1, 2. 1) Jótso Biblia xi tʼatsʼe Moisés, kʼoa jméni xi kisʼin. 2) Ánni nga kʼoénenilee yaoná nga ndʼé koaan.

JE Biblia kʼoatso nga je Moisés xi ngisasa nʼio ndʼé koan “tikʼoajinni je chjota xi tsakatio sonʼnde” (Núm. 12:3). A kui xi tsonile jebi nga indajin koan, nga tsín tsabe jokisʼin kʼoa nga kitsokjon, tojosʼin síkjaʼaitsjen kʼa chjota tʼatsʼe chjota xi ndʼé. Mai. Je Moisés tajajin koan, ñaki tsabee jokisʼin kʼoa nʼiojin koan. Kʼoa nga tsakasenkao Jeobá, kikjákao je rey xi tsʼe Egipto, kʼoa janla miyón mani chjota xi tsakasentítjonle nga tsakʼetsoma ya ʼndekixí. Kʼoati je tsakasenkao naxinandá Israel nga kisikinjele chjotakontrale.

² Ninga tsín kʼoakji kjoa tibitjatojiaan ñá jokji kjoa jaʼatojin Moisés, tonga nga nyaon nyaon sakʼoaa ñʼai maná nga bakoá kjoandʼé kʼianga ʼya xi jotsoná kʼoa tsa kjoa tjínná. Kuinga nʼio machjénni nga kʼoénelee yaoná nga ndʼé katamaa. Je Jeobá kʼoatso nga “je xi ndʼé tsʼee koa̱n i̱ sonʼnde” (Sal. 37:11). Koaan chjónangilee yaoná jebi: “A bakoña kjoandʼé. A kʼoasʼin bena chjota nga tjínna kjoandʼé”. Nga jchaa xi tʼatsʼe jebi, tjínnele nga títjon kjoanla kataʼyaa jósʼin tsoyanile nga ndʼé maa.

3, 4. 1) Ánni kʼoabixónsíñá nga ya mangóson nga jngo dibujo nindaa kʼianga ndʼé maa. 2) Jñánile nga jan koya xi machjénná nga ndʼé koaan, kʼoa ánni.

³ Nga ndʼé * maa yaa mangóson nga jngo dibujo  xi naskánakji nindaa. Nkjín koya color xi naskánakjoan nichjén nga nikʼiaa. Kʼoatisʼinni, nga ndʼé koaan tjínnele koakoá kjoanangitokon, kjoanʼiojin kʼoa nga si̱tjosoán. Tsa mená nga nda kuiyoaa ngixko̱n Jeobá tjínnele koakoá ngayeje jebi. Kataʼyala ánni.

⁴ Tojé chjota xi tjínle kjoanangitokon xi sítjosonle Niná kʼoa xi kʼoasʼín josʼin mele Niná. Kʼoa je xi kʼoati mele Jeobá kuinga ndʼé koaan (Mat. 5:5, TNM; Gál. 5:23, TNM). Tonga nʼio jti male je Na̱i nga kui kʼoanʼia jme xi mele Jeobá. Kuinga nʼio nkjín chjota xi jtikeniná ninga bakoá kjoanangitokon kao kjoandʼé (Juan 15:18, 19). Kʼoa nga kʼoama, machjénní nga nʼiojin katamaa.

5, 6. 1) Ánni nga jtikesíni Na̱i je chjota xi ndʼé. 2) Jmé kjoachjonangi xi chótʼayajiaan.

⁵ Je xi tsínle kjoandʼé ngʼakonní, nʼio síjtile yaole kʼoa tsín sítjosonle Jeobá. Kʼoakjoan je Na̱i kʼoa kuinga jtikeni je chjota xi ndʼé, nga̱ kui bakó jokji tsʼen. Kʼoa ali tsa tokuijin, je chjota xi ndʼé bakó nga ndiso je Na̱i, nga̱ ninga tojme xi sʼin kʼoa tojme xi kuitso, alikui kʼoechjoale nga je Jeobá sixále (Job 2:3-5).

⁶ Tonga kʼiáni nga ñʼai maná nga bakoá kjoandʼé kʼoa ánni nga tjínnenile nga kʼoénelee yaoná nga ndʼé koaan. Nga jchaa xi tʼatsʼe jebi, kataʼyala je choa̱le Moisés, kao tsʼe xi jan xti hebreo kʼoa kao tsʼe Jesús.

