“NʼIO tse xi majchá, tonga tochoa mani xi síxá. Tʼetsʼoalao tsokʼoa je Naile xi tsʼe je xi kjimajchábe nga katasíkasén chjota xi síxá xi tʼatsʼe xi majchále” (Luc. 10:2). Jela 2,000 nó tjínle nga kʼoakitso Jesús, kʼoa én jebi tíbitjoson ya naxinandá Myanmar. Ánni. Kuinga to 4,200 mani publicador xi tjín kʼoa 55 miyón mani chjota xi tsoyasonle.

Je Jeobá tíbasenkao je ndsʼee xi xin naxinandále nga ya katafitsjoánganʼio ya naxinandá xi tíjna ya Asia nga kuitsoyale xi tʼatsʼe Niná je chjota xi ya tsʼe. Ánni nga xin naxinandá tjíofitsjoánganʼioni je ndsʼee. Jméni xi kisʼin nga koan xin naxinandá kikationi. Jmé kjoanichikontʼain xi tjíosokóle. Kataʼyala.

Jela jngo jao nó tjínle nga jngo ndsʼee xi precursor sʼin tísíxá xi Kazuhiro ʼmi xi Japón tsʼe xi chʼinxín koanle, kichaa kjoafaʼaitsjenle kʼoa yaa hospital kinikájna. Je chjinexki kʼoakitso nga jao nó nga tsín tikoa̱n karro sixákaoni. Je Kazuhiro tokʼoakoanle kʼoa i kitso: “Jméni xi sʼian, nga̱ nʼio tsjoake̱ nga precursor sʼin tisixá kʼoa tsín mena sikʼéjna”. Tsakʼétsʼoale je Jeobá nga katabasenkao nga tosi tonda precursor katama.

Je Kazuhiro itso: “Kʼianga jejngosá jaʼato, jngo miyona xi ya Myanmar títsjoánganʼio kisʼejinle jmeni xi koanna. Kinchjana kʼoa i kitsona: I̱ Myanmar me tokui síchjén chjota je karro xi i̱ síxá. Tsa kjuinroai, tojo koaan precursor sʼin si̱xái kʼoa tsín karroli koa̱nchjénli. Kiskonangile je chjinexki tsa koa̱n kjuía ya Myanmar ninga chʼin tjínna. Tokʼoakoanna nga i̱ kitsona: I̱ Japón jngo chjota neurólogo tsoʼba xi ya Myanmar tsʼe. Koakolale ʼyani. Kʼiatsa tikʼoakoa̱nngánili, koaan je sixkili. Kʼianga kʼoakitsona je chjinexki, tsaʼbeña nga je Jeobá tíbasenkaona”.

Je Kazuhiro tokjoan kisikasén jngo correo electrónico ya sucursal xi tíjna ya Myanmar kʼoa kʼoakitso nga mele ya koaitsjoánganʼio kao chjoónle. To aon nichxin jaʼato kʼoa je sucursal i kitsole: “Nroao, nkjínsa precursor machjén”. Je Kazuhiro kao chjoónle xi Mari ʼmi, tsakaténa karrole,  tsakʼéndaa je xo̱nle kʼoa tsakatsee je boletole. Ndʼaibi, nʼio tsjoa tjío kon nga ya tjíotsjoánganʼio je jtín xi tsʼe seña ya Mandalay. Je Kazuhiro itso: “Ngayeje kjoa xi tibitjatojinjin tísítajasa je kjoamakjainnajin nga ñaki kʼoatjín jmeni xi tso ya Salmo 37:5, nga i̱ tso: Je Jeobá tintsjai je ndiaali, kʼoa je tinʼiotʼai yaoli, kʼoa je koasenkaoli”.

