1. 1) Jméni xi tjínnele sʼin xi sʼa xti xi tʼatsʼe nichxin xi sʼa nroa. 2) Ánni nga tsín koa̱n tso̱kjonsíni xi sʼa xti kʼianga jme xi kʼoendajin (chótsenlai sén xi faʼaitʼa ibi).

JON xi sʼa xtio, tsakui nichxin kʼoati ʼyao nga tongini bʼendajiaan kʼianga tjín jña mangián. Kʼoatisʼinni, kʼianga sʼa xtiaa tongini bʼendajiaan jmeni xi sʼiaan kʼianga jekoa̱njchíngaa. Tonga kʼianga jme xi bʼendajiaan ñʼai maná. Jngo tsoti xi Heather ʼmi, itso: “Ñaki tsokjonña nga kui sikjaʼaitsjen jmeni xi sʼian kʼianga jekoa̱njchínga”. Kʼiatsa kʼoati sʼe tokuin, tikjaʼaitsjain nga i̱ tsole Jeobá je naxinandále: “Ali tsa nikjáojinjin, nga̱ anña Nináli. An tsjoanganʼiole, an koasenkaole” (Is. 41:10).

2. Jósʼin ʼyani nga kui xi mele Jeobá nga tsjoa sʼe̱ tokuin.

² Je Jeobá kui xi mele nga nda kʼoéndajin jmeni xi sʼiain nichxin xi sʼa nroa (Ecl. 12:1; Mat. 6:20). Mele nga tsjoa sʼe̱ tokuin. Kʼianga jchai nga kui xi mele je Jeobá kui bakó nga ma chótsain, noʼyai kʼoa nga ʼyai jochine je tsojmi xi kisinda. Kʼoa tikjaʼaitsjain nga mandosinle xi tʼatsaan kʼoa tsoyaná josʼin si̱jchá yaoná. Je xi bʼasjengi kjoatéxomale itsole: “Kui kichjoejion jmeni xi tsín sasénna”. Kʼoa itsosa: “¡Koeni! Je choʼndana nda satío kon, tonga jon kjoasoa kuiyojion. [...] ¡Koeni! Je choʼndana ñaki sé kʼianga tsjoa tjío je ni̱ma̱le”  (Is. 65:12-14). Kʼianga kui chjoéjiaan xi ndatjín, jé Jeobá kuitjongʼa (Prov. 27:11).

3. Jméni xi tsoli Jeobá nga sʼiain.

³ Jméni xi tsoli Jeobá nga sʼiain. Tikjaʼaitsjenlai jebi. Je Niná kui xá kisindani je cho̱ nga nda sa̱tío kon nga koakjen, nga skʼuí kʼoa nga koa̱nnkjínya. Tonga ñá xi chjotaa, ngisaa nʼio chjíle jmeni xi tsjoa báya tokoán, jolani nga ʼyaa xi tʼatsʼe Niná kʼoa nga kixi mangíntʼalee (Sal. 128:1; Mat. 5:3). Je Biblia kʼoatso nga je xi kisindaná jngoo Niná xi kjoatsjoacha, “Niná xi tsjoa tjínle” kʼoa nga sénle kisikʼaná kʼianga kisindaná (2 Cor. 13:11; 1 Tim. 1:11; Gén. 1:27). Nʼio tsjoa sʼe̱ tokuin kʼiatsa je Niná chjénngilai. A saje tsaʼyai nga ñaki bitjoson je Énle Niná, nga i̱ tso: “Tongisa ndaní nga kʼoee kaoni tsa nga chjoé” (Hech. 20:35). Jebi alikʼia nga tsín bitjoson. Kʼianga tjín xi kʼoéndajin tʼatsʼe nichxin xi sʼa nroa, je Jeobá kui xi mele nga koakolai nga tsjoachai kʼoa nga kʼoati tsjoachai xi kjaʼaí chjota (tʼexkiai Mateo 22:36-39). *

4, 5. Ánni nga tsjoa kisʼeni kon je Jesús.

⁴ Je Jesús jé xi ngisasa nʼio nda choa̱ tsakʼéjnale je xti. Kʼianga sʼa tiʼndí, kisiská kʼoa tsakʼétsaojin. Tojo tso je Énle Niná, “tjín nichxin nga bijnoá” kʼoa “tjín nichxin nga chá” (Ecl. 3:4). Tonga je Jesús kʼoati kiskotʼaya je Énle Niná, kʼoa nga kʼoakisʼin ngisaa koanmiyo je Nʼaile. Kʼianga 12 nóle, je xi tsoya ya yo̱ngo̱ tokoanxkónle “josʼin nga kinchja” nga nʼio kisʼele kjoankjíntokon, kʼoa nga nʼio nda majinle xi tʼatsʼe Niná (Luc. 2:42, 46, 47).

