1. Ánni nga jtín tjíoni ngatsʼi xi ya tjíojin naxinandále Jeobá. Jngo koya tikʼaxki̱.

A TSÍ nʼio tsjoa sʼe tokoán nga naxinandále Jeobá tiyojiaan. Nda mangínkoaa xíngiaa kʼoa jtín sʼin biyoaa, nga̱ ʼyañá josʼin tjínndajinle je Jeobá kʼianga tjínkʼa xi xá bánele. Kʼianga ngisa nda majinná xi tʼatsʼe jebi ngisaa jtín biyoaa.

2. Jméni xi chótʼayajiaan i̱ kjoaʼmiya jebi.

² I̱ kjoaʼmiya jebi kui chótʼayajiaan ʼyáni xi xá kjinele ya jinjtín. Kʼoati jchaa xi tʼatsʼe jebi: jmé xá xi kjinele tichjaa ya jinjtín, a ngatsʼi je ndsʼee nga jko̱ tjíole je tichjaa, kʼoa je xi chjotajchínga sʼin tjío, a kʼoatisʼin batéxomale je ndsʼee kao tichjaa tojosʼin batéxomale jngo xi jko̱ tíjnale yaniʼya je chjoónle kao xtile. Kuila títjon kataʼyaa jmé xá xi kjinele je tichjaa kʼoa jósʼin tjínnele jchatokoán.

3. Jméni xi koasenkaoná nga ngisa chjí jchatokoán jmeni xi sʼín je tichjaa.

³ Chjí ʼyatokoán ngayeje jmeni xi sʼín je tichjaa nga síkuinda je familiale, nga tsoya Énle Niná kʼoa nga binyakao je ndsʼee ya jinjtín. Ngisaa tichjí jchatokonngáñá kʼiatsa si̱kjaʼaitsjenjiaan josʼin bekon je Jeobá kao Jesús. Kʼoati nʼio koasenkaoná nga kui chótʼayajiaan josʼin tsabekon je pastro Pablo je yánchjín.

4. Jósʼin bakóyaná Biblia nga tongóson kji chjí bekon je Jeobá xi xʼin kao xi yánchjín.

⁴ Ya Biblia kʼoatso nga je Jeobá tongóson kji chjí bekon je xi xʼin kao xi yánchjín. Tobʼelañá, je Biblia kʼoatso nga kitsjoale je nganʼiotsjele Jeobá xi xʼin kao xi yánchjín kʼianga siglo 1 kʼianga koanle tsakatío kjoaxkón, jolani nga kjaʼaí kjaʼaí én kinchja̱ (Hech. 2:1-4, 15-18). Kjoéjin Jeobá  je xi xʼin kao xi yánchjín nga ya koatexomakao je Jesús ya ngʼajmi (Gál. 3:26-29, TNM). Ni xi xʼin kʼoa ni xi yánchjín kʼoati kui kjoanda kʼoaile nga koa̱n koatio ngantsjai nichxin i̱ Sonʼnde (Apoc. 7:9, 10, 13-15). Je Jesús kʼoati kui xá kitsjoale je xi xʼin kao xi yánchjín nga kuitsoyason je Énle Niná (Mat. 28:19, 20, TNM). Tobʼelañá, ya libro xi tsʼe Hechos jngo chjoón síkʼaxki̱ xi Priscila tsakʼin, xi chjotatjenngile Cristo koan. Je Priscila kao xʼinle, xi Áquila tsakʼin, kitsoyandale jokjoantjínni xi tʼatsʼe Niná je Apolos, jngo chjota xi nʼio chjine koan (Hech. 18:24-26, TNM).

5. Tojo tso Lucas 10:38, 39, 42, jósʼin tsakakó je Jesús nga tsabexkón je yánchjín.

⁵ Je Jesús tsabexkón je yánchjín. Alikui kʼoakisʼin jokisʼin je chjota fariseo nga choa chjí tsabekon je yánchjín, nga̱ je chjota fariseo tsín tsakjákaonajmí ya jinle chjota kʼoa alikʼia tsakjákaonajmíni jotso je Énle Niná. Tonga je Jesús kitsoyale xi xʼin kao xi yánchjín xi nʼio tjínle kjoandosin xi tʼatsʼe Niná * (tʼexkiai Lucas 10:38, 39, 42). * Kʼoati nkjín koanni yánchjín xi kikao jñani kitsoyason je Jesús (Luc. 8:1-3). Kʼoa tjínkʼa je yánchjín xi kui kjoanda kitsjoale nga kikájinkon je pastrole kʼianga jejaʼáyanile Jesús (Juan 20:16-18).

