JE KJOATÉXOMA xi tsakʼaile chjota israelita kʼoatso nga koan tsakʼaitʼale Jeobá tójoo kʼoa tsa paloma. Bʼaxki nga jao nise jebi kʼianga tsoya je kjoatéxoma xi nchja̱ni josʼin tsakʼaitʼale cho̱ je Niná. Je chjota israelita, tojñanile nga jao nise jebi xi koan kitsjoatʼa (Lev. 1:14; 12:8; 14:30). Kui kʼoakitsoni kjoatéxoma nga̱ tsín tongantsjai nga kisʼe tójoo. Kataʼyala ánni.

Je tójoo tokʼiaa bichókatio ya naxinandá Israel kʼianga cha̱nndoá nga̱ xinxin ʼnde bʼema. Kʼianga sá octubre, je nise jebi yaa fi ya naxinandá jñani ngisa sjeya kʼoa kʼiaa bichó ijngokʼa ya naxinandá Israel kʼianga cha̱nndoá (Cant. 2:11, 12; Jer. 8:7). Kʼoa kʼianga cha̱nnyʼán, je chjota israelita alikui kisokole tójoo xi kitsjoatʼale Jeobá.

Tonga je paloma ali jña fi, to kisʼe ʼndeʼnde ya naxinandá Israel. Xi ijngosani, kʼoati cho̱ntje kisikao je chjota israelita (tingósonkoai Juan 2:14, 16). Jngo libro xi kʼoatso nga je chjota xi ya tsakatio “kisikatíontje paloma. Ngakjijnda ndʼia, ñaki xá kiskoxʼáni tʼaxjáo jñani koan tsakatio je paloma” (tingósonkoai Isaías 60:8).

Jebi kui bakóyaná nga nʼio nda kosonnile jmeni xi sʼín Jeobá, nga̱ kitsjoaʼnde nga kui kitsjoatʼale je chjota israelita je nise xi kisʼe tsʼajnda nó.