1. Jmé kjoanda xi tsjoáná je kjoabʼechjíntjai.

NʼIO tse kjoanda tsjoáná je kjoabʼechjíntjaile Jesús. Tobʼelañá, kuicho nichxin nga ya koatiojinle familiale Niná je chjota xi tsjoake xi kixi tíjna (chótsenlai je rekuadro “Jósʼin tsoyanile”). Je kjoabʼechjíntjai kʼoati tsjoáná kjoanda nga koa̱n kuiyoaa ngantsjai nichxin. Tonga ali tsa tokuijin, je kjoabʼechjíntjai nʼiosa tse xi tínchja̱ni xi nʼio tjínle kjoandosin ya ngʼajmi kao i̱ Sonʼnde (Hebreos 1:8, 9, TNM).

2. 1) Jméni xi nʼio tjínle kjoandosin ya ngʼajmi kao i̱ Sonʼnde xi kisikʼaxki̱ je Jesús ya padrenuestro (chótsenlai sén xi faʼaitʼa ibi). 2) Jméni xi jchaa i̱ kjoaʼmiya jebi.

² Jaola nó tongini nga kjesa mʼejin, je Jesús kitsoyale chjotale josʼin kʼoetsʼoa. Kitsole: “Nʼainajin xi tijnai ngʼajmi, kataʼyaxkón jaʼaínli. Katjinroa kjoatéxomali. Kʼoakatasʼín josʼin nga meli, joni ya ngʼajmi kʼoatisʼin i̱ sonʼnde” (Mateo 6:9, 10). I̱ kjoaʼmiya jebi jan koya chótʼayajiaan josʼin basenkao je kjoabʼechjíntjai nga kataʼyaxkón je jaʼaínle Niná, nga kjoaʼaí kjoatéxomale Niná kʼoa nga kʼoakoa̱n josʼin mele Niná.

3. 1) Jméni xi tsoyanile je jaʼaínle Niná. 2) Jósʼin kisijndí Na̱i je jaʼaínle Niná.

³ Je xi títjon kisikʼaxki̱ Jesús ya padrenuestro kuinga kataʼyaxkón  je jaʼaínle Niná nga̱ nʼio tsje. Je jaʼaín jebi kui tsoyanile jokjoan je Jeobá. Jé Niná xi ngisasa tse nganʼio tjínle kʼoa xi nʼio kixi. Je Jesús “Nʼaitsje” kitsole je Jeobá (Juan 17:11). Nga nʼio tsje je Jeobá, kʼoati tsje ngayeje jmeni xi sʼín kʼoa kao kjoatéxomale. Tonga ya ʼndenaxóle Edén, je Na̱i kʼoakitso nga tsín tiʼndele Niná nga kjoatéxoma tsjoále chjota. Énndiso tsakáne je Jeobá kʼoa kisijndí je jaʼaínle (Génesis 3:1-5).

4. Jósʼin tsabexkón Jesús je jaʼaínle Niná.

⁴ Je Jesús nʼio tsjoake koan je jaʼaínle Niná. Kuinga tsabexkónni ngantsjai (Juan 17:25, 26, TNM). Jmeni xi kisʼin kʼoa jmeni xi kitsoya tsakakó nga tsabexkón je jaʼaínle Niná. Nga kʼoakisʼin, tsakasenkao xi kjaʼaí nga tsabe nga kixi je kjoatéxomale Jeobá kʼoa nga kjoanda tsaanñá ngayeje jmeni xi tsoná (tʼexkiai Salmo 40:8-10). * Jé Na̱i xokisʼin nga tse kjoañʼai kinikjaʼá je Jesús kʼianga kinikʼien. Ninga kʼoakinikao, je Jesús kixi kitʼale Niná. Tsakakó nga jngo chjotatsje koaanle ñaki nda sitjosonle je Niná.

