOAJNDA 35 Kui kuenta sʼiaan xi ngisa nʼio chjíle
Kui kʼoasʼiaan jmeni xi sasénle Jeobá
“Nga nokjonchá Jeobá yaa nroani nga sʼená kjoachjine, kʼoa je kjoankjíntokonle xi nʼio ngʼa tíjna kui je kjoamajintokon” (PROV. 9:10).
XI TÍNCHJA̱NI
Jósʼin si̱chjén je kjoachjine, kjoankjíntokon kao kjoamajintokon nga kui kʼoasʼiaan xi ndatjín.
1. Jméni xi nʼia ngatsʼiaa kʼoa jmeni xi ñʼai maná.
NGANTSJAI nga nikjaʼaitsjenjiaan jmeni xi nʼia. Tobʼelañá, jmé xi kuichiñá kʼoa jóchon sójnafé. Tonga tjín jmeni xi ñʼai maná nga kʼoanʼia, jolani jósʼin si̱kuindaa yaoná nga tsín nanda chʼin katakatʼaná, jósʼiaan nga nda sʼe̱ tokoán, jósʼiaan nga si̱kuindaa familianá kʼoa jósʼiaan nga ngisasa nda si̱xálee Jeobá. Kui xi mená nga kui kʼoasʼiaan xi ndatjín, xi tsjoa kʼoe tokoán, xi nda kʼoe kon xi tjío yaniʼyaná kʼoa xi tsjoa kʼoe kon Jeobá (Rom. 12:1, 2).
2. Jñánile nga jan koya xi koasenkaoná nga kui xi ndatjín kʼoasʼiaan.
2 I̱ kjoaʼmiya jebi jan koya tjínni xi chótʼayajiaan xi koasenkaoná nga kui xi ndatjín kʼoasʼiaan. Xi títjon, nda kjoásjaiyaa jmeni xi sʼiaan. Xi majaoni, kuenta sʼiaan jósʼin síkjaʼaitsjen Jeobá. Kʼoa xi majanni, nda chósonnilee josʼiaan. Kʼoati kui chótʼayajiaan jmésa xi sʼiaan nga sʼe̱ná kjoankjíntokon (Prov. 2:11).
NDA KJOÁSJAIYAA
3. Jngo choa̱ tʼejnai ánni machjénni nga títjonkjoanla kjoásjaiyaa nga kjesa chjoéjinjián jmeni xi sʼiaan.
3 Xi títjon, ndakjoanla kjoásjaiyaa jmeni xi sʼiaan tsa jme kjoa tibitjatojiaan ánni nga kui kʼoasʼiansíñá xi ndatjín. Si̱kjaʼaitsjenjinla josʼín je chjinexki kʼianga sísinle jngo chjota xi nʼio táo chʼin tjínle. Títjonkjoanla kotʼa, kjonangile jómale kʼoa kʼiaa tsjoále je xki xi machjénle. Kʼoatisʼinni xi kao ñá, machjén nga títjonkjoanla kjoásjaiyaa jmé xi tjínnele sʼiaan tsa jme kjoa xi tibitjatojiaan. Kataʼyala jmé xi koa̱n sʼiaan.
4. Tojo tso Proverbios 18:13, jmé xi koa̱n sʼiaan tsa jmeni xi mená jchaa (kʼoati chótsenlai sén xi faʼaitʼa).
4 Kʼiatsa jmeni xi mená jchaa, machjén nga títjonkjoanla kjoásjaiyaa. Si̱kjaʼaitsjenla tsa kʼoakʼuínná nga jngo sʼuí kjuian, tonga tsa tsín ʼyaxkoaan ʼyani xi kʼoejna sʼuí kʼoa josʼin tísʼendajin, machjén nga chjónangiaa kʼiáni kʼoa jñáni sʼe̱jna je sʼuí, jótjín chjota koa̱nña, ʼyáni xi koandiaa, ʼyáni xi kuicho, jmésa xi koa̱n kʼoa a sʼee xi xán tjínle. Nga jchaa jebi kui xi koasenkaoná nga chósonnilee tsa kjuian kʼoa tsa mai (tʼexkiai Proverbios 18:13). a
