NICHXIN kjoatse, kʼianga ʼya xi tsakixan, je xi xʼin ma tjínnele tsakʼéchjíngi je chjoón xi tsakixankao. Nkjín koya josʼin koan tsakʼéchjíngi. Tobʼelañá, koan tsojmichjí kitsjoa, tsa cho̱ kʼoa tsa tao̱n. Kʼoati koan ninga tokisixángi, tojo kisʼin je Jacob kʼianga chixankao je Raquel. Kʼoasʼin tsakʼéndajin kao je nʼaichále nga ñato nó sixángi je Raquel (Gén. 29:17, 18, 20). Ánni nga kʼoakisʼinni je chjota.

Jngo chjoón xi kui kotʼayason jmeni xi tso je Biblia xi Carol Meyers ʼmi itso: “Kuinga koanchjíngini jngo chjoón nga̱ tsín tiya tsakasenkaoni je xijchále je xá xi kisʼin. Kʼoa nga kʼoakoan nʼio tsakinyakao je chjota xi tsojmi tsakántje”. Xi ijngosani, kʼoati tsakinyakao nga ngisa nda kikao xínkjín nga jngó jngó familia. Kʼoa tsa kjoalani jaʼatojin koan kitsjoanganʼiongañále xínkjín. Xi ijngosani, kʼoasʼin tsaʼyanile jngo chjoón nga tojeme kuixan, kʼoa nga tsín tije nʼaile kjinenile nga sikuinda.

Kʼianga koanchjíngi jngo chjoón alikui xi tsonile nga koan tsakinda kʼoa tsa kisatena tojo nikao jngo tsojmi. Je libro xi Instituciones del Antiguo Testamento ʼmi itso: “Nga koanchjíngi je chjoón kʼoa tsa jme xi tsakʼaile je xijchále, kʼoasʼin koantsen joni tsa tsakinda. Tonga [...] nga kʼoasʼin koanchjíngi, ali tsakuijin xi tsonile nga tsakinda jngo chjoón, tokui nga tjín xi tsakʼaingajaonile je xijchále”.

Nichxin xi tiyoaa ndʼaibi, tojo tjín ʼnde jñani kui costumbre fitjenngi je chjota. Tonga tsa tsín sikʼatone choa̱le je chjotale Cristo jokji tao̱n sijéngi je xtiyánchjínle kʼoasʼin skoe̱ni chjota nga nda síkjaʼaitsjen (Filip. 4:5; 1 Cor. 10:32, 33). Kʼoa kʼoasʼin koakoni nga tsín nʼio tao̱n símekon (2 Tim. 3:2). Tsa tsín nʼio tse jmeni xi ni̱jéle je xi xʼin ma alikuijinla tokui sixáni nga koa̱njndale jotjín tínijéle, kʼoa alikuijin nʼio tse sikʼachxin nga kuixan. Kʼoa tsa precursor sʼin tísíxá, alikuijin tokui koajñánile nga to tao̱nla koa̱njngí nga sixá kʼoajnda xomana.

Tjínkʼa naxinandá jñani kʼoatso je kjoatéxoma jotjín tjínnele koa̱nchjíngi jngo chjoón. Ya ʼnde jñani kʼoama, je chjotale Cristo xi xijchá ma sítjoson jotso je kjoatéxoma. Kui kʼoasʼínni nga̱ kui xi mele Niná nga “katasítjosonle chjota xi xá tjínle” kʼoa nga katasítjoson je kjoatéxoma xi tsín kontra file je kjoatéxomale Niná (Rom. 13:1; Hech. 5:29).