Si̱kjaʼaitsjenla jme xi tjenkao tsa kʼoalani tjín. Tobʼelañá, jngo ndsʼee xi kisikʼien yaole je tile. Kʼoa ndsʼee jebi kui kisikjaʼaitsjen tsa tongini be je Jeobá nga ska̱le je kʼoa kao chjoónle nga kui kjoa kjoaʼatojin. Nʼio nkjín kjoa bitjatojiaan sonʼnde, tonga a koaan kʼoasʼin koa̱nkjainná nga je Jeobá xotso ngayeje jme xi matʼeen.

Tsa nda chótʼayasoán jme xi tso 1 Corintios 10:13 jchañá nga tsínkui xi tsonile tsa tongini be je Jeobá jme kjoa xi ska̱ná kʼoa kui kjoéjin nga kuitjátojiaan. Ñola koya kataʼyaa anni kʼoabixónsíñá.

Xi títjon, je Jeobá kitsjoaná kjoandái ngatsʼiaa. Kui xi mele nga ñá chjoéjiaan jme xi sʼiaan (Deuteronomio 30:19, 20; Josué 24:15). Kʼianga kui chjoejiaan jmeni xi sasénle Jeobá, ʼyañá nga je koandiaaná (Proverbios 16:9). Tonga kʼianga kui chjoéjiaan xi tsín ndatjín, alikui nda bichómani (Gálatas 6:7). Tsa jelani Jeobá kjoéjin je kjoa xi bitjatojiaan, tsínjinniná kjoandái nga ñá chjoéjiaan jmeni xi sʼiaan.

Xi majaoni, je Biblia kʼoatso nga “je nichxin kʼoa xi tsín choyalee faʼaine ngatsʼi chjota” (Eclesiastés 9:11). Tsakui nichxin jngo kjoaxkón so̱kole chjota, tonga kuinga kʼoamani nga tokʼiakjoan ya tíjna nga tjín xi kama. Je Jesús kʼoakitso nga jngo kjoaxkón kisoko kʼianga jngo torre kiskane chjota kʼoa 18 kʼien. Je Jesús kʼoakitso nga tsín je Niná xokisikao chjota jebi nga kʼoasʼin kʼien (Lucas 13:1-5). Kuinga kʼoabixónsíñá nga tsín je Niná xotso ʼyani xi batiokon kʼoa ʼyani xi mʼe kʼianga jngo kjoaxkón sʼe.

Xi majanni, nga jngó jngoá tjínnele koakoá tsa kixi kjuintʼalee Jeobá. Je Na̱i kʼoakitso nga kuinga nixánilee Jeobá nga tjín xi tsjoáná kʼoa nga tsín kixi kjuintʼalee tsa kjoa kuitjátojiaan (Job 1:9-11; 2:4; Apocalipsis 12:10). Tsa tjínlani kjoa xi tsín tsjoáʼnde je Jeobá nga kuitjátojiaan nga be nga tsín ska̱ná, a tsí kʼoakuixoán nga kjoaixi jme xi kitso je Na̱i nga totjín xi tinʼianilee nga tinixálee Jeobá.

Xi mañoni, je Jeobá alikui tongini be ngayeje jmeni xi koa̱nná. Tsa je xi mele Jeobá koaan skoe̱ jme xi koa̱nná nichxin xi nroaján (Isaías 46:10). Tonga je Biblia kʼoatso nga tsín to ngayeje nga tongini kotsenle Jeobá jmeni xi koa̱n (Génesis 18:20, 21; 22:12). Nga nʼio tsjoakená kʼoa nga ñaki kixi jme xi sʼín, alikui je fajin kjoandái xi kitsjoaná, tsjoáʼndená nga ñá chjoejiaan jmeni xi nʼia (Deuteronomio 32:4; 2 Corintios 3:17).

Jókitsonile Pablo nga kʼoakitso nga tsín tsa tsjoáʼnde Niná nga ngisa tse kjoa chʼao sikaoná kaoni tsa je nganʼioná. Kʼianga kʼoakitso Pablo én jebi kui tínchja̱ni jmeni xi sʼín Jeobá kʼianga kjoa tiyojiaan, ali tsakuijin tínchja̱ni jmeni xi sʼín kʼianga kje kʼoamajin. * Tsa ninʼiotʼaa yaoná je Jeobá koasenkaoná nga ska̱ná tojme kjoani xi kuitjátojiaan (Salmo 55:22). Jaola koya kataʼyaa anni kʼoakitsoni je Pablo.

