1, 2. 1) Ánni nga ñʼai ma kʼanile chjota nga sínʼiotʼa xi xá tjínle. 2) Jmé xi chótʼayajiaan i̱ kjoaʼmiya jebi.

NICHXIN xi tiyoaa ndʼaibi, alikui choa ñʼai male je chjota nga je sínʼiotʼa chjota xi xá tjínle. Nga̱ tojé nda nikao chjota xi nyiná kʼoa xi nʼio ʼyale kʼoa je xi ma̱ tjío totaon ʼya. Je Biblia itso: “Je chjota tjíobatéxomale xínkjín nga tjíosíkiʼaon” (Ecl. 8:9). Je chjota alikui tisínʼiotʼani je xi nyatítjonle religión xi totʼatsʼe nga tsín ndasʼin fikao yaole, kʼoa yaa nroani nga tjínkʼa chjota xi tsín tisínʼiotʼani je Niná. Kuinga machjénni nga kuinyakoaa je xi ʼmiyalee Biblia nga katasínʼiotʼa je Niná kʼoa nga katasínʼiotʼa je xi tsakinyánda Niná nga bándiaaná.

² Ali tsa tojejin chjota xi Biblia ʼmiyalee xi tjínnele sinʼiotʼa Niná kao naxinandále. Ninga jenkjínná nó nga tichotʼayá tojo machjén nga kʼoéjngoaa tokoán nga kixi jmeni xi sʼín Jeobá ngantsjai, nga̱ kui xi koasenkaoná tsakui kjoa kuitjátojiaan xi skótʼayakao kjoamakjainná. I̱ kjoaʼmiya jebi jan koya tjínni xi chótʼayajiaan. Xi títjon, nga bʼexkiaa jmeni xi tso Biblia. Xi majaoni, kʼianga jme xi tsoná je naxinandále Jeobá. Kʼoa xi majanni, nga kjoa kuitjátojiaan nichxin xi sʼa nroa.

3. Jméni xosikaoná nga to jao sʼe̱ni tokoán nga bʼexkiaa jmeni xi tso je Biblia.

 ³ Kʼianga kʼoéxkiaa Biblia jchañá jokisikao kʼa Jeobá je chjota kʼoa ánni nga kʼoakisikaoni. Tobʼelañá, je libro xi tsʼe  Números kui bʼéyanajmí nga kʼoakitso Jeobá nga katanikʼien jngo chjota israelita xi chikín tíbʼéxkó nga xoto. Tonga kʼianga jesiento nó jaʼato, kʼoatso ya Segundo de Samuel nga kisichatʼale Jeobá je rey David ningalani kisichajngi kʼoa kʼien kisikʼien (Núm. 15:32, 35; 2 Sam. 12:9, 13). Tsakui nichxin i̱ kuixoán: “Ánni nga kisichatʼanile Jeobá je rey David nga̱ nʼio tse jée tsakajngi, kʼoa ánni kʼoakitsoni nga katanikʼien je chjota xi to chikín tíbʼéxkó nga xoto”. Kʼianga koa̱njinná jan koya tjínni xi kuenta sʼiaan nga kʼoéxkiaa je Biblia.

