Tjínkʼa xi kjonangi
A ndatjín tsa jngo pistola kʼoa tsa jngo tjo̱ sʼe̱le je chjotale Cristo nga sikuinda yaole
Je chjotale Cristo kosonnile josʼin síkuinda kʼoa josʼin sítoánntjai yaole. Kui kuenta sʼín je kjoafaʼaitsjen xi tsjoá je Biblia. Kjoafaʼaitsjen jebi binyakaoná nga ʼyaa nga tsín ndatjín tsa pistola kʼoa tsa tjo̱ si̱chjén nga si̱toánntjé yaoná kʼianga ʼya xi josíkaoná. Kataʼyala jme xi koasenkaoná nga kui xi ndatjín kʼoasʼiaan.
Je Jeobá nʼio bechjí je kjoabijnachonle chjota. Je David kʼoakitso nga tʼatsʼe Jeobá tínroani je kjoabijnachon (Sal. 36:9). Kʼianga síkuinda yaole kao tsojmi xi tjínle je chjotale Cristo, nda kosonnile nga tsínkui síchjén jmeni xi sikʼien xi ngikʼa ánni nga tsín njínle chjota ska̱tʼasínile (Deut. 22:8; Sal. 51:14).
Sikʼieen chjota tojmeni. Tonga ngisaa ngotjo sikʼienni tsa jngo pistola kʼoa tsa jngo tjo̱ ninga toxá sʼinni kʼoa ninga to kjoataon xi koa̱nle. * Kʼoa tsa jngo chjota xi tísíché skoe̱ nga jngo pistola yʼa jngo chjota, tochale ngisa koa̱ntse kjoa kʼoa saʼnda tjín xi kuiyá.
Kʼianga toje ni̱kʼien je Jesús, kʼoakitsole chjotale nga jngo ki̱cha̱ espada katabajngi, tonga likuijin nga yaole sitoánntjai (Luc. 22:36, 38). Kuinga kʼoakitsonile nga tsín ndatjín nga kjoatsʼen kʼoasʼin ninga nʼio nkjín mani xi kʼoetʼale (Luc. 22:52). Kʼianga ki̱cha̱ espada tsakále Pedro je choʼndale naʼmitítjon, je Jesús i kitsole: “Cha̱nisʼain ki̱cha̱li yaxjoa̱le”. Xijekoan, kʼiaa kitsjoale kjoafaʼaitsjen xi tojo nichjén saʼnda ndʼaibi. Kitsole: “Nga̱ ngatsʼi xi skoé ki̱cha̱, ki̱cha̱ kuiyáni” (Mat. 26:51, 52).
Tojo tso Miqueas 4:3, je choʼndale Niná ki̱cha̱bʼenyi sikʼóya ki̱cha̱ espadale kʼoa ki̱cha̱ oso sikʼóya ki̱cha̱ lanzale. Je chjotale Cristo kjoanyʼán tsjoake. Sítjoson kjoafaʼaitsjen xi kitsjoa je pastro Pablo nga kitso: “Ali chʼaojin nikao je xi chʼao síkaono [...]. Tojo kji ngayije xi koa̱nno, kʼoatʼiaon jméni nga nyʼán kuiyosínio kao ngatsʼi chjota” (Rom. 12:17, 18). Je Pablo nʼio tse kjoa jaʼatojin, xkón tsakʼejna xi tʼatsʼe ché (2 Cor. 11:26). Tonga tsínkʼia jaʼatone kjoatéxomale Niná kʼianga kisikuinda yaole. Tosaa Niná kisinʼiotʼa yaole kʼoa kui kitjenngi kjoafaʼaitsjen xi tsjoá Biblia, nga̱ ngisaa nda tikʼoajinni jme xi nichjén nga bixkan (Ecl. 9:18).
Je chjotale Cristo ngisaa nʼio bechjí je kjoabijnachon tikʼoajinni tsojmi xi tjínle. Alikui je tsojmi xi tjínná sikatíokonná (Luc. 12:15). Tsa pistola yʼa xi sichéná tjínnele nga tojbi chja̱koaa. Tsa tosi tonda kʼoenená nga kʼoailee tsojmi xi kichʼá ngisaa nda nga kui kjoafaʼaitsjen xi kitsjoa Jesús kjuintjenngiaa: “Tikjaínlao xi tsʼen”. Jebi kui xi tsonile nga katabʼa tojmeni xi mele (Mat. 5:39, 40; Luc. 6:29). * Tonga xi ngisa nda kuinga si̱kuindaa yaoná. Tochajinle likui ʼya xi sichéná tsa tsín koakoá jmeni xi kichʼá kʼoa tsa be je chjotandaindʼianá nga tsjoachaa kjoanyʼán nga testigole Jeobá maa (Prov. 18:10; 1 Juan 2:16).
