1, 2. Jókisʼin je Pablo nga tsabechjí je kjoanda xi tsakakóle Niná.

NGA títjon, je pastro Pablo kitjenngike je chjotale Cristo. Kuinga kʼoakitsoni nga tsín bakinle nga koakole kjoamatokon je Niná. Kʼoa i kitso: “Je kjoandale li tokjoatjaojin kitsjoana” (tʼexkiai 1 Corintios 15:9, 10). *

² Kʼianga tojeme kuiyá, je pastro Pablo i kitsole Timoteo: “Tsjoale kjoanda je xi kitsjoana nganʼio, Cristo Jesús Nainá, nga̱ kʼoasʼin nʼiotʼakonna nga tsakaséjnana je xábi” (1 Timoteo 1:12-14). Jméni xá xi tsakʼaile je Pablo. I kitso kʼianga kiskile je chjotajchínga xi tsakatio ya Éfeso: “Alikui ni̱ma̱na skonle xi totʼatsʼan. Tokui xi mena nga nda sikjetʼa ndiaana kao kjoatsjoa, kʼoa nga nda sikjetʼa je xá xi kitsjoana je Nainá Jesús, nga tsjoa je énnda xi tʼatsʼe kjoandale Niná” (Hechos 20:24).

3. Jmé xá xi tsakʼaile je Pablo (chótsenlai sén xi fitsʼiani kjoaʼmiya jebi).

 ³ Jmé “énnda” xi kitsoyason je Pablo. Kʼoa ánni nga kui bakósíni je kjoandale Niná. Je Pablo i kitsole je chjotale Cristo xi ya Éfeso tsʼe: “Kʼoasʼin kinoʼyao nga xá kisʼenena nga an xi tʼatsʼe je kjoandale Niná xi kitsʼaina xi tʼatsaon” (Efesios 3:1, 2). Je Jesús kui xá kitsjoale je Pablo nga jngo én katafikaole je chjota xi tsín chjota judío kitjenni. Én jebi kuiní nga je chjota jebi koaan ya koatexomakao Jesús (tʼexkiai Efesios 3:6, 8). * Je Pablo kao kjoatsjoa kitsoyason kʼoa jngo choa̱ tsakʼéjnaná xi chjotale Cristo maa ndʼaibi. Nga kʼoakisʼin tsakakóní nga tsín tokjoatjao nga tsakakóle kjoanda je Niná.

4, 5. Ánni kʼoabixónsíñá nga je “énnda xi tʼatsʼe je kjoatéxomale ngʼajmi” tikuini “je énnda xi tʼatsʼe kjoandale Niná”.

⁴ Nichxin fetʼa xi tiyoaa ndʼaibi, je Jeobá kui xá títsjoáná nga kʼuínyasoán “je énnda xi tʼatsʼe je kjoatéxomale ngʼajmi”. Kʼoa tjínnele kʼuínyasoán “ngakijnda sonʼnde, nga si̱kixiyandale ngatsʼi naxinandá” (Mateo 24:14). Je “énnda xi tʼatsʼe je kjoatéxomale ngʼajmi” tikuini “je énnda xi tʼatsʼe kjoandale Niná”. Ánni kʼoabixónñá. Kuinga tjínle kjoanda je Jeobá nga tsjoániná kjoanichikontʼain je Chjotaxále (Efesios 1:3). Je Pablo kao kjoatsjoa kitsoyason nga̱ tsabechjí je kjoanda xi tsakakóle Niná. A kʼoati tinʼia tsanda ñá (tʼexkiai Romanos 1:14-16). *

⁵ Ya kjoaʼmiya xi jaʼato tsaʼyañá je kjoanichikontʼain xi tjínná nga bakóná kjoanda je Niná ninga chjotajée maa. Kuinga tjínnesíniná nga chja̱kaoñá chjota xi tʼatsʼe kjoatsjoacha xi tjínle Jeobá kʼoa kʼoakʼuínlee jme xi tjínnele sʼin. Jósʼin kuinyakoaa xi kjaʼaí nga skoe̱chjí je kjoanda xi bakóná Niná.

6, 7. Ánni kʼoabixónsíñá nga kui kjoandale Niná tiʼmiyasoán kʼianga ʼmiyalee chjota tʼatsʼe kjoabʼechjíntjai.

