1. Jméni xi nimetokoán ngatsʼiaa.

KʼIATSA jngo chjota ska̱jiaan xi ʼyaxkoaan, jósʼe̱ tokoán kʼiatsa tsín faʼaitsjenle joʼminá kʼoa tsa saʼnda kʼoakuitso nga tsín bexkonná. Bajin sa̱tío tokoán. Ánni. Nga̱ ngatsʼiaa kui xi mená nga katabexkonná xi ngikʼa kʼoa nga chjí kataʼyakonná (Núm. 11:16; Job 31:6).

2, 3. Jókoa̱n kʼiatsa kui si̱metokoán nga nʼio kataʼyaná (chótsenlai sén xi faʼaitʼa ibi).

² Nga chjotajée maa, tsakui nichxin si̱kʼatoné choa̱le tʼatsʼe josʼin mená nga skoe̱konná xi ngikʼa. Xi ijngosani, jmeni xi chon je sonʼnde tsakui nichxin kui xosikaoná nga kui si̱metokoán nga nʼio kataʼyaná. Kʼianga kʼoama alikui je Nʼainá xi tíjna ngʼajmi bitjongʼa (Apoc. 4:11).

³ Kʼianga nichxinle Jesús, tjínkʼa je chjotatítjonle relijión xi koanmele nga nʼio kataʼyale. Kuinga i̱ kitsonile Jesús je  chjotale: “Tikuindalao yaono chjota skribano xi tsjoale bʼamje kao najñojnro, kʼoa tsjoale nga chjota sitiʼndale ya ndi̱tsi̱nbe, kʼoa mele je yáxile xi títjon ya ndʼia sinagoga, kʼoa je ʼnde xi títjon ya jña kjensʼuí”. Kʼoa i kitsosale: “Je xi kʼoakjoan ngisa tse kjoañʼai sʼe̱le” (Luc. 20:46, 47). Tonga nʼio tsabechjí jngo ʼndíchjoónkʼan xi toʼi̱natjín tao̱n kisikʼéjna nga̱ tsínkui tsakásjai nga chjota kʼoasjengʼa (Luc. 21:1-4). Je Jesús kʼoasʼin kisikjaʼaitsjen josʼin síkjaʼaitsjen je Jeobá. I̱ kjoaʼmiya jebi kui chótʼayajiaan jósʼin bekon Niná kʼianga ngʼa bʼasje yaole je chjota.

4. Jméni xi ngisa tjínle kjoandosin nga kjoásjee, kʼoa ánni.

⁴ Jméni xi ngisa tjínle kjoandosin nga kjoásjee. Ali tsakuijin jmeni xi tjín sonʼnde, jolani je kjoachjine, negosio kʼoa kao kjoasʼetsaojin. Kʼianga kui kinchja̱ni je Pablo xi tʼatsʼe jebi, i kitso: “Tonga ndʼaibi, nga jeʼyao Niná, tosa je Niná xi beno, ánni nga si̱kʼófayatʼa ngindianilao je kjoakostumbre xi yo̱ma̱ xi tsínle nganʼiojin” (Gál. 4:9). Nʼio tseni kjoanda nga koa̱n skoe̱xkonná je Niná xi batéxomale Sonʼnde kao ngʼajmi. Je Jeobá bená nga jngó jngoá, tsjoakená kʼoa mele nga miyole koaan. Je Jeobá toxá kʼoasʼin kisindaniná nga koa̱n miyole koaan (Ecl. 12:13, 14).

5. Jmé xi tjínnele sʼiaan nga miyole Niná koaan.

⁵ Je Moisés kui xi koanmele nga ngisasa nda skoe̱xkon je Niná. Kʼoa je Jeobá i kitsole: “Jmeni xi kasi kʼoati kʼoasʼian, nga̱ nda tijnai ngixkoan kʼoa nda ʼbexkonle kao jaʼaínli” (Éx. 33:12-17). Kʼianga nda bexkonná je Jeobá nʼio tse kjoanichikontʼain sokóná. Tonga jmé xi tjínnele sʼiaan nga miyole Niná koaan. Machjén nga tsjoacha koaan kʼoa kʼoaitʼalee yaoná (tʼexkiai 1 Corintios 8:3). *

6, 7. Jméni xosikaoná nga si̱chaa je kjoamiyo xi tjínná kao Jeobá.

