1, 2. Ánni nga kui kjoanda kitsjoaniná je Jeobá nga ya familiale tiyojiaan, kʼoa jmé xi kisʼin.

JE Jeobá kui xi mele nga ya familiale kuiyojinlee. Je xi ya tjíojin familiale jéní ngatsʼi chjota xi jekitsjoatʼale yaole kʼoa xi tjínle kjoamakjain tʼatsʼe kjoabʼechjíntjaile Jesús. Kʼoa nʼio tsjoa tjío tokoán ngatsʼiaa. ʼYañá nga tsín toxitsjoa nga tiyochoán, kʼoa kui kjoachoya tjínná nga koa̱n kuiyoaa ngantsjai nichxin, tsa ya ngʼajmi kʼoa tsa i̱ Sonʼnde nga jeʼndenaxó koa̱n.

² Nga tsjoakená je Jeobá, tsee kjoama̱ tsakʼéngi nga ya tiyojiaan je familiale (Juan 3:16). Je Biblia itso: “Chjí tsakindanino” (1 Cor. 6:20). Xi totʼatsʼe nga tsakʼéchjíntjainá je Jesús, koaan ndasʼin kuiyoaa ngixko̱n Niná. Nʼio tse kjoanda tjínná nga Nʼai ʼmilee je xi batéxomale je ngʼajmi kao Sonʼnde. Kʼoa tojosʼin tsaʼyaa ya kjoaʼmiya xi jejaʼato, jé Jeobá xi ngisasa ndasʼin síkuindaná nga Nʼainá mani.

3. Jméni xi tsakui nichxin chjonangilee yaoná (kʼoati chótsenlai je recuadro “ A kuenta sʼínna je Jeobá”).

³ Tsakui nichxin kʼoati bixoán jokitso jngo choʼndale Niná xi Biblia kiski, nga kitso: “Jósʼin kʼoechjínile je Jeobá ngayeje kjoanda xi tíbakóna” (Sal. 116:12). Alikui jme xi tjínná xi koa̱n kʼoéchjínilee je Nʼainá xi tíjna ngʼajmi. Tonga nga bakóná kjoatsjoacha kui xosíkaoná nga kʼoati matsjoachañá. Je pastro Juan i kitso: “Ñá kjaínga tjaochaa Niná, nga̱ je tjaoke koanná nga títjon” (1 Juan 4:19).  Jósʼin koakolee je Nʼainá xi tíjna ngʼajmi nga tsjoachaa.

4. Tojo tso Santiago 4:8, ánni nga kʼoénenilee yaoná nga si̱chriantʼalee je Jeobá.

⁴ Je Jeobá kui xi mele nga si̱chriantʼalee kʼoa nga chja̱kaonajmiá ngantsjai (tʼexkiai Santiago 4:8). * Kʼoatsoná nga ntsjaintsjai kʼoétsʼoalee, kʼoa tíjnandaa nga nrʼoéná ngantsjai (Rom. 12:12). Je Niná alikuikʼia kuijtale nga kjuinrʼoéná. Kʼoa ñá, jósʼin bakoá nga noʼyalee. Jngo koya kʼiaa nga bʼexkiaa je Biblia kao xo̱n xi Énle Niná yʼangini. Kʼoati noʼyalee je Niná kʼianga nda binyañoaa jmeni xi ʼmiyaná ya kjoajtín. Kʼianga kjitʼa fáonajmí je xijchá kao ʼndíxtile, ndasʼin batiokao xínkjín, tikʼoasʼinni xi kao Jeobá, nga kjitʼa kuinókjoakoaa ngisasa koa̱nchriantʼalee.

5. Jósʼiaan nga kjuinrʼoéná je Niná.

⁵ Je Niná kui xi mele nga kʼoéyanajmílee jotjín tokoán (Sal. 62:8). Kuinga ndatjínsíni nga chjónangilee yaoná jebi: “A tikui timaa kʼoaxinña ngantsjai nga bʼetsʼoale Niná. Axo kʼoasʼin fakaonajmía josʼin fakaonajmía je miyona”. Tsjoachañá je Jeobá kʼoa kui xi mená nga tosi tonda si̱chriantʼalee. Nga kʼoakoa̱n, machjén nga kjitʼa chja̱kaonajmiá. Kʼoéyanajmílee jotjín tokoán, jmeni xi tsjoa báya tokoán kʼoa jme xi nikjáojiaan. Ñaki kʼoéjngoaa tokoán nga koasenkaoná kʼianga nganʼio si̱jélee.

