1, 2. 1) Jméni xi chan koanjinle je Robert. 2) Jméni xi kisʼin nga koanskanni.

JE Robert kʼiaa kisʼenngindá kʼianga sʼa xti, tonga alikui ñaki tjínjngo kon nga kʼoakisʼin. Itso: “Alikuikʼia kui kʼoakisʼian xi chʼaotjín, tonga tokui kisixánile Jeobá nga tjínnele kʼoasʼian. Nʼio tíjna je kjoamakjainna koanna, nga̱ kintsjaiña kjoajtín kʼoa nkjín kʼa nga precursor auxiliar sʼin kisixá nga xki̱ nó. Tonga tjínsa jmeni xi kichana”.

² Je Robert kʼiaa saʼnda koanjinle kʼianga jechixan. Sakʼoaa kui kiskonangile xínkjín jmeni xi tsoya je Biblia. Je chjoónle nʼio nda be jmeni xi tso je Biblia, nga̱ nʼio tíjna je kjoamakjainle. Tonga je Robert to kjoasoa bʼejnajin nga tsín be jmeni xi chjonangile kʼoa kʼoasʼin kisikjaʼaitsjen nga tsín jme xi majinle. Kʼoa i kitso: “Kʼiatsa an koandiaale je chjoónna, tjínnele nga nʼio sʼe̱jna je kjoamakjainna”. Kʼoakisʼin jmeni xi kitso. Itsosa: “Kʼoa nga sa tse sa tse kiskotʼaya je Biblia tobijbini koanjinna jmeni xi tsoya”. Nga koanskanni, je Robert koanjinle jotjínni xi kixi, kʼoa xi ngisa tjínle kjoandosin kuinga koanmiyosa je Jeobá.

3. 1) Jmé xi tsoyaná jmeni xi koanle je Robert. 2) Jmé kjoachjonangi xi chótʼayajiaan i̱ kjoaʼmiya jebi.

³ Jmeni xi koanle je Robert nʼio tse xi tsoyaná. Tsakui nichxin majin choaná jotso je Biblia, tsa mangián ngantsjai je kjoajtín xi satíoná kʼoa mangínkʼinyasoán. Tonga jebi ali tsakuijin xi tsonile nga  jenʼio tíjna je kjoamakjainná. Tsakui nichxin sa nda sa nda jetiʼyaa je Énle Niná, tonga tsa si̱kjaʼaitsjenjiaan josʼin timangínkoaa yaoná jchajián nga machjénsa nga si̱ndayaa yaoná (Filip. 3:16). Je xi koasenkaoná nga tosi tonda nʼio sʼe̱jna je kjoamakjainná, kui xi jan kjoachjonangi chótʼayajiaan i̱ kjoaʼmiya jebi. Xi títjon, jmé xi koasenkaoná nga jchaa josʼin tíjna je kjoamakjainná. Xi majaoni, jméni xi sʼiaan nga ngisa nʼio sʼe̱jna je kjoamakjainná. Kʼoa xi majanni, jósʼin koasenkaoná nga nyaon nyaon kʼianga nʼio sʼe̱jna je kjoamakjainná.

4. ʼYáni xi tjínnele koaitjenngi je kjoafaʼaitsjen xi faʼaitʼa Efesios 4:23, 24.

⁴ Kʼianga jechoʼndale Niná koan, kinikʼantjaiyañá josʼin timangínkoaa yaoná. Kʼoa tosi tonda kinindayasaa yaoná kʼianga jetsangínsʼenngindá. Je Biblia itso: “Katamachjotseya jo tjín kjoafaʼaitsjenno” (Efes. 4:23, 24). Kui xi tsonile nga tosi tonda chʼa̱sjee nganʼio nga si̱ndayaa yaoná. Nga chjotajée maa tjínnele nga tosi tonda si̱ndayaa yaoná kʼoa ninga jekjoan nkjín nó tinixálee Jeobá tjínnele si̱kuindaa josʼin tíjna je kjoamakjainná (Filip. 3:12, 13).