⁶ Machjén nga si̱kuindaa je kjoamiyo xi tjínná kao Nʼainá xi tíjna ngʼajmi. Tojo kitsole Pablo je chjotale Cristo, tjínnele si̱kuindaa yaoná nga tsín choʼndale koaan jmeni xi tjín sonʼnde, xi tsín jme chjíle, jolani tsa nʼio ngʼa kʼoasjená je chjota (Gál. 4:9). Je chjotale Cristo xi kiskile Pablo ndasʼin tsakatio ngixko̱n Niná. Tonga kʼoakitsole nga kui tsakásjai ijngokʼa tsojmi xi tsín jme chjíle, joxi ini kitsole: “Kʼianga jenda tinixálao Niná tsakai, ánni nga kui kʼoatinʼia ijngokʼaño jmeni xi tsín jme chjíle xi jekinikatio”.

⁷ Kʼianga tsaʼyaa xi tʼatsʼe Niná, tsakui nichxin alikui kui tsakjasjee nga nʼio kataʼyaná i̱ Sonʼnde, tojo kisʼin je Pablo (tʼexkiai Filipenses 3:7, 8). * Tsakui nichxin tsín tikui tsakasjeñá nga universidad chótʼayá, nga nda xá sʼe̱ná kʼoa nga tse tao̱n kuinjená. Kʼoa tsakui nichxin nda koanná kinikjanee kʼoa tsa nda koanná kiniská, tochajinle nʼio tse tao̱n kisʼená kʼoa nʼio tsaʼyaná. Tonga kinikatíoñá ngayeje jebi (Heb. 11:24-27). Kʼoa ndʼaibi, a kʼoasʼin nikjaʼaitsjeen nga  tse xi kinichaa. Tsa kʼoasʼin ni̱kjaʼaitsjeen kuijin xosikaoná nga kui si̱metokon ijngokʼá je tsojmi xi tsín jme chjíle.

8. Jméni xi koasenkaoná nga tosi tonda kui kjoásjee nga ndasʼin skoe̱xkonná je Jeobá.

⁸ Jósʼiaan nga tosi tonda kui kjoásjee nga nda skoe̱xkonná je Niná. Jaola koya kataʼyaa. Xi títjon, machjén nga si̱kjaʼaitsjenjiaan nga je Jeobá ndasʼin bekon ngantsjai je choʼndale xi kixi fitʼale (tʼexkiai Hebreos 6:10; * 11:6). Nʼio bechjí je choʼndale nga jngó jngó. Nga̱ “je Jeobá bení je xi tsʼe” (2 Tim. 2:19, TNM). Kuenta sʼín je chjota xi kixi kʼoa basenkao nga kjoa faʼatojin (Sal. 1:6; 2 Ped. 2:9).

9. Tikʼaxki̱ kʼai jósʼin tsakakó je Jeobá nga kuenta kisʼin je naxinandále.

⁹ Jósʼin bakóle Jeobá je naxinandále nga kuenta sʼín (2 Crón. 20:20, 29). Si̱kjaʼaitsjenjinla josʼin tsakʼasjentjai je chjota israelita ya ndáchikon Ní kʼianga kitjenngile je chjotakjoajchánle faraón (Éx. 14:21-30; Sal. 106:9-11). Kʼianga kʼoasʼin tsakʼasjentjai Jeobá je naxinandále nʼio tsaʼyale, kʼoa ninga jeñachan nó jaʼato, tojo kui kinchja̱ni je chjota xi ya tsʼe jmeni xi koan nga kui nichxin (Jos. 2:9-11). Kʼoa nga jenʼio machrianle nga kʼoetʼale naxinandále Niná je Gog xi tsʼe Magog, sínʼio tokoán nga kui nikjaʼaitsjenjiaan josʼin tsakʼasjentjai Jeobá je naxinandále nichxin kjoatse (Ezeq. 38:8-12). Kʼianga kjoaʼaí nichxin jebi, nʼiojin tsjoa sa̱tío tokoán nga je Jeobá tsakjasjee kʼoa nga tsínkui jmeni xi chon sonʼnde tsangintjenngilee.

10. Jñánile xi majaoni koya xi machjén nga si̱kjaʼaitsjenjiaan.

¹⁰ Xi majaoni koya, nkjín koya josʼin bakóná je Jeobá nga kuenta sʼínná. Alikui jme kjoanda tsjoále je chjota xi tokui kʼoasʼínni xi ndatjín kʼianga kjaʼaí xi katabe, nga̱ je Jesús kʼoakitso nga jetjíosokóle chjíle (tʼexkiai Mateo 6:2-4). * Tonga kʼoati kitso nga je Nʼaile be ʼyani xi kui kʼoasʼín xi ndatjín ninga tsín be xi kjaʼaí chjota. Kʼoa chjota jebi jé Jeobá tsjoále chjíle. Kataʼyala kʼaa choa̱.