4. Jósʼin basenkaoná Génesis 18:20, 21 kao Deuteronomio 10:17 nga ñaki sʼejngo tokoán nga kixi jmeni xi sʼín je Jeobá.

⁴Je Biblia alikui tongantsjai nga tsoya jmekjoanni xi kisʼin nga jngó jngó chjota. Tobʼelañá, je David kʼoakoannile jme xi kisʼin (Sal. 51:2-4). Tonga jókisʼin je chjota xi jaʼatone kjoatéxoma kʼianga xoto. A kʼoakoannile jme xi kisʼin. A sa jetsín kisitjosonle Jeobá. A sa jetsakichakjáyale kʼoa tsín kisitjoson. Je Biblia alikui tsoya xi tʼatsʼe jebi. Tonga xi tsín jao tjín tokoán kuinga ñaki kixi jmeni xi sʼín ngantsjai je Jeobá (Deut. 32:4). Ñá xi chjota sakʼoa tsín kʼoasʼin nikjaʼaitsjeen jokjoantjínni jngo kjoa, nga̱ tokui mangínñá josʼin síkjaʼaitsjen xi kjaʼaí, kʼoa tokui mangínñá josʼin nikjaʼaitsjeen tʼatsʼe chjota xi jée kabajngi. Tonga je Jeobá alikui kʼoasʼín, kui fini jokjoantjínni kjoa (tʼexkiai Génesis 18:20, 21; * Deuteronomio 10:17 *). Kʼianga ngisa nda jchaxkoaan je Jeobá kao jotso kjoatéxomale ngisaa sʼe̱jngo tokoán jmeni xi sʼín. Ninga tsín tokjoan koa̱njinná jmeni xi tso Biblia kʼoa tsa to jao sʼe̱ tokoán, jmeni xi jeʼyaa xi tʼatsʼe Jeobá kui xi kʼoejngo tokoán nga ñaki kixi jmeni xi sʼín ngantsjai (Sal. 145:17).

5. Jósʼin nikjaʼaitsjen sakʼoa nga chjotajée maa (chótsenlai je recuadro “ Nga chjotajée maa sakʼoa tsínkjoan kʼoasʼin majinná jokjoantjínni kjoa”).

⁵Nga chjotajée maa sakʼoa tsín kixi josʼin nikjaʼaitsjeen. Nga kʼoasʼin kisindaná Niná  jokjoan je kuinga tsín sasénniná xi tsín kixi tjín (Gén. 1:26). Tonga nga chjotajée maa sakʼoajin tsín kixi josʼin si̱kjaʼaitsjeen tʼatsʼe xi ngikʼa, ningalani kʼoasʼin nikjaʼaitsjeen nga ʼyaa jokjoantjínni kjoa. Tobʼelañá, je Jonás nʼio kisijtile yaole nga kʼoakitso Jeobá nga kjoamatokon koakole je chjota xi Nínive tsʼe (Jon. 3:10-4:1). Nga kʼoakisʼin je Jeobá tsʼato 120,000 chjota xi Nínive tsʼe kitjontjaile yaole. Jé Jonás xi tsín ndasʼin kisikjaʼaitsjen, ali tsa jejin Jeobá.

6. Ánni nga tsínkjoan machjénni nga ñá kuitsoyaná anni kʼoasʼinni je Jeobá tsa jmeni.

⁶Alikui machjén nga ñá kuitsoyaná Jeobá jokjoantjínni kjoa. Nichxin kjoatse, je Jeobá kitsjoaʼnde kʼale je choʼndale nga kʼoakitso josʼin síkjaʼaitsjen tʼatsʼe jmeni xi kitso nga sʼin je Jeobá (Gén. 18:25; Jon. 4:2, 3). Kʼoa sakʼoa kitsoya Jeobá ánni kʼoakisʼinni tsa jmeni (Jon. 4:10, 11). Alikui machjén nga ñá kʼoakuitsoná jmeni xi sʼín, nga̱ jé kisindaná kʼoa alikui machjén nga ñá kʼoakʼuínlee tsa ndatjín kʼoa tsa chʼaotjín jmeni xi sʼin (Is. 40:13, 14; 55:9).

7. Ánni nga ñʼai ma sakʼoaniná nga makjainná jmeni xi tso je chjota xi binyánda Jeobá nga bándiaaná.

