1. Jósʼin kichomani nga koanxinkonke je xtindsʼe̱ José.

JE Jacob tjao koanle ngatsʼi xtile, tonga je xi ngisa tjao koanle jé José, xi 17 nóle nga kʼia. Jókisatio kon je xtile xi ngikʼa. Koanxinkonke je José kʼoa koanjtike. Ningalani tsín je José kisʼele jée, jo choʼnda sʼin tsakaténa je xtindsʼe̱ kʼoa kʼoakitsole je nʼaile nga jngo cho̱jñá kisikʼien je tile xi nʼio tjaole. Kui je kjoaxintokon xokisikao nga tsín tinda tsakationi kʼoa kjoaba tsakʼejnajin je nʼaile (Gén. 37:3, 4, 27-34).

2. Tojo tso Gálatas 5:19-21, ánni nga nʼio xkón tíjnani je kjoaxintokon.

² Ya Biblia je kjoaxintokon * yaa maxki̱kao “kjoa xi sʼín yaoná”, kʼoa jngo chjota xi maxinkonke xi kjaʼaí kuijin xosikao nga tsín tjoéle kjoanda xi kjoaʼaíkao je Chjotaxále Niná (tʼexkiai Gálatas 5:19-21). * Je kjoaxintokon síkiʼaonná, kʼoa yaa nroani nga yaoná nijtilee, nga majtichaa xíngiaa kʼoa nga bixkan.

3. Jmé xi jchaa i̱ kjoaʼmiya jebi.

³ Jokoan je xtindsʼe̱ José kui bakóyaná nga tse kjoa bichómani nga kjoaxintokon bʼetʼaná, nga̱ tsín tinda biyokaoñá xíngiaa. Ningalani tsínkʼia kʼoasʼiaan jokisʼin je xtindsʼe̱ José, chjotajée maa ngatsʼiaa kʼoa bʼanachaná je ni̱ma̱ná (Jer. 17:9). Kuinga sakʼoa maxinkonchañá xíngiaa. Kataʼyala kʼaa choa̱ xi faʼaitʼa Biblia xi bakóyaná kʼoa xi kuinyakaoná  nga jchaa jméni xosikaoná nga kjoaxintokon sʼe̱jnajin ni̱ma̱ná. Xijekoa̱n, kui jchaa jméni xi koa̱n sʼiaan nga chja̱ʼaxinlee yaoná kʼoa nga nyʼán sʼin kuiyoaa.

4. Ánni nga koanxinkonkeni chjota filisteo je Isaac.

⁴ Nga nyiná je xi ngikʼa. Nga nyiná koan je Isaac, koanxinkonke je chjota filisteo (Gén. 26:12-14). Saʼnda tsakʼéʼndee jñani kikʼá nandá xi kisikʼi cho̱ntjele je Isaac (Gén. 26:15, 16, 27). Nichxin xi tiyoaa ndʼaibi, tjínkʼa xi ya mangóson je chjota filisteo kʼoa maxinkonke je chjota xi ngisa nkjín tsojmi tjínle tikʼoajinni je. Ali tokuijin símekon jmeni xi tjínle xi kjaʼaí, kʼoati tsín mele nga tsojmi katasʼele.

5. Ánni nga koanxinkonkeni chjotatítjonle religión je Jesús.

⁵ Nga nda ʼyatokon xi kjaʼaí. Je chjotatítjonle religión koanxinkonke je Jesús nga̱ nʼio tsjoake koan je chjota (Mat. 7:28, 29). Jé Jeobá kisikasén je Jesús i̱ Sonʼnde kʼoa kui kitsoya xi kixi. Ninga kʼoalani, je chjotatítjonle religión énndiso tsakáne nga chʼaosʼin kisikʼéjna ngixko̱n chjota (Mar. 15:10; Juan 11:47, 48; 12:12, 13, 19). Jebi kui bakóyaná nga tsín koa̱n koa̱nxinkonchá je xi nda ʼyatokon ya jinjtín. ʼNdele nga kʼoasʼiaan, tosa chjénngilee jokjoan (1 Cor. 11:1; 3 Juan 11).

