1, 2. Ánni nga machjénsíni nga kui chótʼayajiaan josʼin kuisenkoaa je xi xínkjín kisicha (chótsenlai sén xi faʼaitʼa ibi).

JNGO tichjaa xi Susi ʼmi i kitso: “Kʼianga jekʼien je ʼndítinajin, me jngo nó nga aon koannajin”. Kʼoa jngo ndsʼee xi kʼoatso nga nʼio aon koanle nga toxijña kʼien je chjoónle. Nʼio nkjín chjota xi kui kjoa jebi faʼatojin. Nichxin xi tiyoaa ndʼaibi alikui kui choyalee nga xíngiaa kuiyá nga kjesa faʼaijin Armagedón. Tonga kʼiatsa jngo xíngiaa kanichaa kʼoa tsa jngoje̱ xi ʼyaxkoaan xi kui kjoa tífaʼatojin, tsakui nichxin kui si̱kjaʼaitsjeen jméni xi koasenkaoná.

² Tsakui nichxin tjínkʼa xi kʼoakuitso nga channi chajinná nga jefi nichxin. Tonga a kʼoama kjoaixi. Jngo tichjaa xi jekʼien xʼinle kʼoatso nga kui xi ngisa basenkaoná jmeni xi nʼia. Jokji aon sʼe tokoán yaa mangóson joma kʼianga miʼaon yaoná, nga tobijbi mandani. Jméni xi sʼiaan nga kuinyakoaa je xi xínkjín kisicha.

3, 4. Ánni nga tsín jao sʼeniná nga majinle je Jeobá josʼe tokoán kʼianga xíngiaa nichaa.

³ Alikui jao tjínná nga sinʼio tokoán je Jeobá (tʼexkiai  2 Corintios 1:3, 4). * Jé Jeobá xi ngisa nda machoyale josatío kon je chjota xi xínkjín biya. Itsole je choʼndale: “Anña je xi kʼoasʼin tisinʼioa tokon” (Is. 51:12; Sal. 119:50, 52, 76).

⁴ Je Nʼainá Jeobá, xi bakóná kjoamatokon, kʼoati jekisicha kʼa je xi tsjoake, jolani Abrahán, Isaac, Jacob, Moisés kʼoa kao je rey David (Núm. 12:6-8; Mat. 22:31, 32; Hech. 13:22). Je Biblia kʼoatso nga nʼio mele Jeobá nga sikjaʼáyanile je choʼndale (Job 14:14, 15). Kʼianga jekjoaʼáyanile, nʼio tsjoa sa̱tío kon kʼoa alikui tijme chʼin sʼe̱nile. Je Niná kʼoati tsabe josʼin kinikʼien je ʼNdíle, xi nʼio tsjoake (Prov. 8:22, 30). Alikuijin koa̱njinná jokji aon koanle je Jeobá (Juan 5:20; 10:17).

5, 6. Jósʼin sínʼio tokoán je Jeobá.

⁵ Alikui jao kʼoé tokoán nga je Jeobá koasenkaoná. Kuinga machjénsíni nga kʼoéyanajmílee jotjín ni̱ma̱ná kʼoa jotjín tokoán. Nʼio tsjoánganʼioná nga be Jeobá je kjoaʼaon xi biyojiaan kʼoa sínʼio tokoán. Jósʼin basenkaoná.

⁶ Jngo koya josʼin basenkaoná je Niná, kʼiaa nga tsjoáná je nganʼiotsjele (Hech. 9:31). Je nganʼiotsjele Niná nʼio tjínle nganʼio nga basenkaoná. Je Jesús kʼoakitso nga Nʼainá “xi tíjna ya ngʼajmi” kao kjoatsjoa “tsjoále je Espíritu Santo je xi sijéle nga je” (Luc. 11:13). Je Susi, je xi jenása kanikʼaxkiaa itso: “Nʼio nkjín kʼa tsakʼetsʼoalaijin je Jeobá nga kinijélaijin nganʼio. Kʼoa nga ñandia ñandia tsakʼetsʼoaijin, ñaki tseen koannajin josʼin kisinʼio tokuinjin” (tʼexkiai Filipenses 4:6, 7). *

7, 8. Ánni nga tsín jao sʼeniná nga sinʼio tokoán je Jesús.