⁷ Ñaki tjínjngoo tokoán nga kui xi kixi kʼoasʼín Jeobá ngantsjai. Tonga tsakui nichxin ñʼai maná nga makjainná jotso je xi tsakinyánda nga bándiaaná. Tsakui nichxin i̱ bixoán: “A kʼoatjíosʼín tsokʼoa josʼin mele Jeobá axo totsʼee kjoafaʼaitsjen tjíosíchjén”. Kʼoajin koan kʼa je chjota xi tsakatio nichxin kjoatse. Kataʼyala je choa̱ xi síkʼaxki̱ ya  párrafo 3. Tsakui nichxin je xínkjín chjota xi jaʼatone kjoatéxomale Niná nga xoto, kui kisikjaʼaitsjenjin tsa kiskonangile Jeobá je Moisés nga kjesa nikʼienjin chjota jebi. Tsakui nichxin kʼoatisʼin kisikjaʼaitsjen je miyole Urías. Nga kisichajngi je David kao chjoónle Urías, tsakui nichxin kʼoakitso je miyole Urías nga kuinga tsín jokinikaoni David nga je tíbatéxoma. Alikuijinni makjainná jmeni xi tso je Jeobá kʼiatsa tsín makjainná jmeni xi tso je chjota xi je tsakinyánda nga bándiaaná.

8. Jósʼin mangóson jmeni xi tso Hechos 16:4, 5 josʼin tísíxá je naxinandále Niná ndʼaibi.

⁸ Jé “choʼnda xi nʼiotʼakon, xi nda be xá” tísíchjén Jeobá ndʼaibi nga tíbándiaale je naxinandále i̱ Sonʼnde (Mat. 24:45). Jé choʼnda jebi tíbándiaale naxinandále Niná kʼoa tsjoále kjoafaʼaitsjen xi chjotajchínga sʼin tjío, tojo kisʼin je cuerpo gobernante nga siglo 1 (tʼexkiai Hechos 16:4, 5). * Kʼoa jé xi chjotajchínga sʼin tjío bándiaale je jtín nga katabitjoson jotso “choʼnda xi nʼiotʼakon, xi nda be xá”. Kʼiatsa mangíntjenngiaa je kjoafaʼaitsjen xi tsjoáná je naxinandále Niná kʼoa jme xi tsoná xi chjotajchínga sʼin tjío, kʼoasʼin koakoñá nga nitjosoán josʼin bʼéndajin je Jeobá.

9. Kʼiáni nga ñʼai maná nga nitjosonlee je xi chjotajchínga sʼin tjío, kʼoa ánni.

⁹ Sakʼoajin tsín koa̱nmená si̱tjosonlee josʼin bʼéndajin xi chjotajchínga sʼin tjío. Tobʼelañá, josʼin tísʼendajin je nó xi tífaʼato josʼin koatio je jtín kao circuito. Nga ngisa nda koa̱nchjén je Ndʼia jña chotʼayá, je xi chjotajchínga sʼin tjío kʼoatso kʼale je ndsʼee nga xin jtín katafi. Kʼiatsa ñálani xi kʼoatíʼminá ñʼaijin koa̱nná nga si̱katioá je xíngiaa kao miyoná. Nga tsín je Jeobá  xotsole je xi chjotajchínga sʼin tjío jñani koai nga jngó jngó publicador, kuinga ñʼai maniná nga nitjosoán jmeni xi ʼminá. Je Jeobá sasénle josʼin bʼéndajin xi chjotajchínga sʼin tjío kʼoa kʼoati machjén nga si̱tjosoán tsanda ñá. *

10. Tojo tso Hebreos 13:17, ánni nga si̱tjosonñá jme xi tso je xi chjotajchínga sʼin tjío.

¹⁰ Ánni nga kʼoainganʼioñá josʼin bʼéndajin xi chjotajchínga sʼin tjío ninga sakʼoa tsín sasénná. Nga kʼoanʼia jtín sʼin biyoaa (Efes. 4:2, 3). Ndasʼin biyoaa ngatsʼiaa ya jinjtín kʼianga nangitokon maa kʼoa nga nitjosoán josʼin bʼéndajin je xi chjotajchínga sʼin tjío (tʼexkiai Hebreos 13:17). * Tonga xi ngisa chjíle kuinga kʼoasʼin bakoñá nga nitjosonlee je Jeobá nga̱ jé tsakinyánda xi chjotajchínga sʼin tjío nga sikuindaná (Hech. 20:28).