5. Jósʼin koakoá nga ʼyaxkoán je jaʼaínle Jeobá.

⁵ Jósʼin bakoá nga tsjoachaa je jaʼaínle Jeobá. Kao kui koakoñá jmeni xi nʼia. Je Jeobá kui xi mele nga tsje koaan (tʼexkiai 1 Pedro 1:15, 16). * Kuinga tojé ʼyaxkónñá kʼoa ñaki kao ni̱ma̱ná nitjosonnilee. Kʼoa ninga chjota fitjenngikená, bʼenelee yaoná nga nitjosoán jmeni xi tsoyaná Jeobá. Kʼianga nitjosoán kjoatéxomale, chʼasjengʼañá jaʼaínle (Mateo 5:14-16). Kʼoati bakoá nga nʼio nda je kjoatéxomale Jeobá kʼoa nga ndiso je Na̱i. Nga chjotajée maa sakʼoaa saténgiaa. Tonga kʼianga kʼoama, kʼoamaniná jmeni xi chʼao kanʼia kʼoa bʼenelee yaoná nga tsín tikui kʼoanʼiañá jmeni xi síjndí jaʼaínle Jeobá (Salmo 79:9).

6. Ánni nga chjotakixi sʼin bekonniná Jeobá ninga chjotajée maa.

⁶ Ninga ya ngʼajmi tjínná kjoachoya kʼoa ninga ya tiyojinlee xi “kjaʼaí barré”, je Jeobá síchatʼaa je jéená kʼiatsa tjínná kjoamakjain tʼatsʼe kjoabʼechjíntjai. Ndasʼin bekon Niná ngatsʼi xi je tsjoátʼale yaole. Je Jeobá chjotakixi sʼin bekon je chjotale Cristo, xtile tsole xi ya ngʼajmi koai kʼoa miyo tsole je xi “kjaʼaí barré” (Juan 10:16; Romanos 5:1, 2; Santiago 2:21-25). Xi totʼatsʼe kjoabʼechjíntjai, koaan ndasʼin kuiyoaa kao Niná nichxin xi tiyoaa ndʼaibi kʼoa koaan chʼa̱sjetsjee je jaʼaínle.

7. Jmé kjoanichikontʼain kjoaʼaíkao je Chjotaxále Niná xi totʼatsʼe kjoabʼechjíntjai.

⁷ Ya padrenuestro, je Jesús i kitso: “Katjinroa kjoatéxomali”. Jósʼin kitsoa xínkjín je kjoabʼechjíntjai kao kjoatéxomale Niná, xi tsonile je Chjotaxále Niná. ʼYañá nga je Chjotaxále Niná jéní Jesús kʼoa kao chjota xi 144,000 mani xi kitjoejin nga ya ngʼajmi koai. Xi totʼatsʼe kjoabʼechjíntjai yaa ngʼajmi faʼáyale chjota jebi (Apocalipsis 5:9, 10; 14:1). Je xi 144,000 mani, naʼmi koa̱n kʼoa rey koa̱n ya ngʼajmi kʼoa jé koatexomason Sonʼnde kao Jesús xi jngo jmi nó. Nga kʼia, je Jeobá kui Chjotaxále sichjén nga ʼndenaxó sikao i̱ Sonʼnde kʼoa nga chjotatsje koa̱n je chjota. Je choʼndale Niná xi tjío ya ngʼajmi kao i̱ Sonʼnde tojngo familia koa̱nni (Apocalipsis 5:13; 20:6).  Je Jesús sikʼien je Na̱i kʼoa kjoaʼaxin ngayeje kjoa xi tíbajngi (Génesis 3:15).

8. 1) Jósʼin tsakasenkao je chjotale Jesús nga koanjinle nga nʼio tjínle kjoandosin je Chjotaxále Niná. 2) Jósʼin bakoá nga bʼainganʼiolee je Chjotaxále Niná.