Tjasjaiyai tsa jmeni xi meli jchai (Chótsenlai párrafo 4) e
5. Jmé xi sʼiaan tsa jeʼyaa josʼin kuichomani ya sʼuí jñani kʼoakaʼminá nga koanngián.
5 Kʼianga jeʼyaa jmeni xi koa̱n, kuenta sʼiaan josʼin kuichomani. Tobʼelañá, tsa ya kuicho je chjota xi tsín sítjoson kjoatéxomale Niná kʼoa tsa toxkia kʼoabí xi xán tjínle tsakui nichxin tsín tinda kuitjoni je sʼuí (1 Ped. 4:3). Kʼoa jósʼiaan tsa kʼiakjoan sʼe̱jna je sʼuí nga reunión tjínná kʼoa tsa kʼiaje̱ nga mangínkʼinyasoán. Tsa kuenta sʼiaan ngayeje jebi kui xi koasenkaoná nga kui kʼoasʼiaan xi ndatjín. Ningalani jeʼyaa jmeni xi sʼiaan, kʼoati machjén nga kuenta sʼiaan jósʼin síkjaʼaitsjen Jeobá (Prov. 2:6).
KUENTA SʼIAAN JOSʼIN SÍKJAʼAITSJEN JEOBÁ
6. Tojo tso Santiago 1:5, ánni machjénni nga kʼoétsʼoalee Jeobá.
6 Nga kʼoétsʼoalee Jeobá kʼoakʼuínlee nga katabasenkaoná nga kʼoatisʼin si̱kjaʼaitsjeen josʼin síkjaʼaitsjen je, nga̱ kʼoatso nga tsjoáná kjoachjine nga kui kʼoasʼiaan jmeni xi sasénle (tʼexkiai Santiago 1:5). b
7. Jméni xi sʼiaan nga jchaa josʼin síkjaʼaitsjen Jeobá. Jngo choa̱ tʼejnai.
7 Kʼianga jekʼoétsʼoalee Jeobá kuenta sʼiaan jmeni xi tsoná. Tobʼelañá, kʼiatsa tjín jña timangián tonga tsa tsín nanda ʼyaxkoaan je ndiaa, jejin chjónangilee xi bexkon kʼoa ndajin koasenñoaa jokuitso ánni nga jchasíñá josʼin ndiaa kjuian. Tikʼoasʼinni, kʼianga jekabʼetsʼoalee Jeobá, kjoásjaiyaa jotso je kjoafaʼaitsjen xi tsjoá Biblia kʼoa si̱tjosoán jmeni tso. Si̱kjaʼaitsjenla ijngokʼá tʼatsʼe je sʼuí xi jená kanikʼaxkiaa. Kʼiatsa mená kjuian kuentajin sʼiaan jótso Biblia tʼatsʼe sʼuí jñani tosʼínjen sʼínkjá chjota, tʼatsʼe nga ya fajtaa je chjota xi tsín nda sʼín kʼoa nga kui xále Niná ngisa kʼoailee kjoandosin tikʼoajinni nga to yaoná kjuinñá (Mat. 6:33; Rom. 13:13; 1 Cor. 15:33).
8. Jméni xi sʼiaan tsa jmeni xi mená jchaa (kʼoati chótsenlai sén xi faʼaitʼa).
8 Sakʼoa machjén nga chjónangilee je ndsʼee kao tichjaa xi jetjínle kjoafaʼaitsjen tsa jmeni xi mená jchaa. Tonga kʼoati ndatjín nga kʼoati ñásoa kjoásjaiyaa. Nkjín xo̱n bʼasje naxinandále Niná xi koa̱n si̱chjén nga kjoásjaiyaa. Jolani je Xo̱n xi síchjén je testigole Jeobá nga jme xi básjaiya kao libro Textos bíblicos para la vida cristiana. Kui xi mená nga kui kʼoasʼiaan jmeni xi sasénle Jeobá.
Kuenta tʼiain josʼin síkjaʼaitsjen Jeobá (Chótsenlai párrafo 8) f
9. Jósʼin jchañá tsa sa̱sénle Jeobá jmeni xi sʼiaan (Efesios 5:17).
9 Machjén nga nda jchaxkoaan je Jeobá ánni kui kʼoasʼiansíñá jmeni xi sasénle. Ya Proverbios 9:10 itso: “Je kjoankjíntokonle xi nʼio ngʼa tíjna kui je kjoamajintokon”. Tsa mená sʼe̱ná kjoamajintokon tjínnele jchaxkoaan jokjoan Jeobá, jmé xi tjínndajinle, jméni xi tsjoake kʼoa jméni xi jtike. Si̱kjaʼaitsjenjiaan jebi: “Nga jeʼbexkoan jokjoan Jeobá, a sasénle tsa i̱ sʼian” (tʼexkiai Efesios 5:17). c
10. Ánni ngisa chjínile nga si̱tjosoán je kjoafaʼaitsjen xi tsjoá Biblia tikʼoajinni jmeni xi tsoná je xíngiaa.
