KJOAʼMIYA XI CHOTʼAYA 9
Chjénngilee je Jesús nga kuinyakoaa xi ngikʼa
“Tongisa ndaní nga kʼoee kaoni tsa nga chjoé” (HECH. 20:35).
KJOAJNDA 17 “Mena”
XI TÍNCHJA̱NI *
1. Jósʼín je naxinandále Jeobá.
JENʼIO kjoatse kʼoakitso je Biblia kʼianga je choʼndale Niná kao kjoatsjoa sixále nga koaitjenngi josʼin koandiaa je ʼNdíle (Sal. 110:3). Tíbitjoson je én jebi nichxin xi tiyoaa ndʼaibi. Nga xki̱ nó siento millón hora tsoyason je choʼndale Niná, kao kjoatsjoa kʼoasʼín kʼoa tsín machjíle. Kʼoati síkʼaya nichxin nga binyakao je ndsʼe̱, nga tsjoánganʼiole kʼoa nga binyakao nga sa nʼio sa nʼio sa̱tío kjoamakjainle. Kʼoa je xi siervo ministerial sʼin tjío kao xi chjotajchínga sʼin tjío síkʼaya nichxin nga batíonda jmeni xi faʼa ya kjoajtín, nga batíonda kjoanokjoaya kʼoa nga síxatʼa je ndsʼee nga tsjoánganʼiole. Kuinga tsjoake je ndsʼe̱ kʼoa kuinga tsjoake je Jeobá nga kʼoasʼínni (Mat. 22:37-39).
2. Tojo tso Romanos 15:1-3, jmé choa̱ xi tsakʼéjnaná je Jesús.
2 Je Jesús jé ngisa títjon kuenta kisʼin xi ngikʼa. Kʼoa nga chjotatjenngile maa bʼenelee yaoná nga mangíntjenngiaa choa̱le (tʼexkiai Romanos 15:1-3). * Ndasʼin kuichomani tsa kʼoasʼiaan. Je Jesús i kitso: “Tongisa ndaní nga kʼoee kaoni tsa nga chjoé” (Hech. 20:35).
3. Jmé xi chótʼayajiaan i̱ kjoaʼmiya jebi.
3 I̱ kjoaʼmiya jebi kui chótʼayajin kʼa jmeni xi kisʼin je Jesús nga tsakasenkao xi kjaʼaí. Kʼoati chótʼayajiaan jósʼin koa̱n chjénngilee. Kʼoati jchaa jméni xi sʼiaan nga ngisa koa̱nmená kuinyakoaa xi ngikʼa.
CHJÉNNGILEE JE JESÚS
Ningalani jekijtale Jesús, jméni xi kisʼin kʼianga nʼio nkjín chjota kichokonle (Chótsenlai párrafo 4)
4. Jósʼin tsakakó Jesús nga kui títjon kuenta kisʼin jmeni xi machjénle xi ngikʼa.
4Je Jesús tsakasenkao xi ngikʼa ninga kʼia nga nʼio kijtale. Si̱kjaʼaitsjenla jokisʼin kʼianga jngo jtín chjota kichokonle ya jñani tíjna jngo nindo, tsakui nichxin ya chrian Capernaúm. Nga tsʼajndale nitje̱n nga tíbʼétsʼoa je Jesús jejin kijtale nga kʼia. Tonga nga tsabe chjota jebi koanmake je xi ma̱ kʼoa xi chʼin tjínle. Ali tsa tokisindayajin chjota jebi, kʼoati nʼio kitsjoanganʼiole jmeni xi kitsoya je Jesús nga kui nichxin, kʼoa nʼio ʼyale jmeni xi kitso je Jesús nga kʼia, kʼianga kinchja̱ya jngo sonnindo (Luc. 6:12-20).
Jósʼin koa̱n chjénngilee je Jesús nga tsakasenkao xi kjaʼaí (Chótsenlai párrafo 5)
5. Kʼianga nʼio kijtale je xi jko̱ tjío ya yaniʼya, jósʼin fitjenngi je choa̱le Jesús.
5Jósʼin fitjenngi choa̱le Jesús je xi jko̱ tjíole yaniʼya. Si̱kjaʼaitsjenla jngo xi nʼai ma kʼianga jekijtale nga fisíxá nga jebichóni ya niʼyale. Nga kui nichxin kʼoasʼin tjínndajinle nga skótʼayajtín kao familiale, tonga tsakui nichxin kʼoasʼin sikjaʼaitsjen nga tosa kjaʼaí nichxin skótʼaya. Jé Jeobá síjéle nganʼio kʼoa kotʼayajtín ngatsʼi tojo sʼín nga xki̱ xomana. Kʼoa je xtile majinle nga kui xi tʼatsʼe Niná xi ngisa chjí bekon je xijchále.