⁸ Je Jesús tsakasenkao je chjotale nga koanjinle jokji kjoandosin tjínle je Chjotaxále Niná. Jósʼin tsakasenkao. Kʼianga jekisʼenngindá, tokjoan kitsoyason “je énnda xi tʼatsʼe kjoatéxomale Niná” tojñani nga ki (Lucas 4:43). Kʼoa kʼoakitsole je chjotale nga tjínnele kuitsoyason “jña saʼnda nga fetʼa sonʼnde” (Hechos 1:6-8). Nichxin xi tiyoaa ndʼaibi, nga tíʼmiyasonle chjota, títjoʼndele nga katabe xi tʼatsʼe kjoabʼechjíntjai ánni nga koa̱n koatiosíni kʼianga jekoatexoma Chjotaxále Niná. Bakoñá nga bʼainganʼiolee je Chjotaxále Niná kʼianga binyakoaa je chjotale Cristo xi ya ngʼajmi koai nga tiʼmiyasoán je énnda chjotse jngo tjíjtsa Sonʼnde (Mateo 24:14; 25:40).

9. Ánni nga tsín jao tjínniná nga kuitjoson jmeni xi mele je Jeobá xi tʼatsʼe chjota.

⁹ Ya padrenuestro, je Jesús kʼoati i̱ kitso: “Kʼoakatasʼín josʼin nga meli”. Jósʼin tsoyanile. Kʼianga jmeni xi tso je Jeobá nga kʼoakoa̱n, ñaki kʼoasʼin bitjoson (Isaías 55:11). Ningalani yátsʼi̱n tsakasénle Jeobá je Na̱i, alikui tíbʼantjaiya jmeni xi tjínndajinle Jeobá saʼnda nga títjon. Jméni xi koanmele Jeobá xi kao Sonʼnde. Kui xi koanmele tsakai nga je xtile Adán kao Eva sitse ngakjijnda Sonʼnde (Génesis 1:28). Tsa tokjoan kʼienlani je Adán kao Eva nga kjesa tsínjinle xti, alikuijin kʼoakoan josʼin koanmele Niná, nga kʼoakitso nga je xtile Adán sitse Sonʼnde. Kuinga kitsjoaʼndeni Jeobá nga kisʼele xti. Xi totʼatsʼe kjoabʼechjíntjai ngatsʼi chjota xi sʼe̱le kjoamakjain, kui kjoanda tjínle nga koa̱n chjotatsje koa̱n kʼoa nga koa̱n koatio ngantsjai nichxin. Je Jeobá tsjoake je chjota kʼoa kui xi mele nga kʼoasʼin kuiyoaa josʼin koanmele saʼnda nga títjon.

10. Jósʼin binyakao je chjota xi jekʼien je kjoabʼechjíntjai.

¹⁰ Jmi miyón chjota xi jekʼien xi tsín tsabe tʼatsʼe Jeobá. Jókoa̱n chjota jebi. Je Niná mele nga sʼe̱le kjoabijnachon je chjota, kuinga sikjaʼáyanile je chjota xi jekʼien. Kjoaʼáyanile chjota xi totʼatsʼe kjoabʼechjíntjai. Kʼianga jekjoaʼáyale kui kjoanda sʼe̱le nga skoe̱ xi tʼatsʼe Jeobá kʼoa nga koa̱n koatio ngantsjai nichxin (Hechos 24:15). Nga tʼatsʼe Jeobá nroani je kjoabijnachon, Nʼaile koa̱n ngatsʼi xi kjoaʼáyanile (Salmo 36:9). Kuinga kʼoakitsoni je Jesús ya padrenuestro nga Nʼainá mani je Jeobá (Mateo 6:9). Je Jeobá kui xá kitsjoale je Jesús nga sikjaʼáyale je kʼien. Kuinga i̱ kitsoni je Jesús: “An nía xi sikjaʼáya, kʼoa an nía xi kjoabijnachon” (Juan 6:40, 44; 11:25).