10 Kʼiatsa mená nga nda kuiyoaa ngixko̱n Jeobá sakʼoajin tsín sa̱sénle je xíngiaa kʼoa tsa miyoná jmeni xi sʼiaan. Tobʼelañá, tsakui nichxin je xi xijchá ma kʼoakuitsole tsotile nga je katabixankao jngo chjota xi tjínle tao̱n kʼoa tsa xi tse tao̱n kʼoejnangi nga kuixan. Kuijin kʼoatsoni xi xijchá ma nga mele nda kʼoéjna je tsotile. Tonga tsa tsínni nda tíjna ngixko̱n Jeobá je chjota xi kuixankao, machjén nga i̱ tso xi sikjaʼaitsjenjin je tsoti: “A koasenkaona chjota jebi nga ngisa nda sixále Jeobá”. Kʼianga jchaa josʼin síkjaʼaitsjen Jeobá kuenta sʼiaan nga kʼoatso Mateo 6:33 nga kui xále Niná títjon si̱kʼéjnaa xi chjotale Cristo maa. Ningalani ʼyaxkoán je xijcháná kʼoa ʼyaxkoán josʼin ngale je chjota jñani tsaan, je xi ngisa chjíle kuinga kjoáyatsjoaa kon Jeobá.
NDA CHÓSONNILEE JOSʼIAAN
11. Tojo tso Filipenses 1:9, 10, jmé xi koasenkaoná nga kui xi ndatjín kʼoasʼiaan.
11 Kʼianga jechótʼayajiaan kjoafaʼaitsjen xi tsjoá Biblia chósonnilee josʼiaan (tʼexkiai Filipenses 1:9, 10). d Si̱jinlee yaoná jósʼin kuichomani jmeni xi mená sʼiaan. Sakʼoajin choa ñʼai koa̱nná josʼiaan kʼoa sakʼoajin tsín jchaa jméni xi sʼiaan. Tonga tsa si̱nkjínlee tokoán kui xi koasenkaoná nga kui xi ndatjín kʼoasʼiaan ninga ñʼai koa̱nná.
12, 13. Kʼiatsa ndakjoanla si̱kjaʼaitsjenjin, jósʼin koasenkaoli nga nda chjoéjin je xá xi sʼiain.
12 Tikjaʼaitsjenjinlai jebi. Kʼiatsa xálani tifasjai kʼoa tsa chan so̱koxáli, kuijin kuenta sʼiain jókji kjin jñani si̱xái, jóchon kuitjásʼain kʼoa jóchon kuitjui. Ningalani tsín chʼaotjín nga ya si̱xái, tonga kʼoati kui kuenta sʼiain jñáni ngisa meli nga kʼuínni̱xái, a yaa jñani ngisa tsjoachai jme xá xi sʼiain axo yaa jñani ngisa tse koa̱nchjíli. Tonga tjínsa jmeni xi kʼoati kuenta sʼiain.
13 Kʼianga jeso̱koxáli, tikjaʼaitsjenjin jebi: A kʼoakoa̱nli nga kʼuín je kjoajtín xi satíoná. A koa̱nʼali nga si̱kʼayalai nichxin xi tjío ya yaniʼyali kʼoa nga kʼuínyalai xi tʼatsʼe Jeobá. Kʼiatsa kui si̱kjaʼaitsjenjin jebi ngisaa kui kʼoailai kjoandosin josʼin ʼyaxkuín Jeobá kʼoa jmeni xi machjénle je xi tjío ya yaniʼyali. Ngisaa chjíle jebi tikʼoajinni tsa tse tao̱n kuinje̱li. Kʼiatsa kʼoasʼiain, jé Jeobá sichikontʼainli nga kui kʼoatinʼiai jmeni xi sasénle.
