1, 2. 1) Ánni nga tsín mangósonni je testigole Jeobá kao xi kjaʼaí relijión. 2) Jméni xi jchaa i̱ kjoaʼmiya jebi kʼoa kao xi ijngo.

JE CHJOTA kjitʼaa nga i̱ tsoná: “ʼYá xi séntítjonno”. Kuinga kʼoatsoni nga̱ nʼio nkjín relijión xi tjínle je xi binyatítjonle, tsa chjoón kʼoa tsa xʼin. Tonga ñá, ali tsa chjotajin xi séntítjonná. Je xi séntítjonná jé Jesucristo. Kʼoa je Jesucristo jé sítjosonle Jeobá, xi Nʼaile mani kʼoa xi séntítjonle (Mateo 23:10).

² Jngo jtín mani chjota xi “choʼnda xi nʼiotʼakon, xi nda be xá” ʼmile, je xi bándiaale naxinandále Niná nichxin xi tiyoaa ndʼaibi (Mateo 24:45). Tonga jósʼin ʼyañá nga je Jeobá xi tíbándiaaná kʼoa nga je Jesús tísíchjén. I̱ kjoaʼmiya jebi kʼoa kao xi ijngo jan koya tjínni xi kuitsoyaná tʼatsʼe jebi. Ningalani chjota síchjén Jeobá nga bándiaale je naxinandále, alikui jao tjínná nga jeni Jeobá xi bándiaale (Isaías 58:11).

3. Jmé xi tsakasenkao Moisés nga tsakasentítjonle je chjota israelita.

³ Kui nganʼiotsjele Niná tsakinyakao je chjota xi kitsjoale xá je Jeobá. Jé Moisés kiskoejin Jeobá nga koasentítjonle je chjota israelita. Jmé xi tsakasenkao je Moisés nga kitjosonle  je xá xi tsakʼaile. Kui nganʼiotsjele Jeobá tsakasenkao (tʼexkiai Isaías 63:11, 12). * Jékjoánni Jeobá xi tsakándiaale naxinandále, nga̱ kui nganʼiotsjele tsakasenkao je Moisés.

4. Jméni xi tsakakó nga kui nganʼiotsjele Niná tsakasenkao je Moisés (chótsenlai sén xi fitsʼiani kjoaʼmiya jebi).

⁴ Jósʼin tsabeni je naxinandá nga kui nganʼiotsjele Niná tsakasenkao je Moisés. Nga nganʼiotsjele Niná tsakʼaile je Moisés kui xi tsakasenkao nga koannile tsakatío kjoaxkón, kʼoati kui tsakasenkao nga tsakʼéjnatsenle jaʼaínle Niná je faraón (Éxodo 7:1-3). Je nganʼiotsjele Niná kʼoati tsakasenkao Moisés nga kisʼele kjoatsjoacha kʼoa nga tsejta koan. Kʼoa alikui kʼoakisʼin jokisʼin je chjota xi tsakinyatítjonle xi kjaʼaí naxinandá nga tsʼen koan kʼoa nga to yaole kini (Éxodo 5:2, 6-9). Alikui jao tjínná nga je Jeobá kiskoejin Moisés nga koasentítjonle naxinandále.

5. ʼYásani xi kitsjoale nganʼiotsjele je Jeobá nga tsakándiaale je chjota israelita.

⁵ ʼYásani xi kitsjoale Jeobá je nganʼiotsjele nga tsakándiaale je naxinandále. Je Biblia itso: “Je Josué tile Nun nʼio tse nganʼio xi tsʼe kjoachjine kisʼele” (Deuteronomio 34:9). “Jé nganʼiole Jeobá jaʼasʼenjinle je Gedeón” (Jueces 6:34). Kʼoa “kui nganʼiole Jeobá kitsjoanganʼiole je David” (1 Samuel 16:13). Ngatsʼi chjota jebi tsabení nga je nganʼiotsjele Niná tsakinyakao nga kʼoakisʼin jmeni xi tsín kʼoakoanle nga toje (Josué 11:16, 17; Jueces 7:7, 22; 1 Samuel 17:37, 50). Kʼoa jmeni xi kisʼin jé Jeobá tsakʼasjengʼa.

6. Ánni nga koanmenile Jeobá nga katabexkón je naxinandá Israel je chjota xi tsakinyatítjonle.