⁷ Jmeni xi kisʼin kʼoa jmeni xi kitso je Jesús kʼianga tsakʼejna i̱ Sonʼnde, tsakakó jokjoan je Jeobá, nga tjínle kjoatsjoacha, nga tjínle kjoamatokon kʼoa nga machoyale josʼe tokoán kʼianga kjoa tiyojiaan (Juan 5:19). Je Jesús kui xá jaʼaini i̱ Sonʼnde “nga sindaya je chjota xi kjoaʼaon tjíojin ni̱ma̱le” kʼoa nga sinʼio kon “ngatsʼi xi kjoaba tjíojin” (Is. 61:1, 2; Luc. 4:17-21). Je chjota tsabee nga je Jesús tsakakó kjoamatokon, koanjinle jokji kjoañʼai tjíofaʼá kʼoa tsakasenkao (Heb. 2:17).

⁸ Kʼianga sʼa xti je Jesús, kʼoati kisicha je xínkjín kʼoa kao miyole. Tsakui nichxin je José, xi nʼaile koanni nga jaʼai i̱ Sonʼnde, kʼia kʼien nga 20 nóle je Jesús. * Si̱kjaʼaitsjenla jokji aon koanle nga kui kjoa jaʼatojin kʼoa nga tsabe jokji aon koanle je na̱le kao ndsʼe̱.

9. Jósʼin tsakakó je Jesús nga koanjinle jokji aon koanle je xínkjín Lázaro kʼianga kʼien.

⁹ Kʼianga kitsoyason je Jesús, koanjinle jokisatio kon je chjota xi kjoañʼai tjíofaʼatojin. Tobʼelañá, kʼianga kʼien je  Lázaro, xi nʼio miyole koanni, be je Jesús nga sikjaʼáyanile. Ninga kʼoalani, nga tsabe jokji aon koanle je María kao Marta, kʼoati kinroajen ndáxko̱n tsanda je (Juan 11:33-36).

10. Ánni nga tsín jao sʼeni tokoán nga be je Jesús jomaná kʼianga kjoaʼaon tiyojiaan.

¹⁰ Jósʼin basenkaoná ndʼaibi jmeni xi kisʼin je Jesús nichxin kjoatse. Je Biblia itso: “Jesucristo tongóson[...] ngojña, kʼoa ndʼai, kʼoa ngantsjai nichxin” (Heb. 13:8). Jé Jesús xi séjnatítjonná kʼoa be josʼe tokoán kʼianga kjoaʼaon tiyojiaan, kuinga koa̱nnile koasenkao je xi kjoañʼai faʼatojin (Hech. 3:15; Heb. 2:10, 18). Alikui jao tjínná nga majinle josʼe tokoán kʼianga kjoaʼaon tiyojiaan. Majinle jomaná kʼoa kʼiakjoán tsjoánganʼioná nga machjénná (tʼexkiai Hebreos 4:15, 16). *

11. Jñánile testo xi tsʼe Biblia xi sínʼio tokuin.

¹¹ Sínʼio tokoán jmeni xi tso je Biblia tʼatsʼe nga nʼio aon koanle je Jesús kʼianga kʼien je Lázaro. Tonga kʼoati tjíosa testo xi tsʼe Biblia xi sínʼio tokoán. Kʼoa alikui tokʼoamaná jebi, nga̱ “je kjoa [xi] kichjitʼa ngasʼa, kichjitʼa xi tʼatsʼe nga koakoyaná, jméni nga sʼe̱síniná kjoachoya[...] xi totʼatsʼe kjoatsejta kao kjoanijetakon xi tjínle xo̱n Escrituras” (Rom. 15:4). Kʼiatsa kjoaba tiyojiaan, koasenkaoná je testo xi si̱kʼaxkiaa ibi:

• “Je Jeobá chrian tíjnale je xi nʼio aon tjío ni̱ma̱le; bʼasjentjai xi jekisikinroajen kon” (Sal. 34:18, 19).

• “Kʼianga nʼio kisikjaʼaitsjenjian, ji [Jeobá] tsakʼainganʼionái kʼoa kinikinjenyʼánjinní ni̱ma̱na” (Sal. 94:19).

