KʼIANGA mixkue 18 sá enero nó 2023, kʼiaa kisʼejna ya jw.org én xi kʼoatso nga jeya tjíojinle Cuerpo Gobernante xi tsʼe testigole Jeobá je ndsʼee Gage Fleegle kao Jeffrey Winder. Ndsʼee jebi jenkjín nó nga tjíosíxále Jeobá.

Je ndsʼee Fleegle yaa koanjchínga ya Pensilvania (Estados Unidos). Jé xijchále kitsoyale Énle Niná. Nga sʼa xti yaa kikatio kao xijchále jñani ngisa machjén xi tsoyason. Kʼiaa nga 20 sá noviembre nó 1988 kisʼenngindá ndsʼee jebi.

Je xijchále kʼoakitsole nga to xále Niná katasʼín. Kinchjale ya ndʼiale je superintendente xi tsʼe circuito kao ndsʼee xi ya Betel tjío, kʼoa kʼoasʼin tsabeni nga nʼio tsjoa tjíole je ndsʼee nga ñaki to xále Niná tjíosʼín. Totjíchoa̱ tsee jaʼato nga jekisʼenngindá, precursor regular sʼin kisixá nga 1 sá septiembre nó 1989. Kʼoa nga koanskanni yaa Betel kisixá, kui xi koanmele saʼnda nga sʼa 12 nóle. Kʼiaa jaʼasʼen Betel xi tíjna Brooklyn kʼianga sá octubre nó 1991.

Jin nó nga ya kisixá jñani manda xo̱n. Nga koanskanni, yaa Departamento de Servicio kisixá. Nkjín nó nga ya kitsjoanganʼio ya jtín jñani én ruso nokjoa. Nga nó 2006 jé tichjaa xi Nadia ʼmi chixankao, kʼoa tosi tonda yaa Betel kisixá nga jao. Xijekoan, yaa kitsjoanganʼio jñani én portugués nokjoa, kʼoa tsʼato 10 nó nga ya kitsjoanganʼio ya jtín jñani kastía nokjoa. Nkjín nó nga ya Departamento de Servicio kisixá ndsʼee jebi, xijekoan, yaa tsakʼejnajinle Comité de Enseñanza, kʼoa nga koanskanni, yaa Comité de Servicio tsakʼejnajinle. Kʼianga sá marzo nó 2022 yaa tsakasenkao je Comité de Servicio xi tsʼe Cuerpo Gobernante.

Je ndsʼee Winder yaa koanjchínga ya Murrieta (California). Je xijchále tokʼoa jetestigole  Jeobá nga kitsin kʼoa jé kitsoyale Énle Niná. Kʼiaa kisʼenngindá nga 29 sá marzo nó 1986. Jngo sá koanskanni precursor auxiliar sʼin kisixá, tsjoa kisʼe kon nga kʼoasʼin kisixále Jeobá kʼoa tosi tonda kʼoasʼin kisixá. Kʼianga 1 sá octubre nó 1986 precursor regular koan.

Kʼianga sʼa xti, je ndsʼee jebi yaa Betel ki nga kisíxatʼaa nga jao ndsʼe̱ xi ya tjíosíxá. Kʼoati koanmele nga ya Betel sixá kʼoa kʼiaa kisikʼasʼen solicitud nga jekiskason nóle. Kʼiaa nga sá mayo nó 1990 jaʼasʼen ya Betel xi tíjna Wallkill.

Kjaʼaí kjaʼaí xá kisʼin. Kisixá ya Departamento de Limpieza, Departamento de la Hacienda kao Oficina de Betel. Kʼianga nó 1997 jé tichjaa xi Angela ʼmi chixankao, kʼoa tosi tonda yaa Betel kisixá nga jao. Kʼianga nó 2014 yaa Warwick kinikasén. Je ndsʼee Winder yaa kitsjoanganʼio nga kisʼenda jña tjen sʼendiaanile xále Niná. Kʼianga nó 2016 yaa Patterson kinikasén, jñani tíjna Centro Educativo de la Watchtower. Je ndsʼee Winder yaa kisixá ya Servicios de Audio y Video. Kʼianga jeño nó jaʼato, yaa Warwick kinikasén ijngokʼa, je ndsʼee Winder yaa Oficina del Comité de Personal kisixá. Nga sá marzo nó 2022 yaa tsakasenkao je Comité de Personal xi tsʼe Cuerpo Gobernante.

Je ndsʼee jebi jngoo kjoatjao xi tʼatsʼe Jeobá tínroani (Efes. 4:8). Kʼoétsʼoantjé nga tosi tonda katasíchikontʼain Jeobá nga nʼio nda tjíosíxále.