XI NGISA TÍNCHJA̱NI REBISTA JEBI | JE BIBLIA: LIKUI TÍCHANGI NINGA TSE KJOA TÍFAʼATOJIN
Ánni nga tsín tíchangini Biblia
Ninga tse kjoa jaʼatojin, je Biblia alikui tíchangi kʼoa kuinga koa̱n so̱koniná kʼoa koa̱n kʼoéxkiasíñá. Kʼianga jngo Biblia xi nda jaʼatoya chjoejiaan koaan kʼoakʼoé tokoán nga ñaki kʼoatjín je én xi tibʼexkiaa jokisʼe je xi títjon kichji. * Tonga ánni nga tojo kijnani Biblia saʼnda ndʼaibi ninga bitson xo̱n xi kichjitʼa, ninga chjota tsakatiochjoale kʼoa ninga tjío xi mele kisikʼantjaiyajin én xi nroatʼa. Ánni nga tsín mangósonsíni Biblia kao libro xi kjaʼaí.
“Ndʼaibi ʼbeña nga je Biblia xi kijnana jngo kjoatjao xi tʼatsʼe Niná tínroani”
Nʼio nkjín chjota xi kotʼaya Biblia xi kʼoati tso jokitso je pastro Pablo: “Ngayije xo̱n Escritura Niná jinroani” (2 Timoteo 3:16). Kʼoasʼin makjainle nga kuinga Énle Niná nga tsín tíchangini kʼoa nga je Niná xi tsín títsjoáʼnde nga jchangi. Je Faizal, xi jesa kanikʼaxkiaa, jesoaa kiskotʼaya Biblia. Tokʼoakoanle jme xi koanjinle. Tsabee nga nkjín koya xi tsínni ya Biblia faʼaitʼa jmeni xi tsoya je xi chjotale Cristo tsole yaole. Kʼoa ñaki kiskajin ni̱ma̱le nga tsabe jme xi tjínndajinle Niná tʼatsʼe Sonʼnde, tojosʼin tsoya je Énle.
Je Faizal itso: “Ndʼaibi ʼbeña nga je Biblia xi kijnana jngo kjoatjao xi tʼatsʼe Niná tínroani. Tsa koanle Niná kisinda ngʼajmi kao Sonʼnde, tsí kʼoati koa̱nle sikuinda je Énle ánni nga kataʼyasíñá. Tsa kjaʼaí kuixoán kʼoajinni tibixoán nga tsínle nganʼio je Niná xi nʼio ngʼa tíjna. ʼYáni an nga kʼoaxínña nga tsínle nganʼio je Niná” (Isaías 40:8).
^ párr. 3 Chótʼajin rebista La Atalaya xi tsʼe 1 de mayo de 2008 ya jñani “Cómo escoger una buena traducción de la Biblia” tso.
Tsa kʼoati meli jchai xi tʼatsʼe jebi
XO̱N XI BÁJINKONNÁ
Jósʼin koasenkaoli tsa kʼoéxkiai je Biblia
Nkjín chjota xi bexkón je Biblia tonga likui be josʼin koasenkao
XI MACHJÉN NGA JCHAA
Ánni nga koa̱n koa̱nkjainsíniná nga ñaki kʼoatjín jotso je Biblia
Kʼiatsa Énle Niná je Biblia, likuijin koa̱nngóson xi kjaʼaí libro.
