Kʼiaa nga nó 1937 kitsian ya jngo granja xi tíjnachrian ya Tokmak (Kirguistán), je familiana kirguís kitjenni, kʼoa kʼoati kui én nokjoaijin. Je xijchána yaa kisixá ya granja nga bʼajnda nichxin. Je chjota xi ya kisixá tokui tsojmi xi ma chine tsakʼaile kʼoa to ñandia koanchjíle nga jngo nó.Tonga je mana alikui choa ñʼai koanle nga kisikuindanajin kao tichja. Kʼoa to aon nó kia skuela, xi koanskanni yaa kisixá jña tíjna granja.

Ya jña kinijcháijin yaonajin nʼio ma̱ koanchon kʼoa kʼianga koa̱nsonninajin je tao̱n nʼio tsakʼenelaijin yaonajin nga kinixáijin kʼoa nʼio kijtanajin. Kʼianga sʼa xtia alikui koanjinna jme xá tijnakonña kʼoa nikuijinla kisikjaʼaitsjenjian tʼatsʼe nichxin xi nroaján. Likui kʼia koanjinna tsa kʼoanisikji tsjoa kʼoe tokoan jmeni xi tso je Jeobá kʼoa jmeni xi tjínndajinle kao chjotasonʼnde. Matsjoana nga xínyano jókoanni kisʼe testigole Jeobá ya Kirguistán, kʼoa josʼin tsakʼinyason je Énle Niná. Yaa títjon kinroani ya jñani koanjchínga.

Kʼianga nó 1956, kʼiaa tsabe je chjota xi Kirguistán tsʼe jotjínni xi tʼatsʼe Jeobá. Tonga alikui choa ñʼai koanle nga̱ je chjota xi ya tsʼe kjaʼaísʼin makjainle. Nga kui nichxin, je chjota xi ya tsʼe Kirguistán jé Unión Soviética tsakánentsja, tonga je testigole Jeobá alikui ya kitsjonjin yaole je kjoa polítika xi kisʼe ya naxinandá xi tsakánentsja je Unión Soviética (Juan 18:36). Kʼianga tsín kʼoakisʼin, je chjota xi ya tsʼe kitjenngike. Ninga  kjaʼaílani sʼin makjainle je chjota xi ya tsʼe alikui kui tsakʼéchjoale nga tsabe Énle Niná je chjota xi ndʼé tjío ni̱ma̱le. Jokjitse nga tijnakoan tiʼbeña nga je Niná male kʼoasʼín “ngayije kjoa” (Mar. 10:27).

Jmeni xi koantʼain je testigole Jeobá ya Kirguistán, kui xi tsakinyakao nga nkjínsa chjota tsabe je Énle Niná. Jókoannile. Je naxinandá Siberia jé tsakájta Unión Soviética kʼoa yaa kinikatíonʼio xi kontra tsakatiole naxinandá jebi. Kʼianga jetsakationdaí, nkjín xi ya Kirguistán kichokatio kʼoa tjínkʼa xi kitsoyanajin Biblia jolani je Emil Yantzen, xi ya Kirguistán kitsin nga nó 1919, yaa granja kisixá ngasʼa kʼoa yaa tsabexkonni je testigole Jeobá. Je Emil koankjainle tʼatsʼe Niná, kʼoa kini naxinandále kʼianga nó 1956 kʼoa yaa chrian Sokuluk tsakʼejnani tiyani jñani tijna. Kʼianga nó 1958, kʼiaa kisʼejna je jtín xi títjon ya Kirguistán.

Jngo nó koanskanni, je ndsʼee Victor Vinter xi kʼoati tse kjoa jaʼatojin, yaa kichokʼejna ya Sokuluk. Kʼianga kixi kitʼale Niná, jao kʼa nga jan nó tsakʼejnaʼya ndoyá, xi koanskanni, ngi te nó kinikʼéjnaʼya ndoyá kʼoa aon nó nga xin ʼnde kinikʼéjnanʼio. Ninga kʼoalani, alikui jme xi tsakʼéchjoale nga tosi tonda koannkjínya je testigole Jeobá.

Kʼianga nó 1963, jejngo siento kao jankan mani je testigole Jeobá ya Kirguistán. Nkjín koanni xi Alemania, Ucrania kao Rusia tsʼe. Kʼoa jngo ndsʼee xi Eduard Warter tsakʼin, xi kʼoati tsakʼejnanʼio, xi ya Alemania kisʼenngindá nga nó 1924. Kʼianga nó 1940, je chjota nazi yaa kisikasén jngo ʼnde jñani nga kjoañʼai kinikjaʼá, tojngo jao nó jaʼato kʼianga je chjota comunista xi ya Unión Soviética tsʼe kisikʼéjnanʼio. Kʼianga nó 1961, je ndsʼee Eduard Warter yaa kichokʼejna ya naxinandá Kant, ya chrian jñani tsʼan.