5. Jmé kjoachjonangi xi koasenkaoná nga jchaa josʼin tíjna je kjoamakjainná.

⁵ Kʼianga nʼio sʼe̱jna kʼoa nga tosi tonda sʼe̱ná je kjoamakjain tjínnele si̱kjaʼaitsjenjiaan jotinʼia. Tsa sʼa xtiaa kʼoa ninga jechjotajchíngaa koaan chjónangilee yaoná jebi: “A ngisaa kjimachriantʼasale Niná. A kʼoakjimakjoan jokjoan je Cristo. Jósʼin bakó jokjoan kʼoa josʼian kʼianga fia kjoajtín. Jméni xi ngisa nʼio sikʼaxkia kʼianga nchjanajmía. A kotʼayaña, jókjoan najño xi bʼakja, jófa kʼoa jósʼian kʼianga ʼya xi kjoafaʼaitsjen tsjoána. Jósʼian kʼianga kui xi chʼaotjín sʼejnabasenna. A jemajinna jmeni xi choa ñʼai tjín kʼoa a jengisa kjimataja je kjoamakjainna” (Efes. 4:13). Nga kui chjónangilee yaoná jebi koasenkaoná nga jchaa josʼin tíjna je kjoamakjainná.

6. Kʼianga si̱kjaʼaitsjenjiaan josʼin tíjna je kjoamakjainná, jmésani xi machjén nga sʼiaan.

⁶ Kʼianga si̱kjaʼaitsjenjiaan josʼin tíjna je kjoamakjainná tsakui nichxin machjén nga je ndsʼee kuinyakaoná. Je pastro Pablo kʼoakitso nga je chjota xi tsínle kjoamakjain alikui be nga tsín sasénle Niná jmeni xi sʼín. Tonga je chjota xi kʼoasʼin síkjaʼaitsjen josʼin síkjaʼaitsjen Niná be jmeni xi sasénle Niná kʼoa bʼasjengi xi chʼaotjín (1 Cor. 2:14-16; 3:1-3). Nga tjínle kjoafaʼaitsjen xi tsʼe Cristo je ndsʼee xi chjotajchínga sʼin tjío ndi̱toon be tsa ʼyani xi jetínroajen je kjoamakjainle. Kʼiatsa ñálani xi kʼoakoaan kʼoa tsa je xi chjotajchínga sʼin tjío kuinyakaoná, a si̱tjosonñá jmeni xi kuitsoná. Kʼiatsa kʼoasʼiaan koakoñá nga mená nʼio sʼe̱jna je kjoamakjainná (Ecl. 7:5, 9).

7. Jósʼin ʼyañá nga tsín tsa tokui xi machjén nga jchaa jmeni xi tsoya je Biblia kʼianga nʼio sʼe̱jna je kjoamakjainná.

⁷ Kʼianga nʼio sʼe̱jna je kjoamakjainná ali tsa tokuijin xi machjén nga jchaa jmeni xi tsoya je Biblia. Je rey Salomón nʼio tsabe jotjínni xi tʼatsʼe Jeobá. Saʼnda yaa Biblia kisʼetʼa kʼa je én xi kinchja̱. Tonga xijekoanni, yátsʼin tsakasénle Jeobá (1 Rey. 4:29, 30; 11:4-6). Kuinga nʼio machjénni nga tosi tonda si̱tajaa je kjoamakjainná kʼoa nga tsín tokui nga jchaa jmeni xi tsoya je Biblia (Col. 2:6, 7). Jókoa̱n sʼiaan.

8, 9. 1) Jméni xi koasenkaoná nga nʼio sʼe̱jna je kjoamakjainná. 2) Jmé xá chótʼayañá kʼoa si̱kjaʼaitsjenjinñá (chótsenlai sén xi fitsʼiani kjoaʼmiya jebi).

⁸ Je Pablo kʼoakitsole je chjotale Cristo xi tsakatio nga siglo 1, nga tjínnele kʼoenele yaole nga sʼe̱le kjoafaʼaitsjen (Heb. 6:1). Nichxin xi tiyoaa ndʼaibi, tojo machjén nga kʼoasʼiaan jmeni xi kitso je Pablo. Nʼio tjínle kjoandosin nga chótʼayá je libro “Tosi tonda katasʼeno kjoatsjoachale Niná”. Koasenkaoná nga jchaa  josʼin si̱chjén je kjoafaʼaitsjen xi tsjoá je Biblia. Kʼiatsa jekichotʼayá libro jebi, koaan chótʼayá je xi kjaʼaísanile je xo̱n xi Énle Niná yʼangini xi koasenkaoná nga nʼio sʼe̱jna je kjoamakjainná (Col. 1:23). Xi ijngosani, tjínnele kʼoétsʼoaa kʼoa si̱kjaʼaitsjenjiaan josʼin si̱chjén jmeni xi chotʼayá.

