1, 2. Jméni xi koanchoyale jngo ndsʼee xi kjoafaʼaitsjen kitsjoa.

JESÁNI nkjín nó jaʼato kʼianga jao xi chjotajchínga sʼin tjío kisíxatʼa jngo tichjaa xi tsín tifini kjoajtín. Jngo xi nkjín texto tsakʼéxkiale xi kui nchja̱ni nga machjén nga kjuian kjoajtín. Je ndsʼee jebi kʼoasʼin kisikjaʼaitsjen nga kitsjoanganʼiole je tichjaa. Je tichjaa i kitso kʼianga to jetjíofini xi chjotajchínga sʼin tjío: “Alikuijin ʼyao jme kjoa xi tifaʼatojian”. Je ndsʼee jebi to kjoafaʼaitsjen kitsjoale kʼoa tsín kiskonangile jme kjoa xi tífaʼatojin. Je tichjaa kʼoakitso nga tsín josʼin tsakinyakao.

² Je ndsʼee xi texto tsakʼéxkiale je tichjaa itso: “Nga kʼia kʼoasʼin kisikjaʼaitsjen nga tsín kitsjoa kjoanda je tichjaa. Tonga kʼianga jenda kisikjaʼaitsjenjian, koanjinna nga ngisani nda tsakui kiskonangile jósʼin tíjnani ʼndele nga texto tsakʼexkiale. Tsa i̱ kixinle: Jósʼin tijnani. Jótjín tokuin. Jósʼin koa̱n koasenkaole”. Nʼio chjíle jmeni xi koanjinle ndsʼee jebi, kʼoa ndʼaibi nʼio nda basenkao je ndsʼee nga̱ síjinle yaole jotjío kon.

3. ʼYáni xi koa̱n tsjoá kjoafaʼaitsjen ya jinjtín.

 ³ Nga je síkuindaná xi chjotajchínga sʼin tjío, jé kjinele nga tsjoále kjoafaʼaitsjen ʼyani xi machjénle. Tonga kʼoati sakʼoa tsjoá kjoafaʼaitsjen je ndsʼee xi ngikʼa xi tjío ya jinjtín. Tobʼelañá, tsa ʼyani xi ya Biblia kʼoangini nga kjoafaʼaitsjen tsjoále jngo miyole (Sal. 141:5; Prov. 25:12). Kʼoa tsakui nichxin jngo tichjaa xi jejchínga tsjoále kjoafaʼaitsjen jngo tichjaa xi sʼa xti tʼatsʼe jmeni xi síkʼaxki̱ Tito 2:3-5. Kʼoa je xi xijchá ma kʼoati kjitʼa tsjoále kjoafaʼaitsjen kʼoa batekjáyale je xtile. Ningalani je ngisa bʼakaole xi chjotajchínga sʼin tjío jmeni xi tso kjoaʼmiya jebi, kuinyakaoná ngatsʼiaa nga koa̱nná kʼoee kjoafaʼaitsjen xi kuinyakao xíngiaa, xi tsjoa koaya ni̱ma̱ná (Prov. 27:9).

4. Jmé xi chótʼayajiaan i̱ kjoaʼmiya jebi.

 ⁴ I̱ kjoaʼmiya jebi ño koya tjínni xi jchaa tʼatsʼe josʼin kʼoee kjoafaʼaitsjen. Ánni nga kjoafaʼaitsjen kʼoaiñá. A machjénkjoán nga kjoafaʼaitsjen kʼoee. ʼYáni xi tjínnele tsjoá kjoafaʼaitsjen. Kʼoa jósʼiaan nga koasenkao je xi kjoafaʼaitsjen kʼoailee.

5. Ánni nga ngisa kʼoaʼénni tsa ʼyani kʼianga ngasin nganda kʼoaile kjoafaʼaitsjen (1 Corintios 13:4, 7).