11. Jméni xi koasenkaoná nga si̱tjosoán josʼin bándiaaná xi chjotajchínga sʼin tjío.

¹¹ Jmé xi koasenkaoná nga si̱tjosoán josʼin bándiaa je xi chjotajchínga sʼin tjío. Kuenta sʼiaan nga kui nganʼiotsjele Jeobá síjé ndsʼee jebi nga jme xi bʼéndajin ya jinjtín. Kuenta sʼín jotso je Biblia kʼoa josʼin bándiaa je naxinandále Niná. Kui xi mele nga tsjoa koaya kon je Jeobá kʼoa nga tsjoa sa̱tío tokoán ngatsʼiaa xi tiyoaa ya jinjtín. Be xi chjotajchínga sʼin tjío nga kuenta tsjoále Jeobá josʼin sitjoson je xá xi kjinele (1 Ped. 5:2, 3). Ningalani xkoa̱ya tjío je chjota xi totʼatsʼe nga bʼasjengi xínkjín, tʼatsʼe religión kao kjoa política, tonga jtín sʼin tiyoaa ñá nga toje xi ñaki Niná tinixálee. Kʼoasʼin ʼyañá nga tísíchikontʼain Jeobá je naxinandále.

12. Jméni xi kuenta sʼin je xi chjotajchínga sʼin tjío nga skoe̱ tsa kʼoakjimanile je jéele jngo chjota.

¹² Je Jeobá kui xá bánele xi chjotajchínga sʼin tjío nga sikuinda je jtín nga tsje kʼoéjna. Tobʼelañá, kʼianga jngo chjotale Cristo xi ai jée bajngi, jé xi chjotajchínga sʼin tjío bʼéndajin kjoa tsa tosi tonda ya naxinandále Niná kʼoéjnajin je xi tsakajngijée. Je xi sʼín xi chjotajchínga sʼin tjío kuinga básjaiya tsa kʼoakjima kjoaixinile je chjota xi jée tsakajngi. Kui jebi xi kuenta sʼín: Ningalani kʼoakuitso chjota jebi nga kʼoakjimanile jéele, tonga a ñaki tíbakó nga kʼoakjima kjoaixinile, a ñaki kʼoatjín kon nga tsín tikui jée koa̱njngíni. Tsakui tsakajngijéeni nga je kisimiyo chjota xi tsín nda sʼín, a tíjnanda nga tsín tije simiyoni. Je xi chjotajchínga sʼin tjío bʼétsʼoale Jeobá, kotʼayajin jmeni xi tso je Biblia kʼoa kuenta sʼín josʼin síkjaʼaitsjen je chjota xi tsakajngijée tʼatsʼe jmeni xi kisʼin. Fáoyani tsa koa̱n nga tosi tonda ya kʼoéjnajin jtín je chjota xi tsakajngijée kʼoa tsa mai. Kʼoa sakʼoa bichonsjejin ya naxinandále Niná je xi bajngijée (1 Cor. 5:11-13).

13. Jósʼin si̱kjaʼaitsjeen tsa jngo xíngiaa kʼoa tsa jngo miyoná kuichonsjejin naxinandále Niná.

¹³ Alikuijin jokuixoán tsa je kuichonsjejin naxinandále Niná xi tsín miyoná mani kʼoa xi tsín xíngiaa mani. Tonga tsa je kuichonsjejin miyoná kʼoa tsa xíngiaa, tsakui nichxin kʼoasʼin si̱kjaʼaitsjeen nga tsín nda tsakʼéndajin kjoa je xi chjotajchínga sʼin tjío. Tsakui nichxin kʼoasʼin si̱kjaʼaitsjeen nga tsín nda tsakásjaiya jotjínni kjoa kʼoa nga tsín kʼoasʼin tsakʼéndajin josʼin mele Jeobá. Jméni xi koasenkaoná nga tsín chʼaosʼin si̱kjaʼaitsjeen tʼatsʼe xi chjotajchínga sʼin tjío.