11. Jméni xi mele Niná nga sʼe̱le je chjota xi “nkjín mani”.

¹¹ Je Jesús i kitso: “Toʼyanibe xi kʼoasʼin sʼín josʼin mele Niná, jebi xi ñaki ndsʼe, xi tichja, kʼoa xi na̱na” (Marcos 3:35). Je Jeobá kui xi mele nga katabʼétsʼoale je chjota xi nʼio “nkjín mani” xi tsín ʼya xi maxki̱le, xi kjuinroani “ngatsʼi ʼnde, kao ntje̱, kao naxinandá, kao én”. Chjota jebi tjínle kjoamakjain tʼatsʼe kjoabʼechjíntjai kʼoa sítjosonle Niná. Kʼoati bʼasjengʼa Niná kʼoa itso: “Kjoabitjontjai tjínle je Nináná, xi ya tíjnane je yáxilebe, kʼoa je Barré” (Apocalipsis 7:9, 10).

12. Jméni xi tsoyaná je padrenuestro tʼatsʼe jme xi tjínndajinle Jeobá xi kao chjota.

¹² Je padrenuestro nʼio tse xi tsoyaná tʼatsʼe Jeobá kao jmeni xi tjínndajinle tʼatsʼe chjota. Xi títjon, tsoyaná nga tjínnele kʼoénelee yaoná nga jchaxkoán je jaʼaínle Niná (Isaías 8:13). Je kjoabʼechjíntjai bʼasjentjainá kʼoa kʼoati  bʼasjengʼa je jaʼaínle Niná. Je jaʼaínle Jesús “Je Jeobá bʼasjentjai” sʼin tsoyanile. Xi majaoni, je Jeobá kui Chjotaxále sichjén nga tjoéle je chjota xi sitjoson kjoanda xi tjenkao je kjoabʼechjíntjai. Kʼoa xi majanni, tsín jme xi kʼoechjoa nga kuitjoson jme xi mele Jeobá (Salmo 135:6; Isaías 46:9, 10).

13. Ánni nga tsangínsʼenngindáñá.

¹³ Jngo koya josʼin bakoá nga ʼyachjiá je kjoabʼechjíntjai kʼiaa nga bʼaitʼalee yaoná je Jeobá kʼoa mangínsʼenngindá. Kʼoasʼin bakoñá nga tjínná kjoamakjain kʼoa nga “tsʼe nía Nainá [Jeobá]” (Romanos 14:8). Kʼianga tsangínsʼenngindá kinijélee je Jeobá nga nda katasʼe kjoafaʼaitsjenná (1 Pedro 3:21, TNM). Kʼoa je Jeobá kui síchjén je kjoabʼechjíntjai nga tsjoáná jmeni xi nijélee. Alikui jao tjínná nga tsjoáná jmeni xi tso (Romanos 8:32).

14. Ánni kʼoatsoniná je Jeobá nga tsjoacha katamaa xíngiaa.

¹⁴ Ngayeje jmeni xi sʼín je Jeobá, kui kʼoasʼínni nga tsjoakená, kʼoa kui xi mele nga je choʼndale kʼoati katasʼín, nga tsjoake katama xínkjín (1 Juan 4:8-11). Kʼianga tsjoachaa je chjota, bakoñá nga mená “ʼndíle Nʼai[ná] xi tíjna ngʼajmi” koaan (Mateo 5:43-48). Je Biblia kʼoatso nga je kjoatéxoma xi títjon tíjna kuinga tsjoacha koaan je Jeobá. Kʼoa xi majaoni xi kʼoati nʼio chjíle, kuinga tsjoacha koaan xíngiaa (Mateo 22:37-40). Jngo koya josʼin koakoá nga tsjoachaa je chjota, kʼiaa nga chja̱kaonajmíñá je énnda chjotse xi tʼatsʼe Chjotaxále Niná. Tsa si̱tjosoán je kjoatéxomale Jeobá xi kʼoatso nga tsjoacha katamaa xíngiaa, kʼoa ngisaa je xi ndsʼee mani, ñaki koa̱njngojin je kjoatsjoachaná (1 Juan 4:12, 20).