6. Jósʼin tsakakó je Diótrefes nga kjoaxintokon tsakʼetʼale.

⁶ Kʼianga ʼya xi xá bʼaile jinjtín. Nga siglo 1, je Diótrefes koanxinkonke je xi tsakándiaale je jtín. Koanmele je tsakʼejnatítjon ya jinjtín, kuinga chʼaosʼin kinchja̱ni xi tʼatsʼe pastro Juan kao tʼatsʼe chjotale Cristo xi xá kjinele (3 Juan 9, 10). Ningalani tsín kʼoasʼiaan jokisʼin Diótrefes, tsakui nichxin koa̱nxinkonchá je ndsʼee xi xá bʼaile jinjtín, ngisaa tsakui xá tinimetokoán kʼoa tsa kʼoasʼin nikjaʼaitsjeen nga kʼoati koa̱nná nda si̱tjosoán joni je.

7. Jósʼin kuichomani tsa kjoaxintokon sʼe̱jnajin ni̱ma̱ná.

⁷ Je kjoaxintokon yaa mangóson je xka̱ xi veneno tjínle. Kʼianga jekui faʼasʼenjin ni̱ma̱ná, nʼio ñʼai tjoxin ijngokʼani. Kʼoa yaa nroani nga chi̱ni̱ maa, nga ngʼakon maa kʼoa nga toñá mangínñá yaoná. Je kjoaxintokon alikui tsjoáʼndená nga kui xi ndatjín bakoá, jolani kjoatsjoacha, kjoamatokon kao kjoandʼé. Tjínnele nga kjitʼanangi chʼa̱sjexian ya jinni̱ma̱ná tsa kjoaxintokon jetífaʼasʼenjin. Jmé xi koa̱n sʼiaan nga tsínkui katasíkinjená.

8. Jmé xi koasenkaoná nga chja̱ʼaxinlee yaoná je kjoaxintokon.

⁸ Tsa nangitokon koaan kʼoa tsa tokoanjngoni tokoán jmeni xi tjínná kui xi koasenkaoná nga tsín koa̱nxinkonchá xíngiaa. Tsa kʼoasʼiaan, alikui kʼoaiʼndee nga kui kjoaxintokon sʼe̱jnajin ni̱ma̱ná. Tsa nangitokon maa, alikuijin ngʼa chʼa̱sjee yaoná kʼoa tsínjin kʼoasʼin si̱kjaʼaitsjeen nga ngisa tse xi bakinná tikʼoajinni xi ngikʼa (Gál. 6:3, 4). ʼYani xi tomajngoni kon jmeni xi tjínle, tsjoa sʼele kʼoa tsínkui símekon jmeni xi tjínle xi ngikʼa (1 Tim. 6:7, 8). Je xi nangitokon kʼoa xi tomajngoni kon jmeni xi tjínle, tsjoa sʼe kon nga jme xi bʼaile xi ngikʼa.

9. Tojo tso Gálatas 5:16 kao Filipenses 2:3, 4, jósʼin koasenkaoná je nganʼiotsjele Niná.

⁹ Kui je nganʼiotsjele Niná koasenkaoná nga tsínkui kjoaxintokon kʼoetʼaná, nga nangitokon koaan kʼoa nga tokoa̱njngoni tokoán jmeni xi tjínná  (tʼexkiai Gálatas 5:16; * Filipenses 2:3, 4 *). Jé nganʼiotsjele Niná koasenkaoná nga si̱kjaʼaitsjenjiaan jotjín ni̱ma̱ná. Nga je Niná koasenkaoná, koaan chja̱ʼaxinlee yaoná je kjoafaʼaitsjen xi chʼaotjín kʼoa nga kui si̱kjaʼaitsjeen xi ndatjín (Sal. 26:2; 51:10). Kuila chótʼayajiaan je choa̱le Moisés kao Pablo, jmé xi tsakinyakao nga kisikinjele je kjoaxintokon.

10. Jmé kjoa xi jaʼatojin je Moisés jñani tsakakó nga tsín xinkon koan (chótsenlai sén xi faʼaitʼa ya portada).

¹⁰ Je Moisés tsee xá kisʼenele jinnaxinandále Niná, tonga alikui kʼoasʼin kisikjaʼaitsjen nga toje xi bakinle nga kui xá kʼoaile. Tobʼelañá, ñandia nga tsakjaʼáxin choale Jeobá je nganʼiotsjele kʼoa jé kitsjoale je chjota israelita xi chjotajchínga sʼin tsakatio xi ya tjíochrian jñani tíjna je ndʼianajño. Xijekoan, je Moisés kisʼejinle nga kʼoati tsakʼaile je nganʼiotsje je xi jao mani chjotajchínga xi tsín ya kicho jñani tíjna je ndʼianajño kʼoa nga kʼoati jo profeta kisʼin. Jókitso je Moisés kʼianga kʼoakitsole je Josué nga katabatekjáyale chjota jebi. Alikui koanxinkonke nga kui kjoanda kitsjoale Jeobá nga profeta koan nga jao chjota jebi (Núm. 11:24-29). Jmé xi bakóyaná je choa̱le Moisés.