7, 8. Jókisʼin je Moisés kʼianga tsín kisakole kjoaxkóntokon.

⁷ Kʼianga ñá tinyatítjoán. Tsakui nichxin ñʼai koa̱nná nga koakoá kjoandʼé kʼianga tsín koakoná kjoaxkóntokon je chjota xi kjinená, kʼoa tsa kʼiaje̱ nga tsín sasénle jme xi kʼuínlee nga sʼin. A sakʼoaa kʼoamatʼeen. Jósʼiaan tsa je xtiná kʼoa tsa je chjoónná xi kʼoasʼin. Kataʼyala jme xi kisʼin Moisés.

⁸ Je Jeobá kui xá kitsjoale Moisés nga je koasentítjonle naxinandá Israel kʼoa kʼoati kitsole nga je katakji je kjoatéxoma xi kitsjoale naxinandá. Alikui jao kisʼele chjota israelita nga je Niná kitsjoanganʼiole Moisés. Ninga kʼoalani, je Míriam kao Aarón, xi ndsʼe̱ koanni Moisés, alikui nda kisikʼaxki̱ tʼatsʼe chjoón xi chixankao. Tsa je xi kjaʼaí, xi kui xá tjínle  je xá xi kisʼele Moisés tochajinle koanjtile kʼoa kjoañʼai kitsjoale. Tonga alikui tokjoán kisijtile yaole je Moisés kʼoa saʼnda kʼoakitsole Jeobá nga katafaʼáxinle Míriam je chʼin xi kitsjoale nga kjiʼndojon yaole (Núm. 12:1-13). Ánni nga kʼoakisʼinni je Moisés.

9, 10. 1) Jméni xi kisijinle Jeobá je Moisés. 2) Jméni xi bakóyale je choa̱le Moisés je xi nyatítjonle yaniʼya kʼoa kao je xi chjotajchínga sʼin tjío.

⁹ Je Moisés kitsjoaʼnde nga je Jeobá tsakakóyale. Ñachan nó tongini nga ya tíjna ya ndʼiale je rey xi tsʼe Egipto, alikui ndʼé koan je Moisés. Ñandia kʼianga jngo chjota kisikʼien nga̱ kʼoakitso nga tsín nda tísʼín chjota jebi. Kʼoasʼin kisikjaʼaitsjen nga sa̱sénle Niná jmeni xi kisʼin. Je Jeobá 40 nó tsakasenkao nga kisijinle nga tsín tsa to kjoanʼiojinjin machjén nga koasentítjonle je naxinandá Israel, tjínnele nga kʼoati ndʼé koa̱n. Kʼoa nga kʼoakoa̱nkjoan machjén nga nangitokon koa̱n kʼoa nga sitjosonle je Jeobá. Koanjinle jmeni xi kisakoyale kʼoa nʼio ndasʼin tsakándiaale je naxinandá Israel (Éx. 2:11, 12; Hech. 7:21-30, 36).

¹⁰ Nichxin xi tiyoaa ndʼaibi, je xi nyatítjonle yaniʼya kʼoa kao je xi chjotajchínga sʼín tjío tjínnele kui choa̱le Moisés koaitjenngi. Tsa chjotajchínga sʼin tijnai kʼoa tsa jko̱ tijnalai yaniʼya, ali ngotjojin nijtinilai yaoli kʼiatsa tsín sa̱kóli kjoaxkóntokon. Nangitokon katamai kʼoa kʼoasi jñani tsín nda kanʼiai (Ecl. 7:9, 20). Titjosonlai je Jeobá kʼoa kʼoasʼin tʼendajin je kjoa josʼin sasénle, kʼoa takontsjai kjoandʼé (Prov. 15:1). Je xi kʼoasʼín tsjoa báya kon je Jeobá, nyʼán batiokao xi kjaʼaí kʼoa nda choa̱ batío.

11-13. Jmé choa̱ xi tsakatíoná nga jan xti hebreo.

¹¹ Kʼianga ʼya xi fitjenngikená. Jokji jetífaʼato nó nkjín chjotaxá sonʼnde xi tjíofitjenngike je naxinandále Niná. Ánni kʼoasʼínni. Tsakui nichxin kʼoatso nga tibitjatoné je kjoatéxoma, tonga kuinga fitjenngikeniná nga je títjon “nikjitjosonlee Niná kaoni tsa chjotasonʼnde” (Hech. 5:29). Sakʼoaa besinná, ndoyá síkatíoʼyaná kʼoa síkiʼaonná. Tonga jé Jeobá basenkaoná nga tsín kʼoanʼiangajaoñá jmeni xi matʼeen, tosaa tojyó biyoaa.