⁶ Jótjínnele kisʼin je chjota israelita nga tsabe nga je nganʼiotsjele Niná tsakinyakao je Moisés, Josué, Gedeón kao David. Tjínnejinle tsabexkón tsakai. Kʼianga chʼaosʼin kinchja̱ni xi tʼatsʼe Moisés je chjota israelita, je Jeobá i kitso: “Kʼiá saʼndani nga tsín skoe̱xkónna naxinandá jebi” (Números 14:2, 11). Alikui jao tjínná nga je Jeobá kiskoejin ngatsʼi chjota jebi nga tsakinyatítjonle naxinandále. Kʼianga kisitjoson je naxinandá josʼin tsakándiaa je chjota xi tsakinyatítjonle, jéni Jeobá xi kisitjosonle.

7. Jósʼin tsakasenkao ánkje je Moisés.

⁷ Jé ánkjele Niná tsakinyakao je chjota xi xá kitsʼaile (tʼexkiai Hebreos 1:7, 14). * Je Niná ánkje kisichjén nga tsakándiaale je Moisés. Xi títjon, je Niná kisikasén “ánkje xi koantsenjin yáxka̱cha” xi kitsjoale xá je Moisés nga sikatíondái kʼoa koasentítjonle je chjota israelita (Hechos 7:35). Xi majaoni, ánkje kisichjén Jeobá nga kitsjoale kjoatéxoma je Moisés nga katabakóyale je chjota  israelita (Gálatas 3:19). Xi majanni, je Jeobá i kitsole: “Tʼinkoai naxinandá ya ʼnde jñani kixinle. ¡Koeni! Jé ánkjena koaitítjonli” (Éxodo 32:34). Je Biblia alikui kʼoatso nga jngo ánkje tsabe je chjota israelita nga kʼoakisʼin jmeni xi kanikʼaxkiaa. Tonga josʼin kitsoyale Moisés kʼoa josʼin tsakándiaale je naxinandá, tsakakó nga je ánkje tsakasenkao.

8. Jósʼin tsakasenkao ánkje je Josué kao Ezequías.

⁸ ʼYásani xi tsakinyakao je ánkje. Je Biblia kʼoatso nga jngo ánkje tsakasenkao Josué nga kinjele kjoajchán xi tsakʼéjna kao chjota cananeo (Josué 5:13-15; 6:2, 21). Kʼoa nga koanskanni, kʼianga je rey Ezequías tsakasentítjonle naxinandále Niná, je chjotakjoajchán asirio kʼoakitso nga kuichosíkje naxinandá Jerusalén. Tonga nga tojngo nitje̱n, “je ánkjele Jeobá kitjo kʼoa 185,000 chjota asirio kisikʼien” (2 Reyes 19:35).

9. Ningalani chjotajée je xi tsakinyatítjonle, jméni xi tjínnele kisʼin je chjota israelita.

⁹ Je ánkjele Niná ñaki tsjení, tonga je chjota xi tsakinyakao chjotajéení. Tobʼelañá, je Moisés ñandia kʼianga tsín je Jeobá tsakʼasjengʼa (Números 20:12). Kʼoa je Josué alikui je Jeobá kiskonangile josʼin kʼianga kʼoakitso je chjota gabaonita nga jngo kjoasʼendajin kʼoenda kao naxinandá Israel (Josué 9:14, 15). Kʼoa ñandia kʼianga kjoangʼakon tsakʼetʼale je Ezequías (2 Crónicas 32:25, 26). Ningalani chjotajée je xi tsakinyatítjonle, je chjota israelita tjínnele nga kisitjosonle nga̱ jé ánkjele Jeobá tsakinyakao chjota jebi, kʼoa jékjoánni Jeobá xi tsakándiaale naxinandále.

10. Jósʼin tsakándiaale kjoatéxomale Niná je Moisés.

¹⁰ Kui Énle Niná tsakándiaale je chjota xi xá kitsʼaile. Je Biblia kʼoatso nga “Kjoatéxomale Moisés” tsakʼin je kjoatéxoma xi tsakʼaile chjota israelita (1 Reyes 2:3). Tonga je Biblia tsoya kixi nga jé Jeobá xi kitsjoale kjoatéxoma jebi. Kʼoa je Moisés kʼoati kui kjoatéxoma kisitjoson (2 Crónicas 34:14). Tobʼelañá, kʼianga kʼoakitsole Jeobá josiká nga kʼoenda je ndʼianajñole Jeobá, je Moisés ñaki kʼoakjoánsʼin kitjenngi ngayeje jme xi kitsole Jeobá (Éxodo 40:1-16).