6. Jngo koya tikʼaxki̱ josʼin kisikʼaya nichxinle Jesús kʼianga tsakasenkao xi kjaʼaí.
6Je Jesús kisikʼayale nichxin je xi kjaʼaí. Si̱kjaʼaitsjenjinla jebi: nʼiojin ba kisʼe kon je Jesús nga tokʼia kisʼejinle nga kinikʼien je Juan Bautista, xi miyole mani. Je Biblia itso: “Kʼia nga kinrʼoé Jesús, kitʼaxinni yabe. Kiya jngo chitso, ki ya ʼndetʼaxintʼa” (Mat. 14:10-13). Majinná ánni nga toje koanmenile tsakʼejna je Jesús nga kʼia. Nga̱ tjínkʼa chjota xi toje mele batio kʼianga kjoaba tjíojin. Tonga alikuini toje tsakʼejna je Jesús nga̱ nʼio nkjín chjota jetjíokoyale ya ʼnde jñani kicho. Jméni xi kisʼin je Jesús. Kui kuenta kisʼin nga nganʼio machjénle chjota jebi kʼoa koanmake. Koanjinle je Jesús nga machjénle chjota jebi nga kjuinrʼoé xi tʼatsʼe Niná kʼoa kuinga tsakasenkaoni, kʼoa nʼio nkjín koya jmeni xi kitsoyale xi tʼatsʼe Niná (Mar. 6:31-34; Luc. 9:10, 11).
7, 8. Tikʼaxki̱ kʼai josʼin fitjenngi choa̱le Jesús je xi chjotajchínga sʼin tjío kʼianga ʼya xi nganʼio machjénle.
7Jósʼin fitjenngi je xi chjotajchínga sʼin tjío je choa̱le Jesús. Chjí ʼyaa ngayeje jmeni xi sʼín xi chjotajchínga sʼin tjío nga binyakaoná. Sakʼoa likui majinná jokji xá kjinele. Tobʼelañá, kʼianga ʼya xi sokóchʼinle, je xi ya tjíojinle Comités de Enlace con los Hospitales tokjoan binyakao je ndsʼee xi nganʼio machjénle, kʼoa sakʼoa kʼia nokjoale ninga jebasenya nitje̱n. Tonga nga bakó kjoamatokon je ndsʼee jebi kao familiale, kui ngisa kuenta sʼín josʼin kuinyakao je ndsʼee kʼoa tsín to yaole fini.
8 Je xi chjotajchínga sʼin tjío kʼoati tsjoánganʼio nga sʼenda Ndʼia jña chotʼayá kao je ndʼia xi machjén nga ʼyaxkón Niná. Kʼoati tsjoánganʼio jñani kjoaxkón sʼe. Kʼoa kjaʼaínile jokji hora síkʼaya nga bakóya, nga binyakao kʼoa nga tsjoánganʼiole je ndsʼee xi tjío ya jinjtín. Machjén nga kʼoakʼuínlee je ndsʼee jebi kao familiale nga nʼio nda sʼín nga kʼoasʼin binyakaoná. Kui xi mená nga tosi tonda katabinyakao je Jeobá nga kʼoasʼín. Tojo tjínnele sʼin ngatsʼi je chjotale Cristo, je xi chjotajchínga sʼin tjío kʼoati machjén nga skósonnile jmeni xi sʼin. Alikui koa̱n nga kui nʼio sikʼayale nichxin jme xá xi kjinele jinnaxinandále Niná kʼoa tsa totsjiónkon je familiale.