⁶ Nichxin xi tiyoaa ndʼaibi, nʼio nkjín chjota xi tsín chʼao satío kon kʼianga bajngijée. Kuinga tsín majinnile nga machjénle je kjoabʼechjíntjai xi kitsjoa je Jesús. Xi ijngosani, tjín chjota xi tsín tsjoa tjío kon josʼin tjíofikao yaole. Tonga nga fákaonajmí je testigole Jeobá tjínkʼa xi majinle jmeni xi jée ʼmi, josʼin bʼetʼale kʼoa jme xi tjínnele sʼin nga tsín tichoʼndale jée koa̱nni. Tsa nda tjío ni̱ma̱le, tsjoá kjoanda nga kisikasén Niná je ʼNdíle i̱ Sonʼnde nga tsakʼasjentjainá xi tʼatsʼe jée kao kjoabiya. Kʼoati majinle nga kui kʼoakisʼinni Jeobá nga nʼio tsjoakená kʼoa nga nʼio tjínle kjoanda (1 Juan 4:9, 10).

⁷ Je Pablo i kitso tʼatsʼe je ʼNdíle Niná: “Je Cristo tsakʼéchjíntjainá kao njínle. Kisichatʼa jéená”. Je Pablo kʼoakitso nga totʼatsʼe kjoandale Niná nga kʼoakoanni (Efesios 1:7). Je kjoabʼechjíntjaile Jesús kui xi ngisa bakó jokji tsjoakená Niná kʼoa jokji  kjoanda tjínle. Nda sʼe tokoán nga ʼyaa nga jchatʼa jéená kʼoa nga tsje sʼe̱ tokoán tsa sʼe̱ná kjoamakjain tʼatsʼe kjoabʼechjíntjai xi kitsjoa Jesús (Hebreos 9:14). Nʼio nda tso én jebi kʼoa mená nga katasʼejinle ngatsʼi chjota.

8. Ánni nga machjénsíni nga nda katabatio ijngokʼani je chjota kao Niná.

⁸ Je Niná kontra sʼin bekon je chjota xi tsín tjínle kjoamakjain tʼatsʼe kjoabʼechjíntjaile Jesús. Kuinga tjínnenile kʼoakʼuínlee nga koa̱n miyole Niná koa̱n. Je pastro Juan i kitso: “Je xi makjainle tʼatsʼe ʼndíle Niná, tjínle kjoabijnachon ngantsjai. Je xi tsín makjainle tʼatsʼe ʼndíle Niná, likui skoe̱ kjoabijnachon, tonga je kjoañʼai xi Niná tsjoále tíjnanele” (Juan 3:36). Tsjoa maná nga ʼyaa nga je kjoabʼechjíntjaile Cristo xi nda síkatío ijngokʼaniná kao Niná (chótsenlai je rekuadro “Jósʼin tsoyanile”). Je Pablo i kitso: “Jon ngasʼa kjaínga nda jitjoxinlao, kʼoa kontra koanlao kao kjoafaʼaitsjenno, nga kjoatsʼen kinʼiao, tonga ndʼaibindai jekʼoasʼin kisikjáondano. Kisikjáondano xi totʼatsʼe je yaole xi jo chjota, xi kitsjoa nga kʼen, jméni nga kʼoasʼin tsje koa̱kosínino, nga tsín jndí kjoaon nga tsín jée tjínno ngixko̱n nga je” (Colosenses 1:21, 22).

9, 10. 1) Jmé xá tsakánele Jesús je chjotale xi ya koai ngʼajmi. 2) Jósʼin binyakao je xi “kjaʼaí barré” je chjotale Cristo xi ya koai ngʼajmi.

⁹ Je Cristo kui xá kitsjoale je chjotale xi ya koai ngʼajmi nga katasíkjáondani chjota kao Niná (chótsenlai je rekuadro “Jósʼin tsoyanile”). Je Pablo i kitso: “Ngayije jebi Niná nroani. Xi totʼatsʼe Cristo kisikjáondaná Niná xi titʼatsʼeni, kʼoa kitsjoanajin je xá nga si̱kjáondanijin. Kui jebi nga Niná tsakʼejnakao Cristo, nga kisikjáondani sonʼnde xi titʼatsʼeni. Likui ya kisikʼa jéele, kʼoa tsakʼéjnatʼainnajin je én xi nikjáondanijin. Kʼoasʼin nga jinjin tiyongajaolaijin Cristo, joni tsa Niná xi bʼétsʼoano xi totʼatsainjin. Bʼetsʼoalaijin xi totʼatsʼe Cristo, cho̱bandanio kao Niná” (2 Corintios 5:18-20).

¹⁰ Nʼio tse kjoanda tjínle xi “kjaʼaí barré” ʼmile nga tjíobinyakao je chjotale Cristo xi ya koai ngʼajmi nga tjíotsoyason én jebi (Juan 10:16). Je xi “kjaʼaí barré” jé xi ngisa kʼoatjíosʼín xá jebi nga tjíobakóyale chjota jme xi tso je Biblia. Kʼoa binyakao chjota nga miyole Niná katama. Nga tíʼmiyason kʼoasʼin tínokjoani “je énnda xi tʼatsʼe kjoandale Niná”.

