1, 2. 1) Tʼeyanajmí je choa̱ xi tʼatsʼe je chjota xi xka̱totsee kjintjele. 2) Jósʼin bakóná choa̱ jebi nga nda chjota je Jeobá kʼoa nga bakóná kjoanda.

JNGO chjota xi xka̱totsee kjintjele, tanjioya kikásjai je choʼnda xi sixále. Kʼoakitsole jotjín kʼoechjíle kʼoa je choʼnda koanjyole. Xijekoan, je chjota xi tsʼe xka̱totsee tsabee nga machjénsale choʼnda. Tsʼajnda nichxin nkjín kʼa kikásjai je choʼnda nga kitsjoaxále. Kʼoa kʼoakitsole ngatsʼi nga ndatjín kʼoechjíle. Nga jekoanxon, kinchjale ngatsʼi nga tsakʼéchjíle. Tjínkʼa xi tsʼajnda nichxin kisixá kʼoa tjínkʼa xi tojngo ora kisixá. Tonga je naile xka̱totsee tongóson kji tsakʼéchjíle ngatsʼi. Tonga je chjota xi tsʼajnda nichxin kisixá tsín kisasenle nga tongóson kji koanchjíle. Kʼoa je chjota xi tsʼe xka̱totsee kʼoakitsole nga koanjyole jotjín kitsole nga kʼoechjíle. Kʼoati kitsole nga tjínle ʼnde kʼoakji kʼoechjíle je choʼndale jotjín mele. Xijekoan, kui kiskonangile tsa chʼaondai koan kʼianga nda chjota koan kao choʼndale (Mateo 20:1-15).

² Kui jebi tsakʼéyanajmí je Jesús kʼianga kitsoya tʼatsʼe “kjoandale Niná” (tʼexkiai 2 Corintios 6:1). * Tsakui nichxin tjín xi kʼoasʼin sikjaʼaitsjen nga tjínnele ngisa tse koanchjíle je choʼnda xi tsʼajnda nichxin kisixá. Tonga je chjota xi tsʼe xka̱totsee tsakakóle  kjoanda je chjota xi tojngo jao ora kisixá. Jngo chjota xi tʼatsʼe Biblia kotʼayason kʼoatso nga je én xi “kjoandale Niná” sʼin jaʼatoya ya Biblia, kui tínchja̱ni “tsa jmeni xi tokjoatjao bʼainá kʼoa xi tsín bakinná” kʼoa “jmeni xi bʼaile jngo chjota, ninga tsín bakinle nga kui kʼoaile nga̱ tsín jme xi kasʼín”.

3, 4. 1) Ánni nga bakónile kjoanda Jeobá ngatsʼi chjota. 2) Jósʼin tsakakóná kjoanda Niná.

³ Je Biblia kʼoatso nga kitsjoakjoatjaoná Niná je kjoandale (Efesios 3:7). Nga tsín bitjosonná ngayeje jmeni xi tsoná je Jeobá, tsín bakinná nga koakoná kjoanda. To kjoabiya bakinná. Je rey Salomón i kitso: “I̱ sonʼnde tsín jngo chjota xi kixi xi kui kʼoasʼínntsjai xi ndatjín xi tsín bajngijée” (Eclesiastés 7:20). Nga jekoanskanni, je pastro Pablo i kitso: “Ngatsʼi tsajngi jée, likui nda bitjo ngixko̱n Niná”. Kʼoa i kitsosa: “Je chjíle jée kjoabiya ní” (Romanos 3:23; 6:23a).

⁴ Je Jeobá nʼio tsjoake ngatsʼi chjota. Kuinga kisikasénni je ʼNdíle xi tojngo mani nga kʼienntjainá. Nga kʼoakisʼin kʼiaa nga ngisasa tsakakóná kjoanda je Niná (Juan 3:16). Je Pablo kʼoakitso nga je Jesús “kitsʼaile kjoajeya kao kjoangʼa joni tsa koronale, nga̱ tsakjaʼá kjoañʼai nga kʼen [...], jméni nga tokjoandale Niná kiskotʼasíni kjoabiya xi tʼatsʼe ngatsʼi” (Hebreos 2:9). Kʼoa “je kjoatjaole Niná kjoabijnachon ngantsjai ní, xi totʼatsʼe Cristo Jesús Nainá” (Romanos 6:23b).