11, 12. 1) Jméni xi tjínnele kisʼin je Josué kʼoa kao rey xi tsakatéxomale naxinandále Niná. 2) Jósʼin tsakándiaale Énle Niná je chjota xi tsakinyatítjonle naxinandále Niná.

¹¹ Je Josué tokʼoa jekijna choale je Énle Niná kʼianga chjotatítjon koan, kʼoa je Jeobá i kitsole: “Tjínneli nga ntsjaintsjai kʼoéxkiai. Kʼoa nichxin kao nitje̱n tjínneli chéché kʼoéxkiai, ánni nga nda si̱tjosonsíni ngayeje xi tjítʼa” (Josué 1:8). Kʼoa je xi rey koan nga jekoanskanni, kʼoati tjínnele nga nyaon nyaon tsakʼéxkia kjoatéxomale Niná kʼoa nga jngo copia kiski kʼoa nga kisitjoson ngayeje jme xi tjítʼa (tʼexkiai Deuteronomio 17:18, 19). *

¹² Jósʼin tsakinyakao nga Énle Niná tsakándiaale je xi tsakinyatítjonle naxinandá Israel. Tobʼelañá, kʼianga koansjai je Kjoatéxomale Moisés nga tíbatéxoma rey Josías, je secretariole tsakʼéxkiale, kʼoa nga kinrʼoé je Josías jotso kjoatéxomale Niná, tsakasénjndajon najñole. * Je Énle Niná tsakasenkao je Josías nga tsakjaʼáxin ngayeje xkóson xi tjín ya naxinandá kʼoa nga tsakʼéndajin nga katasʼejna je sʼuí Paxko, kʼoa je  sʼuí xi tsakʼéjna kui xi ngisasa nʼioje (2 Reyes 22:11; 23:1-23). Nga kui kitjenngi Énle Niná je Josías kao xi ngikʼa xi tsakinyatítjonle naxinandále Niná, kisikʼantjaiyaa jñani tsín kʼoasʼin tjíobándiaa kʼoa kitsoyale je naxinandá. Nga kʼoakisʼin kui xi tsakinyakao je chjota israelita nga kʼoakisʼin josʼin mele Niná.

13. Jméni xi tsín koanngóson je chjota xi tsakinyatítjonle naxinandále Niná kao xi tsakinyatítjonle xi kjaʼaí naxinandá.

¹³ Je chjota xi tsakinyatítjonle xi kjaʼaí naxinandá to kjoafaʼaitsjenle chjota kitjenngi. Tobʼelañá, je xi tsakinyatítjonle chjota cananeo kao naxinandále, nʼio chʼao kisʼin. Tijé xi xínkjín mani tsakjayokaoni, tixʼin xínkjín kʼoa tiyánchjín xínkjín tsakjayokaoni, cho̱ tsakjayokao, xtiʼndíle tsakaká kʼoa xkóson tsakʼétsʼoale (Levítico 18:6, 21-25). Kʼoa je kjoatéxoma xi kisʼele Babilonia kao Egipto josʼin nga tsje koatio alikui koanngóson kao kjoatéxoma xi tsakʼaile naxinandále Niná (Números 19:13). Je naxinandále Niná tsabee nga je xi tsakinyatítjonle kui kʼoakitsole nga tsje sʼin, nga tsje koaikao yaole kʼoa nga tsje sʼin skoe̱xkón Niná. Alikui jao tjínná nga jesoani Jeobá tsakándiaale.

14. Ánni nga tsakatekjáya kʼanile Jeobá je chjota xi tsakinyatítjonle naxinandále.

¹⁴ Je chjota xi tsakinyatítjonle naxinandále Niná, tjínkʼa xi tsín kʼoasʼin kitjenngi jmeni xi kitsole Jeobá. Tsín kitjenngi josʼin tsakándiaale nganʼiotsje, ánkje kʼoa kao Énle Niná. Nga kʼoakisʼin chjotatítjon jebi, je Jeobá tsakatekjáyale kʼoa tjínkʼa xi tsakjáʼale xále kʼoa kjaʼaí xi kitsjoale (1 Samuel 13:13, 14). Nga koanskanni, je Jeobá jé kiskoejin jngo chjotatítjon xi nʼio ndasʼin koasentítjon.