11. Jósʼin koa̱n skénngile Moisés je xi chjotajchínga sʼin tjío.

¹¹ Kuila si̱kjaʼaitsjeen tsa jngo ndsʼee xi chjotajchínga sʼin tíjna xi nʼio tsjoake nga bándiaa Nga chotʼaya Xo̱n xi Bájinkonná. Tsa kʼoaʼmile nga katabakóyale je ndsʼee xi kjaʼaí ánni nga je koandiaani nga koa̱nskanni. Tsa tjínle kjoanangitokon joni Moisés. Kaojin kjoatsjoa kuitsoyale xi kjaʼaí.

12. Jósʼin bakó je ndsʼee nga nangitokon ma kʼoa nga tomajngoni kon jmeni xi tjínle.

¹² Kataʼyala ijngoaa choa̱ xi bakóyaná joma je ndsʼee xi jejchínga. Nkjín nó nga coordinador sʼin batiole je chjotajchínga xi ngikʼa. Tonga nga jebichóle 80 nó kao kjoatsjoa síkatío xále. Je superintendente xi tsʼe circuito nga jebichóle 70 nó bakó nga nangitokon ma kʼianga síkatío xá jebi kʼoa nga kjaʼaí xá bʼaile. Kʼoa je nó xi tífaʼato, jngo tjíjtsa Sonʼnde nʼio nkjín ndsʼee xi ya Betel tjíosíxá tsakai xi kjaʼaí xá tjíobʼaile. Je ndsʼee kao tichjaa jebi, alikui maxinkon nga kjaʼaí xi tíbʼaile xá xi kisʼin tsakai.

13. Jméni xokisikao tsakai Pablo tsa koanxinkonkelani je xi 12 pastrole Jesús.

¹³ Je pastro Pablo kʼoati nʼio nda choa̱ bʼéjnaná nga nangitokon koan kʼoa nga tokoanjngoni kon jmeni xi kisʼele. Alikui kitsjoaʼnde nga kjoaxintokon kisʼejnajin ni̱ma̱le. Nʼio tsakʼénele yaole nga kitsoyason, kʼoa nga nangitokon koan, i kitso: “An nía pastro xi ngisa nangi tíjnasale xikʼa pastro, nga tsín tsa bakinna nga kʼoaʼmina pastro” (1 Cor. 15:9, 10). Xi 12 pastro yaa tsakʼetsomakao je Jesús nga kitsoyason i̱ Sonʼnde, tonga je pastro Pablo kʼiaa chjotatjenngile Cristo koan kʼianga jekʼien kʼoa nga jejaʼáyanile je Jesús. Ninga pastro koan nga koanskanni, alikui ya tsakʼejnajinle je xi 12 pastrole Jesús (Rom. 11:13; Hech. 1:21-26). Ninga kʼoalani, tsjoa kisʼe kon nga kui xá tsakʼaile kʼoa alikui koanxinkonke je xi 12 pastro ninga ñaki ya tsakʼetsomakao je Jesús.

14. Jmé xi sʼiaan tsa nangitokon maa kʼoa tsa tomajngoni tokoán jmeni xi tjínná.

¹⁴ Tsa nangitokon maa kʼoa tsa tomajngoni tokoán jmeni xi tjínná, kʼoajin tisʼiaan jokisʼin je Pablo kʼoa jchaxkónjián je  ndsʼee xi xá tsjoále Jeobá (Hech. 21:20-26). Jé Jeobá tsjoále xá xi chjotajchínga sʼin tjío nga bándiaale je jtín. Ninga chjotajéelani ma, jngoo kjoatjao xi tʼatsʼe Jeobá nroani (Efes. 4:8, 11). Kʼianga ʼyaxkoán kʼoa nga kao kjoanangitokon mangíntjenngiaa josʼin bándiaa, miyole Jeobá maa kʼoa ndasʼin biyoaa kao je ndsʼee.