14. Kʼianga tsjoachaa xíngiaa kʼoa nga nijinlee yaoná jonʼia, jósʼin basenkaoná nga tsín chʼao satío kon xi ngikʼa.
14 Kʼianga ninkjínlee tokoán kuenta nʼia josʼin síkjaʼaitsjen xi ngikʼa kʼoa alikui kui kʼoanʼia jmeni xi chʼao bʼé kon (Filip. 1:10). Tobʼelañá, jokjoan najño xi chʼakjá kʼoa josoyoaa. Ninga tsjoachaa josoyoaa kʼoa jokjoan najño xi chʼakjá kʼoati machjén nga kuenta sʼiaan jósʼin síkjaʼaitsjen je chjota xi kotsenná kʼoa kao je ndsʼee, a sasénle josoyoaa. Tsa si̱jinlee yaoná josʼiaan kʼoasʼin koakoñá nga ʼyaxkoán josʼin síkjaʼaitsjen xi kjaʼaí. Tsa tsjoachaa xíngiaa kuenta sʼiaan josʼin síkjaʼaitsjen kʼoa nangitokon koaan (1 Cor. 10:23, 24, 32; 1 Tim. 2:9, 10). Tsa kʼoasʼiaan, kʼoasʼin koakoñá nga tsjoachaa xíngiaa kʼoa nga ʼyaxkoán josʼin síkjaʼaitsjen.
15. Jméni xi machjén nga títjonkjoanla sʼiaan tsa nʼio tjínle kjoandosin jmeni xi tibʼendajiaan.
15 Tsa nʼio tjínle kjoandosin jmeni xi tibʼendajiaan, tjínsa jmeni xi machjén nga kuenta sʼiaan, nga̱ je Jesús kʼoakitso nga títjonkjoanla chósonnilee tsa kuitjosonná jmeni xi tibʼendajiaan (Luc. 14:28). Machjén nga si̱kjaʼaitsjenjiaan jótjín nichxin si̱kʼayalee kʼoa jókji taon kjoeyaná nga kuitjosonná jmeni xi mená sʼiaan. Kʼoati ndatjín nga cho̱bayañá kao xi tjío ya yaniʼyaná ánni nga kʼoati tsjoánganʼioni tsanda je. Tsakui nichxin kʼoati machjén nga si̱kʼantjaiyajiaan josʼin jetibʼendajiaan tsakai kʼiatsa jme kjoafaʼaitsjen tsjoáná xi tjío ya yaniʼyaná. Tsa kuenta sʼiaan jokuitsoná koasenkaoná nga nda kuichomani jmeni xi tibʼendajiaan (Prov. 15:22).
KUI KʼOASʼIAAN JMENI XI NDA KUICHOMANI
16. Jméni xi sʼiaan nga nda kuichomani jmeni xi kʼoéndajiaan (kʼoati chótsenlai je recuadro “ Jmé xi koasenkaoná nga kui xi ndatjín kʼoasʼiaan”).
16 Tsa kjuintjenngiaa kjoafaʼaitsjen xi kachotʼayajiaan i̱ kjoaʼmiya jebi nda kuichomani jmeni xi sʼiaan. Xi kachotʼayajiaan i̱bi koasenkaoná nga kui kʼoasʼiaan xi sasénle Jeobá. Je Jeobá si̱jélee nganʼio nga nda kuichomani ngayeje jmeni xi kʼoéndajiaan.
17. Jmé xi koasenkaoná nga nda chjoéjiaan jmeni xi sʼiaan.
17 Ningalani nda kichomani jmeni xi sa jekinʼia, alikui koa̱n nga totsaan kjoafaʼaitsjen si̱chjén kʼoa nga to yaoná kjuinñá, machjén nga kuenta sʼiaan je kjoachjine xi tsjoáná Jeobá nga̱ tojé xi koa̱nle koasenkaoná, tsjoáná kjoankjíntokon kao kjoachjine (Prov. 2:1-5). Kʼoa tijé koasenkaoniná nga kui kʼoasʼiaan jmeni xi sasénle (Sal. 23:2, 3).
KJOAJNDA 28 Jósʼiaan nga miyole koaan je Jeobá
a Proverbios 18:13: “Kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole”.
b Santiago 1:5: “Tsa jngo xi jon xi chale kjoaʼisentakon, katasíjéle Niná, je xi kjaínga tse tsjoákjoatjaole ngatsʼi, kʼoa likui taon be. Kʼoasʼin kʼoaile”.
c Efesios 5:17: “Xi kui, ali chi̱kónjin mao, tonga katamachoyano josʼin nga mele Nainá”.
d Filipenses 1:9, 10: “Jebi xi bʼetsʼoantjaino, nga je kjoatjaochano koa̱nnkjínyani kao kjoachjine kao kjoaʼisentakon, 10 jméni nga jchasínio xi nda tjín, kʼoa jméni nga tsje koa̱nsínio, nga nijmejin jée sʼe̱no kʼia nichxin nga kjoaʼaí Cristo”.