⁹ Kuinga chotʼayañá kʼoa nikjaʼaitsjenjinñá nga̱ mená si̱tjosonlee je Jeobá kʼoa mená nga sa̱sénle jmeni xi sʼiaan (Sal. 40:8; 119:97). Nga kʼoasʼiaan, kʼoati koasenkaoná nga tsín kʼoaiʼndee nga jme xi kʼoechjoaná nga nʼio sʼe̱jna je kjoamakjainná (Tito 2:11, 12).

10. Jméni xi tjínnele sʼin je xi sʼa xti nga nʼio katasatío je kjoamakjainle.

¹⁰ Kʼiatsa sʼa xti, a jeʼyai jósʼin si̱xálai Niná. Kataʼyala josʼín jngo ndsʼee xi ya Betel tísíxá kʼianga satío je kjoajtíntse xi jngo nichxin, ndsʼee jebi fákaonajmí je xti xi kʼia fisʼenngindá. Kui kjonangile jósʼin tjíondajinle nga si̱xále Niná. Jmeni xi tso xti jebi bakó nga ñaki be josʼin sixále je Jeobá. Tjínkʼa xi kʼoatso nga ñaki to xále Niná mele sʼin kʼoa tjínkʼa xi mele nga ya koaitsjoánganʼio jñani ngisa machjén xi tsoyason. Tonga kʼoati tjínkʼa xi tsín be jmeni xi sʼin. Nga kʼoatso, tsakui nichxin kʼoasʼin síkjaʼaitsjen nga tsínkjoan machjén nga kʼoenesale yaole nga sixále Niná. Je xi sʼa xti, machjén nga skónangile yaole jebi: “A kuinga fiña je kjoajtín kʼoa a kuinga xinyasonña nga je xijchána xi kʼoasʼin mele. Axo kuinga miyona mani je Jeobá”. Ninga sʼa xtiaa kʼoa ninga jekoanjchíngaa machjén nga si̱kjaʼaitsjenjiaan jósasʼin nga ngisa nda si̱xálee je Niná. Jebi koasenkaoná nga koa̱ntajasa je kjoamakjainná (Ecl. 12:1, 13).

11. 1) Jméni xi sʼiaan nga nʼio sʼe̱jna je kjoamakjainná. 2) Jmé choa̱ xi faʼaitʼa Biblia xi koa̱n chjénngiaa.

¹¹ Kʼianga ʼyaa jñasani chaná nga si̱ndayaa yaoná, tjínnele nga kʼoasʼiaan. Jebi nʼio tjínle kjoandosin nga̱ kui xi kuitsoni tsa tjoéná kjoabijnachon kʼoa tsa mai (Rom. 8:6-8). Kʼianga jetjínná kjoafaʼaitsjen alikui xi tsonile nga jechjotatsje maa. Je Jeobá tsjoáná je nganʼiotsjele nga basenkaoná. Ninga kʼoalani, tjínnele nga kʼoénelee yaoná. Je ndsʼee John Barr xi ya tsakʼejnajinle je Cuerpo Gobernante, kui kisikʼaxki̱ jmeni xi tso Lucas 13:24, nga kʼoakitso nga nkjín chjotale Cristo xi saténgi xi totʼatsʼe “nga tsín nda síxá”. Chjénngiaa je choa̱le Jacob, nga tosi tonda kisitajakao je ánkje josaʼnda nga kisichikontʼain (Gén. 32:26-28). Tsakui nichxin nʼio tsjoachaa nga chotʼayá je Biblia, tonga kʼianga kʼoéxkiaa, alikui kʼoasʼiaan joni tsa novela tibʼexkiaa kʼoa tsa tokui nga tokʼoetsaojinná. Tjínnele nga nʼio nda chótʼayá ánni nga jchasíñá jmeni xi nʼio chjíle xi koasenkaoná nga nʼio sʼe̱jna je kjoamakjainná.

12, 13. 1) Jméni xi koasenkaoná nga kʼoasʼiaan jotso Romanos 15:5. 2) Jósʼin basenkaoná je choa̱le Pedro kʼoa kao kjoafaʼaitsjen xi kitsjoa. 3) Jméni xi sʼiaan nga kʼoasʼin si̱kjaʼaitsjeen josʼin síkjaʼaitsjen Niná (chótsenlai je rekuadro jñani tso “ Jméni xi sʼiaan nga nʼio katasʼejna je kjoamakjainná”).