14. Jméni xi kuenta sʼiaan tsa kʼoasʼin kʼoendajin xi chjotajchínga sʼin tjío nga tjínnele kuichonsjejin naxinandále Niná je xi xíngiaa mani kʼoa tsa xi miyoná mani.

 ¹⁴ Kuenta sʼiaan nga kui bichonsjejinni xi bajngijée nga ndasʼin bʼejna je naxinandále Jeobá, kʼoa kʼoati basenkao je xi bichonsjejin. Kʼiatsa totjóʼndele je xi jée tsakajngi nga tosi tonda ya kʼoéjnajin je jtín kʼoajin tisʼin xi ngikʼa josʼín je (Gál. 5:9). Xi ijngosani, je xi tsakajngijée alikuijin koa̱njinle jokji ai tíjna je jée xi tsakajngi kʼoa tsínjin skoe̱ nga tjínnele sikʼantjaiya yaole ánni nga nda kʼoéjnani ngixko̱n Jeobá (Ecl. 8:11). Koaan kʼoéjngoaa tokoán nga ñaki ndasʼin sítjoson je xi chjotajchínga sʼin tjío je xá xi kjinele kʼianga kjoa bʼéndajin kʼoa nga kʼoatso tsa kuichonsjejin naxinandále Niná je chjota xi tsakajngijée kʼoa tsa mai. Tojo kisʼin je xi juez koan ya naxinandá Israel, be je xi chjotajchínga sʼin tjío nga tʼatsʼe Jeobá nga kjoa bʼéndajin, ali tsa tʼatsʼe chjotajin (2 Crón. 19:6, 7).

15. Ánni nga nʼio machjénsíni nga si̱nʼiotʼaa ndʼaibi josʼin bándiaaná je Jeobá.

¹⁵ Nga jenʼio koanchrianle nga kjoetʼa jme xi chon sonʼnde, nʼio machjén nga kʼoéjngoaa tokoán nga kui xi kixi tjín kʼoasʼín je Jeobá. Machjén nga je Jeobá si̱nʼiotʼaa kʼianga jetíjna kjoañʼai xi nʼio tse, tsakui nichxin kui kʼoakʼuínná jmeni xi tsín ndi̱to̱n koa̱njinná kʼoa tsa ñʼai koa̱nná nga si̱tjosoán. Alikui jesoa Jeobá kjoakaoná nga kui nichxin, jéjin sichjén je chjota xi kjoéjin nga bándiaaná. Nga kui nichxin alikuijin koa̱n nga kuila si̱kjaʼaitsjeen tsa tʼatsʼe Jeobá tínroani je kjoafaʼaitsjen xi tíbʼainá kʼoa tsa totsʼe kjoafaʼaitsjen tjíosíchjén xi tjíobándiaaná. A jé Jeobá si̱nʼiotʼaa nga kʼia, kʼoa a koa̱nkjainná jme xi kuitso naxinandále. Kʼianga jchaa xi tʼatsʼe jebi kuenta sʼiaan jonʼia ndʼaibi kʼianga jme kjoafaʼaitsjen tsjoáná je naxinandále Niná. Tsa makjainná jmeni xi tso naxinandále Niná ndʼaibi kʼoa tsa tokjoan nitjosoán kʼoajin tisʼiaan kʼianga jetíjna kjoañʼai xi nʼio tse (Luc. 16:10).

