1, 2. 1) Jméni xi tsoyaná je Jeobá. 2) Jméni xi tongini tso Isaías 46:10, 11 kao 55:11.

JE ÉN xi fitsʼiani Biblia tochoa mani, tonga nʼio tse jmeni xi tsoyanile. Itso: “Nga sʼa kitsʼia, Niná kisinda ngʼajmi kao sonʼnde” (Génesis 1:1). Nʼio tochoa ʼyaa jotjín koya tsojmi kisinda Niná, jolani tʼatsʼe jmeni xi tjío ya ngʼajmi, tʼatsʼe gravedad kʼoa nga isen machon (Eclesiastés 3:11). Tonga je Jeobá tsoyaná jme xi tjínndajinle xi kao Sonʼnde kʼoa jme xi tjínndajinle tʼatsʼe chjota. Kʼoasʼin kisindaná jokji je kʼoa kui xi mele nga kʼoétsaojiaan nga kuiyoaa i̱ Sonʼnde (Génesis 1:26). Mele nga xtile koaan kʼoa nga Nʼainá koa̱nni je.

² Ya kapítulo 3 xi tsʼe Génesis kʼoatso nga jngo kjoa kisʼe kʼoa kuinga tsín kʼoakoanni josʼin tjínndajinle Niná tsakai (Génesis 3:1-7). Tonga je Jeobá male bʼéndajin tojme kjoani. Alikui ʼya xi koa̱nle kʼoechjoale nga kuitjoson jmeni xi mele (Isaías 46:10, 11; 55:11). Alikui jao tjínná nga kʼiakjoan nga choa̱le kuitjoson jme xi tjínndajinle Jeobá saʼnda ngasʼa.

3. 1) Jméni xi nʼio tjínle kjoandosin tsoya je Biblia. 2) Ánni nga kui chótʼayajinñá ndʼaibi. 3) Jméni xi jan koya chótʼayajiaan i̱ kjoaʼmiya jebi.

 ³ ʼYañá jme xi tjínndajinle Jeobá xi kao Sonʼnde kʼoa jme xi tjínndajinle tʼatsʼe chjota. Kʼoati ʼyaa jmeni xi kisʼin je Jesús nga koa̱n kuitjoson jme xi tjínndajinle Niná. Nʼio tjínle kjoandosin jebi. Tsakui nichxin kui títjon tsaʼyaa nga tosʼa kichotʼayá je Énle Niná. Kʼoa kui xi mená nga kʼoati katabe xi kjaʼaí chjota. Kʼoa ndʼaibi, kui nichxin tiyoaa nga kʼoatiʼmilee chjota nga katafaʼai kʼianga kjoaʼaítsjenya Kjoabiyale Cristo (Lucas 22:19, 20). Kʼiatsa kjoaʼaí, koa̱njinsale tʼatsʼe jme xi tjínndajinle Niná. Kuinga ndatjínsíni nga si̱kjaʼaitsjenjiaan jókʼuínlee ánni nga koa̱nmesínile kjuinroa kʼianga kjoaʼaítsjenya Kjoabiyale Cristo. I̱ kjoaʼmiya jebi, jan koya tjínni xi chótʼayajiaan: Jmé xi tjínndajinle tsakai Niná xi kao Sonʼnde kʼoa kao chjota. Ánni nga tsín kitjosonni jme xi tjínndajinle Niná, kʼoa ánni koanchjénni nga kitsjoa kjoabijnachonle Jesús nga kuitjoson jme xi tjínndajinle Niná.

4. Jósʼin bʼasjengʼa Niná jmeni xi kisinda.

⁴ Tomaxkónná josʼin tjíonda ngayeje jmeni xi kisinda Jeobá, nʼio nda ngayeje jmeni xi kisinda (Génesis 1:31; Jeremías 10:12). Jméni xi tsoyaná josʼin síxá jmeni xi koannda kʼoa nga nʼio naskákjoan. Kui tsoyaná nga basenkaoná ngayeje jmeni xi kisinda je Jeobá. Tomaxkónná kʼianga chotsenlee je niño ya ngʼajmi, nga ʼyaa jngo ʼndílee xi tosʼa katsin kʼoa tsakuije̱ joma kʼianga kantjai je tsʼuí. Toxá kʼoasʼin tsakʼéndaniná je Jeobá nga ʼyachjiá jonaskásʼin matsen jmeni xi koannda (tʼexkiai Salmo 19:1; * 104:24 *).