⁵ Kʼianga jekoanjchínga, je Jesús tsjoa kisʼe kon nga̱ kui kʼoakisʼin jmeni xi sasénle Niná. Tobʼelañá, kinchja̱yajinle je énnda chjotse “xi yo̱ma̱” kʼoa tsakasenkao “je xi xka̱ kjoan”, nga̱ kui xi koanmele je Nʼaile nga kʼoasʼin (Luc. 4:18). Ya Salmo 40:8 kʼoatso jokisʼe kon je Jesús. Itso: “Kʼianga kʼoasʼian josʼin nga meli, ji Ninána, kui xi simetokoan”. Je Jesús nʼio tsjoake koan nga kitsoyale chjota xi tʼatsʼe Niná (tʼexkiai Lucas 10:21). * Ñandia kʼianga jngo chjoón kitsoyale jósʼin tjínnele jchaxkoán je Niná. Xijekoan, i kitsole je chjotale: “Jé xi bakjennia, nga kʼoasʼian josʼin mele je xi kisikasénna kʼoa nga sijngoa xále” (Juan 4:31-34). Nga tsjoake koan je Niná kʼoa kao chjota, kui xi tsjoa tsakáya kon. Kʼoati kui xi tsjoa koaya tokuin tsa kʼoasʼiain.

6. Ánni nga ndatjínsíni nga kʼoéyanajmílai jmeni xi tjínndajinli nga sʼiain nichxin xi sʼa nroa je ndsʼee xi ñaki to xále Niná tjíosʼín.

⁶ Nʼio nkjín ndsʼee xi kʼia tsakʼétsʼiakao nga sʼa xti nga precursor koan, kʼoa nʼio tsjoa kisatio kon nga kʼoakisʼin. Koaan kʼoéyanajmílai jmeni xi meli sʼiain nichxin xi sʼa nroa. Proverbios 15:22 itso: “Alikui ndasʼin bichómani jngo kjoa jñani tsín nkjín ma xi fáoyani, tonga ndasʼin bichótsjoá jñani nkjín ma xi tsjoá kjoafaʼaitsjen”. Je ndsʼee jebi kʼoajin kuitsoli nga basenkaoná kʼianga ñaki to xále Niná nʼia. Je Jesús nʼio tse xi koanle kʼianga tsakʼejnakao je Nʼaile ya ngʼajmi. Tonga nkjínsa koya xi koanle kʼianga kitsoyason i̱ Sonʼnde. Tobʼelañá, nʼio tsjoa kisʼe kon kʼianga kitsoyale chjota je Énle Niná kʼoa nga kixi koan kʼianga kjoa jaʼatojin (tʼexkiai Isaías 50:4; * Heb. 5:8; 12:2). Kataʼyala kʼaa jmeni xi  tsjoa koaya tokuin kʼianga ñaki to xále Niná sʼiain.

7. Ánni nga nʼio nkjín xti xi tsjoakeni nga chjotale Cristo síkao je chjota.

⁷ Je Jesús kʼoakitso nga tjínnele kjuinkjasjee je chjota kʼoa kʼuínyalee jokjoantjínni je xi kixi (Mat. 28:19, 20). Kʼianga kʼoasʼiain jokitso je Jesús, tsjoa sʼe̱ tokuin kʼoa jé Niná chʼa̱sjengʼai. Tonga nichxin machjén nga koa̱nná ndasʼin si̱xálee Niná. Jngo ndsʼee xi kʼia tsakʼétsʼiakao nga sʼa xti nga precursor sʼin kisixá xi Timothy ʼmi, i kitso: “Nʼio tsjoake̱ nga ñaki to xále Jeobá sʼian, nga̱ kʼoasʼin bakonile nga tsjoake̱. Nga títjon nijngojin estudio kisʼena. Tonga nga koanskanni, xin ʼnde kʼia, kʼoa nkjín estudio kisʼena ninga kje jngo sájin nga ya tijna. Jngo chjota xi kixinyale Biblia ki je kjoajtín. Xijekoan, jao sá kia je Skuela xi síchjine je ndsʼee xi sʼa tjíotoje, * kʼoa xin ʼnde kinikasénna. Kʼoa ya ʼnde jebi, ño estudio tsakʼetsʼiakoa. Nʼio tsjoa sʼena nga xinyale je chjota jokjoantjín xi kixi nga̱ ʼbeña josʼin basenkao je nganʼiotsjele Niná nga síkʼantjaiya yaole” (1 Tes. 2:19).

