NGATSʼI chjota mele nga tsjoa sa̱tío kon. Tonga nichxin xi tiyoaa ndʼaibi nʼio tse “kjoañʼai” tjín (2 Tim. 3:1). Je chjota alikui titsjoa tjíonile nga tsín kixi jmeni xi matʼain, nga chʼin katʼale, nga tsínle xá kʼoa tsa xínkjín biya. Saʼnda je choʼndale Niná faʼajen sakʼoa kon kʼoa likui titsjoa sa̱tíonile. Kʼiatsa ñá xi kʼoakjimaa, jósʼiaan nga tsjoa sʼe̱ ijngokʼa tokoán.

Kʼianga jchaa tʼatsʼe jebi títjonkjoanla kataʼyaa josʼin tíjna xi kjoatsjoa ʼmi kʼoa jótjíosʼín kʼa je chjota nga tsín tjíosícha je kjoatsjoa xi tjínle. Kʼoati jchaa jósʼiaan nga tosi tonda tsjoa sʼe̱ná kʼoa nga si̱tseyaa je kjoatsjoa xi tjínná.

Jngo chjota xi totíbijnoʼnde alikui kui xi tsonile nga tsjoa tjín kon. Tobʼelañá, jngo chjota xi chʼi̱, tsakui nichxin totíbijnoʼnde, tonga kʼianga jesʼendajinle alikui tikʼoasʼínni kʼoa tojo kui faʼaitsjenle je kjoa xi tjínle. Alikuini tsjoa tjínntsjaile (Prov. 14:13).

Kjaʼaísʼin tíjna nga tsjoa sʼe tokoán ngantsjai. Tsjoa sʼe tokoán tʼatsʼe jmeni xi tjínná kʼoa tsa jme xi choyalee. Tsjoa sʼe tokoán ngantsjai nga nda tiyoaa kʼoa ninga kjoa tjínná (1 Tes. 1:6). Jngo chjota koaan tsjoa sʼe̱le tsanda tse kjoa tíjnajin. Tobʼelañá, je pastrole Jesús kjoañʼai tsakʼaile nga kui kinchja̱ni xi tʼatsʼe Cristo, tonga ya Biblia kʼoatso nga nʼio tsjoa kisatio kon nga “kichʼasjengi xi tʼatsʼe jaʼaínle Jesús” (Hech. 5:41). Ali tsakuijin nga kjoañʼai tsakʼaile nga tsjoa kisʼeni kon, kuiní nga kixi kitʼale Niná.

Ali tsa tojejin kichʼá kjoatsjoa kʼianga tsiaan kʼoa nikoa̱njinla nga toxijña sʼe̱ná. Ánni, kuinga tʼatsʼe Niná nroani. Jé nganʼiotsjele Niná basenkaoná nga kʼoamakjoaan josʼin mele Niná, nga sʼená kjoatsjoa (Efes. 4:24; Gál. 5:22). Kʼianga sʼená kjoanda jebi alikui nʼio nikjáojiaan je kjoa xi bitjatojiaan.

Je Jeobá kui xá kisindani je Sonʼnde nga nda kuiyoaa, ali tsakuijin nga kjoa sʼe̱ná. Je Niná alikui tísícha je kjoatsjoa xi tjínle ninga chʼao tjíosʼín je chjota. Je Biblia kʼoatso nga tjín nganʼio kao kjoatsjoa ya jña tíjna Niná (1 Crón. 16:27). Xi ijngosani, nʼio tsjoa sʼele nga be nga kui xi ndatjín kʼoatjíosʼín choʼndale (Prov. 27:11).

Jósʼin koa̱n kjuintjenngiaa je choa̱le Jeobá. Alikui koa̱n nʼio si̱kjáojiaan kʼiatsa tsín kʼoasʼin bichómani jmeni xi tjínndajinná. Kuenta sʼiaan jmeni xi ndatjín tjínná ndʼaibi kʼoa kao kjoatsejta chóyaa saʼnda nga ndasʼin kuiyoaa. *

 Ya Biblia, nkjín choa̱ faʼaitʼa xi tsʼe choʼndale Niná xi tsjoa kisatio kon ninga nʼio tse kjoa jaʼatojin. Tobʼelañá, je Abrahán nʼio tse kjoa jaʼatojin xi totʼatsʼe jmeni xi koantʼain kʼoa saʼnda xkón sʼin tsakʼejna (Gén. 12:10-20; 14:8-16; 16:4, 5; 20:1-18; 21:8, 9). Tonga tsjoa kisʼele ngantsjai, nga̱ kui kisikjaʼaitsjenjin nga koa̱n kʼoéjna i̱ Sonʼnde kʼianga jekoatexoma je Mesías (Gén. 22:15-18; Heb. 11:10). Je Jesús i kitso: “Je Abraham nʼaino kjaínga koantsjoale nga kuicho be nichxinna” (Juan 8:56). Ñá kʼoati koa̱n kjuintjenngiaa je choa̱le Abrahán tsa kao kjoatsjoa si̱kjaʼaitsjenjiaan je kjoanda xi sʼe̱ná nichxin xi nroaján (Rom. 8:21).