11. Jósʼin kisokole kjoanda ngixko̱n Jeobá je María.

¹¹ Je Jeobá jngoo tsotixo̱ngó kiskoejin xi María tsakʼin kʼianga je xi na̱le koanni je Jesús kʼianga jaʼai i̱ Sonʼnde. Yaa Nazaret tsakʼejna, jngo naxinandá xi kjin tíjnale Jerusalén kao je yo̱ngo̱ (tʼexkiai Lucas 1:30, 31). * Ánni nga je kiskoejinsíni. Je ánkje Gabriel kʼoakitsole je María nga kisokole “kjoanda ngixko̱n Niná”. Je María tsakakó nga kisʼele kjoamakjain xi kao Niná kʼianga tsakjákaonajmí je Elisabet, xi xínkjín koanni (Luc. 1:46-55). Je Jeobá nʼio chjí tsabekon je María kʼoa kuinga kitsjoanile kjoanda jebi.

12, 13. Jósʼin tsaʼyatokon je Jesús kʼianga kitsin, kʼoa kʼianga kikao je xijchále ya yo̱ngo̱.

 ¹² Kʼianga jekitsin je Jesús alikui je tsakʼéyanajmíle Jeobá je chjota xi tsakatéxoma ya Jerusalén kʼoa kao xi tsakatio ya Belén. Tosaa ánkje kisikasén kʼianga kʼoakitsole je chjota xi barré síkuinda kʼianga jekitsin je Jesús (Luc. 2:8-14). Je chjota xi barré síkuinda kikotsenle (Luc. 2:15-17). Je María kao José nʼiojin tsjoa kisatiole kʼianga kʼoasʼin chjí tsaʼyatokon je Jesús. Si̱kjaʼaitsjenjinla josʼín je Jeobá kʼoa josʼín je Na̱i. Tobʼelañá, jé Na̱i xokisʼin nga je chjota xi niño kotʼayason kikonle je Jesús kao xijchále, kʼoa kisʼejinle je chjota xi ya Jerusalén tsʼe (Mat. 2:3). Kʼianga nkjín chjota kisʼejinle nga kitsin je Jesús, nʼio nkjín xtiʼndí kinikʼien nga kui nichxin (Mat. 2:16).

¹³ Kʼianga jeñachan nichxin jaʼato nga kitsin je Jesús, je María jngoo kjoatjao kikao xi je Jeobá tsjoátʼale ya yo̱ngo̱ xi tíjna ya Jerusalén, xi ñajanla kilómetro kjin tíjnale Belén (Luc. 2:22-24). Kʼianga tjíofi ya yandiaa, tochajinle kui kiskonangile yaole María tsa koakole kjoaxkóntokon naʼmi je Jesús tʼatsʼe jmeni xi sʼin nichxin xi nroaján. Kisakole kjoaxkóntokon je Jesús, tonga alikui kʼoasʼin kisakole josʼin kisikjaʼaitsjen je María. Je Jeobá jngoo chjota kisichjén xi kixi koan, xi Simeón tsakʼin, kʼoa kao jngo ʼndíchjoónkʼan xi Ana tsakʼin xi 84 nóle, xi kitsoya nga jéní Jesús je Mesías xi tíchoyale (Luc. 2:25-38).

14. Jmé kjoanichikontʼain kitsjoale Jeobá je María.

¹⁴ Je Jeobá nʼio chjí tsabekon je María nga kʼoasʼin kisikuinda kʼoa kisijchá je ʼNdíle. Tobʼelañá, jé Jeobá xi koanmele nga kisʼetʼaxo̱n ya Biblia jmeni xi kisʼin je María. Tonga alikui ya tsakʼamjekao je Jesús xi jan nó basen tsakakóyason. Tochajinle ya tsakʼejna ya Nazaret, nga̱ jechjoónkʼan nga kʼia. Kʼoa alikuijin kisʼele kjoanda xi kisʼele je chjota xi ya tsakʼetsomakao je Jesús. Tonga alikui jao tjínná nga ya tíjna kʼianga kinikʼien je Jesús (Juan 19:26). Kʼoati ya tsakʼejnakao je chjotale Jesús ya Jerusalén nga kjesa sʼejnajin je sʼuí Pentecostés nga nó 33, kʼianga tsakʼaile nganʼiotsjele Niná (Hech. 1:13, 14). Je María kui kjoanda tsakʼaile nga ya ngʼajmi koai, xi tsonile, yaa ngʼajmi kʼoéjnakao je Jesús ngantsjai nichxin. Nʼio tse kjoanda tsakʼaile je María nga kixi kitʼale Niná.