15. 1) Jókitso je profetale Niná kʼianga kui kinchja̱ni nga kjoaʼaí jngo xi nʼio nda koasentítjon. 2) ʼYáni chjotatítjon jebi.

¹⁵ Je Jeobá nʼio nkjín nó tongini kʼoakitso nga jngo xi nʼio nda koasentítjonle naxinandále skoéjin. Tobʼelañá, je Moisés kʼoakitsole je chjota israelita nga jngo profeta skoéjin je Jeobá xi koa̱nngóson Moisés, kʼoa kʼoakitsole nga tjínnele kjuinrʼoéle (Deuteronomio 18:15). Je Isaías kʼoakitso nga je xi skoéjin Jeobá chjotatítjon koa̱n (Isaías 55:4). Kʼoa je Daniel kʼoakitso nga je Mesías xi “Ngʼajko̱” sʼin kʼoéjna (Daniel 9:25). Kʼoa xijekoanni, je Jesús kʼoakitso nga je xi ngʼajko sʼin kʼoéjnale naxinandále Niná (tʼexkiai Mateo 23:10). * Je chjotale Jesús kao kjoatsjoa kitjenngile kʼoa koankjainle nga Niná kiskoejin Jesús (Juan 6:68, 69). Jméni xi tsakinyakao nga koanjinle nga je Jesucristo kiskoejin Niná nga koasentítjonle je naxinandále.

16. Jméni xi tsakakó nga kisʼele nganʼiotsjele Niná je Jesús.

¹⁶ Kui nganʼiotsjele Niná tsakasenkao je Jesús. Kʼianga kisʼenngindá je Jesús, je Juan kʼoakitso nga tsabe “je Espíritu Santo nga jitjojenni ngʼajmi, joni tsa jngo nise paloma, kisasenjnasonle Jesús”. Kʼoa xijekoan,  je “Espíritu Santo kikao ndi̱toon Jesús jña ʼndetʼaxintʼa” (Juan 1:32; Marcos 1:10-12). Kʼianga tsakʼejna Jesús i̱ Sonʼnde, kui nganʼiotsjele Niná tsakasenkao nga kitsoya kʼoa nga koanle tsakatío kjoaxkón (Hechos 10:38). Xi ijngosani, je nganʼiotsjele Niná tsakasenkao je Jesús nga tsakakó kjoatsjoacha, kjoatsjoa kʼoa nga nʼio kisʼejna kjoamakjainle (Juan 15:9; Hebreos 12:2). Nijngojin chjotatítjon xi kʼoasʼin tsakakó joni Jesús nga tjínle nganʼiotsjele Niná. Alikui jao tjínná nga je Jeobá kiskoejin Jesús.

17. Jósʼin tsakinyakao ánkje je Jesús.

¹⁷ Je ánkje tsakinyakao je Jesús. Kʼianga to chriankʼia kisʼenngindá je Jesús kicho je ánkje “kʼoa kisisinle” (Mateo 4:11). Kʼoa nga tojeme ni̱kʼien, “koantsen jngole ánkje xi tsʼe ngʼajmi, xi kitsjoale nganʼio” (Lucas 22:43). Je Jesús bení nga ánkje sikasén je Jeobá kʼianga koa̱nchjénle nganʼio (Mateo 26:53).

18, 19. Jósʼin tsakándiaale Énle Niná je Jesús kʼianga tsakakóya.

¹⁸ Kui Énle Niná tsakándiaale je Jesús. Saʼnda nga tsakʼétsʼiakao Jesús nga kitsoyason kʼoa saʼnda nga kinikʼien, kui tsakándiaale je Énle Niná. Kʼoa kʼianga toje kuiyá, kui kisikʼaxki̱ jmeni xi tongini kinokjoa tʼatsʼe Mesías (Mateo 4:4; 27:46; Lucas 23:46). Tonga nga kui nichxin, je chjotatítjonle relijión alikui kʼoakisʼin jokisʼin Jesús. Alikui kuenta kisʼin je Énle Niná kʼianga tsín koanngóson kao jmeni xi tsakakóya. Je Jesús yaa Énle Niná kiskoenile nga i̱ kitsole: “Je naxinandá kao énle bexkónna, tonga ni̱ma̱le xin tjíona. Tonga lijme chjíle nga bexkónna, nga̱ bakóya kjoafaʼaitsjen xi toxkia kjoatéxomale chjota” (Mateo 15:7-9). Je Jeobá alikui je chjota  jebi kiskoejin nga je kuinyatítjonle naxinandále, nga̱ tsín kitjenngi jotso je Énle.