Ya naxinandá Kant kʼoati tsakʼejna jngo testigole Jeobá xi Elizabeth Fot tsakʼin, xi najño kisinda kʼianga tsakajngiʼa yaole. Kʼianga nʼio nda koanle kisinda najño, kisʼele xá kʼoa kisindale najño chjinexki, maestro kʼoa xi kjaʼaísa chjota. Jngo chjoón xi kʼoati najño kisindale jéni xi Aksamai Sultanalieva tsakʼin, xi chjoónle koanni jngo chjota xi xángʼa kisʼele. Ñandia kʼianga je Aksamai kikonle je Elizabeth, nʼio nkjín koya xi kiskonangile jolani tʼatsʼe jmé xá tiyoñá kʼoa jósʼin tjío xi jekʼien. Je Elizabeth Biblia kisichjén nga kitsoyale. Nga jeki nichxin je Aksamai nʼio nda kitsoyason je Énle Niná.

Je ndsʼee xi Nikolai Chimpoesh tsakʼin xi Moldavia tsʼe, me kante nó nga superintendente xi tsʼe circuito koan. Kʼoati je kisʼenele nga katachʼasje je copiale xo̱n xi Énle Niná yʼangini kʼoa nga katab’abíson. Kʼianga kisʼejinle chjotaxá je xá xi tísʼín ndsʼee, je Eduard Warter i kitsole: “Kʼianga chjónangili, tokʼoatʼinlai nga ya Brooklyn faʼaininá je xo̱n xi tinichjén, ya oficina xi tíjnatítjonle je testigole Jeobá. Yakjoan chóʼai je chjotale KGB kʼianga kjoakaoli. Ali nokjonjinlai” (Mat. 10:19).

Kʼianga jetsakjáonajmí ndsʼee jebi, je Nikolai kʼoatsakʼinle nga ya oficinale KGB katafi, xi ya naxinandá Kant tíjna. I tso: “Je chjotale KGB kui kiskonangina jñá mangínchʼaijin je xo̱n xi nichjainjin. Kʼoakixinle nga ya Brooklyn nikasénninajin. Alikui tijo kitsonina. Kitsjoaʼndena nga kʼia kʼoa tsín tikʼia ya kinokjoanina”. Nʼiojin koan ndsʼee  kʼoa kiskosonnile jokisʼin nga tosi tonda kitsoyason je Énle Niná ya chrian jña tsakatejna ya nortele Kirguistán. Nga nó 1980, kʼiaa tsabe je xíngia jotjínni xi kixi, kʼoa je xi títjon kinrʼoé je Énle Niná jé chjoónna.

Je Mairambubu yaa Naryn tsʼe, ya ʼnde xi tíjna Kirguistán. Kʼiaa nga sá agosto nó 1974 tsaʼyaxkuijin xíngijin ya niʼyale tichja kʼoa tokjoan koantsjoachaníjin xíngijin kʼoa tikuini nichxin chixainjin.

Kʼianga sá enero nó 1981, je Mairambubu kʼianga tíjnaya je karro kinrʼoéle nga tínchja̱najmí je chjoón xi kasikʼaxki̱ná nga títjon. Je chjoónna koanmesale nga skoe̱ jmeni xi kinrʼoé, kuinga kiskonangisínile joʼmi kʼoa jñani tsʼe. Kʼoakitso nga Apun ʼmi. Nga kui nichxin, je testigole Jeobá tsín tjoʼndele nga tsoyason kʼoa nʼio kiskosonnile jokisʼin, ʼndele nga kʼoakuitso jñani tsʼe tosaa je chjoónna kiskonangile jñáni tiyonijin. Kʼoa je chjoónna nʼio tsjoa tjínle nga kicho ya niʼyanajin.

Je chjoónna i tso nga kicho: “Nʼio naskánatjín xi kanrʼoe. Jngo chjoón xi kʼoakatsona nga tsínxó tikuiyáni je chjota kʼoa saʼnda je cho̱toán ndʼéxó koa̱n”. Kʼianga kʼoakitsona to énská koanna, kʼoa i kixinle: “Ndajin tsa kjoaʼaí, ánni nga kuitsoyasíniná”.

Jan sá koanskanni, kʼiaa kichokonnajin je Apun. Xi koanskanni, jé kichosíxatʼanajin je xi ntje̱ kirguís kitjenni. Tichjaa jebi kui kitsoyanajin jotjínni xi tʼatsʼe Jeobá kʼoa jmeni xi tjínndajinle xi tʼatsʼe chjotasonʼnde. Kui kisichjén nga kitsoyanajin je libro De paraíso perdido a paraíso recobrado. * Tonga ya Tokmak tojngo libro jebi tíkijna kʼoa nga koan kisʼejna jngonajin ndsai kichjinijin.