6. Jósʼin tsakakó je pastro Pablo nga tsabexkón je yánchjín.

⁶ Je pastro Pablo kʼoakitsole je Timoteo nga katabexkón je yánchjín. Kʼoakitsole nga jo na̱le sʼin katabekon xi jetjínle nó kʼoa nga jo ndichja sʼin katabekon xi sʼa xti (1 Tim. 5:1, 2). Ningalani je tsakasenkao nga nʼio kisʼejna kjoamakjainle Timoteo, koanjinle Pablo nga je na̱le kao majchále kitsoyale je Timoteo jmeni xi tso je Énle Niná saʼnda nga sʼa ʼndí kji (2 Tim. 1:5; 3:14, 15). Xi ijngosani, kʼianga kiskile Pablo je chjotale Cristo xi Roma tsʼe, nkjín tichjaa kisikasénle kjoatiʼnda, kʼoa kisikʼaxki je jaʼaínle. Kuenta kisʼin josʼin kisixále Niná je yánchjín jebi kʼoa nʼio chjí tsabekon (Rom. 16:1-4, 6, 12; Filip. 4:3).

7. Jméni xi chótʼayajiaan.

⁷ Tojosʼin tiʼyaa, je Biblia alikui kʼoatso tsa ngisa nangi tjío je tichjaa tikʼoajinni je ndsʼee. Je xi chjotajchínga sʼin tjío tjíojngo kon nga nʼio tsjoánganʼio je tichjaa ya jinjtín nga jtín sʼin biyoaa. Tonga, si̱kjaʼaitsjenjinla jebi: ánni kʼoatsonile Jeobá je tichjaa nga tjínnele kʼoejtsa sakʼoa jko̱, kʼoa nga toje xi xʼin xi ma chjotajchínga kʼoa siervo ministerial sʼin batio, a kui xi tsonile nga ngatsʼi je ndsʼee nga jko̱ tjíole je tichjaa.

8. Tojo tso Efesios 5:23, a ngatsʼi je ndsʼee nga jko̱ tjíole je tichjaa. Tʼeyanajmí.

⁸ A ngatsʼi je ndsʼee nga jko̱ tjíole je tichjaa. Mai. Tojé Cristo xi jko̱ tíjnale ngatsʼi tichjaa ya jinjtín (tʼexkiai Efesios 5:23). * Ya yaniʼya tojé xi xʼin xi jko̱ tíjnale je chjoónle, kʼoa ninga jekisʼenngindá jngo tile, ali tsa jko̱jin sʼin tíjnale je na̱le (Efes. 6:1, 2). Ya jinjtín, je xi chjotajchínga sʼin tjío tjín jmeni xi je kjinele kʼoatsole je ndsʼee kao tichjaa, tonga kʼoati tjín xi tsín je kjinele kʼoakuitso (1 Tes. 5:12; Heb. 13:17). Kʼoa jngo tichjaa xi tíjnatoje xi tsín  tiya tíjnakaoni je xijchále, tojo bexkón, tonga alikui tije nʼaile xi jko̱ tíjnanile. Tojo bexkón xi chjotajchínga sʼin tjío, tonga tojé Jesús xi jko̱ tíjnale, joni ngatsʼiaa xi tiyoaa ya jinjtín.

9. Ánni nga tjínnenile kʼoejtsa sakʼoani jko̱ je tichjaa.

⁹ Je Jeobá kui xi mele nga nda katasʼendajin josʼin koa̱nxá ya jinjtín (1 Tim. 2:12). Kuinga je Jesús xi jko̱ kisikʼéjnanile je xi xʼin, kʼoa je Jeobá jé ndsʼee bánele nga koandiaale je jtín, ali tsa jejin tichjaa. Tsakuilani kʼoasʼin jngo tichjaa xi je ndsʼee kjinele kʼoasʼin, je Jeobá kʼoatsole nga tjínnele kʼoejtsa jko̱ (1 Cor. 11:4-7). * Ali tsakuijin nga ngisa nangi síkatío tikʼoajinni je xi xʼin, kuinga kʼoaʼminile je tichjaa nga̱ kʼoasʼin koakoni nga bexkón josʼin tjínndajinle je Jeobá. Kuila chótʼayajiaan ndʼaibi jmé xá xi kjinele je xi jko̱ tjíole yaniʼya kʼoa kao xi chjotajchínga sʼin tjío.