11, 12. Ánni nga tsjoa sa̱tíosíni kon je chjota kʼianga skoe̱ nga koa̱n kʼoetsʼoale je Jeobá.

¹¹ Nkjín chjota xi tokui nga bʼétsʼoani nga nda satío kon. Tonga tsín makjainle nga nrʼoéle Niná. Tjínnele skoe̱ nga nrʼoéná Niná kʼianga bʼetsʼoalee. Kʼianga kisele Jeobá je David i kitso: “Ji xi Noʼyai kjoabʼetsʼoa, kjoaʼaínrʼoeli tojokji chjotani. Nʼio tse jée tsakajngia xi tsín tikanina, tonga ji nichatʼaní je jéenajin” (Salmo 65:2, 3).

¹² Je Jesús i kitsole chjotale: “Tojmeni xi si̱jélao Nʼainá kao jaʼaínna, jé tsjoáno” (Juan 16:23). Kui xi kitsonile nga koa̱n si̱jélee je Jeobá tojmeni, nga tonga kuikjoanni xi sasénle. Je Juan i kitso xi tʼatsʼe Jeobá: “Kʼoasʼin nʼiotʼatakoán ndʼai ngixko̱n nga je. Tsa nijé tojmeni kjoa josʼin mele nga je, je nrʼoéná” (1 Juan 5:14). Tsjoa sʼená nga binyakoaa je chjota nga katamajinle nga tsín tsa tokuijin nga kʼoétsʼoañá nga nda sʼe̱ tokoán. Nga bʼetsʼoaa machriantʼalee je Jeobá “je xi tíjnason yáxilele, xi tjínle kjoanda” (Hebreos 4:16).  Tjínnele kuisenkoaa je chjota nga koa̱nle kʼoetsʼoa, nga skoe̱ ʼya xi kʼoetsʼoale kʼoa jmeni xi sijé kʼianga kʼoetsʼoa. Tsa kʼoasʼiaan, kuinyakaoñá nga miyole Niná koa̱n kʼoa nga so̱kole kjoanʼiojin nga kjoa kjoaʼatojin (Salmo 4:1; 145:18).

13, 14. 1) Jmé kjoanda xi sʼe̱le je chjotale Cristo xi ya koai ngʼajmi. 2) Jmé xi sʼin je chjotale Cristo xi ya koai ngʼajmi nga kuinyakao je chjota.

¹³ Je Jeobá ngisasa tse josʼin koako je kjoandale nichxin xi nroaján. Jósʼin. Nʼio tse kjoanda tsjoále je xi 144,000 mani xi koatexomakao Cristo ya ngʼajmi. Jmé kjoanda xi kʼoaile. Je pastro Pablo i kitso: “Niná, nga̱ kʼoasʼin totse kjoamatakon tjínle, kjaínga nʼio koantsjoakená. Nda tsa ñá xi joni tsa xi tiyokʼen xi totʼatsʼe kjoatsʼenná, tojngo kao Cristo kisikʼéyokonná. Totʼatsʼe kjoandale jitjontjainio. Tojngo kisikjaʼáyaná, kʼoatisʼin kisikatíotʼaná ya ngʼajmi kao Cristo Jesús, jméni nga je nichxin xi nroasa koakosíni je kjoandale xi li tojo xi kjitse, nga kʼoasʼin kisʼele kjoamatakon tʼatsaan nga tiyokoaa Cristo Jesús” (Efesios 2:4-7).

¹⁴ Nʼiojin tse kjoanda tsjoále Jeobá je chjotale Cristo xi ya koai ngʼajmi kʼianga jekoatexomakao Cristo (Lucas 22:28-30; Filipenses 3:20, 21; 1 Juan 3:2). Je Jeobá kui kjoanda tsjoále nga “Jerusalén chjotse” koa̱n kʼoa nga “chjoónle” Cristo koa̱n (Apocalipsis 3:12; 17:14; 21:2, 9, 10). Kʼoa yaa sixákao je Cristo nga sixkile “ngatsʼi naxinandá”. Kui xi tsonile nga kuinyakao je chjota nga ndaí koatiole je jée kao kjoabiya kʼoa nga chjotatsje koa̱n (tʼexkiai Apocalipsis 22:1, 2, 17). *

15, 16. Jósʼin koakole Jeobá kjoanda ngatsʼi xi koatio ya sonʼnde chjotse.