8. Jméni xi tjíosʼín kʼa je ndsʼee xi sʼa xti nga ngisasa nkjín chjota tsoyale je Énle Niná.

⁸ Tjínkʼa je xti xi kjaʼaí én tjíokotʼaya. Tobʼelañá, jngo ndsʼee xi Norteamérica tsʼe xi Jacob ʼmi, itso: “Kʼianga ñato nóna, nʼio nkjín je xti xi ñatjen tsakitsomaijin je skuela xi naxinandá Vietnam tsʼe. Kui xi koanmena nga xínyale xi tʼatsʼe Jeobá, kuinga kui én kiskotʼayaña je én xi male. Kʼoasʼin koannina nga kisingósonkoa je Xo̱n xi Bájinkonná kʼianga én inglés kao nga én vietnamita. Kʼoati kisimiyoa je ndsʼee xi ya fi je jtín kʼianga én vietnamita xi ya chrian ndʼiana tíjna. Kʼianga tosʼa 18 nóna precursor sʼin kisixá. Xi koanskanni, yaa kia je Skuela xi síchjine je ndsʼee xi sʼa tjíotoje. Je skuela jebi nʼio tsakasenkaona tʼatsʼe jme xá xi tisʼian ya jtín jñani precursor sʼin tisixá kʼoa toʼanña xi chjotajchínga sʼin tijna. Nʼio nkjín xi ya tsʼe xi tokʼoamale nga jemana je énle. Nchjaana ya niʼyale, kʼoa nkjín xi saʼnda estudio tsjoale. Tjínkʼa xi jekisʼenngindá” (tingósonkoai Hechos 2:7, 8).

9. Jósʼin koasenkaoli nga kʼuínyalai chjota je Énle Niná.

⁹ Kʼianga kʼuínyalai chjota je Énle Niná nʼio tse xi koa̱nli. Tobʼelañá, koaanli nga ngisa nda si̱xái, josʼin nga nda kuinókjoai, nga tsín jao kʼoái tokuin kʼoa jchaní josʼin chja̱kaonajmí je chjota (Prov. 21:5; 2 Tim. 2:24). Tonga kʼoati tsjoa sʼe̱ tokuin nga kʼuínyalai je chjota, nga̱ koasenkaoli nga ngisa nda jchai jmeni xi tso je Biblia tʼatsʼe jmeni xi makjainli. Kʼoa xi ijngosani, ngisaa nda koa̱nli josʼiain nga je Niná si̱xákoai (1 Cor. 3:9).

10. Ánni nga tsjoa sʼeni tokuin nga chjotale Cristo nikoai je chjota ninga tsín nanda ʼya xi mandosinle je Énle Niná ya jñani tijnai.

¹⁰ Jósʼiain kʼiatsa ya tijnai jñani tsín nanda nrʼoé chjota je Énle Niná. Ninga kʼoalani, tsjoa sʼe̱ tokuin nga chjotale Cristo si̱koai je chjota. Ánni, nga̱ ngatsʼiaa ñatjen tinixáñá nga tibijnyisjé je chjota xi nda tjío ni̱ma̱le. Ningalani tojngo ndsʼee ska̱jin jngo chjota xi koa̱nndosinle je Énle Niná, bʼainganʼioñá nga fasjee kʼoa tsjoa satío tokoán. Tobʼelañá, jngo ndsʼee xi Brandon ʼmi, ñajan nó nga precursor sʼin kisixá ya jñani nʼio tochoa chjota mandosinle je Énle Niná. Itso: “Nʼio tsjoake̱ nga xinyasoan je énnda chjotse, nga̱ jé Jeobá xi mele nga kʼoasʼiaan. Kʼiaa tsakʼetsʼiakoa nga precursor sʼin kisixá kʼianga jejetʼana skuela. Kao kjoatsjoa tsjoanganʼiole je ndsʼee xi sʼa xti xi tjío ya jinjtín kʼoa tsjoa sʼe tokoan nga ʼbe josʼin mataja je kjoamakjainle. Kʼianga jekia je Skuela xi síchjine je ndsʼee xi sʼa tjíotoje, xin ʼnde kinikasénna nga precursor sʼin kisixá. Jotjín mani je chjota xi estudio tsjoale,  nisajngojin xi fisʼenngindá, tonga tjíofisʼenngindá kʼa je chjota xi kʼoati tjíobʼaile estudio. Nʼio tsjoa tjín tokoan nga kʼoasʼin tsakʼendajian nga ñaki to xále Niná sʼian” (Ecl. 11:6).