5, 6. 1) Jmé xi koa̱nná kʼiatsa kʼoaiʼndee nga kui jée koatexomaná. 2) Jmé xi kʼoainá kʼiatsa kʼoaiʼndee nga kjoandale Niná koatexomaná.

⁵ Ánni nga bijnyijéeñá kʼoa biyañá. Je Biblia kʼoatso nga je “kjoabiya tsakatéxoma” nga tsakajngijée Adán. Nga ntje̱le maa, kui jée batéxomaná ngatsʼiaa kʼoa kuinga biyañá (Romanos 5:12, 14, 17). Ninga kʼoalani, koaan nga tsín kʼoaiʼndee nga kui jée koatexomaná. Jósʼiaan. Kʼiaa nga sʼe̱ná kjoamakjain nga kʼienntjainá je Cristo. Kʼoasʼin kʼoaiʼndee nga kjoandale Niná koandiaaná. Je Biblia itso: “Jña nga je jéebe koantse, kʼoati ngisa tse koansa kjoanda. Josʼin nga je jéebe tsakatéxoma xi tʼatsʼe kjoabiya, kʼoatisʼinni je kjoandabe koatexoma xi totʼatsʼe kjoakixi nga sʼe̱ kjoabijnachon ngantsjai xi totʼatsʼe Jesucristo Nainá” (Romanos 5:20, 21).

⁶ Ninga chjotajée maa, alikui tjínnele nga kui jée koatexomaná. Kuinga nijénilee kjoanichatʼa je Jeobá kʼianga kui kʼoanʼia xi chʼaotjín. Je Pablo i kitso: “Je jéebe likui koatexomano, nga̱ tsín tsa nangi tiyolao kjoatéxoma, tonga nangi tiyolao kjoandale Niná” (Romanos 6:14). Jmé kjoanda xi sʼe̱ná tsa kʼoaiʼndee nga kjoandale Niná koatexomaná. Je Pablo kʼoakitso nga chja̱ʼaxinlee “yaoná ngayije kjoa xi tsín bexkón Niná, kʼoa jméni nga chjaʼaxinsínilee yaoná ngayije kjoachi̱nga̱le sonʼnde, kʼoa jméni nga nda kuiyosínía sonʼndebi ndʼaibi. Tíbakóyaná jméni nga nda kjuinkaosínía yaoná, jméni nga chjotakjoakixi koa̱nsínía” (Tito 2:11, 12).

7, 8. Jmé xi tsonile nga “kjaʼaíngá” sʼin bakóná kjoandale je Niná (chótsenlai sén xi fitsʼiani kjoaʼmiya jebi).

⁷ Je pastro Pedro kʼoakitso nga nkjín koya josʼin bakóná kjoandale Niná. Kʼoa i kitso: “Josʼin kjoanda tsakʼaile, nga jngójngó katasíchjén tʼatsʼe xi kjaʼaí. Katasíchjén josʼin xi nda síchjén xi kjaʼaíngá kjoandale Niná” (1 Pedro 4:10). Jmé xi tsonile nga “kjaʼaíngá” sʼin bakóná kjoandale je Niná. Kui xi tsonile nga je Niná basenkaoná nga kaná tojme kjoa xi bitjatojiaan (1 Pedro 1:6). Tsa jme kjoa tjínná kuikjoán tsjoáná jmeni xi koasenkaoná.

 ⁸ Je Jeobá “kjaʼaíngá” sʼin bakóná kjoandale. Xi tsonile, nkjín koya josʼin bakóná kjoanda. Je pastro Juan i kitso: “Kitjoéná ngatsʼiaa xi tsʼe kjoandale xi kjaínga nʼio tse tjínle” (Juan 1:16). Nga nkjín koya josʼin bakóná kjoandale Niná, nʼio tse kjoanichikontʼain tjínná. Kataʼyala kʼaa.