 ¹⁵ Ya Efesios 2:7 kʼoatso nga koako Niná kjoandale nichxin xi nroaján. Nga kʼia, ngatsʼi xi koatio i̱ Sonʼnde nʼio tse kjoanda sʼe̱le (Lucas 18:29, 30). Jngo koya josʼin koako Niná kjoandale i̱ Sonʼnde kʼiaa nga sikjaʼáyale xi jekʼien (Job 14:13-15; Juan 5:28, 29). ʼYáni xi kjoaʼáyanile. Kjoaʼáyanile je choʼndale Niná xi kʼia kʼien nga kjesa faʼaijin Cristo. Kʼoati kjoaʼáyanile je xi “kjaʼaí barré” ʼmile xi tjíobiya nichxin fetʼa xi tiyoaa ndʼaibi. Koatiokon ijngokʼani kʼoa tosi tonda sixále je Jeobá.

¹⁶ Tonga je Niná kʼoati sikjaʼáyale je chjota xi miyón mani xi tsín kisʼejinle xi tʼatsʼe Jeobá. Je Juan i kitso: “Kʼoa tsaʼbeña je xi jekʼien, xi jchínga kao xi ʼndí, yaa nya ngixko̱n je yáxile, kʼoa kitjoʼai je xo̱n xi kjioxkóya. Tonga ijngo xo̱n xi kjixkóya kitjoʼai; kuiní xi tsʼe kjoabijnachon. Kʼoa nga kisʼendajinle xi jekʼien kui kuenta koan xi tjíotʼa je xo̱n xi kjioxkóya tojo nga kisʼin. Kʼoa je ndáchikon kitsjoa je kʼien xi ya tjío, kʼoa je kjoabiya kao Tsjó kitsjoa je kʼien xi ya tjío, kʼoa nga kisʼendajinle nga jngó jngó kui kuenta koan tojo nga kisʼin” (Revelación 20:12, 13, TNM). Je xi kjoaʼáyanile koaan skoe̱ xi tʼatsʼe Jeobá kʼoa koaan tsjoáʼnde nga je koatexomale. Tjínnele kʼoasʼin koaikao yaole jotso je Biblia kao jmeni xi tso je “xo̱n xi kjioxkóya” xi sʼe̱ nga kʼia. Jmeni xi kjoaʼaítʼa je “xo̱n xi kjioxkóya” kui koako kjoandale Jeobá.

17. Jméni xi si̱kjaʼaitsjeen kʼianga ʼmiyasoán.

¹⁷ Jenʼio chrian tíjna je kjoafetʼa. Kuinga nʼio machjénsíni ndʼaibi nga kʼuínyasoán “je énnda” xi tʼatsʼe Chjotaxále Niná (Marcos 13:10). Si̱kjaʼaitsjeen ngantsjai nga kuinga ʼmiyasonñá nga je Jeobá chʼasjengʼaa. Jósʼin chʼasjengʼaa. Kʼiaa nga kʼoaʼmilee je chjota nga ngayeje jmeni xi sʼe̱ná ya ʼndenaxó totʼatsʼee kjoandale Jeobá.

18, 19. Jósʼin chʼa̱sjengʼaa je Jeobá nga bakóná kjoanda.

¹⁸ Kʼianga kʼuínyasoán, kʼuínyalee je chjota jmeni xi koa̱n kʼianga jekoatexoma Cristo i̱ Sonʼnde. Nga kʼia, nʼio tse kjoanda sʼe̱ná xi totʼatsʼe nga kʼienntjainá je Jesús kʼoa tobijbi nga chjotatsje koaan. Je Biblia itso: “Ngayije xi kisʼenda sonʼndebi, kuitjondaíle je kjoa xi kʼoasʼin bʼénʼiole xi tofitson. Kʼoaile nga kʼoéyondaí kao kjoajeya xi tsʼe ʼndíle Niná” (Romanos 8:21). Kʼoakoa̱n ngayeje jebi xi totʼatsʼe kjoandale Jeobá.

¹⁹ Tse kjoanda tjínná nga kui chjakaonajmíñá je chjota tʼatsʼe jmeni xi tso Apocalipsis 21:4, 5. Ya testo jebi kʼoatso jmeni xi jeme sʼin Niná tʼatsʼe chjota. Itso: “Niná kʼoejon ngayije ndáxko̱n xi tsʼe xko̱n. Likui tisʼe̱ni kjoabiya. Likui tisʼe̱ni kjoaba, nijejin xi kjiʼndía, nijejin xi aon male, nga je kjoa xi títjon jejaʼato”. Je Jeobá itso: “Koeni an sichjotse ngayije”. Kʼoa itsosa: “Chjí, nga je énbi ndaní, kʼoa kjoakixiní”. Kao kjoatsjoa kʼuínyasoán je én jebi kʼoa kʼoasʼin chʼa̱sjengʼañá je Jeobá nga bakóná kjoanda.