1. Jósʼin tsakakó jngo chjota samaritano nga kitsjoa kjoanda.

JE CHJOTA xi te koanni xi kjiʼndojon yaole ñaki mele koannda. Kinrʼoé xi tʼatsʼe Jesús, nga male síndaya tojme chʼinni kʼoa bení nga kʼoati koa̱nle sindaya tsanda je. Kʼianga tsabe nga kjin nroa Jesús, kiskiʼndáxá kʼoa kitso: “Jesús, Maestro, jchamatakonnajin”. Je Jesús kinrʼoéle kʼoa kisindayaa ngatsʼi. Nga te chjota jebi, nʼiojin kitsjoa kjoanda * nga kʼoasʼin kisindaya Jesús. Tonga tojngoo xi ñaki kikon ijngokʼale Jesús nga kitsjoale kjoanda. Chjota samaritano jebi tsakʼasjengʼa Niná nga kitsjoa kjoanda (Luc. 17:12-19).

2, 3. 1) Ánni nga sakʼoa tsín bʼaiñá kjoanda. 2) Jméni xi chótʼayajiaan i̱ kjoaʼmiya jebi.

² Tojo kisʼin je chjota xi kisindaya Jesús nga kitsjoa kjoanda, kʼoati nʼia tsanda ñá kʼianga ʼya xi basenkaoná. Tonga tsakui nichxin sakʼoa tochajinná nga bʼé kjoanda.

³ I̱ kjoaʼmiya jebi kui chótʼayá ánni nga nʼio tjínnile kjoandosin nga kʼoee kjoanda. Kʼoati nkjín choa̱ jchaa tʼatsʼe chjota xi síkʼaxki̱ ya Biblia xi tsakakó kjoanda kʼoa kao xi mai. Xijekoa̱n, kʼoati jchaa jmeni xi koasenkaoná nga kʼoee kjoanda.

4, 5. Ánni nga tjínnenile kʼoee kjoanda.

⁴ Jé Jeobá bʼéjnaná choa̱ nga tjínnele kʼoee kjoanda.  Tobʼelañá, nʼio tse kjoanichikontʼain tsjoále je xi kʼoasʼín jmeni xi sasénle (2 Sam. 22:21; Sal. 13:6; Mat. 10:40, 41). Kʼoa je Biblia itsoná: “Chjénngilao Niná, joni tsa ʼndí xi kjaínga tjaocha” (Efes. 5:1). Jngo koya anni nga bʼaiñá kjoanda kuinga mená nga je Jeobá chjénngilee.

⁵ Xi majaoni koya anni nga kʼoasʼianñá kuinga tsjoa sʼe tokoán kʼianga ʼya xi tsjoáná kjoanda kʼoa kʼianga bʼé kjoanda tsjoa satío kon je xíngiaa. Kuinga tsjoa satíoni kon nga be nga jmeni xi kasʼín kʼoa tsa jmeni xi katsjoáná kabasenkaoná. Nga kʼoanʼia ngisaa mamiyoaa xíngiaa.

6. Jósʼin mangóson je én xi nichjén nga bʼailee kjoanda xíngiaa kao manzana xi tao̱nsine koanndani.

⁶ Nʼio chjíle nga kʼoee kjoanda. Je Biblia itso: “Joni tsa manzana xi tao̱nsine koanndani xi ya tjíoya jngo xjoa̱ xi tao̱nchxoa koanndani kʼoasʼin mangóson jngo én xi kʼiakjoan nokjoa nga machjén” (Prov. 25:11). Tosi̱kjaʼaitsjenla jonaskánakji kʼoa jokji chjíle jngo manzana xi tao̱nsine koanndani, xi kui tjíotʼale tsojmi xi tao̱nchxoa koanndani. Jósʼe̱ tokoán tsa ʼya xi kui tsjoáná. Nʼiojin tsjoa koa̱nná. Kʼianga bʼailee kjoanda je xíngiaa kʼoati kji chjíle jokji chjíle manzana jebi. Jngo manzana xi tao̱nsine koanndani nʼiojin tse koa̱nle. Kʼoati ma je én xi nokjoakoaa xíngiaa nga bʼailee kjoanda, tsakui nichxin kjoaʼaítsjenle ngantsjai jme xi kaʼmilee.

7. 1) Tojo tso Salmo 27:4, jósʼin tsakakó kjoanda je David. 2) Jósʼin tsakakó kjoanda je ntje̱le Asaf.