5. Jméni xi kisʼin je Jeobá nga síxá chʼin chʼin ngayeje jmeni xi kisinda.

⁵ Ngayeje jmeni xi kisinda Jeobá kitsjoale kjoatéxoma jmeni xi tiʼndele kʼoa jmeni xi mai. Kʼoati kitsjoale kjoatéxoma je chjota jme xi tjínnele sʼin (chótsenlai je rekuadro “Jósʼin tsoyanile”). Kʼoa ngayeje jmeni xi tjín ya ngʼajmi kao i̱ Sonʼnde ñaki síxá chʼin chʼin (Salmo 19:7-9). Ngayeje jmeni xi tjín i̱ Sonʼnde kao ngʼajmi tsen kitsjoale xá je Jeobá. Tobʼelañá, nga kui tjín je xi gravedad ʼmi kui xi basenkao je atmósfera nga tsín bitjoxinle je Sonʼnde, kʼoati kui xi basenkao je ndáchikon nga tsín xin fi je nandále. Tsa tsín xi gravedad ʼmi, tsínjin sʼe̱ kjoabijnachon i̱ Sonʼnde. Ngayeje jmeni xi tjín i̱ Sonʼnde kao ngʼajmi ñaki nda síxá nga̱ je Jeobá xi kʼoasʼin tsakʼénda. Kui xi bakóná nga je Jeobá tjín xá kisindani je Sonʼnde kao chjota. Kʼianga ʼmiyasoán kuinyakoaa je chjota nga katabe je xi kisinda ngʼajmi kao Sonʼnde (Apocalipsis 4:11).

6, 7. Jméni xi kitsjoakjoatjaole Jeobá je Adán kao Eva.

⁶ Kui xi koanmele Jeobá saʼnda ngasʼa nga koatio ngantsjai nichxin je chjota (Génesis 1:28; Salmo 37:29). Nga nʼio nda chjota je Jeobá, nʼio nkjín koya kjoatjao kitsjoale je Adán kao Eva kʼoa nʼio chjíle jmeni xi kitsjoale (tʼexkiai Santiago 1:17). * Tobʼelañá,  kitsjoale kjoandái nga je skoéjin jmeni xi sʼin kʼoa kʼoasʼin kisinda nga koa̱nle sikjaʼaitsjen, nga koako kjoatsjoacha kʼoa nga sʼe̱le miyo (chótsenlai je rekuadro “Jósʼin tsoyanile”). Je Jeobá kʼoakitsole Adán jmeni xi tjínnele sʼin. Kʼoati kitsoyale josʼin nga sikuinda yaole, nga sikuinda je nangi kao je cho̱ (Génesis 2:15-17, 19, 20). Je Jeobá kʼoasʼin kisinda je Adán kao Eva nga skoe̱ ntsja tsa jme xi sikao, nga koa̱n skótsen, nga skoe̱ tsʼoa tsa jme xi ski̱ne, nga koa̱n kjuinrʼoé kʼoa nga koa̱n skónje̱. Ngayeje jebi kui xi kuinyakao nga kʼoetsaojinkao jmeni xi tjín jñani tsakatio. Je Jeobá kʼoati nʼio tse xá kitsjoale xi nʼio tsjoa tsakáya kon. Je Adán kao Eva tosi tondajin nkjínsa koya tsabe kʼoa nkjínsa koya jmeni xi koanle.

⁷ Jmésani xi tjínndajinle Niná tsakai. Je Jeobá kʼoatisʼin kisinda je Adán kao Eva nga koa̱n sʼe̱le xti xi ñaki tsje koa̱n. Kʼoa xtile kʼoati sʼe̱le xti. Kʼoa ñaki to chjota sʼe̱jnakitse i̱ Sonʼnde. Je Niná kui xi koanmele nga tsjoake koa̱n xtile je xijchá josʼin tsjoake koan Niná je Adán kao Eva ngasʼa títjon. Je Niná jé chjota kitsjoakjoatjaole Sonʼnde kao ngayeje jmeni xi tjín xi nʼio naskákjoan kʼoa xi nʼio chjíle, kʼoa nga i̱ koatio ngantsjai nichxin i̱ Sonʼnde (Salmo 115:16).