Je xi títjon tsakʼinyanajin kui jmeni xi tso Génesis 3:15, én jebi kʼiaa kuitjoson kʼianga jekoatexoma Chjotaxále Niná, je Jesucristo. Nʼio tjínle kjoandosin nga sʼe̱jinle ngatsʼi chjota xi tʼatsʼe jebi. Kui xokisikaonajin nga tsakʼinyasuinjin (Mat. 24:14). Tochoatsee jaʼato nga tichotʼayaijin je Biblia nga kinikʼantjaiyaijin yaonajin.

Kʼianga kʼoakitso jngonajin je testigole Jeobá xi ya Tokmak tsʼe nga koanngínkoaijin jña tjín xi kuixan, tsaʼyaníjin nga kjaʼaí sʼin beni je testigo.  Alikui tokjaʼaíngá kisʼin kʼoa tsín xán tsakʼi. Alikui mangóson kao sʼuí jña saje tsangínjin, jñani toʼbi je chjota kʼoa jñani tokjaʼaíngá sʼín kʼoa nga toxkia nchja̱.

Kʼoati tsangínjin je kjoajtín ya Tokmak. Yaa ngijñájchá tsakiyojtínjin kʼianga nda chon. Je polisía básjainajin kuinga tjín xi síkatíoni je ndsʼee nga síkuindanajin. Kʼianga cha̱nnyʼán yaa biyojtínjin jñani tíjna jngo niʼya kʼoa je polisía nkjín kʼa kichokonnajin nga skoe̱ jme xi nʼiaijin. Kʼiaa tsangínsʼenngindáijin nga sá julio nga nó 1982 ya xo̱ngá xi Chu ʼmi, nʼio kichosonnilaijin jokinʼiaijin (Mat. 10:16). Tochoa choaa koannijin nga kichuijin ya ngijñájchá, kijndaníjin nga kichʼasjengʼaijin Niná kʼoa kinoʼyaníjin je kjoanokjoaya xi tsʼe kjoachanisʼenngindá.

Nga nó 1987, jngo ndsʼee xi kʼoakitsona tsa koa̱n kjuísixatʼa jngo chjota xi koanndosinle Énle Niná xi ya Balykchy tsʼe. Kʼianga bichoaa ʼnde jebi ño ora nʼia kao tren. Kʼianga jenkjín kʼa tsangínkʼinyasuinjin ya Balykchy, tsaʼyaníjin nga nʼio nkjín chjota xi koanndosinle je Énle Niná. Kʼianga tsaʼyaijin jebi tsesa kinixálaijin je Jeobá.

Ntsjaintsjai tsangínjin kao chjoónna ya Balykchy. Me tongantsjai nga ya biyonijin nga tífe xomana, ʼmiyasonníjin kʼoa bationíjin kjoajtín. Nkjínsa xo̱n xi Énle Niná yʼangini koanchjénnajin kʼoa kʼianga koan kichʼaijin jngoo naxá xi tomáte xinyá tsakinyaijin. Kʼianga jao naxá mangínkoaijin toʼyaa masonninajin nga jngo sá. Nga mangínjin kʼoa nga nroanijin ʼmiyalaijin je chjota.

Nga nó 1995 kʼiaa kisʼejna jngo jtín ya Balykchy, kʼianga jejin nó jaʼato nga tsangíntítjuinjin ya naxinandá jebi. Jokjitse tsakitsomaijin nʼio tse tao̱n kisʼenginajin nga tsangínjin ya ʼnde jebi. Ñʼai koannajin xi tʼatsʼe tao̱n tonga jngo ndsʼee tsakasenkaonajin. Tsabe je Jeobá nga menajin nga tsesa si̱xálaijin kʼoa kisichikontʼainnajin (Mal. 3:10). Je Jeobá male kʼoasʼín tojmeyejeni nga basenkaoná.