JÓSʼIAAN NGA KOA̱NMENÁ KUINYAKOAA XI KJAʼAÍ
9. Tojo tso Filipenses 2:4, 5, jósʼin tjínnele si̱kjaʼaitsjeen ngatsʼiaa xi chjotale Cristo maa.
9 (Tʼexkiai Filipenses 2:4, 5). * Ningalani tsín chjotajchínga sʼin tiyoaa ngatsʼiaa, koaan chjénngilee jokisʼin je Jesús. Je Biblia kʼoatso nga “tochoʼnda tsabekon yaole” (Filip. 2:7). Jmé xi bakóyaná én jebi. Jngo choʼnda xi nda síxá kui xi mele nga tsjoa sʼe̱ kon je naile. Nga choʼndale Jeobá maa kʼoa nga je nixálee ndsʼee, kui xi mená nga sa nda sa nda si̱xálee je Niná kʼoa nga kuinyakoaa je ndsʼee. Kataʼyala kʼa jmeni xi kuinyakaoná nga kʼoasʼiaan.
10. Jméni xi koa̱n si̱kjaʼaitsjenjiaan.
10Tikjaʼaitsjenjin jósʼiain. Koaan i̱ tso xi tikjaʼaitsjenjin: “A tijnandaña nga tsjoanganʼiole kʼoa nga sikʼayale nichxinna xi kjaʼaí. Jóxián tsa kʼoakʼuínna nga kjuísixatʼa jngo ndsʼee xi jejchínga kʼoa tsa kʼoakʼuínna nga kjoaʼakʼatoa jngo tichjaa xi jejchínga nga kjuíkoa kjoajtín. Kʼianga kʼoaʼminá nga nganʼio machjén nga koa̱ntsje ya jñani sʼejna kjoajtíntse kʼoa tsa yaje̱ Ndʼia jña chotʼayá, a tokjoan kʼoaxian nga tsjoanganʼioa”. Kʼianga tsakʼaitʼalee yaoná je Jeobá, kʼoatsakʼinlee nga kʼoasʼin ni̱chjén jmeni xi tjínná nga je si̱xálee, jolani je nichxinná kʼoa kao jmeni xi tjínná. Nʼio tsjoa sʼe kon je Jeobá kʼianga binyakoaa xi kjaʼaí. Jméni xi koasenkaoná tsa tsín kʼoasʼin bʼainganʼioá.
11. Jósʼin koasenkaoná nga kʼoétsʼoalee Niná nga koa̱nmená kuisenkoaa xi kjaʼaí.
11Kʼoatʼinlai Jeobá jotjín tokuin. Tsa ʼyai nga machjén nga tjínnele si̱ndayai yaoli tonga tsa tsín tso tokuin nga kʼoanʼiai, tʼetsʼoalai je Jeobá kʼoa kʼoatʼinlai nga katabasenkaoli. Tʼeyanajmílai jotjín tokuin kʼoa kʼoatʼinlai nga katabasenkaoli nga koa̱nmeli si̱ndayai yaoli (Filip. 2:13).
12. Jósʼin kuinyakao naxinandále Niná je ndsʼee xi sʼa xti xi jekisʼenngindá.
12 Tsa sʼa ti kʼoa tsa jekisʼenngindái kʼoatʼinlai je Jeobá nga katabasenkaoli nga koa̱nmeli ngisasa kʼoainganʼiui ya jinjtín. Nkjín ʼnde jñani ngisa nkjín mani xi chjotajchínga sʼin tjío tikʼoajinni xi siervo ministerial ma, kʼoa tjín xi siervo ministerial sʼin tjío xi jekiskason nóle. Nga sa nkjín sa nkjín kjimani xi tjíofaʼaikatiojin naxinandále Niná, machjénsa je ndsʼee xi sʼa xti xi kuinyakao xi chjotajchínga sʼin tjío nga sikuinda je jtín. Tsjoa sʼe̱ tokuin tsa kʼoainganʼiui jñani ngisa machjén nganʼio, nga̱ tsjoa sʼe̱ kon je Jeobá tsa kʼoasʼiain, ndasʼin kʼoaxki̱ kʼoa nda sʼe̱ tokuin nga kuisenkoai xi kjaʼaí.
Je chjotale Cristo xi Judea tsʼe kitokachjingaa, yaa jaʼatojin xo̱ngá Jordán kʼoa yaa naxinandá Pela kicho. Je xi tokʼoa jeya tjío tsjoále tsojmi xi ma chine je ndsʼe̱ xi tosʼa tjíobichó (Chótsenlai párrafo 13)
13, 14. Jméni xi sʼiaan nga kuinyakoaa je ndsʼee (chótsenlai sén xi faʼaitʼa ya portada).