8. Ánni nga kui kjoatéxoma xi faʼaitʼa ya Génesis 2:16, 17 kitsjoanile Jeobá je Adán kao Eva.

⁸ Ánni nga tsín kʼoasʼin kitjosonni jmeni xi koanmele Niná. Kataʼyala jmeni xi koan. Nga tsín totiʼndele ngayeje je Adán kao Eva, je Jeobá jngo kjoatéxoma xi tochoa ñʼai tíjna kitsjoale. I kitsole: “Koaan chi̱nai tole ngayeje yá xi tjín i̱ ʼndenaxó saʼnda nga koa̱nski. Tonga je tole yá xi tsʼe kjoankjíntokon xi ndatjín kao xi chʼaotjín, alikui koa̱n chi̱nai, nga̱ nichxin nga kui chi̱nai, kuiyání” (Génesis 2:16, 17). Alikui ñʼai tíjna je kjoatéxoma xi tsakʼaile. Kʼoati tsín ñʼai koanle tsakai nga kisitjoson, nga̱ nʼio nkjín koya tsojmi kisʼe xi koan kiskine.

9, 10. 1) Jméni xi kitso je Na̱i tʼatsʼe Jeobá. 2) Jméni xi kisʼin je Adán kao Eva (chótsenlai sén xi fitsʼiani kjoaʼmiya jebi).

⁹ Je Na̱i jngo ye̱ kisichjén nga tsakʼanachale je Eva nga tsín tikisitjosonnile je Jeobá (tʼexkiai Génesis 3:1-5; * Apocalipsis 12:9). Je Na̱i joxi kʼoakitso nga tsín kixi tíjna nga tsín tsjoáʼndele Niná je xtile nga ski̱ne “tole ngayeje yá xi tjín” ya ʼndenaxó. Joxi ini kitsole: “Ánni nga tsín koa̱n kʼoasʼianño jmeni xi meno”. Xijekoan, i kitsole je Eva: “Likui kuiyáo”. Kʼoakitsole nga tsín tjínnele sitjosonle je Niná. I kitsole: “Je Niná bení kʼianga je nichxin nga kui chi̱nao tjóxʼángi xkon”. Kui xi kitsonile nga kuinga tsakʼéchjoanile Jeobá nga ski̱ne tole yá nga tsín mele nga sʼe̱le kjoankjíntokon. Xijekoan, je Na̱i i kitsole: “Nichxin nga kui chi̱nao [...] koa̱nngósonño kao Niná, nga jchao xi ndatjín kao xi chʼaotjín”.

¹⁰ Je Adán kao Eva, tjínnele kiskoejin a jé Niná sitjosonle axo jé ye̱ sitjosonle. Kʼoa kui kiskoejin nga je ye̱ kisitjosonle. Tsakʼasjengi je Jeobá kʼoa tsín tikoanmenile nga tojo Nʼaile koa̱n. Jé Na̱i kitsjoanganʼiole  nga kʼoakisʼin. Saʼnda nga kʼia, tojé tsakatio kʼoa likui tije Jeobá kisikuindani (Génesis 3:6-13).

11. Ánni nga tsín tokisichajinsíni Jeobá jmeni xi kisʼin je Adán kao Eva.

¹¹ Kʼianga tsín tikisitjosonni Adán kao Eva je kjoatéxomale Niná, likui tichjotatsje koanni. Kontra tsakatiole Niná, nga̱ je Niná jtike xi chʼaotjín. Je Biblia kʼoatso nga nʼio tsje je Niná, likui ma be xi chʼaotjín (Habacuc 1:13). Tsa tokisichajinlani Niná jmeni xi kisʼin je Adán kao Eva, alikuijin tijme kjoachoya kisʼeni. Je ánkje kao chjota to jaojin kisʼele tsa tojo koa̱nkjainle jmeni xi tso Niná. Tonga je Jeobá sítjoson jmeni xi tso, alikui faʼatone kjoatéxomale (Salmo 119:142). Ningalani kisʼele kjoandái je Adán kao Eva nga kiskoejin jmeni xi kisʼin, chʼaosʼin kichomani nga yátsʼi̱n tsakinyále Niná. Nga jeki nichxin, kʼieen kʼoa chao koan ijngokʼani (Génesis 3:19).