Kʼiaa nga nó 1992 nga chjotajchínga sʼin tsakatejna ya jinjtín. An xi títjon chjotajchínga koan ya jtín xi ntje̱le kirguís kitjenni. Ya jtín jña tiyuijin ya Tokmak kisʼenajin kjoanda nga tsesa kinixálaijin je Jeobá. Tobʼelañá, koa̱n tsakʼinyalaijin je xti xi ntje̱ kirguís kitjenni ya ndʼiaskuela. Ndʼaibi, jngo ti jebi xi ya tíjnajinle Comité xi tsʼe Sucursal kʼoa ngi jao xi precursor especial sʼin tjíosíxá. Kʼoati tsakʼainganʼiolaijin je xi kjaʼaí ya jinjtín. Nga tífitsʼia nga nó 1990, je xo̱n xi tjíonajin tokui xi én ruso faʼaitʼa kʼoa kui én machjén nga sʼejna je kjoajtín. Tonga ngisaa koannkjín je ndsʼee xi én kirguís nchja̱ kʼoa an kisikʼatoyale nga sʼejna kjoajtín. Tsakinyakao jebi nga ngisa koanjinle jotjínni xi kixi.

Je Mairambubu kao an kʼoati tse nichxin kinikʼayalaijin je ʼndíxtinajin. Tsangínkaoníjin nga ʼmiyasuinjin kʼoa nga mangínjin je kjoajtín. Kʼianga 12 nóle je tsotinajin xi Gulsayra ʼmi, nʼio tsjoake koan nga tsakjákaonajmíni je chjota xi tʼatsʼe je Énle Niná ya yandiaa. Ngatsʼi ʼndíxtinajin nʼio tsjoake koan nga tsakʼéjinkon je testo xi tsʼe Biblia. Je xtinajin kao je xtindainajin, ngantsjai nʼio  tsjoále kjoandosin je xá xi tjín ya jinjtín. Je xi ñajan mani xtinajin xi tjíokon, kʼoa je xtindainajin xi 11 mani, 16 mani xi choʼndale Jeobá ma kʼoa xi fi kjoajtín kao xijchále.

Je ndsʼee xi tsakʼétsʼiakao nga kitsoyason kʼianga nó 1950, tokʼoajinkoa̱nle tsa skoe̱ josʼin tíʼmiyason ndʼaibi je Énle Niná. Tobʼelañá, fitsʼiakjoanni nga nó 1990 ngisaa tiʼndená nga ʼmiyasoán kʼoa nga satíoná je kjoajtíntse.

Kʼianga nó 1991, yaa tsangínjin kao chjoónna ya Alma-Atá (jñani Almaty ʼmi ndʼaibi), jngo ʼnde xi tíjna ya Kazajistán. Tokʼiaa kisʼejnatítjon jngo kjoajtíntse. Kʼoa nga nó 1993 kʼiaa kisʼejnatítjon jngo kjoajtíntse ya Kirguistán, jñani tíjna je estadio Spartak jñani Biskek ʼmi. Je ndsʼee xi jetsoyason, jngo xomana kisitsje ʼnde jebi nga kjesa fitsʼiajin je kjoajtíntse. Kʼoa je chjota xi síkuinda tokʼoakoanle kʼoa saʼnda tsín kisikʼéchjínajin nga ya kisʼejna je kjoajtíntse.

Kʼoati nʼio tsjoa sʼe tokoán jmeni xi koan nga nó 1994, kʼiaa kitjo títjon je xo̱n xi Énle Niná yʼangini kʼianga én kirguís. Kʼoa ndʼaibi, yaa sucursal xi tíjna Biskek faʼatoya je xo̱n xi Énle Niná yʼangini kʼianga én kirguís. Kʼoa xi ijngosani, kʼiaa saʼnda tjen nó 1998, kisʼeyani xo̱n ngixko̱n chjotaxá je testigole Jeobá ya Kirguistán. Jetsʼato 5,000 mani xi jetsoyason, 83 mani je jtín kʼoa 25 mani je grupo xi tjín xi kjaʼaí kjaʼaí én nchja̱, jolani: én chino, inglés, kirguís, ruso kao lenguaje de señas ruso, turco, uigur kʼoa kao uzbeko. Je ndsʼee kjaʼaí kjaʼaísʼin koanjchá, tonga ñaki jtín sʼin tjíosíxále je Jeobá. Alikui jao tjín tokoán nga je Jeobá xotísʼín nga nʼio tíʼmiyason je Énle.

Jé Jeobá tsakasenkaona nga kisikʼantjaiya yaona. Je xijchána xá jinjñá kisʼin kʼoa to aon nó kʼia skuela. Ninga kʼoalani, je Jeobá kui kjoanda títsjoána nga chjotajchínga sʼin tijna ya jinjtín kʼoa nga xinyale je chjota jmeni xi tso je Biblia ninga je chjota xi ngisa tse xo̱n male tikʼoajinni an. Je Jeobá ngisasa tse jmeni xi sʼín tikʼoajinni josʼin nikjaʼaitsjeen. Ngayeje jmeni xi koantʼen kui xi basenkaona nga tosi tonda kuinchjaña xi tʼatsʼe Jeobá. Nga je “Niná koaanle ngayije kjoa” (Mat. 19:26).