9. 1) Jósʼin basenkaoná nga tjínle kjoanda je Niná. 2) Jósʼin koakoá nga bʼailee kjoanda je Niná.

⁹ Je Jeobá síchatʼaná je jéená. Nga tjínle kjoanda je Jeobá síchatʼaná je jéená. Tonga tokʼiaa síchatʼaná kʼiatsa kʼoamaniná kʼoa tsa bʼenelee yaoná nga tsín tikui kʼoanʼiañá je xi chʼaotjín (tʼexkiai 1 Juan 1:8, 9). * Je Pablo kʼoakitsole je chjotale Cristo xi ya koai ngʼajmi josʼin síchatʼaná je Jeobá. I kitso: “Kʼoasʼin tsakʼasjentjaininá je nganʼiole kjoanjio. Kisikjaʼaná ya jña nga batéxoma je ʼndíle, xi kjaínga tsjoake, je Jesucristo. Je tsakʼéchjíntjainá kao njínle. Kisichatʼa jéená” (Colosenses 1:13, 14). Kʼiatsa bʼailee kjoanda je Niná jmeni xi kisʼin xi tʼatsaan, chʼa̱sjengʼajián. Kʼoa nga síchatʼaná je jéená, nʼio tse kjoanichikontʼain tjínná.

10. Jmé kjoanda xi tjínná xi totʼatsʼe kjoandale Niná.

¹⁰ Koaan nyʼán sʼin kuiyoaa kao Niná kʼoa miyole koaan. Nga chjotajée maa saʼnda nga sʼa tsiaan, joxi kontra sʼin tiyolee Niná. Je pastro Pablo i kitso: “Kʼia nga kontraná koan Niná, tijeni kisikjáondaná titʼatsʼeni xi totʼatsʼe kjoabiyale ʼndíle” (Romanos 5:10). Xi totʼatsʼe nga tsakʼéchjíntjainá je Jesús, koaan ndasʼin kuiyo ijngokʼañá kao Niná. Kui xi tsonile nga koa̱n nyʼán sʼin kuiyoaa kao je kʼoa nga koa̱n miyole koaan. Je Pablo i kitsole je chjotale Cristo xi koai ngʼajmi: “Nga jetʼa jéená xi totʼatsʼe nga makjainná, tjínná kjoa xi nyʼán tjín tʼatsʼe Niná, xi totʼatsʼe Nainá Jesucristo. Xi totʼatsʼe Cristo kʼoati kisakoná ʼnde nga jitjasʼeen je kjoandabi, nga̱ makjainná tʼatsʼe. Nʼio nda tiyojinlee kui kjoandabi” (Romanos 5:1, 2). Nʼio bʼe kjoanda nga nyʼán sʼin tiyoaa kao Jeobá kʼoa nga miyole maa.

11. Jótjíosʼín je chjotale Cristo xi ya koai ngʼajmi nga tjíobinyakao xi kjaʼaí nga “katabatiojin je kjoakixi”.

¹¹ Koaan nga kixi sʼin jchatokonná ngixko̱n Niná. Je profeta Daniel kʼoakitso nga je chjotale Cristo xi ya koai ngʼajmi “nkjín chjota kuinyakao nga katabatiojin je kjoakixi” kʼianga toje tífikjetʼa nichxin (tʼexkiai Daniel 12:3). * Jósʼin sítjoson jebi je chjotale Cristo xi ya koai ngʼajmi. Miyón chjota tsoyasonle xi tʼatsʼe Chjotaxále Niná kʼoa tsoyale kjoatéxomale Jeobá je xi “kjaʼaí barré” ʼmile (Juan 10:16). Kʼoasʼin binyakao je chjota nga kixi sʼin jchatokon ngixko̱n Niná. Kʼoa totʼatsʼee kjoandale Niná nga kixi sʼin jchatokonná. Je Pablo i kitso: “Fetʼale jée xi tokjoatjao, xi totʼatsʼe kjoandale Niná, nga̱ Cristo tsakʼéchjíntjai xi tʼatsʼe” (Romanos 3:23, 24).