12. Jméni xi koanle je xtile Adán.

¹² Kʼianga jekiskine Adán kao Eva je tole yá xi kisʼechjoale, je Jeobá likui tikitsjoaʼndeni nga tojo familiale koa̱n. Kuinga tsakʼaonsjejinni ya ʼndenaxóle Edén kʼoa tsín tikitsjoaʼndenile nga ya kicho ijngokʼa (Génesis 3:23, 24). Je Jeobá kitsjoaʼnde nga kjoañʼai tsakjaʼá je Adán kao Eva nga tsín nda kisʼin (tʼexkiai Deuteronomio 32:4, 5). * Kʼoa tsín tikoan ñaki ndasʼin kiskennginile jokjoan je Jeobá. Je Adán kisichaa je kjoanda xi tjínle tsakai nga nʼio ndasʼin koatio je kʼoa kao xtile. Kʼoa kui kisikakinle xtile je jée kao kjoabiya (Romanos 5:12). Xi totʼatsʼe Adán, je xtile alikui tikui kjoanda kisʼenile nga koatio ngantsjai nichxin. Je xti xi kisʼele Adán kao Eva alikui ti chjotatsje koanni. Saʼnda nga tsakʼanachale je Adán kao Eva, je Na̱i kui xi mele nga tsín Niná sitjosonle je chjota (Juan 8:44).

13. Jméni xi mele Jeobá xi kao chjota.

¹³ Ningalani tsakinyaxinle Jeobá je Adán kao Eva, je Jeobá tojo tsjoakee je chjota. Je Niná kui xi mele nga simiyo je chjota kʼoa tsín mele nga ʼya xi kuiyá (2 Pedro 3:9). Kuinga kjitʼanangi tsakʼéndajinni jmeni xi sʼin nga miyole koa̱n ijngokʼani je chjota. Jmé xi kisʼin nga tsín tije jaʼatoneni kjoatéxomale. Kataʼyala.

14. 1) Tojo tso Juan 3:16, jméni xi kisʼin Niná nga ndái kuiyolee je jée kao kjoabiya. 2) Jméni xi koa̱n kʼuínyalee je chjota.

¹⁴ (Tʼexkiai Juan 3:16). * Tsakui nichxin jebe jotso bersíkulo jebi je chjota xi kjoaʼaí nga kjoaʼaítsjenya Kjoabiyale Jesús. Tonga a be ánni nga kjoabijnachon xi tsínkʼia fetʼa tsjoániná je kjoabiyale Jesús. Koaan kʼuínyalee nga katabe xi tʼatsʼe jebi. Kʼiáni. Kʼianga  kʼoakʼuínlee nga katafaʼai nga kjoaʼaítsjenya Kjoabiyale Cristo, kʼianga kuikjoan nichxin nga ya tiyokoaa nga tífaʼaitsjenya je Kjoabiyale Cristo kʼoa kʼianga koa̱nskanni nga kjuinchón ijngokʼalee. Tsa koa̱njinle jmeni xi tsoyanile je kjoabʼechjíntjaile Jesús, koa̱njinle jokji tsjoakená je Jeobá kʼoa jokji chjine. Jméni xi koa̱n kʼuínyalee xi tʼatsʼe kjoabʼechjíntjaile Jesús.

15. Ánni nga tsín koanngósonni je Jesús kao Adán.

¹⁵ Je Jeobá kui kjoabijnachonle jngo chjota xi tsje kitsjoa kʼianga tsakʼéchjíntjainá. Je chjota jebi tjínnele nga kixi koaitʼale Jeobá kʼoa tsjoá kjoabijnachonle xi totʼatsʼe chjotasonʼnde (Romanos 5:17-19). Kʼoa je Jeobá jé Jesús kisikasén, je ʼNdíle xi títjon kisinda. Jé Niná xokisʼin nga jo chjota sʼin kitsin je ʼNdíle i̱ Sonʼnde (Juan 1:14). Je Jesús ñaki chjotatsje koan joni Adán nga chjotatsje tsakai. Tonga je Jesús alikui koanngóson kao Adán. Ánni. Kuinga je Jesús kisitjoson je kjoatéxomale Niná josʼin tjínnele kisʼin tsakai je Adán. Ningalani nʼio tse kjoa jaʼatojin je Jesús, kisitjoson ngantsjai je kjoatéxomale Niná.

16. Ánni nga nʼio chjínile nga tsakʼéchjíntjainá je Jesús.

