KʼIANGA siglo 1, je chjotale Cristo tsakʼénele yaole nga kitsoyason jokji kicho nganʼiole “je énnda xi tʼatsʼe je kjoatéxomale ngʼajmi” (Mat. 24:14). Saʼnda tjínkʼa xi xin naxinandá kikakóyason. Tobʼelañá, je pastro Pablo ki ya jñani Turquía ʼmi ndʼaibi. * Jao jmi nó koanskanni, nga nó 2014, kʼoasʼin kisʼendajin nga nkjín katamani xi koaitsoyason ya Turquía. ʼYáni xi ki kʼoa ánni.

Ya Turquía tsʼato 2,800 mani xi tsoyason, tonga jankan kao xjaʼaonñola miyón chjota tjín. Jebi kui xi tsonile nga 28,000 chjota bʼakaole nga jngó jngó xi tsoyason. Nʼio tochoa mani chjota xi jetsakʼinyasonle. Kʼoa kui xá kisʼendajinni nga nkjín koa̱nni xi koaitsoyason ʼnde jebi ánni nga nkjín chjota kʼuínyanile. Je ndsʼee xi ki ya Turquía xinxin naxinandále kʼoa 550 mani xi én turco nchja̱. Jósʼin kichomani jebi.

Nʼio nkjín chjota tsakʼinyasonle. Jngo jtín xi ya Estambul tíjna i kitso: “Nga nʼio nkjín testigole Jeobá tsabe je chjota kiskonanginajin tsa jngo kjoajtíntse tíjnanajin”. Kʼoa ya naxinandá Izmir, jngo jtín xi i̱ kitso: “Jngo chjota xi ya síxá jña fayo taxi i kitsole jngo xi chjotajchínga sʼin tíjna: Jméni xi kjima. A ngisaa nʼio tiʼmiyason”. Je chjota tsabee nga kʼoasʼin tsakʼinyason.

Je ndsʼee xi xin naxinandále tsjoa kisatiole nga kitsoyason. Je Steffen, xi Dinamarca tsʼe i kitso: “Nga nyaon nyaon, kisatejinña chjota xi kjesa ʼya xi tsoyajinle tʼatsʼe Jeobá. Ñaki sʼa kixinyale joʼmi Niná”. Jngo ndsʼee xi Francia tsʼe, xi Jean-David ʼmi i kitso: “Nkjín ora jetʼaninajin nga tojngo calle. Kʼoa me tongatsʼi chjota nga kje bejin je testigole Jeobá. Ngakjijnda ndʼia jña kinokjoaijin nda kichobanajmíjin, tsakakolaijin video kʼoa tsakjayolaijin xo̱n”.

Je xi 550 koanni je ndsʼee 60,000 xo̱n kisikáyo xi jao xomana. Kʼianga kʼoasʼin kisʼendajin nga tsakʼinyason nʼio nkjín chjota tsakʼinyale.

 Ngisaa koanmele kitsoyason. Kʼianga kʼoasʼin kisʼendajin nga tsakʼinyason nʼio tsjoa kisatiole je ndsʼee xi ya ʼndele. Nʼio nkjín xi kʼoasʼin kisikjaʼaitsjen nga ngisa tse sixále Niná kʼoa jngo nó nga 24% tsakin je xi precursor regular sʼin kisixá kʼianga jekichotsoyason je ndsʼee xi xin naxinandále.

Je ndsʼee xi xin naxinandá kini nga kitsjoánganʼio ya Turquía, kʼoakitso nga nʼio tsakinyakao josʼin kitsoyason nga jekichoni naxinandále. Jngo tichjaa xi Alemania tsʼe xi Şirin ʼmi itso: “Je ndsʼee xi ya tsʼe Turquía nʼio male josʼin fákao chjota tojñani nga fi. Nʼio ñʼai mana an tsakai nga kʼoasʼian nga̱ likui tso tokoan nga fakoa chjota. Tonga tsakasenkaona nga kʼoasʼin kia ya Turquía, je choa̱le ndsʼee kʼoa nga tsakʼetsʼoale Jeobá. Saʼnda tsakjayoña tratado ya metro. Alikui tiñʼaimanina ndʼaibi nga fakoa chjota”.

Je ndsʼee Johannes, xi Alemania tsʼe itso: “Ngisaa koansana josʼin kixinyasoan. Je ndsʼee xi ya tsʼe Turquía nʼio bʼénele yaole nga tsoyale tojotjín chjotani kʼoa tsoyale tojñani nga tjío. Kʼoati kisʼian kʼianga jejeʼe̱ña i̱ Alemania. Kʼoa ngisaa nʼio nkjín chjota xinyasonle ndʼaibi”.

Jngo tichjaa xi Francia tsʼe, xi Zeynep ʼmi itso: “Nʼio tsakasenkaona nga kʼoasʼin kixinyasoan, ngisaa nda xinyasoan ndʼaibi. Ngisaa nʼiojian kʼoa ngisaa sinʼiotʼa Jeobá”.

Ngisaa jtín tsakatio je ndsʼee. Nga tsakakó kjoatsjoacha kʼoa nga jtín tsakatio je ndsʼee alikui kichajin. Je Jean-David, xi jesa kanikʼaxkiaa itso: “Nʼio nda kiskoeyanajin je ndsʼee. Jo familiale kʼoa jo miyole kisikaonajin. Kitsjoaʼndenajin nga ya tsakiyuijin ndʼiale. ʼBeña nga tojngo jtín mañá kao ngatsʼi ndsʼee xi tjío jngo tjíjtsa Sonʼnde nga̱ kʼoatso je xo̱n xi nichjén, tonga ndʼaibi ñaki xkoan tsaʼbeña nga kʼoatjín. Ngisaa nʼio tsjoa kisʼe tokoan nga choʼndale Jeobá ma. Kʼoa tsjoale kjoanda Jeobá tʼatsʼe jebi”.