15. Jmé xi tjínnele sʼiaan nga tsín kjoaxintokon katabʼetʼaná.

¹⁵ Alikui sʼe̱ kjoanyʼán kʼiatsa kjoaxintokon tíjnajin ni̱ma̱ná. Tjínnele nga chja̱ʼaxian ya jinni̱ma̱ná je kjoaxintokon kʼoa kuinyakoaa xi ngikʼa nga tsínkui sʼe̱jnajin ni̱ma̱le. Tjínnele kʼoasʼiaan nga jao koya jebi nga si̱tjosoán nga kʼoatsoná je Jeobá nga kui kjoásjee je xi nyʼán sʼin sikatíoná kao xíngiaa (Rom. 14:19). Jmékjoánni xi koa̱n sʼiaan nga kuinyakoaa xi ngikʼa nga tsín kjoaxintokon sʼe̱jnajin ni̱ma̱le kʼoa jósʼiaan nga nyʼán sʼin kuiyoaa.

16. Jósʼin kuinyakoaa xi ngikʼa nga tsín kjoaxintokon kʼoetʼale.

¹⁶ Jmeni xi nʼia kʼoa jokjoaan kʼoati bʼetʼale xi ngikʼa. Je chjota kui xi mele nga ngʼa chʼa̱sjee yaoná tʼatsʼe jmeni xi tjínná (1 Juan 2:16). Tonga yaa nroani nga maxinkonchá je xíngiaa. Jmé xi sʼiaan nga kuinyakoaa je xi ngikʼa nga tsín kʼoakatama. Jngo koya xi koa̱n sʼiaan kuinga tsín tokui kuinókjoañá jmeni xi tjínná kʼoa jmeni xi kuindá. Xi ijngo koya kuinga nangitokon koaan kʼoa tsínkui chʼa̱sjengʼañá yaoná tsa xá tjínná ya jinjtín. Tsa  ngotjo ngosa kui si̱kʼaxkiaa kui xosikao xi ngikʼa nga koa̱nxinkonkeniná. Tonga tsa koa̱nndosinná xíngiaa kʼoa tsa kuenta sʼiaan jñani nda sʼín, kui xi kuinyakao nga tsjoa sa̱tío kon kʼoa jtín sʼin kuiyoaa.

17. Jósʼin kichomani nga kisikʼantjaiya yaole je xtindsʼe̱ José.

¹⁷ Jmé xi koa̱n sʼiaan nga tsín kjoaxintokon sikinjená. Kataʼyala ijngokʼá tʼatsʼe xtindsʼe̱ José. Nga jenkjín nó jaʼato, yaa Egipto kitsaojin ijngokʼa xínkjín. Tonga je José alikui tokjoan tsakakóle yaole, tosaa títjonkjoanla kiskotʼayakao tsa jekisikʼantjaiya yaole. Tsakʼéndale xi tsakjenni, tonga ngisaa tse kitsjoale xi tsakjenni je Benjamín, je ndsʼe̱ xi maʼndí (Gén. 43:33, 34). Tonga alikui jña kʼoatso je Biblia tsa koanxinkonke je xtindsʼe̱ xi ngikʼa. Tosaa koanndosinle xi tʼatsʼe Benjamín kao tʼatsʼe Jacob, je nʼaile (Gén. 44:30-34). Je xtindsʼe̱ José tsakakó nga tsín tikjoaxintokon tjíojinni ni̱ma̱le, kʼoa tsakjáonda ijngokʼani (Gén. 45:4, 15). Tikʼoasʼinni, tsa ñaki ya jinni̱ma̱ná chja̱ʼaxinlee yaoná je kjoaxintokon, kui xi koasenkaoná nga nyʼán sʼin kuiyoaa ya yaniʼyaná kao ya jinjtín.

18. Tojo tso Santiago 3:17, 18, jósʼin kuichomani tsa kʼoainganʼioá nga katasʼe kjoanyʼán.

¹⁸ Je Jeobá kui xi mele nga kuixkantʼakoaa je kjoaxintokon kʼoa nga kjoásjee je kjoanyʼán. Nga kʼoakoa̱n, tjínnele nga kʼoénelee yaoná, nga̱ tojosʼin tiʼyaa i̱ kjoaʼmiya jebi, toxá kichʼañá nga kjoaxintokon bʼetʼaná (Sant. 4:5, TNM). Xi ijngosani, nichxin xi tiyoaa ndʼaibi, je chjota maxinkonke xínkjín kʼoa kui xi mele nga kʼoati sʼiaan tsanda ñá. Tonga alikui kui kjoaxintokon sʼe̱jnajin ni̱ma̱ná tsa nangitokon koaan, tsa kʼoee kjoanda kʼoa tsa tokoa̱nniná jmeni xi tjínná. Tsa kʼoasʼiaan, kʼoainganʼioñá nga sʼe̱ kjoanyʼán kʼoa kui xi ndatjín koakoá (tʼexkiai Santiago 3:17, 18). *