10. Jméni xosikao je xi chjotajchínga sʼin tjío nga kʼoasʼin sikjaʼaitsjenni nga je tjínle ʼnde kʼoakuitsole jmeni xi sʼin je ndsʼee ya jinjtín.

¹⁰ Je xi chjotajchínga sʼin tjío tsjoake je Jesús, kʼoa kʼoati tsjoake je barréle Jeobá xi je sʼenele nga síkuinda (Juan 21:15-17). Kʼianga mele nga nda sikuinda je jtín jngo xi chjotajchínga sʼin tíjna, tsakui nichxin kʼoasʼin sikjaʼaitsjen nga tjínnele je kʼoakuitsole ndsʼee jmeni xi sʼin tojo síkao je xtile jngo xi nʼai ma. Tsa i̱ kuitso: “Tsa je xi jko̱ tíjnale yaniʼya tjínle ʼnde nga je kʼoakuitsole familiale jmeni xi sʼin nga mele sikuinda, je xi chjotajchínga sʼin tjío kʼoati tjínle ʼnde nga je kʼoakuitsole jmeni xi sʼin je choʼndale Niná nga sikuinda”. Tsakui  nichxin kui kʼoasʼin sikjaʼaitsjenni je xi chjotajchínga sʼin tjío nga tjínkʼa je ndsʼee kao tichjaa xi kui xi mele nga je kʼoakuitsole josʼin. Tonga, a kʼoati kui xá kjinele je xi chjotajchínga sʼin tjío jme xá xi kjinele xi jko̱ tjíole yaniʼya.

11. Jméni xi mangóson je xá xi kjinele xi jko̱ tjíole yaniʼya kao xá xi kjinele xi chjotajchínga sʼin tjío.

¹¹ Je pastro Pablo kʼoakitso nga tjín jmeni xi mangóson je xá xi kjinele jngo xi jko̱ tíjnale yaniʼya kʼoa kao jngo xi chjotajchínga sʼin tíjna ya jinjtín (1 Tim. 3:4, 5). Tobʼelañá, kui xi mele Jeobá nga je xi chjoón kʼoa kao xi xti ma sitjosonle xi jko̱ tíjnale yaniʼya. Kʼoati kui xi mele nga je ndsʼee xi tjío ya jinjtín sitjosonle je xi chjotajchínga sʼin tjío (Col. 3:20). Je Jeobá kui xi mele nga je xi jko̱ tjíole yaniʼya kʼoa kao xi chjotajchínga sʼin tjío kuinyakao xi je kjinele sikuinda, nga nʼio katasatío je kjoamakjainle, nga tsjoa katasatío kon kʼoa nga kʼoakatasatío kon nga chjí ʼyatokon. Tojo sʼín je xi jko̱ tíjnale yaniʼya nga nda síkuinda je familiale, je xi chjotajchínga sʼin tjío kʼoatisʼin binyakao je ndsʼee xi nganʼio machjénle (Sant. 2:15-17). Xi ijngosani, je Jeobá kui xi mele nga je xi chjotajchínga sʼin tjío kuinyakao je ndsʼee xi tjío ya jinjtín, kʼoa nga je xi jko̱ tjíole yaniʼya kuinyakao je familiale nga sitjoson je  kjoatéxomale Niná kʼoa nga tsín kjoaʼatone jmeni xi tso Biblia (1 Cor. 4:6).

12, 13. Tojo tso Romanos 7:2, jméni xi tsín mangóson je xá xi kjinele xi jko̱ tjíole yaniʼya kao je xá xi kjinele xi chjotajchínga sʼin tjío.

¹² Tonga tjín jmeni xi tsín mangóson je xá xi kjinele xi chjotajchínga sʼin tjío kʼoa kao xi jko̱ tjíole yaniʼya. Tobʼelañá, je Jeobá kʼoatso kʼianga je xi chjotajchínga sʼin tjío tjínle ʼnde nga je kʼoendajin kjoa kʼianga ai jée bajngi je ndsʼee, kʼoa tjínle ʼnde nga kʼaonsjejin ya jinjtín jngo xi tsín kʼoakoa̱nnile je jéele (1 Cor. 5:11-13).