11. Jósʼin tsjoánganʼio je xti nga síxále Niná.

¹¹ Nʼio nkjín koya josʼin koa̱n si̱xálee je Jeobá. Tobʼelañá, nʼio nkjín ndsʼee xi ya síxá jñani sʼenda ndʼia jñani ʼyaxkón je Jeobá. Siento Ndʼia jña chotʼayá machjén. Kʼiatsa ya si̱xái nga sʼenda ndʼia jebi, tsjoa sʼe̱ tokuin kʼoa jé Jeobá chʼa̱sjengʼai. Kʼoa nga ya ñatjen nixá kao ndsʼee nʼio tsjoa sʼe tokoán. Kʼianga kʼoainganʼiui nʼio tse xi koa̱nli. Tobʼelañá, koaanli josʼin si̱xái, ndasʼin si̱xái kʼoa yaa kuisenkoai je xi kjinele xá.

12. Jmé kjoanda xi sa̱tíobasenli kʼiatsa precursor sʼin si̱xái.

¹² Jngo ndsʼee xi Kevin ʼmi itso: “Kʼianga sʼa ʼndí kjiʼe̱, kui xi koanmena nga kuicho nichxin nga ñaki to xále Niná sʼian. Precursor sʼin kisixá nga 19 nóna. Kʼianga tsakajngiʼa yaona yaa kisixákoa jngo ndsʼee xi ndʼia bʼénda. Koanna tsakate ndʼia, koanna tsakinya xo̱ntjoa kao ventana. Nga koanskanni, jao nó kisixá jña kisʼendaya Ndʼia jña chótʼayá kao ndʼiale ndsʼee kʼianga jngo huracán jaʼa. Kʼianga kisʼejinna nga nganʼio machjén ya Sudáfrica, tsakʼendaña je solicitud, kʼoa xijekoan kinokjoana. Kʼianga jeya tijna ya África xinxin ʼnde kisixá nga kisʼenda Ndʼia jña chotʼayá. Kʼoasʼin tiyuijin joni jngo familia jotjín manijin xi ya tiyojinjin je grupo xi tsʼe construcción. Ñatjen tiyoníjin, chotʼayajtínnijin je Biblia kʼoa ñatjen nixáníjin. Kʼoati nʼio tsjoake̱ nga ñatjen ʼmiyasuinjin kao je ndsʼee xi ya tsʼe. Jmeni xi tsakʼendajian kʼianga sʼa ʼndí kjiʼe̱, nʼio tsjoa tíbáya tokoan”.

13. Ánni nga tsjoa satíoni kon je xti nga ya Betel síxá.

¹³ Je ndsʼee xi kʼoasʼin tsakʼéndajin nga precursor sʼin kisixá, nʼio nkjín xi ya tjíosíxá ndʼaibi ya Betel. Kʼianga ya Betel nixá  nʼio tsjoa sʼe tokoán, nga̱ jé Jeobá nixálee. Kʼoa xi ijngosani, je xi ya tjío Betel binyakaoná kʼianga bʼainá je xi tʼatsʼe Niná tínroani. Jngo ndsʼee xi Dustin ʼmi itso: “Kʼianga ñajan nóna, kʼoasʼin tsakʼendajian nga mena ñaki to xále Niná sʼian. Kʼiaa nga jejetʼana skuela tsakʼetsʼiakoa nga precursor sʼin kisixá. Kʼoa xijekoanni jngo nó basen yaa Betel kinokjoana. Kʼoa ya Betel koanna kisixákoa je makina xi maxákao kao computadora. Je xi tsjoake̱ nga ya Betel tisixá kuinga sʼejinná josʼin tífison je Énle Niná jngo tjíjtsa Sonʼnde. Nʼio tsjoa tjínna nga Betel tisixá, nga̱ je xá xi kjima binyakao je chjota nga machriantʼale je Jeobá”.