13Kuenta tʼiain tsa ʼyani xi nganʼio machjénle. Je pastro Pablo i kitsole je chjotale Cristo xi Judea tsʼe: “Ali nichajinjion nga nda sʼiaon, kʼoa nga kuinyakao xikʼa, nga̱ kui kjoatjao xi sasénle Niná” (Heb. 13:16). Nʼio nda tsakinyakao je kjoafaʼaitsjen xi kitsjoale Pablo. Tochoatsee jaʼato nga kitjo ya naxinandá je chjotale Cristo, kʼoa kisikatío ndʼiale, negosiole kao xínkjín xi tsín choʼndale Niná ma kʼianga tsanga (Mat. 24:16). Nga kui nichxin nʼiojin koanchjénle nga tsakinyakaongañá xínkjín. Tsa sa jetsakinyakaongañá xínkjín tojo kitso Pablo, ngisajin choa ñʼai koanle nga kʼoakisʼin nga kui nichxin.
14 Tsakui nichxin tsínkjoan kʼoakuitsoná je ndsʼee jmeni xi machjénle. Tobʼelañá, tsa jngo ndsʼee xi jekʼien chjoónle, tsakui nichxin tsín jokuitsoná tsakui machjénle xi koakjenni, tsa tjín jñani mele koai kʼoa tsa jmesa xá xi tjín ya yaniʼya, nga̱ kaile nga xá koanená. Tonga ndajin sʼe̱ kon tsa kʼoakʼuínlee nga mená kuisenkoaa. Alikui koa̱n kʼoasʼin si̱kjaʼaitsjeen nga jetjín xi tíbasenkao kʼoa tsa tokui chóyaleje̱ nga je kʼoakuitso ʼndeʼndená jmeni xi machjénle. Koaan kui si̱kjaʼaitsjeen jósʼin mená nga kuinyakaoná xi ngikʼa tsa kuilani kjoa tibitjatojiaan ñá.
15. Jméni xi sʼiaan tsa mená kuinyakoaa xi kjaʼaí.
15Katabe xi ngikʼa nga tiyondaa kʼianga kuinyakoaa. Ya jinjtínná tjío je ndsʼee kao tichjaa xi tjíonda nga binyakao xi kjaʼaí. Alikui kʼoasʼin síkjaʼaitsjen nga toxá fanelee kʼoa ʼyañá nga tjíonda ngantsjai nga kuinyakaoná kʼianga nganʼio koa̱nchjénná, kʼoa mená kʼoati sʼiaan tsanda ñá. Jngo ndsʼee xi 45 nóle xi chjotajchínga sʼin tíjna xi Alan ʼmi tíjnandaa nga tsjoánganʼiole xi kjaʼaí. Nga kui síkjaʼaitsjen choa̱le Jesús, itso: “Ningalani nʼio tse xá kisʼele je Jesús, nʼio nkjín chjota kichokonle nga kisijéle nganʼio. Nga̱ koanjinle chjota jebi nga koanndosinle Jesús xi tʼatsʼe. Kui xi mena nga kʼoati sʼian jokisʼin Jesús, nga katabe xi ngikʼa nga tijnanda nga koasenkoa, nga katabe nga nda chjota kʼoa nga jo miyole sʼin katabekonna”.
16. Jósʼin basenkaoná Salmo 119:59, 60 nga mangíntjenngiaa choa̱le Jesús.
16 Alikui si̱kinroajeen tokoán tsa tsínkjoan kʼoasʼin kuitjosonná jokisʼin je Jesús (Sant. 3:2). Tsa ʼyani xi kui tíkotʼaya josʼin manda dibujo, alikuijinkʼia kʼoakjoán sikjoan josíkjoan je xi tíbakóyale, tonga tsa kuenta sʼin jñani machjén nga sindayasa josʼin sinda je dibujo kʼoa tsa skénngile je maestrole sa nda sa ndajin sikjoan je dibujo xi sinda. Tikʼoasʼinni, tsa mangíntjenngiaa je kjoafaʼaitsjen xi majinná kʼianga chotʼayá Biblia kʼoa tsa bʼenelee yaoná nga tosi tonda nindayaa yaoná, kʼoasʼin mangíntjenngiñá je choa̱le Jesús (tʼexkiai Salmo 119:59, 60). *
NDASʼIN BICHÓMANI NGA BINYAKOAA XI KJAʼAÍ
Kʼianga kui choa̱le Jesús kjenngi je xi chjotajchínga sʼin tjío nga binyakao xi kjaʼaí, nʼio nda choa̱ batíole xi sʼa xti (Chótsenlai párrafo 17) *
17, 18. Jósʼin kuichomani tsa chjénngilee je Jesús kʼianga kuinyakoaa xi kjaʼaí.