¹² Kʼianga bʼenelee yaoná, je nganʼiotsjele Niná basenkaoná nga nikʼantjaiyaa josʼin nikjaʼaitsjeen. Kʼoa xijemani, chaan sʼená je kjoafaʼaitsjenle Cristo (Rom. 15:5). Xi ijngosani, je nganʼiotsje basenkaoná nga chjaʼaxinlee yaoná je kjoangʼakon kʼoa nga kui kʼoanʼia jmeni xi sasénle Niná (Gál. 5:16, 22, 23). Alikui si̱kinroajeen tokoán kʼiatsa jchaa nga tojo kui nimetokoán jmeni xi tjín sonʼnde kʼoa tsakuije̱ xi símekon yaoná. Tosi tonda si̱jélee je nganʼiotsjele Jeobá kʼoa koasenkaoná nga kui si̱kjaʼaitsjeen xi ndatjín (Luc. 11:13). Si̱kjaʼaitsjenla choa̱le je pastro Pedro, nkjín kʼa nga tsín kʼoasʼin kisikjaʼaitsjen josʼin síkjaʼaitsjen Niná (Mat. 16:22, 23; Luc. 22:34, 54-62; Gál. 2:11-14). Tonga alikui kisikinroajen kon, jé Niná tsakasenkao nga chan kisʼenile je kjoafaʼaitsjenle Cristo. Ñá kʼoati koa̱n kʼoasʼiaan.

¹³ Je Pedro kʼoakitso nga koanskanni, nga kʼoakatamakjoaan jokjoan Cristo, nga chjoéxkoá yaoná, nga katasʼená kjoaka kʼoa nga koakoá kjoatsjoacha (tʼexkiai 2 Pedro  1:5-8). * Kʼoénelee yaoná nga katasʼená kjoanda jebi nga̱ koasenkaoná nga tosi tonda nʼio sʼe̱jna je kjoamakjainná. Nyaon nyaon chjónangilee yaoná jebi: “Jméni xi sʼian ndʼaibi nga kʼoasʼin sikjaʼaitsjen josʼin síkjaʼaitsjen Niná”.

14. Jósʼin basenkaoná kʼianga sʼená je kjoafaʼaitsjen xi tsʼe Cristo.

¹⁴ Kʼianga sʼená je kjoafaʼaitsjen xi tsʼe Cristo basenkaoná josʼin nokjoaa, jonʼia ya tʼaxáná kʼoa tsa ya ndʼiaskuela kʼoa kao jmeni xi chjoejiaan nga nyaon nyaon. Kʼoasʼin ʼyanile nga mená kjuintjenngilee je Cristo. Kʼiatsa nʼio tíjna je kjoamakjainná alikuijin kʼoaiʼndee nga jme xi kʼoechjoale je kjoamiyo xi tjínná xi kao Jeobá. Kʼianga kui sʼe̱jnabasenná xi chʼaotjín alikuijin kʼoasʼiaan. Kʼianga jme xi chjoéjiaan, chjónangilee yaoná jebi: “Jñánile kjoafaʼaitsjen xi tsjoá je Biblia koasenkaona nga jme xi kjoéjian. Jósʼin tsa jelani Cristo xi kui kjoa tífaʼatojin. A sa̱sénle Jeobá jmeni xi skoéjian”. Tjínnele si̱ngalee yaoná nga kʼoasʼin si̱kjaʼaitsjeen. Kataʼyala kʼaa choa̱ xi koa̱n kjuintjenngiaa. Nga jngó jngó koya xi jchaa ibi, faʼaitʼa kjoafaʼaitsjen xi tsjoá je Biblia xi basenkaoná nga kui chjoéjiaan xi ndatjín.

15, 16. Tʼejnai choa̱ josʼin basenkaoná nga sʼená je kjoafaʼaitsjen xi tsʼe Cristo kʼianga chjoéjiaan ʼyani xi kuixankoaa kʼoa kʼianga chjoéjiaan je miyoná.

¹⁵ Nga chjoéjiaan ʼyani xi kuixankoaa. Je kjoafaʼaitsjen xi koa̱n kjuintjenngiaa kui xi faʼaitʼa ya 2 Corintios 6:14, 15 * (tʼexkiai). Jmeni xi kitso Pablo kui bakó nga tsín koa̱n nda koatio je chjota xi makjainle kao xi tsín makjainle. Jósʼin koa̱n kjuintjenngiaa kjoafaʼaitsjen jebi kʼianga chjoéjiaan ʼyani xi kuixankoaa.