15. 1) Jmé kjoanichikontʼain títsjoáná je Jeobá nichxin xi tiyoaa ndʼaibi. 2) Jmé kjoanichikontʼain sʼe̱ná nichxin xi nroaján.

¹⁵ Je Jeobá kʼoatso nga sichatʼa je jéená kʼiatsa sʼe̱ná kjoamakjain tʼatsʼe kjoabʼechjíntjai (tʼexkiai Hechos 3:19-21). * Tojosʼin jetsaʼyaa,  xi totʼatsʼe kjoabʼechjíntjai, je Jeobá xtile sʼin bekon je xi ya ngʼajmi koai (Romanos 8:15-17). Kʼoati tsole Jeobá je xi “kjaʼaí barré” xi koatio i̱ Sonʼnde nga ya katabatiojin familiale. Xijekoa̱n, kʼianga jechjotatsje koa̱n ngatsʼi chjota jebi, chótʼayakao xi tofetʼani. Kʼiatsa kixi koaitʼale Jeobá, kʼoati xtile kuitsole (Romanos 8:20, 21; Apocalipsis 20:7-9). Je Jeobá tsjoake koa̱n ngantsjai je xtile. Kʼoa xi totʼatsʼe kjoabʼechjíntjai, tosi tonda sʼe̱ná kjoanichikontʼain ngantsjai nichxin (Hebreos 9:12). Jé Jeobá kitsjoaná kjoatjao jebi, kʼoa alikui ʼya xi kjoaʼaná.

16. Jósʼin síkatíondáiná je kjoabʼechjíntjai.

¹⁶ Tsa kʼoakoa̱nniná je jéená, je Na̱i alikui koa̱nle kʼoechjoaná nga ya kuiyojinlee familiale Jeobá. Je Jesús tojngokʼa kitsjoa kjoabijnachonle nga tsakʼéchjíntjainá. Kui xi tsonile nga tsín timachjénni nga ijngokʼa koa̱nchjíntjé (Hebreos 9:24-26). Je Adán kjoabiya kitsjoaná, tonga nga kʼienntjainá je Jesús koaan kuiyoaa ngantsjai nichxin. Xi totʼatsʼe kjoabʼechjíntjai koaan ndái kuiyolee sonʼndele Na̱i kʼoa tsín tikuinókjonnilee je kjoabiya (Hebreos 2:14, 15).

17. Jósʼe tokoán nga nikjaʼaitsjenjiaan nga nʼio tsjoakená je Jeobá.

¹⁷ Alikui jao tjínná nga kuitjoson ngayeje jmeni xi tso je Jeobá. Kʼoa tojo ma nga tsín bʼantjaiya josʼin síxá jmeni xi kisinda, je Jeobá kʼoati likui bʼantjaiya. Sitjoson jmeni xi tsoná (Malaquías 3:6). Ali tsa to kjoabijnachonjin xi tsjoáná je Jeobá, kʼoati bakóná kjoatsjoacha. “Ñá tsaʼyanía kʼoa koankjainná nga tjaokená Niná. Je Niná xi kjoatjaocha” (1 Juan 4:16). Nga sítjoson ngantsjai jmeni xi tso je Jeobá, jeme ʼndenaxó koa̱n je Sonʼnde. Ngatsʼi chjota jé Jeobá skénngile kʼoa tsjoake koa̱n xínkjín. Nga kʼia, ngatsʼi choʼndale Jeobá xi tjío ya ngʼajmi kao xi tjío i̱ Sonʼnde kʼoasjengʼa je Niná kʼoa i kuitso: “Nináná katasʼele kjoanichikontʼain, kao kjoajeya, kao kjoaʼisentakon, kao jñale kjoanda xi bʼaile, kao kjoangʼa, kao kjoatéxoma, kao nganʼio ngantsjai nichxin. Kʼoa katama” (Apocalipsis 7:12).