14. Jósʼin koa̱n tjen kuijnandai nga ñaki to xále Niná sʼiain.

¹⁴ Jósʼin koa̱n tjen kuijnandai nga ñaki to xále Niná sʼiain. Xi ngisa chjíle kuinga kʼoakoa̱nkjoain josʼin mele Niná. Kui xi koasenkaoli nga ngisasa nda si̱xálai je Jeobá. Kuinga machjénni nga kjitʼa chótʼayai je Énle Niná, tikjaʼaitsjenjin jmeni xi tso kʼoa tʼai comentarioli nga satíoná kjoajtín. Nga sʼa skuela titomjai, koaan tosi tonda sʼe̱li kjoafaʼaitsjen kʼoa ngisasa nda katamali nga kʼuínyasuin. Katamandosinli je chjota kʼoa kao kjoaxkóntokon chjónangilai josʼin síkjaʼaitsjen kʼoa nda tinóʼyalai jokuitso. Ninga tsín ʼya xi kʼoakuitsoli, koaan kʼoainganʼiui nga tsje katamachon ya Ndʼia jña chotʼayá. Je Jeobá jé síchjén chjota xi nangitokon ma kʼoa xi tjíonda nga tsjoánganʼio (tʼexkiai Salmo 110:3; * Hech. 6:1-3). Je pastro Pablo koanmele nga je Timoteo koaikao nga kʼoati misionero koa̱n, nga̱ je ndsʼee nʼio ndasʼin kinchja̱ni xi tʼatsʼe (Hech. 16:1-5).

15. Jméni xi koa̱n sʼiain nga kuijnyíʼai yaoli.

¹⁵ Je ndsʼee xi ñaki to xále Niná tjíosʼín kʼoati machjén nga sʼe̱le jngo xá xi koa̱njngíʼani yaole (Hech. 18:2, 3). Tsa kʼoakoa̱nli, koaan kui chótʼayai je xá xi tsjoáʼndeli nga si̱xálai Niná. Chjónangilai je superintendente xi tsʼe circuito kao je xi precursor sʼin tjíosíxá jmé xá xi ngisa skénndiaali. Je Biblia itso: “Je Jeobá tintsjai tojmeni xi sʼiain, kʼoa jmeni xi tibʼendajin ndasʼin kuichotsjoá” (Prov. 16:3; 20:18).

16. Jósʼin koasenkaoli nga jekoa̱nskanni nga ñaki to xále Niná sʼiain nga sʼa xti.

¹⁶ Je Jeobá kui xi mele nga nda kuijnai nichxin xi sʼa nroa (tʼexkiai 1 Timoteo 6:18, 19). * Kʼianga ñaki to xále Niná sʼiain, yaa ñatjen ni̱xái kao je ndsʼee xi kʼoatisʼin tjíosíxá. Kui xi koasenkaoli nga ngisa sʼe̱li kjoafaʼaitsjen. Nʼio nkjín xi binyakao kʼianga jebixan nga ñaki to xále Niná sʼín saʼnda nga sʼa xti. Tobʼelañá, me ngatsʼi xi precursor sʼin tjíosíxá xi tojo kʼoasʼin síxá nga jebixan (Rom. 16:3, 4).

17, 18. Jósʼin bʼakaotʼale ni̱ma̱ná kao jmeni xi bʼendajiaan.

¹⁷ Jmeni xi bʼendajiaan kui bakó jotjín ni̱ma̱ná. Ya Salmo 20:4 itso xi tʼatsʼe Jeobá: “Katatsjoáli jme xi mele ni̱ma̱li, kʼoa katabitjoson jme xi tibʼendajin”. Kuinga ndatjínsíni nga si̱kjaʼaitsjenjin jmeni xi sʼiain nichxin xi sʼa nroa, jmeni xi tísʼín Niná nichxin xi tiyoaa ndʼaibi kʼoa jmeni xi koa̱n sʼiain nga si̱xálai. Xijekoa̱n, tʼendajin nga kui kʼoasʼiain jmeni xi sasénle je Jeobá.

¹⁸ Nga je Jeobá si̱xálai nʼio tsjoa sʼe̱ tokuin, nga̱ kʼoasʼin si̱chjáin nichxinli nga je chʼa̱sjengʼai. Kʼoa je Biblia itso: “Nʼio nda katasʼe tokuin xi tʼatsʼe Jeobá, kʼoa jé tsjoáli jme xi mele ni̱ma̱li” (Sal. 37:4).