⁷ Nkjín choʼndale Niná xi tsakatio nichxin kjoatse xi kitsjoa kjoanda, jolani je  David (tʼexkiai Salmo 27:4). * Je David tsakakó nga nʼio tsabechjí nga je Jeobá kisixále. Tobʼelañá, nʼio nkjín tsojmi kitsjoa kʼianga kisʼenda yo̱ngo̱. Je xi kʼoati kisʼin jé ntje̱le Asaf. Kʼianga kitsjoa kjoanda salmo kiski, xi tsonile, kjoajnda xi bʼasjengʼa Niná. Jngo salmo kiski jñani kitsjoale kjoanda Jeobá kʼoa kʼoakitsole nga tomaxkónle jmeni xi sʼín (Sal. 75:1). Tojosʼin tiʼyaa, je David kao ntje̱le Asaf tsakakóle Jeobá jokji tsabechjí je kjoanichikontʼain xi kitsjoale. Jósʼin koa̱n chjénngiaa choa̱le.

8, 9. 1) Jósʼin tsakakó je Pablo nga tsabechjí je ndsʼe̱. 2) Kʼoa jósʼin kichomani.

⁸ Je pastro Pablo nʼio tsabechjí je ndsʼe̱ kʼoa yaa tsakakóni jmeni xi kitso xi tʼatsʼe. Tobʼelañá, kitsjoale kjoanda Niná ngantsjai xi tʼatsʼe ndsʼe̱. Kʼoa kʼianga kiski carta kʼoakitso jokji tsjoake koan. Ya Romanos 16:1-15 kanñato mani xi kisikʼaxki̱ jaʼaínle. Kisikʼaxki je Priscila kao Áquila kʼoa kʼoakitso nga me kinikʼien xi totʼatsʼe. Kʼoati kisikʼaxki̱ Febe, kʼoa kʼoakitso nga nʼio nkjín ndsʼee tsakasenkao, saʼnda tsakasenkao je Pablo. Kuinga nʼio ndasʼin kinchja̱ni Pablo xi tʼatsʼe ndsʼee jebi, nga kʼoasʼin nʼio nda kisixále Niná.

⁹ Ningalani be Pablo nga sakʼoa saténgi je ndsʼe̱, tonga jña fikjetʼani carta xi kiskile je chjotale Cristo xi Roma tsʼe kui kisikʼaxki̱ jmeni xi nda kisʼin. Kʼoa nga kisʼexkia carta jebi ya jinjtín nʼiojin tsjoa kisatio kon je ndsʼee kʼianga kinrʼoé jmeni xi kitso Pablo xi tʼatsʼe, kʼoa ngisajin koanmiyosa. A kʼoanʼia jokisʼin Pablo, a bʼailee kjoanda je ndsʼee xi tjío ya jinjtín tsa jme xi ndatjín kasʼín kʼoa tsa jme xi katso.

10. Jméni xi bakóyaná nga tsabechjí je Jesús jmeni xi kisʼin je chjotale.

¹⁰ Jmeni xi kitso kʼale Jesús je jtín xi kisatio ya Asia Menor tsakakó nga bechjí jme xi tjíosʼín je chjotale. Tobʼelañá, je jtín xi kisʼejna ya Tiatira i kitsole: “An ʼbenía xáno, kʼoa kjoatjaochano, kʼoa josʼin nga makjainno, kʼoa josʼin nixáo, kʼoa je kjoatsejtano. ʼBenía nga je xáno xi jetʼani ngisa tse kaoni xi títjon” (Apoc. 2:19). Je Jesús ali tsa tokuijin xi kitso nga ngisa tse kisixá je ndsʼee, kʼoati kisikʼaxki̱ jmesani xi tsakakó, xi tsakinyakao nga kʼoakisʼinni. Ninga kʼoati kisikixiyanda jtín jebi, tonga kui tsakʼétsʼiakaoni kʼoa kui kisikjetʼani je én xi kitsjoanganʼiole je ndsʼee (Apoc. 2:25-28). Jé Jesús xi ngʼajko̱ sʼin tíjnale je jtín xi tjío kʼoa jé batéxomale, kuinga tsín tjínnenile tsjoá kjoanda jmeni xi nʼia nga nixálee. Tonga kʼoasʼín. Kʼoa jngoo choa̱ xi nʼio nda bʼéjnale xi chjotajchínga sʼin tjío.

11. Tojo tso Hebreos 12:16, jmé xi kisʼin Esaú nga tsín tsabexkón Niná.

¹¹ Nkjín chjota síkʼaxki̱ je Biblia xi tsín kitsjoa kjoanda. Tobʼelañá je Esaú. Je xijchále tsjoake koan je Jeobá kʼoa tsabexkón, tonga je Esaú alikui kʼoakisʼin (tʼexkiai Hebreos 12:16). * Jméni xi kisʼin. Tojngoo chxoa̱ najmá lenteja tsakaténani je tsojmi xi bʼakaole  nga ʼndítjon ma kʼoa jé Jacob, ndsʼe̱ xi maʼndí, tsakaténale (Gén. 25:30-34). Xijekoanni, kʼiaani ba koanle nga kʼoakisʼin kʼoa kʼoakitso nga katabʼaile je kjoanichikontʼain xi bʼakaole nga ʼndítjon ma. Tonga alikui tikoanni nga̱ tsín tsabechjí jme xi bʼakaole.