17 Kʼianga binyakoaa xíngiaa kʼoati mamele kʼoasʼín xi ngikʼa. Jngo ndsʼee xi chjotajchínga sʼin tíjna xi Tim ʼmi, itso: “Ya jtínnajin tjío je ndsʼee xi sʼa xti xi siervo ministerial ma, kʼoa jngo koya xi tsakinyakao kuinga kuenta kisʼin nga tjío je ndsʼee xi tjíonda nga binyakao xi kjaʼaí. Kʼoa kʼoati koanmele kisʼin tsanda je. Nʼio binyakao je jtín kʼianga kʼoasʼin tsjoánganʼio kʼoa kʼoati binyakao je xi chjotajchínga sʼin tjío”.
18 Nichxin xi tiyoaa ndʼaibi to yaole fini je chjota, tonga ñá xi choʼndale Jeobá maa alikui kʼoanʼia. Ñaki kʼoatjín tokoán nga mená chjénngilee jokisʼin je Jesús nga tsakasenkao xi kjaʼaí, ninga tsínkjoan ñaki kʼoasʼin kuitjosonná jokisʼin, tonga koaan chjénngilee (1 Ped. 2:21). Tsa kʼoénelee yaoná nga kuinyakoaa xi kjaʼaí, tsjoa sa̱tío tokoán nga̱ ʼyañá nga kui xi sasénle je Jeobá.
KJOAJNDA 13 Choa̱ xi tsakʼéjnaná Cristo
^ párr. 5 Je Jesús kui ngisa títjon kuenta kisʼin jmeni xi koanchjénle xi ngikʼa. I̱ kjoaʼmiya jebi kui chótʼayajin kʼa josʼin koa̱n chjénngilee jmeni xi kisʼin je Jesús kʼoa jósʼin basenkaoná nga kʼoanʼia.
^ párr. 2 Romanos 15:1-3: “Kʼoasʼin ñábi xi tjínná nganʼio, tjínnená nga kuinyakoaa kjoaʼindajinle xi tsínle nganʼiojin, kʼoa likui si̱tsjoayalee yaoná xi tiñánía. 2 Nga jngójngoábi si̱tsjoayalee xíngiaa xi tʼatsʼe nga ngisa nda koa̱nle kʼoa nga kuinngʼasa. 3 Nga̱ Cristo likui tije kisitsjoayanile yaole, tonga josʼin tjítʼa: Je én xi chʼao tso, xi tsʼe je xi chʼao kitsoli, kiskasonna an”.
^ párr. 9 Filipenses 2:4, 5: “Ali kuindajin nʼiao xi totsaon kjoa, tonga kʼoati tʼiaon kuinda tsʼe xi kjaʼaí chjota. 5 Katasʼeno nga jon jñale kjoafaʼaitsjen xi kisʼele Cristo Jesús”.
^ párr. 16 Salmo 119:59, 60: “Tisikjaʼaitsjenjinña je ndiaana ánni nga kʼoasʼin koai ijngokʼani je ndso̱koa jotso je kjoatéxomali. 60 Kjitʼanangi sitjosoan je kjoatéxomali”.
^ párr. 60 XI TÍNCHJA̱NI SÉN XI FAʼAITʼA: Jngo ndsʼee xi sʼa xti xi Daniel ʼmi be nga jao xi chjotajchínga sʼin tjío bichósíxatʼa je nʼaile nga kijna ya hospital. Nga kʼoasʼín je xi chjotajchínga sʼin tjío nʼio basenkao ndsʼee jebi kʼoa kʼoati kuenta sʼín tsanda je jme nganʼio xi machjénle xi kjaʼaí. Ijngo ti xi Benjamín ʼmi kʼoati kuenta sʼín josʼin tsjoánganʼio je Daniel kʼoa kui xi basenkao nga tsjoánganʼio ya Ndʼia jña chotʼayá.