• “Tijeni Nainá Jesucristo kao Niná Nʼainá, je xi kjaínga koantsjoakená, kitsjoaná kjoajetakon xi kʼoéjnajinntsjainá, kʼoa xi nda tichoyalee xi totʼatsʼe kjoandale. Katasíjekon ni̱ma̱no, kʼoasʼin nʼio katasíkatíono ngayije énno kao xáno xi nda tjío” (2 Tes. 2:16, 17). *

12. Jósʼin kʼoainganʼiolee je xi kjoaba tjíojin.

¹² Je xi xínkjín kisicha, kʼoati koa̱n so̱kole kjoanʼiotokon ya jinjtín (tʼexkiai 1 Tesalonicenses 5:11). * Jósʼin kuisenkoaa kʼoa kʼoainganʼiolee je xi kjoaba tjíojin (Prov. 17:22). Si̱kjaʼaitsjenjiaan nga tjín “nichxin nga jyó biyoaa kʼoa [tjín] nichxin nga nokjoaa” (Ecl. 3:7). Kataʼyala jotso jngo tichjaa xi Dalene ʼmi, xi jekʼien xʼinle, itso: “Je xi kjoaba tjíojin machjénle nga kʼoakuitso josʼin síkjaʼaitsjen kʼoa jotjío kon. Kuinga ndatjínsíni nga nda kuinóʼyalee kʼoa alikui ñá kuinókjoachjoalee”. Ijngo tichjaa xi Junia ʼmi, xi tije kisikʼienni yaole ndsʼe̱, itso: “Ninga likui ñaki koa̱njinná jomale xi kjoaba tjíojin, je xi chjíle kuinga si̱choyalee yaoná jotjío kon”.

13. Jméni xi kuenta sʼiaan kʼianga kuisenkoaa je xi kjoaba tjíojin.

¹³ Xi kʼoati kuenta sʼiaan kuinga  kjaʼaí kjaʼaí nʼia nga jngó jngoá kʼianga kjoaba tiyojiaan. Tojé xi kui kjoa tíjnajin xi machoyale jomale, kʼoa alikui choa ñʼai male nga kʼoatso jotjín kon. Kuinga kʼoatsoni je Biblia nga tojé ni̱ma̱ná xi majinle kʼianga kjoaba tiyojiaan (Prov. 14:10). Kʼoa ninga kʼoakuitsoná jotjín kon je xi kjoaba tíjnajin, tsakui nichxin likui ñaki koa̱nchoyaná jmeni xi kuitso.

14. Jmésani xi koa̱n sʼiaan nga si̱nʼioá kon je xi kjoaba faʼatojin.

¹⁴ Tsakui nichxin tsín ʼyaa jokʼuínlee je xi kjoaba tjíojin. Je Biblia kʼoatso nga je én xi nchja̱ “chjota xi chjine síndayaná” (Prov. 12:18). Nʼio nkjín chjotale Cristo xi sokóle kjoafaʼaitsjen nga tsjoánganʼiole je xi kjaʼaí nga bʼéxkia je foyeto xi Cuando muere un ser querido ʼmi. * Ninga kʼoalani, je xi ngisa ndatjín nga sʼiaan kuinga kjuintjenngiaa je kjoafaʼaitsjen xi tsjoá je Biblia nga tso: “Chjíʼndákao ʼya xi kjiʼndá” (Rom. 12:15). Jngo tichjaa xi Gaby ʼmi, xi jekʼien xʼinle, itso: “Nga kjiʼnda kʼoasʼin bakoña jotjín tokoan. Kʼoa nga bena je miyona nga tikjiʼnda, kʼoati nroajen ndáxko̱n tsanda je. Kʼoa nga kʼoasʼín, tsjoánganʼiona kʼoa majinna nga tsín toʼan tijna”.

15. Kʼiatsa ñʼai maná joʼmilee je xi kjoaba tjíojin, jméni xi sʼiaan nga si̱nʼioá kon (chótsenlai je rekuadro “ Jókuixoán nga si̱nʼioá kon xíngiaa”).

¹⁵ Kʼiatsa ñʼai maná joʼmilee je xi kjoaba tjíojin, tsakui nichxin ngisa choa ñʼai koa̱nná nga xo̱n chjílee, tsa jngo correo si̱kasénlee, tsa jngo mensaje si̱kasénlee kʼoa tsa jngo karta chjílee. Koaan jngo testo xi tsʼe Biblia kʼoétʼaa kʼoa tsa jmeni  xi kjoaʼaítsjenná xi sinʼio kon. Je Junia itso: “Nʼio basenkaona kʼianga jngo xo̱n faʼaina xi kui én xi tsjoánganʼiona tjítʼa, kʼoa tsa kʼiaje̱ nga kʼoatsona jngo tichjaa nga ya kjuíkon ngotjole. Kui xi bakóna nga tjín je chjota xi tsjoakena kʼoa xi síkuindana”.