Kʼianga nó 2014, jngo kjoajtíntse kisʼele je testigole Jeobá xi ya tsʼe Myanmar kʼoa jé kiskoeya xi kicho xi xin naxinandále. Tobʼelañá, jngo tichjaa xi Monique ʼmi xi Estados Unidos tsʼe xi 34 nóle, itso: “Kʼianga jejeʼe̱ña kjoajtíntse, tsakʼetsʼoale Jeobá nga koa̱n nda skoéjian jmeni xi sʼian. Kʼoati kixinyale je xijchána tʼatsʼe jmeni xi mena kuichotjenngia. Je xijchána kisasenle nga kjuí ijngokʼa ya Myanmar. Tonga títjonkjoanla tsakʼetsʼoale Jeobá kʼoa kiskoyakaola choatse”.

Je Monique kʼoatso ánni nga kʼoakisʼinni, itso: “Je Jesús kʼoakitsole je chjotatjenngile nga tjínnele skósonnile jmeni xi sʼin, kuinga kui kiskonanginile yaona. A tjínna tao̱n xi kjuíña. A so̱koʼana yaona ya ʼnde jebi ningalani tsín nʼio tse sixá”. Je Monique itsosa: “Koanchoyana nga tsín koa̱nsonnina je tao̱n xi kjuíña”. Tonga jméni xi kisʼin (Luc. 14:28).

Je Monique itso: “Ñandia kʼoakitso je chjoón jña sixá nga kjoakaonajmína, likuijin titsjoáxániná kixinña. Tonga tosani kʼoakitsona nga nda tisixá kʼoa nga kʼoechjísonna. Kʼoakjoántjín tao̱n kitsjoana jotjín xi machjénna nga sijnda xi kitjenna”.

Je Monique yaa títsjoánganʼio ya Myanmar saʼnda tjen sá diciembre nó 2014. Jótjín kon nga ya tíjna jñani ngisasa machjén xi tsoyason. Itso: “Nʼio tsjoa tjín tokoan. Jan mani chjota xi estudio titsjoale. Jngo chjoón tixinyale xi 67 nóle, kʼoa nga bichokonle nʼio nda kjoéyantsjaina. Kʼianga tsabe nga Jeobá ʼmi Niná ñaki kiskiʼndá, kʼoa i kitsona: Tosʼaa tinrʼoe títjoan je jaʼaínle Niná. Ningalani ngisa nʼio xtijin, kui kaʼmiyanái jmeni xi nʼio tjínle kjoandosin. Chaan kʼoati kiskiʼnda tsanda an. Kʼianga kʼoama nʼio tsjoa bʼé tokoán nga ya tibʼainganʼioá jñani machjénsa xi tsoyason”. Je Monique chriansʼaa ki je Skuela xi síchjine je xi bakóyason tʼatsʼe Chjotaxále Niná.

Jmeni xi kitso je Anuario de los testigos de Jehová 2013 tʼatsʼe Myanmar nkjín koanni xi kitsjoanganʼiole nga ya kikatio ʼnde jebi. Jngo tichjaa xi 30 nóle xi Li ʼmi xi ya Asia tsʼe kʼoa xi me tosíxántsjai tsakai, kʼianga tsakʼéxkia je Anuario kui kisikjaʼaitsjen tsa koa̱n ya Myanmar koaitsjoánganʼio. Je tichjaa itso: “Kʼianga kia kjoajtíntse xi kisʼejna ya Yangón nga nó 2014, yaa kiskajian jngo ndsʼee kao chjoónle xi ya tjíotsjoánganʼio ya jña én chino nokjoa ya Myanmar. Nga kui én nchja yaa kikatejna, ánni nga ya tsjoanganʼioña. Xijekoan, yaa tsangínjin ya Mandalay kao je tichjaa Monique. Je Jeobá kisichikontʼainnajin kʼoa kisokoxánajin ya ndʼiaskuela jñani nga tobasen nichxin kinixáijin, kʼoati kisokonajin jña tsakiyonijin. Nʼio tsjoa tjín tokoan nga ya titsjoanganʼioa ningalani nʼio sje ma kʼoa ningalani sakʼoa ñʼai manajin. Alikui nʼio tse tao̱n nikjeyaa i̱bi, nʼio nda chjota xi i̱ tsʼe kʼoa nrʼoéní nga ʼmiyalee je Énle Niná. Nʼio tsjoa maná kʼianga ʼyaa nga je Jeobá síchikontʼain josʼin tíʼmiyason. ʼBeña nga kui xi mele je Jeobá nga tosi tonda i̱ tsjoanganʼioa”.