Tojo kisʼin je Abrahán, je Pablo kao Silas kʼoati kui kisikjaʼaitsjenjin jmeni xi kitso Niná. Kʼianga nʼio kisatio je kjoamakjainle kui xi tsakinyakao nga tsín kisicha je kjoatsjoa xi kisʼele ninga nʼio tse kjoa jaʼatojin. Ñandia nga kinikiʼaon, nga yá tsakichon kʼoa ndoyá kichaní. Je Biblia itso: “Kʼia nga jicho basennitje̱n, Pablo kao Silas tjíobʼétsʼoa, tjíosele Niná” (Hech. 16:23-25). Nʼio tsjoa kisatio kon, nga̱ totʼatsʼe Jesús nga kjoañʼai tsakjaʼá. Tsa kʼoati mená nga tsjoa sʼe̱ tokoán, tjínnele nga kuenta sʼiaan nga nʼio tse kjoanda tjenkao nga je Niná nixálee (Filip. 1:12-14).

Nichxin xi tiyoaa ndʼaibi, kʼoati nʼio nkjín mani je ndsʼee xi tsín tjíosícha je kjoatsjoa xi tjínle ninga nʼio tse kjoa tjíofaʼatojin. Tobʼelañá, kʼianga sá noviembre nó 2013 jngo kjoaxkón kichone Filipinas je xi supertifón Haiyan tsakʼin. Tsʼato 1,000 ndʼiale ndsʼee kisikje. Jngo ndsʼee xi George ʼmi, xi ya naxinandá Tacloban tsʼe, i kitso: “Ninga kʼoalani koan, je ndsʼee nʼio tsjoa tjíole. Saʼnda likui ʼbe joxián jokji tsjoa tjíole”. Kʼiatsa si̱kjaʼaitsjenjiaan jmeni xi tísʼín je Jeobá xi tʼatsaan kʼoa tsa kʼoailee kjoanda, alikuijin si̱chaa je kjoatsjoa xi tjínná ninga nʼio tse kjoa kuitjátojiaan. Jmésani xi títsjoáná Jeobá xi tsjoa báya tokoán.

Kuinga nʼio tsjoa kʼoéñá tokoán nga miyoná mani je Jeobá. ʼYañá nga toje xi batéxomale ngʼajmi kao Sonʼnde. Jéní xi Nʼainá mani, je Nináná kao miyoná (Sal. 71:17, 18).

Ijngo koya anni nga tsjoa kʼoéñá tokoán kuinga tiyochoán kʼoa nga nda tiyoaa (Ecl. 3:12, 13). Xi ijngosani, nga Jeobá kinchja̱ná, ʼyañá jmeni xi mele kʼoa jmeni xi tjínnele sʼiaan (Col. 1:9, 10). ʼYañá jme xá tiyoñá kʼoa jme xi choyalee. Tonga me ngatsʼi chjota nga tsín be jmé xá tjíoni. Je Pablo i kitso: “Tsín xko̱n tsabeni, nixo̱ñojin kinrʼoéni, nini̱ma̱le chjotajin kisikjaʼaitsjenni, kjoa xi Niná tsakʼéjnandani xi tʼatsʼe je xi tsjoake nga je. Je kjoabi Niná kisikʼatsenná xi totʼatsʼe Espíritu Santo” (1 Cor. 2:9, 10). Nga majinná jmeni xi tjínndajinle Niná kao jmeni xi mele kui xi kʼoati tsjoa báya tokoán.

Ijngola koya kataʼyaa jmeni xi tísʼín je Jeobá xi tʼatsʼe naxinandále. Tsakʼéndajin nga koa̱n jchatʼa je jéená (1 Juan 2:12). Kʼoati tíbakóná kjoamatokon nga títsjoáná kjoachoya nga koa̱n kuiyoaa ya sonʼnde chjotse xi jemachrianle (Rom. 12:12). Kʼoati títsjoáná kjoanda nga ya tiyojiaan je naxinandále jñani ma bʼetsʼoalee (Sal. 133:1). Xi ijngosani, je Biblia kʼoatso nga je Jeobá tísíkuinda je naxinandále tʼatsʼe Na̱i kʼoa kao ánkje tsʼen (Sal. 91:11). Kʼiatsa si̱kjaʼaitsjenjiaan kjoanichikontʼain jebi, ngisajin nʼio tsjoa sa̱tío tokoán (Filip. 4:4).