¹³ Je Jeobá kʼoatso jmeni xi toje tjínle ʼnde kʼoasʼin je xi jko̱ tjíole yaniʼya, xi tsín koa̱n je kʼoasʼin xi chjotajchínga sʼin tjío. Tobʼelañá, jé xi jko̱ tíjnale yaniʼya tjínle ʼnde kʼoakuitsole jmeni xi sʼin je familiale kʼoa nga sitjosonle (tʼexkiai Romanos 7:2). * Tjínle ʼnde nga je kʼoakuitsole je xtile jóchon tjínnele kuicho ya ndʼiale. Kʼoati tjínle ʼnde nga koatekjáyale kʼiatsa tsín sitjoson (Efes. 6:1). Jngo xi jko̱ tíjnale yaniʼya xi kuenta sʼín je chjoónle, títjonkjoanla fáoyani nga jao jme kjoatéxoma xi koaitjenngi ya yaniʼya, nga̱ “tojngo yao mani” (Mat. 19:6). *

14. 1) Tojo tso Marcos 10:45, ánni kixi tíjnani nga je Jesús kiskoéjin Jeobá nga jko̱ tíjnale je jtín. 2) Jmé xá xi kjinele je Cuerpo Gobernante (chótsenlai je recuadro “ Xá xi kjinele Cuerpo Gobernante”).

¹⁴ Nga tsakʼéchjíntjainá je Jesús, je Jeobá kao kui tsakatseni je kjoabijnachonle ngatsʼi xi tjío ya jinjtín kʼoa kao ngatsʼi  je chjota xi koa̱nkjainle tʼatsʼe Jesús (tʼexkiai Marcos 10:45; * Hech. 20:28; 1 Cor. 15:21, 22). Nga ñá kʼienntjainá je Jesús, kixi tíjna nga je xi jko̱ kisikʼéjnale jtín je Jeobá kʼoa kuinga je Jesús tjínnile ʼnde tsjoále kjoatéxoma je chjota, nga je kʼoakuitso jmeni xi tjínnele sʼin je xi tjío ya yaniʼya kʼoa kao ngatsʼi xi tjío ya jinjtín, kʼoa tjínnele kuitjosonle jmeni xi kuitso (Gál. 6:2). Ali tsa to kjoatéxomajin tsjoá, kʼoati nʼio nda síkuindaná kʼoa tsjoakená nga jngó jngoá (Efes. 5:29).

15, 16. Jméni xi bakóyali jotso je Marley kao Benjamin.

¹⁵ Kʼoasʼin bakóni je tichjaa nga bexkón je Cristo kʼianga sítjosonle je ndsʼee xi xá kjinele ya jinjtín. Je tichjaa xi Marley ʼmi, xi ya Estados Unidos tísíjchá yaole, itso: “Nʼio chjí ʼbe je xá xi kjinena ya yaniʼya kao je xá xi kjinena ya jinjtín. Tonga tjínnele tosi tonda kʼoenele yaona nga sitjosoan josʼin tjínndajinle Jeobá. Ngisaa choa ñʼai mana nga sitjosoan nga̱ je xʼinna kao ndsʼee xi tjío ya jinjtín bexkónna kʼoa bakóna nga chjí bekon jmeni xi sʼian”. Alikui jao tjínná nga nʼio nkjín mani je tichjaa xi kʼoatisʼin síkjaʼaitsjen.

¹⁶ Bakó je ndsʼee nga majinle josʼin tjínndajinle Jeobá kʼianga bexkón je tichjaa. Je Benjamin, jngo ndsʼee xi ya Inglaterra tísíjchá yaole, itso: “Nʼio basenkaona je comentario xi tsjoá je tichjaa kʼianga satío je kjoajtín, kao kjoafaʼaitsjen xi tsjoá tʼatsʼe josʼin chotʼayá kʼoa josʼin nga ngisa nda kʼuínyaa je Énle Niná. Nʼio basenkaoná jmeni xi tso kʼoa jmeni xi sʼín je tichjaa”.

17. Ánni nga tjínnenile jchaxkoán josʼin tjínndajinle Jeobá nga tjínkʼa xi xá bánele.

¹⁷ Nda biyoaa ngatsʼiaa ya jinjtín, xi xʼin, xi yánchjín, xi jko̱ tjíole yaniʼya kao xi chjotajchínga sʼin tjío, kʼianga majinná josʼin tjínndajinle Jeobá kʼoa nga ʼyaxkoán je xi xá bánele. Kʼoa xi ngisa chjíle kuinga je chʼasjengʼaa je Nináná Jeobá (Sal. 150:6).