¹² Si̱kjaʼaitsjenla nga jan xti hebreo xi ya kinikatíonʼio ya Babilonia, je Hananías, Misael kao Azarías. * Je xi rey sʼin tíjnale Babilonia kʼoakitsole nga katabʼétsʼoale je xkóson xi ki̱cha̱sine koanndani. Tonga xti jebi kao kjoaxkóntokon tsakjákao je rey  kʼoa ngasin nganda kʼoakitsole nga tsín kʼoetsʼoale xkóson jebi kʼoa kitsoyale anni nga tsín kʼoasʼinni. Jé Niná kisitjosonle ninga kʼoakitso je rey nga lʼí sikʼatsaojin tsa tsín kʼoasʼin. Alikui jao kisatio kon nga je Jeobá kʼoasjentjai ninga tsín be tsa tiʼakʼia kʼoasjentjaini. Tjíondaa nga kʼoakoa̱ntʼain jmeni xi tsjoáʼnde je Jeobá (Dan. 3:1, 8-28). Kʼoasʼin tsakakóni kʼianga tjínle kjoanʼiojin je chjota xi ndʼé, kʼoa nga ni jejin chjotaxá kʼoa nikuijin kjoañʼai kʼoechjoale nga toje Jeobá skoe̱xkón (Éx. 20:4, 5).

¹³ Jósʼin koa̱n chjénngilee nga jan xti hebreo kʼianga chotʼayakao kjoamakjainná. Nangitokon katamaa kʼoa kʼoakʼoé tokoán nga je Jeobá sikuindaná (Sal. 118:6, 7). Kʼoa kʼianga ʼya xi jée koanená ngasin nganda chja̱koaa kʼoa koakolee kjoaxkótokon (1 Ped. 3:15). Kʼoa nitsejin kui kʼoasʼiaan jmeni xi tsín tinda sikʼéjnaniná ngixko̱n Nʼainá Jeobá.

14, 15. 1) Jméni xi nʼia kʼianga tse kjoanikjáojin tjínná. 2) Tojo tso Isaías 53:7, 10, ánni nga jesíni Jesús xi ngisa nda choa̱ tsakʼéjnaná nga ndʼé koaan ninga nʼio tse kjoanikjáojin tjínná.

¹⁴ Kʼianga nʼio nikjáojiaan. Ngatsʼiñá nga sakʼoa nikjáojiaan. Tsakui nichxin nikjáojiaan kʼianga jngo examen kʼoéndaa ya ndʼiaskuela kʼoa tsa kʼiaje̱ nga tjín xi sʼiaan ya tʼaxáná. Kʼoati makjáojinná kʼianga kʼoatsoná chjinexki nga jtíyaa kʼoa tsa jmesa xi síjéná josʼin chótʼaná. Ñʼai maná nga bakoá kjoandʼé kʼianga tinikjáojiaan. Tsakui nichxin totjín totje̱n kjoa koa̱njtininá kʼoa tsín tinda tso én chja̱kaoñá xi ngikʼa kʼoa tsa tsín nda si̱koaaje̱. Tsa kʼoasʼe sakʼoa tokoán si̱kjaʼaitsjenjiaan je choa̱le Jesús.

¹⁵ Kʼianga tojngo jaosa sá tsakʼejna i̱ tʼanangi je Jesús, nʼio tse kjoanikjáojin kisʼele. Bení nga ni̱kʼien kʼoa nga nʼio tse kjoañʼai ni̱kjaʼá (Juan 3:14, 15; Gál. 3:13). Nga kjesa nikʼienjin, kʼoakitso nga nʼio kisikjáojin (Luc. 12:50). Kʼoa nga tojeme ni̱kʼien i kitso: “Ndʼai kjaínga fáole ni̱ma̱na”. Jmeni xi kitsole Nʼaile bakó nga kisʼele kjoanangitokon kʼoa nga kisitjosonle. Kitso: “Nʼaina, chʼa̱sjentjainái je ora jebi, tonga kui xá jaʼainia je ora jebi. Nʼaina, chʼa̱sjejeyai jaʼaínli” (Juan 12:27, 28). Kʼianga kicho nichxin, nʼiojin koan kʼoa kitsjoaʼndé nga kikao je chjotakontrale Niná. Chjota jebi nʼio tse kjoañʼai kisikjaʼá nga kisikʼien kʼoa totaon tsabe. Ninga kʼoasikji kjoañʼai kinikjaʼá, je Jesús tsakakó kjoandʼé kʼoa kʼoakisʼin josʼin mele Niná. Jéní xi ngisasa nda choa̱ tsakʼéjnaná nga ndʼé koaan ninga nʼio tse kjoanikjáojin tjínná (tʼexkiai Isaías 53:7, 10). *