A koaan nga ngisa tsjoa sʼe̱ tokoán. Je Jesús i kitso: “Je énbi tsakjakaono, jméni  nga je kjoatsjoana sʼe̱jnajinsíni ni̱ma̱no, kʼoa je kjoatsjoano koa̱ntseyasíni” (Juan 15:11). Je én jebi kui bakó nga koa̱n nga ngisasa tsjoa sʼe̱ tokoán. Je kjoatsjoa yaa mangóson je lʼí. Kʼiatsa mená nga tsín katabitsʼao je lʼí machjén nga tosi tonda kuinyajiaan chikín. Tikʼoasʼinni, tsa mená nga tosi tonda sʼe̱ná kjoatsjoa kui nganʼiotsjele Niná machjénná. Kuinga kjitʼa si̱jésínilee kʼoa si̱kjaʼaitsjenjiaan jmeni xi tso je Biblia, nga̱ kui nganʼiotsjele Niná koanchjén nga kichji (Sal. 1:1, 2; Luc. 11:13).

Ijngo koya xi koa̱n sʼiaan nga tsjoa sʼe̱ tokoán kuinga kuenta sʼiaan jmeni xi sasénle Jeobá (Sal. 35:27; 112:1). Ánni. Kuinga kʼoasʼin kisindaná Jeobá nga kui kʼoasʼiaan jmeni xi mele. Je Biblia itso: “Tijkónchai je Niná xi kixi kʼoa titjosuin kjoatéxomale, nga̱ kuiní xi tjínnele sʼin je chjota” (Ecl. 12:13). Kuinga tsjoa satíoni tokoán nga je Jeobá nixálee. *

Kʼianga tsjoa tjínná ali tsakuijin nga tongotjo nga nda sʼená, nʼiosa tse kjoanda tjenkao. Tobʼelañá, je Jeobá sasénle kʼianga kao kjoatsjoa nixálee ninga nʼio tse kjoa bitjatojiaan (Deut. 16:15; 1 Tes. 5:16-18). Kʼianga ñaki tsjoa tjín kjoaixiná, alikui kui mangíntjenngiaa jmeni xi tjín sonʼnde, tosaa kui títjon nikʼéjnaa je Chjotaxále Niná (Mat. 13:44). Nga kʼoanʼia, ngisasa tsjoa sʼe tokoán kʼoa ndasʼin biyoaa kʼoa bisenkaoñá xi kjaʼaí nga kʼoati tsjoa katasatío kon (Hech. 20:35; Filip. 1:3-5).

Xi ijngosani, kʼianga ngisa tsjoa satío tokoán kʼoati basenkaoná nga tsín jme nanda chʼin sʼená. Je Biblia itso: “Jngo ni̱ma̱ xi tsjoa tjínle ñaki síndayaná” (Prov. 17:22). Jngo chjinexki xi kui tsakʼejnatsʼinya ya Universidad de Nebraska (Estados Unidos), kʼoakitso nga kʼoatjín jotso Biblia, i kitso: “Tsa tsjoa tjín tokuin josʼin tinijchái yaoli, nichxin xi nroaján alikui nanda jme chʼin sʼeli”.

Tojosʼin tiʼyaa, ninga nʼio ñʼai chon nichxin xi tiyoaa ndʼaibi, koaan nga ñaki tsjoa sʼe̱ tokoán. Xi koasenkaoná kui nganʼiotsjele Niná, kʼoa kʼiaa tsjoáná nga kʼoétsʼoalee, nga chótʼayá je Biblia kʼoa nga si̱kjaʼaitsjenjiaan. Kʼoa tsa mená nga koa̱ntseyasa je kjoatsjoaná, tjínnele kui si̱kjaʼaitsjenjiaan je kjoanichikontʼain xi tjínná ndʼaibi, kjuintjenngiaa choa̱ xi batío je choʼndale Niná kʼoa kʼoénelee yaoná nga kʼoasʼiaan jmeni xi mele Jeobá. Tsa kʼoasʼiaan, kʼoasʼe̱ tokoán jotso je Salmo 64:10: “Je xi kixi tsjoa koa̱nle xi kao Jeobá kʼoa ñaki je sinʼiotʼa”.