12. Jósʼin machjénná kjoandale Niná kʼianga bʼetsʼoalee.

¹² Koaan kʼoétsʼoalee Niná. Nga tjínle kjoanda Niná koaan kʼoétsʼoalee. Je Pablo kʼoatso nga koa̱n si̱chriantʼalee “yáxilele [Niná] xi tjínle kjoanda” kʼoa kʼoatsoná nga ñaki tjínjngo tokoán nga si̱chriantʼalee Niná (Hebreos 4:16a). Xi totʼatsʼe Jesús koaan kʼoétsʼoalee je Jeobá tojme orani. Nʼio tse kjoanda tjínná nga ma bʼetsʼoalee. Je Pablo i kitso: “Kʼia nga tiyokoaa Cristo kjaínga nda nʼiotakoán, kʼoa koaan kuitjásʼeen nga lijme xi xkón koa̱nná,  nga̱ makjainná tʼatsʼe nga je” (Efesios 3:12).

13. Nga bakóná kjoanda Niná, jósʼin basenkaoná kʼianga machjénná.

¹³ Koaan so̱koná nganʼio kʼianga machjénná. Je Pablo kʼoakitso nga Niná kʼoétsʼoalee kʼianga nganʼio machjénná “jméni nga koa̱nsjaisíniná kjoanda xi koasenkaoná kʼia nga koa̱nchjénná” (Hebreos 4:16b). Kʼianga kjoa bitjatojiaan, koaan je Jeobá si̱jélee nganʼio. Je Jeobá nrʼoéná ningalani tsín tjínnele kʼoasʼin. Jé síchjén je ndsʼee xi tjío ya jinjtín nga basenkaoná. Nga nrʼoéná kʼianga bʼetsʼoalee, koaan i̱ kuixoán: “Jé Nainá xi basenkaona, likui tsakjonnia. Jmé xi koa̱n sikaona chjota” (Hebreos 13:6).

14. Jmésa kjoanda xi sokóná xi totʼatsʼe kjoandale Niná.

¹⁴ Koaan so̱koná kjoajetokon. Ijngosa kjoanda xi sokóná xi totʼatsʼe kjoandale Jeobá kuinga basenkaoná kʼianga nʼio nikjáojiaan (Salmo 51:17). Kʼianga chjota kitjenngike je chjotale Cristo xi Tesalónica tsʼe, je Pablo itso én xi kiskile: “Tijeni Nainá Jesucristo kao Niná Nʼainá, je xi kjaínga koantsjoakená, kitsjoaná kjoajetakon xi kʼoéjnajinntsjainá, kʼoa xi nda tichoyalee xi totʼatsʼe kjoandale. Katasíjekon ni̱ma̱no” (2 Tesalonicenses 2:16, 17). Nʼio tsjoánganʼioná nga tsjoakená je Jeobá kʼoa nga síkuindaná xi totʼatsʼe kjoandale.

15. Jmé kjoachoya xi tjínná xi totʼatsʼe kjoandale Niná.

¹⁵ Koaan sʼe̱ná kjoachoya nga koa̱n kuiyoaa ngantsjai nichxin. Nga chjotajée maa, tsín jme kjoachoya tjínná tsa tsín je Jeobá koasenkaoná (tʼexkiai Salmo 49:7, 8). * Je Jeobá jngo kjoachoya xi nʼio naskánatjín títsjoáná. Jñánile. Je Jesús i kitso: “Kui xi mele je xi kisikasénna, nga je ngatsʼi xi be ʼndíle, kʼoa xi makjainle tʼatsʼe, katasʼele kjoabijnachon ngantsjai” (Juan 6:40). Xi totʼatsʼe kjoandale Niná, tjínná kjoachoya nga koa̱n kuiyoaa ngantsjai nichxin. Je Pablo i kitso: “Koantsen je kjoandale Niná xi bʼasjentjai ngatsʼi chjota” (Tito 2:11).

