JE CHJOTA xi kiski Biblia sakʼoa tikui tikui én kisichjénni nga kiski. Janla koya kataʼyaa ánni nga kʼoakisʼinni.

Kʼiáni kichji. Me tongatsʼi chjota israelita nga tsín kisʼeyole jñani faʼaitʼa kjoatéxoma. Tokʼiaa kinrʼoé nga koanxkia Énle Niná kʼianga tsakatiojtín ya ndʼianajño kao ya yo̱ngo̱ (Deut. 31:​10-12). Sakʼoajin tsín nda tsakinyáño nga totsakinyando kʼoa nga nʼio nkjín koanni (Neh. 8:​2, 3, 7). Nga kʼoasʼin tsakatiojtín kʼoa nga nkjín kʼa kinrʼoé én xi tikui tikuini ngisaa nda kisʼejinkon, kisitjoson jmeni xi tsakʼinyale kʼoa tsínjin kichajinle kjoatéxomale Jeobá nga kʼoasʼin nkjín kʼa kinrʼoé (Lev. 18:​4-22; Deut. 5:1).

Jósʼin kichji. Je Biblia kʼoati faʼaitʼa canción. Tobʼelañá Salmos, El Cantar de los Cantares kao Lamentaciones. Tjínkʼa canción xi tikui tikui én síkʼaxki̱ni nga̱ kʼoasʼin ʼyanile jme xi nchja̱ni. Kʼoa nga kʼoasʼin faʼai je letra ngisaa sʼejinkoaan. Nga koa̱njinná jebi kataʼyala jotso Salmo 115:​9-11. Itso: “Ji Israel, tinʼiotʼai je Jeobá. (Jé koasenkaono kʼoa jé koase̱nchjoano). Ji ndʼiale Aarón, tinʼiotʼao je Jeobá. (Jé koasenkaono kʼoa jé koase̱nchjoano). Jon xi nokjonchao Jeobá, tinʼiotʼao je Jeobá. (Jé koasenkaono kʼoa jé koase̱nchjoano)”. Kʼianga nkjín kʼa kise chjota israelita canción jebi ngisajin nda kisʼejinkon.

Ánni nga kui kichjini. Tjínkʼa chjota xi kiski Biblia xi nkjín kʼa kisikʼaxki̱ xi nʼio tjínle kjoandosin. Tobʼelañá, kʼianga kʼoakitsole Jeobá chjota israelita nga tsín koa̱n njín ski̱ne. Jé Moisés kisichjén nga nkjín kʼa kʼoakitsole naxinandá nga tsín koa̱n njín ski̱ne. Kui xi koanmele Jeobá nga katasʼejinle chjota israelita nga ya njín tíjnajin kjoabijnachon (Lev. 17:​11, 14). Nga koanskanni, nga kui tsakjáoyani je pastro kao xi chjotajchínga sʼin tsakatio ya Jerusalén jmeni xi sʼiaan nga ndasʼin kuiyoaa ngixko̱n Niná kʼoati kitsongáni nga tsín koa̱n njín si̱chjén (Hech. 15:​20, 29).

Ningalani tjín én xi nkjín kʼa síkʼaxki̱ Biblia, alikui xi tsonile nga tokui kʼoakuixón ʼndeʼndee. Je Jesús i kitso: “Kʼia nga bʼetsʼoai, ali tikuijinni én nichjain” (Mat. 6:7). Je Jesús kʼoati kitso jmesani xi koa̱n kuixoán nga kʼoétsʼoalee Niná kʼoa nga kui si̱kʼaxkiaa jmeni xi mele (Mat. 6:​9-13). Ningalani tsín tikui tima én kʼoakuixónñá nga kʼoétsʼoalee, koaan nkjín kʼa si̱kʼaxkiaa jmeni xi mená kʼuínlee (Mat. 7:​7-11).

Binyakaoná nga nkjín kʼa síkʼaxki̱ ya Biblia xi tikui tikuini én. Kui kʼoasʼínni Jeobá nga̱ jé xi ngisa nda male bakóyaná (Is. 48:​17, 18).