⁵ Je xi chjotajchínga sʼin tjío tsjoake je ndsʼe̱. Kʼoa nga tsjoake, tsjoále kjoafaʼaitsjen tsa ʼyani xi jexin ndiaa tífi (Gál. 6:1). Kʼianga kjoafaʼaitsjen tsjoá je xi chjotajchínga sʼin tjío kui kuenta sʼin jmeni xi kitso pastro Pablo, nga kui kinchja̱ni tʼatsʼe kjoatsjoacha. I kitso: “Je kjoatjaocha tsejtaní, kʼoa tjínle kjoanda. [...] Síkjaínle ngayije, makjainle ngayije, koyale ngayije, ngayije jchókjoakaole” (tʼexkiai 1 Corintios 13:4, 7). * Nga sikjaʼaitsjenjin jotso texto jebi xi chjotajchínga sʼin tjío, kʼoasʼin skoe̱ni tsakui nga tsjoake je ndsʼe̱ nga kjoafaʼaitsjen tsjoánile kʼoa jósʼin tsjoá kjoafaʼaitsjen. Kʼoaʼénjin jmeni xi kʼuínle jngo chjota kʼiatsa skoe̱ nga kjimandosin kjoaixile je xi kjoafaʼaitsjen títsjoále (Rom. 12:10).

6. Jókisʼin Pablo nga nʼio nda choa̱ tsakʼéjna nga kitsjoa kjoafaʼaitsjen.

⁶ Je pastro Pablo nʼio nda choa̱ bʼéjnale xi chjotajchínga sʼin tjío. Tobʼelañá, kitsjoale kjoafaʼaitsjen je chjotale Cristo xi Tesalónica tsʼe kʼianga koanchjénle. Tonga kʼianga kiskile, títjonkjoanla kʼoakitsole nga nʼio nda tjíosʼín nga nda tjíosíxále Niná, nga kuinga tsjoake Niná nga kʼoatjíosʼínni kʼoa nga tjíokale. Kʼoati kui kisikjaʼaitsjen josʼin tjío, nga tjínjinle nga kjoa tjíofaʼatojin kʼoa nga chjota tjíofitjenngike (1 Tes. 1:3; 2 Tes. 1:4). Kʼoa kʼoakitsole nga nʼio nda choa̱ tjíobatíole je chjotale Cristo xi ngikʼa (1 Tes. 1:8, 9). Nʼiojin tsjoa kisatio kon nga kʼoatsakʼinle. Koanjinle nga nʼio tsjoake koan je Pablo, kuinga nʼio nda tsakinyakaoni je kjoafaʼaitsjen xi kitsjoale kʼianga kiskile nga jao carta (1 Tes. 4:1, 3-5, 11; 2 Tes. 3:11, 12).

7. Ánni nga tomajtinile tsa ʼyani kʼianga kjoafaʼaitsjen bʼaile.

⁷ Alikui ndasʼin kuichomani tsa tsín kixi tíjna josʼin kʼoee kjoafaʼaitsjen. Tojo kitso jngo ndsʼee xi chjotajchínga sʼin tíjna. I kitso: “Tjínkʼa xi tomajtile nga kjoafaʼaitsjen bʼaile, ningalani nda tso kjoafaʼaitsjen xi bʼaile, kuinga tsín sasénnile nga tsín ngasin nganda chjakaonajmí”. Jebi kui bakóyaná nga ngisa chʼaʼén jmeni xi ʼminá kʼianga ngasin nganda bʼainá kjoafaʼaitsjen tikʼoajinni tsa to kuinchja̱tikaoná je xi kjoafaʼaitsjen tsjoáná.

8. Jméni xi machjén nga sikjaʼaitsjenjin xi chjotajchínga sʼin tíjna nga kjesa tsjoájinle kjoafaʼaitsjen tsa ʼyani.

⁸ Je xi chjotajchínga sʼin tjío alikui koa̱n nga tokjoan tsjoále kjoafaʼaitsjen tsa ʼyani. Nga kjesa kʼoasʼínjin machjén nga i̱ tso xi sikjaʼaitsjen: “A machjénkjoán nga kjoafaʼaitsjen tsjoale. A ʼbeña nga kui xi chʼaotjín kʼoatsoʼbasʼín. A tífaʼatone jmeni xi tso je Biblia. Axo tokui kʼoatísʼín jmeni xi tsín kʼoasʼian an”. Jngo xi chjotajchínga sʼin tíjna xi nkjín kon, alikui tokjoan kjoafaʼaitsjen tsjoá (Prov. 29:20). Tsa to jao tjín tokuin, koaan chjónangilai je xi kʼoati chjotajchínga sʼin tíjna tsa machjén nga kjoafaʼaitsjen kʼoaile jngo ndsʼee (2 Tim. 3:16, 17).

9. Jósʼin koaitjenngi choa̱le Pablo je xi chjotajchínga sʼin tjío tʼatsʼe nga kjoafaʼaitsjen tsjoále je ndsʼee jofa kʼoa jokjoan najño xi bʼakjá (1 Timoteo 2:9, 10).