16. Jósʼin jeme chótʼayakaoná nga koakoá tsa je Jeobá ninʼiotʼaa.

¹⁶ Jósʼiaan kʼianga kjoaʼaxin Jeobá jme xi chon sonʼnde. Kui xi mená nga katamakjainle je chjota kʼoa kao xíngiaa xi kje nrʼoéjin je Énle Niná nga kjesa fetʼajin jme xi chon sonʼnde. Kʼianga jekjoaʼaí Armagedón jé Jeobá xi kuitsoni josikao Jesús je chjota (Mat. 25:31-33; 2 Tes. 1:7-9). Alikui ñá xi kuixónñá ʼyani xi kuitjontjai nga kʼia kʼoa ʼyani xi mai, jé Jeobá xi kuitsoni ʼyani xi koakole kjoamatokon (Mat. 25:34, 41, 46). A jé Jeobá si̱nʼiotʼaa nga  kʼia, axo tsín tije si̱xánilee tsa tsín sa̱sénná jmeni xi sʼin. Machjén nga je Jeobá si̱nʼiotʼaa ndʼaibi ánni nga je si̱nʼiotʼasíñá nichxin xi sʼa nroa.

17. Jósʼin kuichomani jmeni xi sʼin Jeobá nga jekjoetʼa jme xi chon sonʼnde.

¹⁷ Si̱kjaʼaitsjenjiaan josa̱tío tokoán nga jeya ʼndenaxó tiyoaa nga jchaa josʼin kuichomani jmeni xi sʼin je Jeobá. Alikui tisʼe̱ni religión ndiso, alikui tiʼya xi negocio sʼinni kʼoa alikui tiʼya chjotaxá sʼe̱ni xi totaon skoe̱ chjota. Alikui tisʼeni chʼin, alikui tikoa̱njchíngañá kʼoa tsín tiʼya xi kuiyáni. Je Na̱i kao sénnichxin xi chʼaokjoan jngo jmi nó si̱katíoʼyanʼio. Tjóxin ngayeje kjoa xi tíbajngi je Na̱i (Apoc. 20:2, 3). Nʼiojin tsjoa sa̱tío tokoán nga je Jeobá kininʼiotʼaa kʼoa nga ñaki tsakʼejngoaa tokoán nga je Jeobá xi ngisa nda be josʼin bʼéndajin kjoa.

18. Jmé xi bakóyaná jokisʼin je chjota israelita tojo tso Números 11:4-6 kao 21:5.

¹⁸ Jméni xosikaoná nga tsín sa̱sénná jmeni xi sʼin Jeobá kʼianga jeya ʼndenaxó tiyoaa. Si̱kjaʼaitsjenla jokisʼin je chjota israelita kʼianga jekitjoni ya Egipto. Tjínkʼa xi kui kisimekon ijngokʼa je tsojmi xi kiskine ya Egipto kʼoa tsakʼasjengi je maná xi Jeobá kitsjoale (tʼexkiai Números 11:4-6; * 21:5 *). A kʼoati koaan tsanda ñá nga jekjoaʼato kjoañʼai xi nʼio tse. Alikui ʼyaa jokjitse kuichomani nga si̱xá nga tobijbi ʼndenaxó koa̱n je Sonʼnde. Nʼiojin tse xá sʼe̱ kʼoa tsakui nichxin tsín choa ñʼai koa̱nná. A tsín sa̱sénná jmeni xi tsjoáná Jeobá nga kʼia. Kʼiatsa bʼailee kjoanda Jeobá jmeni xi tsjoáná ndʼaibi kʼoati kʼoailee kjoanda nga kui nichxin.

19. Tikʼaxki̱ jméni xi nʼio chjíle xi kaʼyaa i̱ kjoaʼmiya jebi.

¹⁹ Ñaki kixi jmeni xi sʼín Jeobá ngantsjai. Kʼoa machjén nga ñaki kʼoéjngoaa tokoán nga kʼoatjín jebi. Kʼoati machjén nga si̱nʼiotʼaa je chjota xi je binyánda nga bándiaaná. Alikui si̱chajiaan jmeni xi kitso je Jeobá, nga i̱ kitsole je profeta Isaías: “Je xi koasenkaono kuinga tsín si̱kjáojion kʼoa nga katasʼeno kjoanʼiotʼa” (Is. 30:15).