16, 17. 1) Kʼiáni nga tse kjoandʼé koanchjénle Jesús tʼatsʼe jme xi kisʼin je pastrole. 2) Jósʼin koa̱n chjénngilee je Jesús.

¹⁶ Nitje̱n nga tojeme kuindoa̱ Jesús, tse kjoandʼé koanchjénle tʼatsʼe jme xi kisʼin je pastrole. Tosi̱kjaʼaitsjenla jokji tísíkjaójin Jesús nga kui nitje̱n. Tsa kixi koaitʼale Niná saʼnda nga kuiyá jmi miyón chjota kuitjontjai (Rom. 5:18, 19). Kʼoa xi ngisasa kisikjaʼaitsjen kui jósʼin kʼoaxki̱ je Nʼaile (Job 2:4). Kʼianga tjíokjen, je pastrole kui tsakjáotiyani ʼyáni “xi koa̱senjna títjon”. Jekjoan nkjín kʼa tsakatekjáyale Jesús tʼatsʼe kjoa jebi, kʼoa nga tiʼakʼiani kʼoati tokʼoa  jetsakatekjáyangánile. Kʼoa ninga tikʼoakitsongáni je pastro, je Jesús alikui kisijtile yaole. Ngasin nganda kisikixiyanda, kʼoa ijngokʼá kʼoakitsole jme xi tjínnele sʼin. Xijekoan, kʼoakitsole nga nda tjíosʼín nga kixi tjíofitʼale (Luc. 22:24-28; Juan 13:1-5, 12-15).

¹⁷ Jósʼiaan tsa ñálani xi kui kjoa tiyojiaan. Koaan chjénngilee je Jesús kʼoa tsín yaoná si̱jtilee ninga tse kjoanikjáojin tjínná. Kao kjoatsjoa si̱tjosoán kjoatéxoma jebi: “Tikjaínlao xíngio” (Col. 3:13). Kuitjosonná kjoatéxoma jebi kʼiatsa si̱kjaʼaitsjeen nga kʼoati bixoán kʼoa kʼoati nʼia jmeni xi tsín sasénle xi ngikʼa (Prov. 12:18; Sant. 3:2, 5). Kʼoati machjén nga kʼoakʼuínlee xi ngikʼa jmeni xi nda tjíosʼín (Efes. 4:29).

18. 1) Jósʼin basenkao Jeobá je xi ndʼé nga kui xi ndatjín kjoéjin. 2) Jmé xi tjínnele sʼiaan nga koasenkaoná Jeobá.

¹⁸ Kui xi ndatjín chjoéjiaan. Kʼiatsa ñʼai tjín jme xi chjoéjiaan, je Jeobá koasenkaoná kʼiatsa tibakoá kjoandʼé. Kʼoatso nga nrʼoéle je xi ndʼé (Sal. 10:17). Je Biblia kʼoatso nga kʼoati koandiaale. Itso: “Jé koandiaale je xi ndʼé nga kui kʼoasʼin xi kixi tíjna, kʼoa jé kuitsoyale je xi ndʼé je ndiaale” (Sal. 25:9). Je Jeobá kui síchjén je Biblia kao xo̱n xi bʼasje naxinandále kʼianga bándiaaná, * kʼoati síchjén je video kao kjoajtín xi satíoná xi batíonda “je choʼnda xi nʼiotʼakon, xi nda be xá” (Mat. 24:45-47). Tonga tjínnele nga nangitokon koaan kʼoa chótʼayá jmeni xi títsjoáná Jeobá kʼoa nga kao kjoatsjoa si̱tjosoán jmeni xi kjimajinná.