 ⁹ Jngola choa̱ kataʼyaa. Tobʼelañá, tsa jngo xi chjotajchínga sʼin tíjna kui kjimakjáojinle jokjoan najño xi bʼakjá kʼoa jofa jngo ndsʼee. Koaan i̱ tso xi sikjaʼaitsjen: “A kui jmeni xi tso Biblia tífaʼatone nga kjoafaʼaitsjen tsjoanile”. Nga tsín tokui koaini josʼin síkjaʼaitsjen koaan je skónangile xi kʼoati chjotajchínga sʼin tíjna kʼoa tsa jngoje̱ ndsʼee xi kʼoati jetjínle kjoafaʼaitsjen. Koaan kui skótʼayajin nga jao ndsʼee jebi jokitso Pablo tʼatsʼe josóyoaa kʼoa jokjoan najño xi chʼa̱kjá (tʼexkiai 1 Timoteo 2:9, 10). * Je Pablo alikui ñaki jngo kjoatéxoma kitsjoa jmeni xi koa̱n sʼiaan kʼoa jmeni xi mai. Tosaa kui kjoafaʼaitsjen kitsjoa xi koasenkaoná jokjoan najño xi chʼa̱kjá, nga tsín si̱kʼatoné choa̱le josóyoaa kʼoa nga nda chósonnilee. Koanjinle kʼianga jngó jngó xi kuixónñá josóyoaa kʼoa jokjoan najño xi chʼa̱kjá, tonga nga tsínkjoanni kuitjátoné jotso kjoatéxomale Niná. Nga skósonnile xi chjotajchínga sʼin tjío tsa tsjoále kjoafaʼaitsjen jngo ndsʼee kʼoa tsa mai, kui kuenta sʼin jótísʼín je ndsʼee, a tíkosonnile jokjoan najño xi bʼakjá kʼoa jofa.

10. Jméni xi kuenta sʼiaan tʼatsʼe josʼin nikjaʼaitsjeen nga jngó jngoá.

¹⁰ Ninga jetjínle kjoafaʼaitsjen je ndsʼee, kjaʼaí kjaʼaísʼin síkjaʼaitsjen tʼatsʼe jngo kjoa. Tonga ali tsakuijin xi tsonile nga tsín ndatjín jmeni xi sʼin jngo. Kuinga tsín koa̱n kui kʼoakʼuínnilee xi ngikʼa josʼin nikjaʼaitsjeen ñá tʼatsʼe jmeni xi ndatjín kʼoa jmeni xi mai (Rom. 14:10).

11, 12. Tsa machjén nga kjoafaʼaitsjen kʼoaile tsa ʼyani, jméni xi kuenta sʼin je xi chjotajchínga sʼin tíjna, kʼoa ánni.

¹¹ ʼYáni xi tjínnele tsjoále kjoafaʼaitsjen tsa ʼyani xi kui machjénle. Tobʼelañá, tsa jngo tichjaa xi jechixan machjénle nga kjoafaʼaitsjen kʼoaile kʼoa tsa jngo xi sʼa xti, machjén nga jekjoanla títjon kjoakaonajmí xi jko̱ tíjnale yaniʼya je xi chjotajchínga sʼin tjío. Tsakui nichxin je xi jko̱ tíjnale yaniʼya kʼoakuitso nga je tsjoá kjoafaʼaitsjen kʼoa tsa maije̱ kʼoati ya kʼoéjnabasen nga tsjoá kjoafaʼaitsjen je xi chjotajchínga sʼin tíjna. * Kʼoa tsa jngo tichjaa xi sʼa xti machjénle nga kjoafaʼaitsjen kʼoaile ngisaa ndatjín nga je tsjoále kjoafaʼaitsjen jngo tichjaa xi jengisa jchínga, tojosʼin kaʼyaa ya  párrafo 3.

 ¹² Xi kʼoati koa̱n sʼin je xi chjotajchínga sʼin tjío kuinga i̱ tso xi sikjaʼaitsjen: “A bakinna nga an tsjoale kjoafaʼaitsjen, axo ngisaa nda nga kjaʼaí xi tsjoále kjoafaʼaitsjen”. Tobʼelañá, tsa ʼyani xi tsín chjí bekon yaole, ngisajin kʼoaʼénle tsa je tsjoále kjoafaʼaitsjen jngo xi kʼoati kui kjoa jaʼatojin joni je, nga̱ ngisajin sijinle yaole jotjín kon. Tonga je xi chjotajchínga sʼin tjío kui xá kjinele nga kʼoakuitsole je ndsʼee nga kʼoakatasʼín jotso je Énle Niná. Tsa ʼyani xi kjoafaʼaitsjen machjénle tjínnele nga kʼoaile.