15. Jósʼin tsabechjí Jeobá je Jesús kʼianga tsakʼejna i̱ Sonʼnde.

¹⁵ Je Jesús alikui kui xi koanmele nga nʼio ndasʼin kʼoéjna ngixko̱n chjotatítjonle relijión kʼoa tsa ngixko̱n chjota polítiko xi tjín nga kui nichxin. Je xi koanmele kuinga nda kʼoéjna ngixko̱n je Jeobá. Nʼiojin tsakasenkao je Jesús nga chjí tsabekon je Jeobá, kʼoa kʼoasʼin tsakakónile nga jan kʼa kinoʼyale je jta̱le Niná ya tjen ngʼajmi. Kʼianga jekisʼenngindá je Jesús ya xo̱ngá Jordán, je Jeobá i kitso: “Jébi ʼNdína xi tsjoake̱, jonda sʼekoan xi tʼatsʼe” (Mat. 3:17). Kʼianga kʼoakoan, tojé Juan Bautista xi kʼoati kinrʼoé én jebi. Kʼoa jngola nó tongini nga kje nikʼienjin je Jesús, jan chjotale xi kʼoati kinrʼoéle je Niná kʼianga i̱ kitso: “Jebi ʼndína xi tsjoake̱. Jonda sʼekoan xi tʼatsʼe. Tinóʼyalao nga je” (Mat. 17:5). Kʼoa xi koanjanni kʼa nga kinoʼyale je jta̱le Jeobá, kʼiaa nga tsakjákao  ijngokʼa je Jesús, tongini nga kje nikʼienjin (Juan 12:28).

16, 17. Jmé kjoanda kitsjoale Jeobá je Jesús.

¹⁶ Je Jesús koanjinle nga nʼio tse kjoa kjoaʼatojin, nga énndiso sʼe̱ne kʼoa nga ni̱kʼien. Ninga kʼoalani, kʼianga tsakʼétsʼoa kui kisijé nga kui kʼoakatama josʼin mele Nʼaile (Mat. 26:39, 42). Kichokjoajinle ngayeje kjoañʼai xi jaʼatojin, kʼoa alikui kui tsakásjai nga ndasʼin jchale i̱ Sonʼnde, kui kʼoakisʼin josʼin koanmele je Nʼaile (Heb. 12:2, TNM). Jósʼin tsakakó Jeobá nga chjí tsabekon je Jesús.

¹⁷ Kʼianga tsakʼejna Jesús i̱ Sonʼnde, kʼoakitso nga mele sʼe̱ ijngokʼale je kjoajeya xi kisʼele nga tsakʼejna ya ngʼajmi (Juan 17:5). Tonga tsínkui xi kitsonile nga jngo xá xi ngʼa tíjna koanmele. Tonga je Jeobá tse kjoanda kitsjoale kʼianga kisikjaʼáyanile kʼoa jngo xá xi ngʼa tíjna kitsjoale. Tonga kʼoati kui kjoanda kitsjoale nga tsín tikʼia kuiyáni (Filip. 2:9; 1 Tim. 6:16). * Nʼio tse kjoanda tsakʼaile nga kixi koan.

18. Jméni xi koasenkaoná nga tsínkui kjoásjee jmeni xi tjín sonʼnde.

¹⁸ Jmé xi koasenkaoná nga tsínkui kjoásjee jmeni xi tjín sonʼnde. Kuenta sʼiaan nga je Jeobá chjí bekon ngantsjai je choʼndale xi kixi fitʼale, kʼoa nkjín koya josʼin bakóniná kjoandale. Alikui ʼyaa jme kjoanda xi tsjoáná nichxin xi nroaján. Kʼoa alikui si̱chajiaan nga tochoasa nichxin tíjnale sonʼnde jebi (1 Juan 2:17). Je Jeobá alikui sichajin je xá xi tinʼia kʼoa kao je kjoatsjoacha xi bakolee je jaʼaínle (Heb. 6:10). Tsakui nichxin tsín majinná ndʼaibi josʼin tsjoáná Jeobá je kjoanichikontʼain nichxin xi nroaján.