16. Jósasʼin kʼoainganʼiolee je xi kjoaba tjíojin.

¹⁶ Kʼoati nʼio binyakao je xi kjoaba tjíojin kʼianga bʼetsʼoantjé kʼoa tsa ñatjen kʼoétsʼoaa kao je. Tsakui nichxin toʼya kuitjoná je én jokuixoán. Tonga nga ñaki ni̱ma̱ná kjuinroajinni jmeni xi kuixoán, kui xi koasenkao je xi kjoaba tjíojin. Je Dalene, xi jenása kanikʼaxkiaa, itso: “Kʼianga faʼaisíxatʼana je tichjaa sakʼoaa kʼoaxinle nga katabʼétsʼoa. Kʼianga bʼétsʼoa toʼyaa majngole je én, tonga tobijbi nda nchja̱ kʼoa nʼio tsjoánganʼiona jmeni xi tso kʼianga bʼétsʼoa. Kui xi basenkaona nga mataja kjoamakjainna”.

17-19. Ánni machjénsíni nga tosi tonda kʼoainganʼiolee je ndsʼee.

¹⁷ Nga kjaʼaí kjaʼaí nʼia nga jngó jngoá, alikui tongóson kji tse chajinniná je kjoaba. Kuinga tsín tokʼia kʼoainganʼionilee xíngiaa nga tosʼa kasícha xínkjín, nga ya tjíokao je xínkjín kao miyole. Machjén nga kʼoainganʼiolee nga koa̱nskanni. Ya Proverbios 17:17 itso: “Jngo xi ñaki miyo tsjoakená tokʼiani, kʼoa jngoyale ndsʼeñá kʼianga kjoaba tijnajiaan”. Tjínnele kʼoainganʼiolee xíngiaa jokjitse nga koanchjénle nganʼio (tʼexkiai 1 Tesalonicenses 3:7). *

¹⁸ Xi kuenta sʼiaan kuinga toxijña ba sʼe tokoán. Tsakui nichxin kui kjoaʼaítsjenná je nichxin kʼianga chixán, tsa jngo canción xi kui sikjaʼaitsjenná, tsa jmeni xi kuinóʼyalee kʼoa tsa jmeni xi sʼiaan. Jngo xi kasícha tsa xʼinle kʼoa tsa chjoónle, tsakui nichxin nʼio ñʼai koa̱nle nga tosʼa choatsele nga kui kjoa tíjnajin, jolani nga koai kjoajtíntse kʼoa tsa kʼiaje̱ nga faʼaitsjenya je kjoabiyale Cristo. Jngo ndsʼee xi jekʼien chjoónle itso: “Kʼianga jekicho jngo nó nga kʼien je chjoónna, nʼio aon koanna. Tonga nkjín ndsʼee kao tichjaa xi kinchja̱mañale xínkjín nga ya ñatjen tsakiyuijin ánni nga tsín toʼan tsakatejnaña”.

¹⁹ Si̱kjaʼaitsjeen nga tsín tosakʼoa koa̱nchjénle nganʼio je xi xínkjín sícha. Je Junia itso: “Kʼianga bʼainganʼioná tojme nichxinni nʼio basenkaoná. Kʼianga kʼoasʼín je ndsʼee nʼio chjí ʼyaa kʼoa sínʼio tokoán”. Ningalani tsín koa̱nná chja̱ʼaxian je kjoaʼaon xi tjíojin je xi xínkjín sícha, koaan nkjín koya josʼin si̱nʼioá kon (1 Juan 3:18). Je Gaby itso: “Nʼio tsjoale kjoanda je Jeobá, nga̱ kao kjoatsjoacha tsakasenkaona je xi chjotajchínga sʼin tjío kʼoa tsín toʼan kisikʼéjnana nga kjoaba tsakatejnajian. Nga kʼoakisʼin, tsaʼbeña nga kao kjoatsjoacha tsakasenkaona je Jeobá”.

20. Ánni nga tsjoánganʼioniná jmeni xi tongini tso je Jeobá.

²⁰ Nʼio tsjoánganʼioná nga tondiaa kjoaʼaxin Jeobá je kjoaʼaon kʼianga “ngatsʼi xi tjío ya nyʼoákʼen kjuinrʼoéle jta̱le” Jesús kʼoa kjoaʼáyanile (Juan 5:28, 29). Je Niná tongini kʼoatso nga “tondiaa kjoaʼaxin je kjoabiya” kʼoa “kʼoejon ndáxko̱n ngatsʼi chjota” (Is. 25:8). Kʼianga kjoaʼaí je nichxin nga kʼoakoa̱n, je xi koatio i̱ Sonʼnde, ʼndele nga skíʼndá tosaa tsjoa sa̱tío kon (Rom. 12:15).