Je chjotale Cristo bexkón je kjoafaʼaitsjenle xi ngikʼa (Rom. 14:21). Tsa jchale je chjotale Cristo nga jngo pistola kijnale xi síkuindani yaole, tsakui nichxin tsín sa̱sén kʼale je ndsʼee kʼoa tsa jme xi kuitso. Tsa tsjoachaa xíngiaa kui xosikaoná nga ngisa kuenta sʼiaan josʼin síkjaʼaitsjen tikʼoajinni nga to yaoná kjuinñá ninga tiʼndená ngixko̱n kjoatéxoma nga kui sʼe̱ná (1 Cor. 10:32, 33; 13:4, 5).
Je chjotale Cristo bʼénele yaole nga nda sʼín (2 Cor. 4:2; 1 Ped. 5:2, 3). Tsa jngo pistola kijnale je chjotale Cristo kʼoa tokui xá kijnanile nga síkuinda yaole, tsa tosi tonda sikájna ninga jekabʼaile kjoafaʼaitsjen alikui nda choa̱ tíbʼéjna. Kuinga tsín koa̱n jme xá kʼoainile ya jinjtín. Kʼoati tsín koa̱n jme xá kʼoaile ya jinjtín tsa jngo ndsʼee xi kui síchjén ya jñani síxá. Ngisaa nda nga tosa kjaʼaí xá katabajngi. *
Nga jngó jngó chjotale Cristo jé xi kuitsoni josʼin sikuinda yaole kao familiale kʼoa josʼin sikuinda tsojmi xi tjínle kʼoa jme xá xi sʼin. Tonga kui kuenta sʼin je kjoafaʼaitsjen xi tsjoá je Biblia nga̱ kui kjoachjinele kao kjoatsjoachale Niná bakó. Je chjotale Cristo xi jetjínle kjoafaʼaitsjen sítjoson jotso Biblia kʼoa alikui pistola síchjén nga síkuinda yaole. Bení nga tsín tijme xi koa̱nnile nichxin xi nroaján kʼiatsa Niná sinʼiotʼa yaole kʼoa tsa sitjoson je kjoafaʼaitsjen xi tsjoá je Biblia (Sal. 97:10; Prov. 1:33; 2:6, 7).
Kʼianga kjoaʼaí kjoañʼai xi nʼio tse, je chjotale Cristo jé Jeobá sinʼiotʼa kʼoa alikui yaole sitoánntjai
^ párr. 3 Tsakui nichxin jngo chjotale Cristo kʼoakuitso nga jngo tjo̱ koatse xi sikʼienni cho̱ xi ski̱ne, kʼoa tsakuije̱ nga cho̱jñá xi toán tjín kʼoa mele sikuinda yaole, tonga tjínnele nʼio nda koajnatjao kʼianga tsínkui tísíchjén, nga kʼoasjele chʼinsále kʼoa tsakui nichxin saʼnda koa̱n kʼoasjekjao. Tsa tsín tsjoáʼnde kjoatéxoma kʼianga jngo pistola kʼoa tsa jngo tjo̱ sʼe̱jnaná, tjínnele si̱tjosoán jme xi tso kjoatéxoma (Rom. 13:1).
^ párr. 2 Yaa rebista ¡Despertad! xi tsʼe 8 de marzo de 1993 faʼaitʼa josʼin koa̱n sitoánntjai yaole chjota tsa ʼya xi tísíkaojée, ya jñani itso “Cómo evitar una violación”.
^ párr. 4 Tsa mesali jchai tsa koa̱n si̱xá ya jñani pistola machjén kʼoa tsa jñasanile xi kjaʼaí, chótʼai rebista La Atalaya xi tsʼe 1 de noviembre de 2005 ya pájina 31, kʼoa kao rebista La Atalaya xi tsʼe 1 de noviembre de 1983 ya pájina 25, 26.