Nʼio nkjín ndsʼee xi ya tjíotsjoánganʼio jñani machjénsa xi tsoyason xi tjíobe nga je Jeobá nrʼoé  je kjoabʼetsʼoa. Tobʼelañá, je ndsʼee Jumpei kao chjoónle xi Nao ʼmi, xi jetsʼato 30 nóle nga jao kʼoa xi ya tjíotsjoánganʼio tsakai jngo jtín xi tsʼe seña ya Japón. Ánni nga ya Myanmar kikationi. Je Jumpei itso: “An kao chjoónna kui xi koanmenajin nga xin naxinandá kʼoainganʼiuijin. Jngo ndsʼee xi ñatjen mangínjin kjoajtín xi tsʼe seña tsakai yaa Myanmar kitsjoánganʼio. Kʼoa ningalani tsín nʼio tse tao̱n tíjnatjaonajin kʼoati ya tsangínkiyuijin nga sá mayo nó 2010. Je ndsʼee xi ya tsʼe nʼio nda kiskoéyanajin”. Itsosa je Jumpei xi tʼatsʼe josʼin tíʼmiyason ya Myanmar: “Je chjota mandosinle xi tʼatsʼe Énle Niná, kʼoa kʼianga be je video xi tsʼe seña tokʼoamale. Nʼio tsjoa tjín tokuinjin nga i̱ jeʼe̱kiyuijin”.

Jmé xi tjíosʼín je Jumpei kao Nao nga tjíobajngiʼa yaole. Itso: “Nga jejan nó jaʼato, tochoasa ma je tao̱n xi tíjnanajin kʼoa jetsínnajin xi kʼoéchjinijin je renta. Tsakʼetsʼoalaijin je Jeobá kʼoa tokʼoakoannajin nga kʼoatsakʼinnajin nga precursor especial sʼin si̱xá choatsaijin. Nga je Jeobá kininʼiotʼaijin alikui kitsjionkonnajin. Tísíkuindanajin ngantsjai”. Chriansʼaa ki je Jumpei kao Nao je Skuela xi síchjine je xi bakóyason tʼatsʼe Chjotaxále Niná.

Ánni nga ya Myanmar kitsjoánganʼioni je Simone, jngo ndsʼee xi Italia tsʼe xi 43 nóle kao je chjoónle xi Anna ʼmi xi Nueva Zelanda tsʼe xi 37 nóle. Je Anna itso: “Kui kitsjoanganʼionajin je Anuario 2013 xi kui kinchja̱ni tʼatsʼe Myanmar”. Je Simone itso: “Nʼio tse kjoanda nga i̱ Myanmar tibʼainganʼiuijin. Alikui nʼio tse tao̱n nikjeyaijin i̱bi kʼoa ngisaa nda tisixále Jeobá. Nʼio tsjoa maná nga ʼyaa josʼin síkuindaná je Jeobá kʼianga ya bʼainganʼioá jñani ngisa machjén xi tsoyason” (Sal. 121:5). Je Anna itsosa: “Nʼio tsjoa tjín tokoan, alijme xi nʼio sikjáojian, ñatjen bitsomantsjainíjin kao je xʼinna kʼoa ngisaa kjimachriantʼalaijin xíngijin, kʼoa tísʼenajin miyo. Je chjota xi i̱ tsʼe alikui bʼasjengi je testigole Jeobá kʼoa nʼio mandosinle je Énle Niná”.

Je Anna itso: “Ñandia nga jngo tsoti xi universidad tíkotʼaya kiskajian ya jinndi̱tsi̱n kʼoa kʼoakixinle nga skansa chótʼayaijin. Kʼianga kiskajin ijngokʼa, jngo tsoti miyole tjenkao. Nga koanskanni, sa nkjín sa nkjín kichokao. Ndʼaibi, aon mani xi tixinyale”. Je Simone itsosa: “Je chjota xi ʼmiyalaijin nʼio ndʼé, kʼoa nʼio nkjín koya jmeni xi kjonangi. Nʼio mandosinle je Énle Niná kʼoa saʼnda tsín masonniná nichxin nga ʼmiyalee ngatsʼi”.