Xi títjon, je Pablo i kitso: “Nijmejin kjoa xi chʼao síkaono xi tsín tsa kʼoati chʼao síkao ngatsʼi chjota”. Kui xi tsonile nga toxá kjoa sʼe̱niná sonʼnde, nga̱ je Na̱i kjinentsja jme xi chon. Tonga tsa je Jeobá si̱nʼiotʼaa yaoná ska̱ná je kjoa xi kuitjátojiaan kʼoa kixi kjuintʼalee je Jeobá (1 Pedro 5:8, 9). Tongileni jme xi tso 1 Corintios 10:13, je Pablo kui kinchja̱ni je kjoa xi jaʼatojin je chjota  israelita ya ʼndekixí (1 Corintios 10:6-11). Je xi je Jeobá kisinʼiotʼa kiskale kjoa xi jaʼatojin. Tonga tjínkʼa je chjota israelita xi tsín kisitjosonle Jeobá. Alikui kixi kitʼale Jeobá nga̱ tsín je kisinʼiotʼa.

Xi majaoni, “nʼiotʼakon Niná”, xi tsonile kixi je Niná. Jósʼin tsoyanile jebi. Kʼianga ʼyaa josʼin kisikuinda Jeobá je choʼndale, ʼyañá nga bakóle kjoatsjoacha je choʼndale xi tsjoake kʼoa xi sítjoson kjoatéxomale (Deuteronomio 7:9). Kʼoati ʼyaa nga sítjoson ngayeje jmeni xi tso (Josué 23:14). Xi títjon, ʼyañá nga je Jeobá tsín tsjoáʼnde nga nʼio tse koa̱n je kjoa xi kuitjátojiaan tsa tsín tichókjoakaoniná. Xi majaoni, ʼyañá nga je Niná “tsjoá josʼin” kuitjoñá jngo kjoa, xi tsonile, koasenkaoná nga kuitjátojiaan je kjoa.

Jósʼin basenkaoná Jeobá nga bitjatojiaan jngo kjoa kʼiatsa je ninʼiotʼaa. Tsa je xi mele koaan kjoaʼaxinná je kjoa xi tibitjatojiaan. Tonga si̱kjaʼaitsjeen jme xi kitso Pablo. Kitso: “Niná ñatje̱n tsjoá josʼin kuitjoo, jméni nga koa̱n jchókjoasínino”. ʼNdele nga kjoaʼaxinná kjoa tosaa totsjoánganʼioná kʼianga kaná je kjoa xi tibitjatojiaan. Kataʼyala josʼin tsjoánganʼioná.

• “Niná xi tsʼe ngayije kjoanijetakon, xi síjekonná ngayije kjoañʼainá” (2 Corintios 1:3, 4). Je Jeobá koaan sikinjenyʼánjin kjoafaʼaitsjenná kao ni̱ma̱ná kʼoa kui síchjén je nganʼiotsjele kao Biblia kʼoa kao xo̱n xi bʼasje “je choʼnda xi nʼiotʼakon, xi nda be xá” (Mateo 24:45; Juan 14:16, Romanos 15:4).

• Je Jeobá koaan sichjén je nganʼiotsjele nga koandiaaná (Juan 14:26). Je nganʼiotsjele Niná koaan sikjaʼaitsjenjinná jmeni xi tso Biblia ánni nga kui xi ndatjín chjoéjinsíñá.

• Je Jeobá koaan sichjén je ánkjele nga kuinyakaoná (Hebreos 1:14).

• Je Jeobá koaan sichjén je ndsʼee nga katatsjoánganʼioná je én xi kjoakaoná kʼoa jmeni xi sʼin tʼatsaan (Colosenses 4:11).

Jósʼin tjínnele koa̱njinná jmeni xi kitso Pablo ya 1 Corintios 10:13. Kuinga tsín je Jeobá kjoéjin je kjoa xi bitjatojiaan. Tsa je Jeobá si̱nʼiotʼaa ʼyañá nga chókjoakaoná tojme kjoa xi kuitjátojiaan. ʼYañá nga tsjoánganʼioná nga ska̱ná je kjoa xi kuitjátojiaan kʼoa koaan tosi tonda kixi kjuintʼalee.