16. Jókisʼin kʼa chjotale Cristo xi títjon tsakatio nga tsín tsabechjí je kjoandale Niná.

¹⁶ Tojosʼin tiʼyaa, nʼio tse kjoanichikontʼain sʼená xi totʼatsʼe nga bakóná kjoanda je Niná. Tonga ali tsakuijin xi tsonile tsa koa̱n toxá kuijnyíjéeñá. Nichxin nga tsakatio je xi títjon chjotale Cristo, tjínkʼa xi tsín ndasʼin kikao yaole. Je Biblia itso: “Chjota xi tsín bexkón Niná, xi síkʼantjaiyani kjoandale Nináná kao kjoachi̱nga̱” (Judas 4). Kui xi tsonile nga tsakatio kʼa chjotale Cristo xi tsín kixi kitʼale Niná, xi kʼoasʼin kisikjaʼaitsjen nga koa̱n koa̱njngijée kʼoa nga sichatʼale ngantsjai je Niná. Saʼnda koanmele kiskenʼndóbʼakjá xi kjaʼaí chjotale Cristo nga kʼoati katasʼín joni je. Toʼyani xi kʼoasʼín ndʼaibi tsín bakóle kjoaxkóntokon “je Espíritu Santo xi tjínle kjoanda” (Hebreos 10:29).

17. Jmé kjoafaʼaitsjen xi kitsjoa je Pedro.

¹⁷ Nichxin xi tiyoaa ndʼaibi, je Na̱i tíbʼanacha kʼale chjotale Cristo nga kʼoasʼin katasíkjaʼaitsjen nga koa̱n koa̱njngíjée nga̱ sichatʼale je Niná. Je Jeobá síchatʼale je xi kʼoamanile jéele. Tonga kʼoati kui xi mele nga kʼoénelee yaoná nga tsínkui xi chʼaotjín kʼoasʼiaan. Jé Jeobá xi koanmele nga i̱ tso én xi kiski je pastro Pedro: “Tikuindao yaono, jméni nga tsín tsa kʼoati jon xin ndiaa koanngínsínio, nga kʼoanachano je chjota xi chʼao kjoan, kʼoa jméni nga tsín tsa tsao̱jenngisíni nganʼiono. Katamajchájinno kjoandale kʼoa kjoafaʼaitsjenle Nainá Jesucristo xi tsakʼasjentjainá” (2 Pedro 3:17, 18).

18. Nga bakóná kjoanda je Jeobá, jméni xi tjínnená nga sʼiaan.

¹⁸ Tsa chjí ʼyaa nga bakóná kjoanda je Jeobá, tjínnená nga kʼoasʼin si̱chjén jmeni xi tsjoáná nga jchaxkoán kʼoa nga kuinyakoaa xi kjaʼaí. Je Pablo i kitso: “Kʼoasʼin kjaʼaíngá kjoan kjoatjaole Espíritu Santo xi tjínle nga jngójngó. Josʼin kitsʼaile kjoandale, kʼoasʼin katasíchjén [...], tsa je kjoatjaobe nga síxá, katasíchjén josʼin bʼaile nga síxá, axo je xi bakóya, kʼoasʼin katasíchjén josʼin bʼaile nga bakóya. Je xi bʼétʼain, katasíchjén josʼin bʼaile nga bʼétʼain [...]. Je xi mamake, kʼoakatasʼín kao kjoatsjoa” (Romanos 12:6-8). Jmé xi tsoyanile én jebi. Kui xi tsonile nga bakóná kjoanda je Jeobá, tjínnele kʼoénelee yaoná nga kʼuínyasoán, nga kʼuínyalee Biblia xi kjaʼaí, nga kʼoainganʼiolee je ndsʼee kʼoa nga si̱chatʼalee tsa ʼya xi josíkaoná.

19. Jmé xi chótʼayá ya kjoaʼmiya xi ijngo.

¹⁹ Nga nʼio tse kjoanichikontʼain títsjoáná je Jeobá xi totʼatsʼe nga tjínle kjoanda, tjínnele nga kʼoénelee yaoná nga kʼoee “je énnda xi tʼatsʼe kjoandale Niná” (Hechos 20:24). Ya kjoaʼmiya xi ijngo kui chótʼayá xi tʼatsʼe jebi.