6. Jméni xi machjén nga sʼiaan nga tosi tonda chrian kuiyolee Jeobá.

⁶ Nga si̱chriantʼalee je Jeobá kʼoati machjén nga kʼoee kjoanda. Kʼoati bixoán jokitso je choʼndale Niná xi jngo salmo kiski, nga kitso: “Nʼio nkjín koya jmeni xi tinʼiai, ji Jeobá Ninána, saʼnda je xáli kʼoa kao je kjoafaʼaitsjenli xi tibakonáijin; tsínsa ʼya xi kjaʼaí xi koa̱nngósonkaoli. Kʼiatsa an xi kʼoeyanajmía kʼoa kuinchjaña xi tʼatsʼe, nʼio toxkia nkjín mani, alikuijin an koa̱nxki̱na” (Sal. 40:5). Ali tsa tonikjaʼaitsjenjián nga bʼailee kjoanda Niná. Kao jmeni xi nʼia kʼoa jobixoán bakoñá nga bʼailee kjoanda. Alikui kʼoanʼia josʼín je chjota xi tsín tsjoále kjoanda Niná. Nga kʼoasʼín kui xi bakó nga jenichxin fetʼa tiyoaa (2 Tim. 3:1, 2). Alikui ya chjénngilee josʼín je chjota.

7. Jméni xi mele Jeobá nga sʼiaan, kʼoa ánni.

⁷ Je xi xijchá ma alikui mele nga to skaan xtile, kui xi mele nga nda katafikao xínkjín. Kʼoati kui xi mele Jeobá nga sʼin xtile. Kʼoa nga tsjoachaa xíngiaa kʼoasʼin bakoñá nga ñaki chjotale Cristo maa (Juan 13:35). Jngo choʼndale Niná xi i̱ kitso: “¡Koeni nʼio nda kʼoa nʼio matsjoaná nga jtín tjío je ndsʼee!” (Sal. 133:1). Kʼoati satío tokoán tsanda ñá jokisʼe kon je xi kiski salmo jebi. Kʼianga tsjoachaa je ndsʼee, kʼoati bakolee Jeobá nga tsjoachaa (1 Juan 4:20). Nʼio tsjoa sʼe tokoán nga ya tiyojinlee je chjota xi nda fikao xínkjín kʼoa xi bakóle kjoamatokon xínkjín (Efes. 4:32).

8. Tojo tso 1 Juan 5:3, ánni nga nitjosonnilee je Jeobá.

⁸ Je Jeobá kui xi mele nga je xti katasítjosonle xijchále, kʼoa kʼoati kui xi mele nga kʼoati si̱tjosonlee tsanda ñá (Efes. 6:1). Bakinle nga si̱tjosonlee je  Jeobá nga̱ jé kisindaná, títsjoáná kjoabijnachon kʼoa nʼio tse kjoachjine tjínle. Tonga xi ngisa chjíle kuinga nitjosonnilee je Jeobá kʼianga tsjoachaa (tʼexkiai 1 Juan 5:3). * Nkjín koya anni nga nitjosonnilee, tonga alikui bʼénená nga kʼoanʼia. Títsjoáná kjoandái nga ñá chjoéjiaan jmeni xi mená sʼiaan, kʼoa nda sʼe kon nga kao kjoatsjoa nitjosonlee nga̱ kuinga tsjoachaa nga kʼoanʼiañá.

9, 10. Ánni nga nʼio chjínile nga kataʼyaa je kjoatéxomale Niná kʼoa kʼoasʼin kjuinkoaa yaoná jotso.

⁹ Je xi xijchá ma kui xi mele nga nda koatio je ʼndíxtile. Kuinga tsjoánile kjoafaʼaitsjen. Je xti xi bʼaʼén kʼoasʼin bakóni nga nʼiotʼa kʼoa nga bexkón je xijchále. Tonga je xi ngisa chjíle kuinga jchaa jotjínni kjoatéxomale Nʼainá Jeobá kʼoa si̱tjosonlee. Kʼoasʼin bakonilee je Jeobá nga tsjoachaa kʼoa nga ʼyaxkoán. Kʼoa nga kʼoanʼia ndasʼin biyoaa (Is. 48:17, 18). Kʼoa je xi bʼasjengi Niná kʼoa xi tsín sítjoson kjoatéxomale tijé síkiʼaonni yaole (Gál. 6:7, 8).

¹⁰ Nga kʼoasʼin mangínkoaa yaoná josʼin mele Niná nda biyoaa, nda sʼe tokoán kʼoa nda biyoaa ngixko̱n. Jé Jeobá xi ngisa nda be jmeni xi machjénná. Jngo tichjaa xi ya Estados Unidos tsʼe, xi Aurora ʼmi, itso: “ʼBeña nga tokʼia ndasʼin  biyoaa nga nitjosonlee je Jeobá”. Kʼoatjín jokitso je tichjaa. Chjónangilee yaoná jebi: “Jósʼin tíbasenkaona nga tifitjenngia josʼin bándiaa je Jeobá”.

11. Jósʼin basenkaoná nga bʼetsʼoaa.

¹¹ Nga bʼetsʼoalee Niná basenkaoná nga nitjosonlee ninga sakʼoa ñʼai maná. Nga chjotajée maa, machjén nga tosi tonda kʼoénelee yaoná nga si̱tjosonlee je Jeobá. Jngo xi kiski salmo i kitsole je Niná: “Tisenkaonái nga koa̱nmena sitjosonle” (Sal. 51:12). Jngo tichjaa xi Denise ʼmi, itso: “Kʼianga ñʼai mana nga sitjosonle Jeobá, sijéle nganʼio nga katabasenkaona”. Alikui jao kʼoé tokoán nga kjuinrʼoéná Niná kʼianga si̱jélee nganʼio (Luc. 11:9-13).