12, 13. Jósʼin tsakakó je chjota israelita nga tsín kitsjoa kjoanda kʼoa jósʼin kichomani.

¹² Je Jeobá nʼio tse jmeni xi kisʼin xi tʼatsʼe chjota israelita kʼoa kuinga tjínnenile kitsjoa kjoanda tsakai. Tobʼelañá, te kjoañʼai kichokaone je naxinandá Egipto kʼianga tsakʼasjentjai nga choʼnda kjima. Kʼoa xijekoanni, tsakʼasjentjai ya ndáchikon Ní kʼoa yaa kisikʼienjin je chjotakjoajchán egipcio. Je chjota israelita nʼio kitsjoa kjoanda nga kʼoasʼin tsakʼasjentjai Jeobá kʼoa kisele. Tonga jókjitse nga tsakakó kjoanda.

¹³ Kʼianga kjoa kisʼele kisichajin ngayeje jmeni xi kisʼin je Niná xi tʼatsʼe, kʼoa alikui titsakakónile kjoanda (Sal. 106:7). Je Biblia kʼoatso nga “ngatsʼi je xtile Israel chʼaosʼin kisikʼaxki̱ je Moisés kao Aarón”, nga kʼoakitso jékjoánni Jeobá xokitsole (Éx. 16:2, 8). Je Jeobá koanjtile kʼoa kʼoakitso nga ya ʼndekixí kuiyá ngatsʼi, kʼoa nga toje Josué kao Caleb xi kuinje̱ngi (Núm. 14:22-24; 26:65). Jméni xi sʼiaan nga je chjénngilee xi nda kisʼin kʼoa tsín je chjénngilee xi chʼao kisʼin. Kataʼyala.

14, 15. 1) Jméni xi sʼin xi jechixan nga tsjoále kjoanda xínkjín. 2) Jméni xi sʼin je xi xijchá ma nga koakoyale ʼndíxtile nga katatsjoá kjoanda.

¹⁴ Ya yaniʼya. Kʼianga male tsjoá kjoanda ngatsʼi xi tjío ya yaniʼya nda batio. Kʼianga tsjoále kjoanda xínkjín xi jechixan ngisaa nda batio kʼoa ngisaa choa ñʼai male nga síchatʼale xínkjín. Je xʼin xi bechjí je chjoónle alikui tokui kotsenle jmeni xi nda sʼín kʼoa jmeni xi tso, kʼoati nda síkʼaxki̱ kʼoa bʼasjengʼaa (Prov. 31:10, 28). Kʼoa je xi chjoón kʼoatsole je xʼinle jmeni xi bechjí xi tʼatsʼe.

¹⁵ Jon xi xijchá mao, jmé xi sʼiaon nga koakoyalao je ʼndíxtino nga katatsjoá kjoanda. Je ʼndíxti kui kjenngi jmeni xi nʼiao kʼoa jmeni xi bixón. Kuinga machjénsíni nga jon kʼoéjnalao choa̱, tʼailao kjoanda kʼianga kʼoasʼín jme xi ʼmilao. Kʼoa kʼoatʼinlao nga katatsjoále kjoanda tsa ʼya xi tjín xi katsjoále kʼoa tsa  jme xi kasʼín xi tʼatsʼe. Tʼinyalao nga ya ni̱ma̱ná nroajinni nga bʼé kjoanda kʼoa nga nʼio binyakao xi ngikʼa nga kʼoanʼia. Tobʼelañá, jngo tichjaa xi Clary ʼmi, itso: “Kʼianga 32 nóle mana, toxijña ndoyá kichaní je pana kʼoa toje mana kisijchánajin, jan koannijin. Kʼianga kichona 32 nó kʼiaa kisikjaʼaitsjenjian jokji ñʼai koanle mana. Kʼoa kʼoakixinle jokji ʼbechjía jmeni xi kisʼin nga kisijchánajin. Chriansʼaa kʼoakitsona nga tsínkʼia chajinle jmeni xi kixinle, nga faʼaitsjenle ngantsjai kʼoa nga kui xi tsjoa bʼé kon”.