¹⁶ Nga chjoéjiaan je miyoná. Kataʼyala je kjoafaʼaitsjen xi faʼaitʼa ya 1 Corintios 15:33 * (tʼexkiai). Je chjota xi tjínle kjoamakjain alikui koa̱n je simiyo je chjota xi sikitsónjin je kjoamakjainle. Si̱kjaʼaitsjenla josʼin koa̱n kjuintjenngiaa kjoafaʼaitsjen jebi. Tobʼelañá, chjónangilee yaoná: “Jósʼin koa̱n sichjén je redes sociales. Jméni xi sʼian kʼiatsa jngo chjota xi tsín ʼbexkoan kʼoakuitsona nga ya tjen Internet si̱skánijin.

17-19. 1) Jméni xi tsín kʼoasʼiaan kʼiatsa nʼio tíjna je kjoamakjainná. 2) Jósʼin si̱xálee je Niná kʼiatsa nʼio tíjna je kjoamakjainná. 3) Jósʼin basenkaoná nga nʼio tíjna je kjoamakjainná kʼiatsa kjoa sʼená kao xíngiaa.

¹⁷ Xi bʼéchjoaná nga nʼio sʼe̱jna je kjoamakjainná. Je Pablo kʼoakitso jmeni xi nʼio kuenta  sʼin je chjotale Cristo (tʼexkiai Hebreos 6:1). * Kʼianga kui kinchja̱ni Pablo je “xá” xi tsín timachjénni, kui xokitsole jmeni xi tsín basenkaoná nga nʼiosa sʼe̱jna je kjoamakjainná. Kjoafaʼaitsjen jebi koasenkaoná nga jchaa jmeni xi sʼiaan, jolani tʼatsʼe jebi: “A basenkaona jmeni xi tisʼian axo mai. A skoéña xá jebi tojoni nga ngisa tse tao̱n kuinje̱na. Ánni nga tsín koa̱n ya tsjoanganʼiosínile je chjota xi kʼoatso nga mele kʼoendajin je kjoa xi tjín sonʼnde”.

¹⁸ Xále Niná xi mená kuichotjenngiaa. Kʼianga kinchja̱yajinle chjota ya jngo sonnindo, je Jesús kʼoakitso jmeni xi ngisa títjon si̱kʼéjnaa (Mat. 6:33). Je chjota xi nʼio tíjna je kjoamakjainle kui títjon síkʼéjna je Chjotaxále Niná. Tsa kuenta sʼiaan kjoafaʼaitsjen jebi koasenkaoná nga chjoéjiaan jmeni xi sʼiaan. Koaan chjónangilee yaoná jebi: “A kjuíña ya universidad axo mai. A skoéña xá xi tíbʼaitʼana”.

¹⁹ Nga kjoa sʼená kao xíngiaa. Kʼianga kjoa sʼená kao xíngiaa koaan kjuintjenngiaa je kjoafaʼaitsjen xi kitsjoale Pablo je jtín xi kisʼejna ya Roma (Rom. 12:18). Ñá xi chjotale Cristo maa bʼenelee yaoná nga nyʼán biyokoaa ngatsʼi chjota. Jónʼia kʼianga kjoa sʼená kao xíngiaa. A tojé fanelee axo bʼendajinñá je kjoa xi sʼená (Sant. 3:18).

20. Ánni nga menili nga tosi tondasa nʼio sʼe̱jna je kjoamakjainli.

²⁰ Tojosʼin kaʼyaa choa̱ jebi, kʼianga nikjaʼaitsjenjiaan je kjoafaʼaitsjen xi tsjoá je Biblia basenkaoná nga kui chjoejiaan jmeni xi bakó nga nʼio tíjna je kjoamakjainná. Jebi kʼoati basenkaoná nga ngisa tsjoa sʼe tokoán. Je Robert, xi kanikʼaxki̱ná nga fitsʼiani kjoaʼmiya jebi, itso: “Kʼianga ngisa koanmiyosa je Jeobá, ngisaa nda koanna nga tsakasentítjonle je yaniʼyana, kʼoa ngisaa koanna josʼin kisijchá je ʼndíxtina kʼoa nʼio tsjoa kisʼe tokoan”. Kʼoati koaan tsanda ñá kʼiatsa nʼio sʼe̱jna je kjoamakjainná. Ngisaa nda kuiyoaa ndʼaibi, kʼoa nichxin xi nroaján so̱koná “kjoabijnachon xi ngantsjai” (1 Tim. 6:19).