13, 14. Ánni machjénni nga nda kuinyaño jmeni xi kʼuínle je xi chjotajchínga sʼin tjío.

¹³Nda tinóʼyai. Kʼianga kui tísíkjaʼaitsjen jngo xi chjotajchínga sʼin tíjna nga kjoafaʼaitsjen tsjoále jngo ndsʼee, machjén nga i̱ kuitso: “A nda ʼbe josʼin tíjnani je ndsʼee. A ʼbeña jme kjoa xi tífaʼatojin. Axo tsín ʼbe jme kjoa xi tjínle. Jméni xi ngisa koasenkao”.

¹⁴ Jmeni xi tso Santiago 1:19 nʼio binyakao je xi kjoafaʼaitsjen tsjoá. Je Santiago i kitso: “Ngatsʼi chjota ndi̱to̱nndi̱to̱n katanrʼoé, tonga katakjenjta nga nchja̱, ali tokjoánjin katamajtile”. Alikui koa̱n kʼoasʼin sikjaʼaitsjen xi chjotajchínga sʼin tíjna nga beyeje jme kjoa xi tífaʼatojin jngo ndsʼee xi kjoafaʼaitsjen tsjoále. Proverbios 18:13 itso: “Kʼianga jngo chjota xi tokjoan nchja̱ nga tikje nrʼoéjinni jotjínni kjoa, to chjotachininí kʼoa nangi síkʼéjna yaole”. Ngisaa nda nga jesoa chjónangilee je ndsʼee. Kʼoa machjén nga ndakjoan kuinóʼyalee nga kjesa joʼmijinlee. Kui jebi xi koanjinle je xi chjotajchínga sʼin tíjna xi sa jená kanikʼaxkiaa nga títjon. Koanjinle nga ʼndele nga kui kʼoakuitsole tsakai je tichjaa jmeni xi jekisikjaʼaitsjen, nga ngisani nda tsa i̱ kitsole: “Jósʼin tijnani, a tokʼoandani, jósʼin koa̱n koasenkaole”. Tsa kʼoasʼin sindosin je xi chjotajchínga sʼin tjío tʼatsʼe ndsʼee kao tichjaa ngisajin kuinyakao.

15. Jósʼin koaitjenngi xi chjotajchínga sʼin tjío jotso Proverbios 27:23.

¹⁵Nda kataʼyaxkuin je ndsʼee. Tojosʼin kaʼyaa nga títjon, kʼianga kuinyakao je ndsʼee je kjoafaʼaitsjen xi kʼoailee ali tsa tokuijin nga texto kʼoéxkialee kʼoa tsa jme xi kʼuínlee, tjínnele nga skoe̱ je ndsʼee nga mandosin kjoaixiná xi tʼatsʼe, nga majinná jotjío kon kʼoa nga mená kuinyakoaa (tʼexkiai Proverbios 27:23). * Je xi chjotajchínga sʼin tjío tjínnele simiyo je ndsʼee kao tichjaa.

16. Jméni xi sʼin je xi chjotajchínga sʼin tjío nga ndasʼin kuichomani nga tsjoá kjoafaʼaitsjen.

¹⁶ Je xi chjotajchínga sʼin tjío alikui mele nga kʼoasʼin sikjaʼaitsjen je ndsʼee nga tokʼia fákaonajmí kʼiatsa jme kjoafaʼaitsjen tsjoále. Tosaa kui xi sʼin je xi chjotajchínga sʼin tjío nga kjitʼa kjoakaonajmí je ndsʼee kʼoa nga kuinyakao kʼianga kjoa faʼatojin. Jngo  ndsʼee xi chjotajchínga sʼin tíjna xi jetjínle kjoafaʼaitsjen kʼoatso nga ngisa simiyo je ndsʼee tsa kʼoasʼin xi chjotajchínga sʼin tjío. Kʼoa itsosa: “Kʼiatsa kjoafaʼaitsjen machjénle tsa ʼyani, ngisaa choa ñʼai koa̱nle xi chjotajchínga sʼin tíjna nga tsjoále kjoafaʼaitsjen”. Kʼoa ngisajin kʼoaʼén je xi kjoafaʼaitsjen kʼoaile.