12. Jmé xi tsoná nga sʼiaan Efesios 5:1.

¹² (Tʼexkiai Efesios 5:1). * Nga xtile tsoná je Jeobá kʼoa nga tsjoakená, bʼenelee yaoná nga chjenngilee jokjoan. Kʼoasʼin chjennginilee jokjoan kʼianga bakoá kjoatsjoacha, nga ndʼé maa kʼoa nga nichatʼalee xíngiaa. Kʼianga bená je chjota nga nda nʼia, tsakui nichxin kui xosikao nga koa̱nmele skoe̱ xi tʼatsʼe Niná (1 Ped. 2:12). Tsa kʼoasʼin skoe̱kon je ʼndíxtile xi xijchá ma josʼin bekonná je Jeobá, je ʼndíxti kʼoajinti koa̱nmele simiyo je Nʼainá xi tíjna ngʼajmi.

13. Jméni xi kuenta sʼiaan nga tsín kuinókjoaan nga kuinókjoañá xi tʼatsʼe Jeobá.

 ¹³ Je ʼndíxti nda síkʼaxki̱ je xijchále kʼoa kao kjoatsjoa nchja̱ni xi tʼatsʼe. Tikʼoasʼinni tsanda ñá, kao kjoatsjoa nokjoañá xi tʼatsʼe Nʼainá xi tíjna ngʼajmi kʼoa kui xi mená nga katabe je chjota xi tʼatsʼe. Kʼoati bixoán jokitso je rey David, nga kitso: “Kao kjoatsjoa kuinchjaña xi tʼatsʼe Jeobá” (Sal. 34:2). Tsakui nichxin nokjoaan kʼoa tsín tso tokoán nga nokjoañá xi tʼatsʼe Jeobá. Jmé xi koa̱n sʼiaan. Kui kuenta sʼiaan nga tsjoa sʼe kon je Jeobá nga nitjosonlee kʼoa nga binyakao je chjota xi bexkon. Jé Jeobá koasenkaoná nga nʼiojin koaan. Tojosʼin tsakinyakao je chjotale Cristo nga siglo 1, kʼoati kuinyakaoná tsanda ñá (1 Tes. 2:2).

14. Ánni nga nʼio chjínile nga chjotatjenngile Cristo si̱koaa je chjota.

¹⁴ Je Jeobá alikui ʼya xi faʼájin, kʼoa tsjoa sʼele nga kʼoati bakolee kjoatsjoacha je xíngiaa, kʼoa nga tsínkui mangínñá jñani tsʼe (Hech. 10:34, 35). Jngo koya josʼin bakoá nga tsjoachaa je xíngiaa kʼiaa nga ʼmiyasonlee je Énle Niná (Mat. 28:19, 20). Jósʼin bichómani nga ʼmiyasoán. Kuinga binyakao ndʼaibi je chjota xi nrʼoé kʼoa kui kjoachoya sʼe̱le nga koa̱n koatio ngantsjai nichxin i̱ Sonʼnde (1 Tim. 4:16).

15, 16. Ánni nga tsjoa tjínni tokoán.

¹⁵ Je Jeobá jngoo Nʼai xi nʼio tsjoakená kʼoa kui xi mele nga tsjoa sa̱tío tokoán (Is. 65:14). Ninga kjoa kuitjátojiaan, nkjín koya anni nga tsjoa satíoni tokoán nichxin xi tiyoaa ndʼaibi. Tobʼelañá, alikui jao tjío tokoán nga nʼio tsjoakená je Nʼainá xi tíjna ngʼajmi. ʼYañá jmeni xi tsoya je Biblia (Jer. 15:16). Kʼoa yaa tiyojinlee je chjota xi tsjoake Jeobá, xi tsjoake kjoatéxomale kʼoa xi tsjoake xínkjín (Sal. 106:4, 5).

¹⁶ Kʼoati tsjoa satío tokoán nga̱ ngisaa nda kuiyoaa nichxin xi nroaján. ʼYañá nga je Jeobá tojeme sikjeson je chjotatsʼen kʼoa je Chjotaxále ʼndenaxó sikao i̱ Sonʼnde. Kʼoati kui kjoachoya tjínná nga jcha ijngokʼá je xíngiaa xi jekʼien (Juan 5:28, 29). A tsí nʼio tsjoa bʼé tokoán nga kʼoakoa̱n. Kʼoa je xi ngisa chjíle kuinga jeme kuitjongʼa je Nʼainá Jeobá ya ngʼajmi kao i̱ Sonʼnde, nga jchaxkón kʼoa nga toje sʼe̱tsʼoale.