¹⁹ Je Jesús kui Énle Niná kisichjén kʼianga kitsoyale xi kjaʼaí. Kʼianga tsakʼékjaoʼakao je chjotatítjonle relijión, alikui totsʼe kjoafaʼaitsjen kisichjén jmeni xi kitsole. Kʼianga kitsoya kui Énle Niná tsakʼangini ngantsjai (Mateo 22:33-40). Je Jesús alikui to yaole tsakʼasjengʼa tsa tokuila tsakʼéyanajmíle xi kjaʼaí jme xi kisʼin ya ngʼajmi kʼoa tsakuije̱ josʼin koannda ngʼajmi kao Sonʼnde. Tosaa kui xi kisʼin nga “kiskoʼaiʼndele kjoafaʼaitsjenle [chjota], jméni nga koa̱nchoyasínile xi tjíotʼa xo̱n Escritura” (Lucas 24:32, 45).

20. 1) Jósʼin tsakʼasjengʼa Jesús je Jeobá. 2) Jósʼin nga tsín koanngóson jokoankjoan je Jesús kao Herodes Agripa I.

²⁰ Ningalani tokʼoakoanle je chjota josʼin tsakakóya Jesús, je Jesús jé Jeobá tsakʼasjengʼa, xi tsakakóyale (Lucas 4:22). Kʼianga jngo chjotanyiná tsakʼasjengʼa je Jesús nga i̱ kitsole: “Maestro ndai”, je Jesús nangitokon koan kʼoa i kitso: “Ánni nga chjotandai ʼmisíninái, niʼyajin xi nda, tojngo je Niná” (Marcos 10:17, 18). Jinla nó nga koanskanni, jé Herodes Agripa I tsakatéxoma ya Judea, kʼoa alikui kʼoakisʼin jokisʼin je Jesús. Ñandia kʼianga tjíojtín, je Herodes “tsakʼakjá najño xi tsʼe chjotatítjon”, kʼoa kʼianga tsabe chjota kʼoa nga kinrʼoéle i kitso: “Jelabe jta̱le Niná, ali tsa je xi tsʼe chjota”. Je Herodes nʼio kisasenle nga je kitjongʼa. Tonga jókoan. Nga tiʼakʼiani je “ánkjele Nainá tsakʼéle Herodes, tokui kjoa nga Herodes likui kitsjoale kjoajeya Niná. Yája̱ kisʼele, kʼoasʼin kʼen” (Hechos 12:21-23). Alikui jao tjínná nga tsín je Herodes kiskoejin Jeobá nga chjotatítjon koa̱n. Tonga je Jesús tsakakó nga je Jeobá kiskoejin kʼoa jé Jeobá tsakʼasjengʼa ngantsjai. Nga̱ jé Jeobá xi batéxomale naxinandále.

21. Jméni xi chótʼayajiaan ya kjoaʼmiya xi ijngo.

²¹ Je Jeobá ali tsa tojngo jaojin nó nga chjotatítjon kisikao je Jesús. Kʼianga jejaʼáyale Jesús i kitsole je chjotale: “Ngayije kjoatéxoma kitsʼaina ngʼajmi, kʼoa i̱ sonʼnde. [...] Koeni an tijnakaono nga jon ngantsjai nichxin, saʼnda nga kjoetʼa sonʼndebi” (Mateo 28:18-20). Tonga jósʼin koandiaanile Jesús je naxinandále Niná nga ya ngʼajmi tíjna kʼoa nga̱ espíritu. ʼYáni xi sichjén Jeobá kʼianga kʼoasʼin sixá josʼin mele Cristo kʼoa nga kuitsoyale je naxinandále Niná. Jósʼin skoe̱ni chjotale Cristo ʼyani xi títsjoále xá je Jeobá. Yaa kjoaʼmiya xi ijngo kuitsoyaná xi tʼatsʼe jebi.