19-21. 1) Jmé xi kisʼin Moisés ya Qadés. 2) Jméni xi bakóyaná jme xi kisʼin je Moisés.

¹⁹ Ngisaa choa kjoa sʼe̱ná. Si̱kjaʼaitsjenla ijngokʼá je Moisés. Nkjín nó nga ndʼé koan kʼoa nga kui kʼoakisʼin jme xi sasénle Jeobá. Tonga nga toje tífikjetʼa xi 40 nó tsakʼetsoma chjota israelita ya ʼndekixí, je Moisés alikui tsakakó kjoandʼé. Nga kui nichxin tochriankʼiaa kʼien je ndichja. Tsakui nichxin je tsakasenkao nga tsín kinikʼien ya Egipto, kʼoa yaa kisʼeñe ya Qadés. Kʼoa je chjota israelita titsakjayojéengáni nga tsínle je xi machjénle. Je Biblia kʼoatso nga koanjtile je chjota israelita nga tsínle nandá. Ninga  nʼio nkjín kjoaxkón tsakatío Jeobá, kʼoa ninga jekjoan nkjín nó nga nda tíbándiaale Moisés je naxinandá tojo tsakjayojée je chjota israelita. Kʼoati kisikʼaxki̱ je Moisés ninga tsín je tjínle jée nga tsín nandá (Núm. 20:1-5, 9-11).

²⁰ Nga kʼia, je Moisés nʼio koanjtile kʼoa alikui tsakakó kjoandʼé. ʼNdele nga kjoakao je na̱xi̱, tojo kitsole je Jeobá, tosaa kao kjoajti tsakjákao je chjota israelita kʼoa kʼoakitsole nga jngo kjoaxkón kʼoejna. Xijekoan, jao kʼa tsakále je na̱xi̱ kʼoa nʼio tse nandá kitjo. Jé kjoangʼakon kʼoa kao kjoajti xokisikao nga tsín nda kisʼinni (Sal. 106:32, 33). Ninga tokʼia nga tsín tsakakó kjoandʼé je Moisés, je Jeobá alikui kitsjoaʼndele nga jaʼasʼen ya ʼNde jña tsakʼinle nga kʼoaile chjota israelita (Núm. 20:12).

²¹ Jméni xi bakóyaná jme xi kisʼin je Moisés. Xi títjon, kuinga kjitʼa chʼa̱sjee nganʼio nga ndʼé koaan. Tsa tsín si̱kuindaa yaoná ngotjo sikinjeniná je kjoangʼakon kʼoa tochale kui kʼoakuixoán kʼoa kui kʼoasʼiaan jmeni xi tsín kixi tíjna. Xi majaoni, kʼiatsa nʼio si̱kjáojiaan ngisaa ñʼai koa̱nná nga ndʼé koaan. Kuinga kʼoénenilee yaoná nga koakoá kjoandʼé ninga kjoa tiyojiaan.

22, 23. 1) Ánni nga machjénni nga tosi tonda kʼoénelee yaoná nga ndʼé koaan. 2) Jméni xi bakóyaná jotso Sofonías 2:3.

²² Lijme xi koa̱nná. Je Jeobá jeme kjoaʼaxin chjota xi tsʼen kʼoa tojé sikinjengi je chjota xi ndʼé. Kʼoa sʼee kjoanyʼán ngakjijnda Sonʼnde (Sal. 37:10, 11). A mená nga ya kuiyojinlee je chjotandʼé xi koatio. Koaan ya kuiyoaa kʼiatsa kʼoasʼiaan jmeni xi tso Jeobá ya Sofonías 2:3 * (tʼexkiai).

²³ Ánni “tsakui nichxin si̱katíoʼmano” tsosíni ya Sofonías. A kui xi tsonile nga tsín ʼyaa tsa sikuinda Jeobá je choʼndale xi tjíobʼénele yaole nga kʼoatjíosʼín josʼin mele. Mai. Kui xi tsonile nga kʼoati machjén nga tjín xi sʼiaan. Tsa mená nga kuinje̱ngilee yaoná nga kjoaʼaí “nichxin kjoajtile Jeobá” kʼoa kuiyoaa ngantsjai, tjínnele nga kʼoénelee yaoná ndʼaibi nga ndʼé katamaa kʼoa nga kui kʼoasʼiaan jme xi sasénle je Jeobá.