 Jngo tichjaa xi Francia tsʼe, xi Claire ʼmi itso: “Tojngo familia koainjin ngatsʼijin ninga tjínkʼa xi Alemania tsʼe, xi Dinamarca, Francia kʼoa Turquía tsʼe. Joxi kao borrador kisichajonni Niná je chinróle naxinandá”.

Je Stéphanie, xi Francia tsʼe itso: “Nga kʼoasʼin tsangínkʼinyasuinjin koanjinnajin nga tsínkui xi jtín sʼin síkatíoná je én xi nokjoaa kʼoa jñani tsaan, je xi jtín síkatíoná kuinga tsjoachaa je Jeobá”.

Nʼio nkjín ndsʼee xi kʼoasʼin kitsoyason xi koanmele nga ya kikatio ya Turquía kʼianga ya tsjoánganʼio. Tjínkʼa xi jeya tjío kʼoa nʼio bʼaile kjoanda jme xá xi tjíosʼín.

Tobʼelañá, jngo ʼnde jñani to 25 mani xi tsoyason. Nkjín nó nga tojngo koanni xi chjotajchínga sʼin tsakʼejna. Tonga nó 2015, jaon mani ndsʼee xi Alemania kao Países Bajos tsʼe xi ya kitsjoánganʼiole. Nʼio tsjoa koanle je ndsʼee nga kʼoasʼin tsakʼainganʼiole.

Jótjío kon je ndsʼee xi jeya tjíosíxále Niná ya Turquía. Tjín jmeni xi ñʼai kjimale tonga kʼoati nʼio tse kjoanichikontʼain tjíosokóle. Kataʼyala jotso kʼa je ndsʼee.

Jngo ndsʼee xi jetjínle chjoón xi Federico ʼmi, xi 40 nóle yaa kikatio España. Je ndsʼee itso: “Nga tsín nkjín tsojmi tjínnajin to ndái tiyuijin kʼoa basenkaonajin nga kui ngisa kuenta nʼiaijin jme xi ngisa chjíle”. A kʼoatso je ndsʼee nga koa̱n kʼoasʼin si̱xá. Jaon. Itso: “Kʼianga xin naxinandá mangián nga binyakoaa je chjota nga katabe Jeobá, joxi jé Jeobá tinintsjaa yaoná kʼoa ʼyañá josʼin síkuindaná”.

Je Rudy, jngo ndsʼee xi kʼoati jetjínle chjoón, xi ya Países Bajos tsʼe kʼoa jeme 60 nóle itso: “Nʼio  tsjoa tjío tokuinjin nga ya tinixáijin jñani nʼio machjén xi tsoyason kʼoa nga ʼmiyalaijin tojotjín chjotani xi kjesa ʼmiyajinle. Nʼio tsjoa manajin nga ʼyaijin jokji tsjoa satío kon kʼianga be jokjoantjínni xi tʼatsʼe Niná”.

Je Sascha kʼoati jetjínle chjoón kʼoa jetsʼato 40 nóle kʼoa yaa kikʼejna ya Alemania. Ndsʼee jebi itso: “Kʼianga bitjoxinyasoan, kajinntsjaiña chjota xi tokʼia nrʼoé títjon tʼatsʼe Niná. Nʼio tsjoa sʼe tokoan nga xinyale tʼatsʼe Jeobá”.

Jngo tichjaa xi Atsuko ʼmi, xi ya Japón tsʼe, kanxjaʼaonla nóle kʼoa itso: “Ngasʼa kui xi mena tsakai nga jekatafaʼai je Armagedón. Tonga nga jeya kikatejna ya Turquía, tsjoale kjoanda Jeobá nga tsejta kjima. Nga ʼbe josʼin tíbándiaale Jeobá jmeni xi kjima ngisaa mesana koa̱nchriantʼale”.

Je Alisa, xi Rusia tsʼe kʼoa xi jetsʼato 30 nóle, itso: “Kʼianga kʼoasʼin tisixále Jeobá tiʼbeña nga nʼio nda chjota (Sal. 34:8). Je Jeobá ali tsa to Nʼainajin ma, kʼoati miyona ma kʼoa ngisasa nda tiʼbe jokjoan kʼianga jme xi mana. Tísʼena kjoatsjoa kʼoa nʼio tse kjoanichikontʼain tísokóna”.

Nga kʼoasʼin kisʼendajin nga tsakʼinyason ya Turquía, nʼio nkjín chjota tsakʼinyale tʼatsʼe énnda chjotse. Tonga tojo nkjínsa ʼnde tjín jñani kje ʼmiyasonjin. Je ndsʼee xi ya kikatio ya Turquía nyaon nyaon masjaile chjota xi kjesa ʼya xi tsoyajinle tʼatsʼe Jeobá. A meli ji nga ya kʼuínnixái jñani ngisa machjén xi tsoyason. Tsa jaon, tikjaʼaitsjain jme xi tso ya Juan 4:35: “Chjóʼaingio xkon, chótsenlao sonʼnde, nga̱ jejichotaon nichxinle nga sʼe̱xkó”. A koaan kʼoainganʼiui jñani nkjín chjota tjín xi sʼa kʼuínyasonle. Tsa jaon, tʼetsʼiakaokjoanni ndʼaibi nga tijnandai nga kʼoasʼian. Tsa ngisasa tse kʼuínyasuin “jña saʼnda nga fetʼa sonʼnde” nʼio tse kjoanichikontʼain so̱koli (Hech. 1:8).