Jméni xi kisʼin kʼa ndsʼee nga koan ya Myanmar kitsjoánganʼio. Je Mizuho xi Japón tsʼe itso: “Kui xi koanmentsjainajin kao je xʼinna xi Sachio ʼmi nga ya kʼoainganʼiuijin jñani ngisa machjén xi  tsoyason. Jmeni xi jaʼaitʼa je Anuario 2013 nʼio tsakasenkaonajin. Kʼoasʼin tsakʼendajinjin nga ya Myanmar kʼoainganʼiuijin”. Je Sachio itso: “Jngo xomana tsangínjin ya Yangón, jngo naxinandá xi ya Myanmar tíjna. Tokui xi koanmenajin nga jchaijin jochon ʼnde jebi. Kʼoa kui xi tsakasenkaonajin nga koan ya tsangínkiyonijin”.

Je Rodney kao chjoónle xi Jane ʼmi xi Australia tsʼe, xi jela 50 nóle, je kʼoa kao xtile xi Jordan kʼoa xi Danica ʼmi, yaa kichotsjoánganʼio ya Myanmar nga nó 2010. Je Rodney itso: “Kʼianga tsaʼyaijin nga nʼio mandosinle chjota je Énle Niná, tsakinyakaoníjin. Kʼoaxinle je ndsʼee nga koa̱n ya koaitsjoánganʼio jñani ngisa machjén xi tsoyason joni tsa ya Myanmar”. Itsosa je ndsʼee: “Alijme xi mangósonkao jokji kjoanda tísʼenajin nga i̱ tibʼainganʼiuijin. Nʼio nkjín xti xi tokuila mandosinle teléfonole, karrole, xále kʼoa kao xi kjaʼaísanile. Tonga je xtinajin kui ngisa mandosinle nga koa̱nle kuitsoyale je chjota xi kje bejin tʼatsʼe Biblia kʼoa nga tsjoá comentariole nga satío kjoajtín. Kui xále Niná xi ngisa mandosinle”.

Je Oliver jngo ndsʼee xi 37 nóle xi Estados Unidos tsʼe, itso: “Ningalani nda chon jñani tijna tsakai tonga nga xin ʼnde tisixále Jeobá nʼio tse kjoanichikontʼain tísʼena, ngisaa tisinʼiotʼa je Jeobá kʼoa nʼio tísʼejna je kjoamakjainna ninga tojme kjoa xi faʼatojian. Kʼianga ya ñatjen titsjoanganʼioa kao je ndsʼee xi tsín ʼbexkoan tsakai, tíbasenkaona nga tiʼbe nga kui xi ngisa tjínle kjoandosin nga bakoyaa xi tʼatsʼe Chjotaxále Niná”. Ndʼaibi, je Oliver kao chjoónle xi Anna ʼmi, tosi tonda ya tjíobakóyale je chjota xi én chino nchja̱.

Jngo tichjaa xi Trazel ʼmi xi 52 nóle xi Australia tsʼe, xi kʼia nga nó 2004 kitsjoánganʼio ya Myanmar. Itso: “Kʼoaxinle ngatsʼi xi kʼoakoa̱nle nga ya katafitsjoánganʼio jñani ngisa machjén xi tsoyason. Tiʼbeña nga je Jeobá síchikontʼain je xi bʼénesale yaole nga je síxále. Alikui ʼbe tsa kʼoanisikji kjoanichikontʼain sʼe̱na. Nʼio tsjoa tjín tokoan”.

Jme xi bʼéyanajmí je ndsʼee xi kanikʼaxkiaa basenkaoná nga nikjaʼaitsjenjiaan tsa koa̱n ya kʼoainganʼioá ya ʼnde jñani ngisa machjén xi tsoyason. Joxi ini tsoná je ndsʼee xi ya tjíotsjoánganʼio ya ʼnde jebi: “Titjái Myanmar kʼoa tisenkaonáijin”.