17. Kʼiáni nga ngisa machjén nga tsejta koa̱n kʼoa nga ngasin nganda tsjoá kjoafaʼaitsjen xi chjotajchínga sʼin tjío.

¹⁷Tsejta katamai kʼoa ngasin nganda tʼai kjoafaʼaitsjen. Ngisaa machjén nga tsejta koaan kʼoa nga ngasin nganda chja̱kaonajmiá tsa tsín sasénle je xi kjoafaʼaitsjen tíbʼaile kʼoa tsa tsín ndi̱to̱n sítjoson. Alikui koa̱n nga yaole sijtile je xi chjotajchínga sʼin tjío tsa kʼoalani koa̱n. Machjén nga koaitjenngi je choa̱le Jesús, nga̱ itso én xi tongini kinokjoa xi tʼatsʼe: “Je yána̱xo̱ xi chikjan, likui skótʼaó. Je xka̱ xi totjoʼndi̱, likui sikitsʼao” (Mat. 12:20). Kʼianga bʼétsʼoa nga toje xi chjotajchínga sʼin tíjna koaan kʼoakuitsole je Jeobá nga katabasenkao je ndsʼee nga katamajinle ánni nga machjénnile kjoafaʼaitsjen kʼoa jósʼin koa̱n sitjoson. Tsa nichxinni machjénle nga sikjaʼaitsjenjin je kjoafaʼaitsjen xi tsakʼaile. Tsa tsejta xi chjotajchínga sʼin tíjna kʼoa tsa ngasin nganda tsjoá kjoafaʼaitsjen, je ndsʼee kui kuenta sʼin je kjoafaʼaitsjen xi tsakʼaile ali tsakuijin kuenta sʼin josʼin kichjakaonajmí. Machjén nga ya Énle Niná chʼa̱ngiñá ngantsjai je kjoafaʼaitsjen xi kʼoee.

18. 1) Jméni xi kuenta sʼiaan kʼianga kjoafaʼaitsjen kʼoee. 2) Tojosʼin matsen je sén kao jotso je recuadro, jméni xi kuenta sʼin je xi xijchá ma kʼianga kjesa tsjoájinle kjoafaʼaitsjen je xtile.

¹⁸Kuenta sʼiaan jñani tsín kʼoasʼin bitjosonná. Nga chjotajée maa ngatsʼiaa alikuijin ñaki kʼoakjoánsʼin kuitjosonná jotso je kjoafaʼaitsjen xi tsjoáná kjoaʼmiya jebi (Sant. 3:2). Sakʼoajin tsín nda sʼiaan, tonga machjén nga tosi tonda si̱ndayaa yaoná. Tsa skoe̱ nga tsjoachaa je ndsʼee, sichatʼajinná kʼiatsa kui kʼoasʼiaan kʼoa tsakui kʼoakuixoán jmeni xi tsín sa̱sénle. (Chótʼai je recuadro “ Én xi sʼejinkon xi xijchá ma”).

19. Jósʼin kjoáyatsjoaa je ni̱ma̱le ndsʼee.

¹⁹ Tojosʼin tiʼyaa, alikui choa ñʼai tíjna nga kjoafaʼaitsjen bʼé. Ngatsʼiñá nga chjotajée maa, ni je xi tsjoá kjoafaʼaitsjen kʼoa ni je xi kjoafaʼaitsjen bʼaile. Kuinga kuenta sʼianñá kjoafaʼaitsjen xi kabʼainá i̱ kjoaʼmiya jebi. Kʼianga ʼya xi kjoafaʼaitsjen kʼoailee, kuenta sʼiaan ánni nga kjoafaʼaitsjen kʼoainilee. Kʼoati nda si̱kjaʼaitsjeen tsa machjén kjoaixile nga kjoafaʼaitsjen kʼoailee je ndsʼee kʼoa ʼyáni xi koa̱n tsjoále kjoafaʼaitsjen. Kʼianga chja̱kaonajmiá je ndsʼee chjónangilee kʼoa nda kuinóʼyalee jmeni xi kuitsoná ánni nga jchañá josʼin tíjnani. Si̱jinlee yaoná jotjín kon. Koakolee nga tsjoachaa je ndsʼee kʼoa miyoná katamani. Kui xi mená nga kuinyakao je ndsʼee kjoafaʼaitsjen xi kʼoailee kʼoa nga tsjoa katasatío kon (Prov. 27:9).