16. Jngo choa̱ kʼoasi jósʼin binyakao je ndsʼee kʼianga bʼailee kjoanda.

¹⁶ Ya jinjtín. Ninʼiojinñá kon je ndsʼee kʼianga bʼailee kjoanda. Kataʼyala tʼatsʼe Jorge, jngo ndsʼee xi 28 nóle xi chjotajchínga sʼin tíjna. Jngo chʼin xi nʼio táo kiskatʼale kʼoa jngo sá nga tsín tikoan kini kjoajtín. Kʼoa kʼianga jeki ijngokʼa tojo kje chókjoajinle nga kitsjoa kjoanokjoaya. Itso: “Alijme chjína koanna nga̱ tsín jme xi tikoan kisʼinña ya jinjtín. Tonga jngo ndsʼee xi i̱ kitsona nga jejetʼa kjoajtín: Tsjoale kjoanda nga nʼio nda choa̱ tibʼejnalai familiana. Jokji tífaʼato nó nʼio tjíobinyakaonajin kjoanokjoayali. Nʼio sítaja kjoamakjainnajin. Nga kʼoakitsona ñaki kiskiʼndáña. Kuikjoán én xi machjénna nga kʼia”.

17. Jméni xi sʼiaan nga kʼoailee kjoanda Jeobá tʼatsʼe ngayeje jme xi títsjoáná, tojo tso Colosenses 3:15.

¹⁷ Nga bʼailee kjoanda je Nináná. Je Jeobá nʼio tse xi títsjoáná xi sítaja kjoamakjainná. Tobʼelañá, jme xi ʼmiyaná ya kjoajtínná, xi faʼaitʼa revista kao xi faʼaitʼa je página xi tíjnaná ya Internet. Sakʼoaa kʼoabixoán nga kuikjoan xi machjénná kʼianga jngo kjoanokjoaya faʼa, tsa jngo revista tibʼexkiaa kʼoa tsakui tichotsenlee JW Broadcasting. Tonga jósʼin kʼoailee kjoanda Jeobá tʼatsʼe ngayeje jebi (tʼexkiai Colosenses 3:15, TNM). * Jngo koya xi koa̱n sʼiaan kuinga kjitʼa kʼoétsʼoalee nga kʼoailee kjoanda (Sant. 1:17).

18. Jósʼin bakoá nga ʼyachjiá Ndʼia jña chotʼayá.

¹⁸ Ijngosa koya josʼin bʼailee kjoanda Jeobá kuinga tsje nichoaan jñani chotʼayá. Kuinga ntsjaintsjai nitsjeñá kʼoa  nisinnilee Ndʼia jña chotʼayá. Kʼoa je ndsʼee xi bʼakaole audio kao video ya jinjtín nʼio nda síkuinda tsojmi xi síchjén. Kʼianga nisinlee Ndʼia jña chotʼayá ngisaa tse male kʼoa ngisaa choa jña sʼendaya. Nga kʼoanʼia ngisaa njengisa je tao̱n xi machjén nga sʼenda kʼoa sʼendaya Ndʼia jña chotʼayá ngakjijnda Sonʼnde.

19. Jméni xi bakóyaná jokoan jngo superintendente kao chjoónle.

¹⁹ Xi nʼio síxá tʼatsaan. Kʼianga bʼailee kjoanda xíngiaa binyakao kʼianga kjoa faʼatojin. Kataʼyala jokoan jngo superintendente xi tsʼe circuito kao chjoónle. Ñandia kʼianga cha̱nnyʼán nga jekichoni jña tjíoni jenʼio aonyale. Nga nʼio nyʼán, je tichjaa totsakajnayaa je chingantsja̱ xi yʼakjá. Nga koannyaonni kʼoakitsole je xʼinle nga tsín tikʼoakoa̱nnile nga tosi tonda kʼoasʼin sixá. Nga tikuini nichxin nga tanjio, jngo carta kichole xi tsʼe sucursal. Je carta kʼoatso nga nʼio nda tísíxá je tichjaa kʼoa nga tíkale. Kʼoa kʼoatso nga ñʼaijin kjimale nga xinxin fikatio nga xki̱ xomana. Je xʼinle tichjaa itso: “Ñaki kichokajin ni̱ma̱le jme xi tso carta jebi kʼoa nikʼiajin tikʼoakitsoni nga sikʼéjna je xá xi tinʼiaijin. Kʼoa kʼianga an xi koanmena kisikʼéjna xá jebi, jé xi kitsjoanganʼiona nga tosi tonda kʼoasʼin kinixáijin”. Ndsʼee jebi kao chjoónle me 40 nó nga superintendente koan.

20. Jméni xi kʼoénelee yaoná nga sʼiaan nga nyaon nyaon, kʼoa ánni.

²⁰ Kʼoénelee yaoná ngantsjai nga kʼoee kjoanda. Jmeni xi nʼia kʼoa jmeni xi bixoán sakʼoaa kuikjoan xi machjénle je xíngiaa nga nda sʼe̱ kon. Kʼoa kʼianga bʼailee kjoanda je xíngiaa miyoná koa̱nni ngantsjai. Kʼoa xi ngisasa chjíle kuinga je tichjenngilee Jeobá, je Nʼainá xi male tsjoá kjoanda.