¹⁶ Nga kʼienntjainá je Jesús, koaan ndái kuiyolee je jée kao kjoabiya. Je Adán tjínnele kʼoakisʼin tsakai jokisʼin je Jesús. Je Jesús chjotatsje koan, ñaki kixi kitʼale Niná kʼoa kisitjosonle (1 Timoteo 2:6). Nga kʼienntjainá je Jesús, tiʼndele ngatsʼi chjota nga koa̱n koatio ngantsjai nichxin, xi xʼin, xi yánchjín kao xtiʼndí (Mateo 20:28, TNM). Tojosʼin tiʼyaa, nga kuitjoson jme xi tjínndajinle Niná, koanchjén nga kitsjoa kjoabijnachonle Jesús (2 Corintios 1:19, 20).

17. Jmé kjoanda sʼe̱ná xi totʼatsʼe nga tsakʼéchjíntjainá je Jesús.

¹⁷ Je Jeobá tse kjoama̱ tsakʼéngi nga tsakʼéchjíntjainá (1 Pedro 1:19). Nʼio bechjíná nga kitsjoaʼnde nga kʼienntjainá je ʼNdíle xi nʼio tsjoake (1 Juan 4:9, 10). Je Jesús jé Adán tsakʼejnangajaole kʼoa jé xi nʼainá koanni (1 Corintios 15:45). Nga kʼienntjainá je Jesús, koaan kuiyoaa ngantsjai nichxin kʼoa koaan familiale Niná koaan. Xi totʼatsʼe nga tsakʼéchjíntjainá je Jesús, koaan chjotatsje koaan nichxin xi nroaján. Kʼoa je Jeobá xtile sʼin skoe̱konná kʼoa tsín tikuitjátoneñá je kjoatéxomale. Si̱kjaʼaitsjenla jonaskákoa̱nchon kʼianga chjotatsje koa̱n ngatsʼi je chjota xi kixi koaitʼale Niná. Ngatsʼi xi tjío ya ngʼajmi kao xi i̱ Sonʼnde tjío tojngo familia koa̱n. Xtile Niná koaan ngatsʼiaa (Romanos 8:21).

18. Kʼiáni nga je Jeobá koanentsjani ngayeje.

¹⁸ Ningalani tsakʼasjengi Jeobá je xijcháná xi títjon tsakatio, je Jeobá tojo tsjoakee koan je chjota. Kuinga kitsjoani je ʼNdíle nga kʼienntjainá. Ningalani chjotajée maa, je Na̱i alikui koa̱nle kʼoenená nga yándsʼiaan kuinyalee je Jeobá. Xi totʼatsʼe kjoabʼechjíntjaile Jesús, jé Jeobá koasenkaoná nga chjotakixi koaan. Nʼiojin naskákoa̱nchon kʼianga koatio ngantsjai nichxin je chjota xi koa̱nkjainle tʼatsʼe Jesús (Juan 6:40). Nga nʼio tsjoakená je Jeobá kʼoa nga nʼio chjine, sitjoson jmeni xi tjínndajinle kʼoa koasenkao je chjota nga chjotatsje koa̱n. Nga kʼia, jé Niná koanentsjani ngayeje (1 Corintios 15:28).

19. 1) Jméni xi sʼiaan kʼiatsa chjí ʼyatokoán je kjoabʼechjíntjaile Jesús (chótsenlai rekuadro “ Tosi tonda kuijnyísjee ʼyani xi bakinle”). 2) Jméni xi chótʼayá ya kjoaʼmiya xi ijngo.

¹⁹ Tsa chjí ʼyatokoán nga tsakʼéchjíntjainá je Jesús, kʼoajinkʼuínlee je chjota xi tʼatsʼe kjoabʼechjíntjai jebi. Tjínnele sʼe̱jinle je chjota nga kuinga tsakʼéchjíntjainá je Jesús nga tsjoániná kjoanda je Jeobá nga koa̱n kuiyoaa ngantsjai nichxin. Tonga ali tsa tokuijin nga koa̱n kuiyoaa ngantsjai nichxin. Je kjoabʼechjíntjai kʼoati kʼoendajin jmeni xi kitso je Na̱i ya ʼndenaxóle Edén. Yaa kjoaʼmiya xi ijngo chótʼayajiaan josʼin sʼe̱ndajin kjoa jebi.