KʼIANGA kisikasén Jesús je chjotale nga koaitsoya je énnda chjotse, be nga tsín tongatsʼi je chjota nga koa̱nkjainle (Luc. 10:3, 5, 6). Kʼianga ʼmiyasoán sakʼoaa tsaojiaan je chjota xi toxkia nchja̱ kʼoa xi saʼnda majtile. Kʼoa nga kʼoasʼín ñʼai maná nga bakolee kjoamatokon.

Jngo chjota xi tjínle kjoamatokon mandosinle je xi kjaʼaí, mamake kʼoa basenkao nga kjoa faʼatojin. Tsa tsín tisʼe̱niná je kjoamatokon, tsínjin tikao kjoatsjoa kʼuínyasonñá. Tonga tsa koakoá kjoamatokon kui xosikaoná nga tosi tonda kao kjoatsjoa kʼuínyasoán, tojo ma je lʼí nga tosi tonda tí kʼianga xinyájin chikín (1 Tes. 5:19).

Jmé xi koasenkaoná nga tosi tonda koakoá kjoamatokon ninga sakʼoa ñʼai koa̱nná. Janla choa̱ kataʼyaa xi koa̱n chjénngia: choa̱le Jeobá, choa̱le Jesús kʼoa kao choa̱le pastro Pablo.

Jmi nó jetjínle nga énndiso tísʼene je Jeobá. Ninga kʼoalani, tojo bakóle kjoanda je xi ngʼakon kao xi tsʼen (Luc. 6:35). Kʼoasʼin bakóni nga tsejta kjima. Kui xi “mele nga ngatsʼi chjota kuitjontjai” (1 Tim. 2:3, 4). Ningalani jtike je kjoatsʼen, chjí bekon ngatsʼi chjota kʼoa kui xi mele nga kuitjontjai ngatsʼi (2 Ped. 3:9).

Je Jeobá bení nga je Na̱i tíbʼéchjoangi kjoafaʼaitsjenle chjota (2 Cor. 4:3, 4). Nʼio nkjín xi tsín kʼoasʼin tsakʼinyale jokjoantjínni xi tʼatsʼe Niná saʼnda nga sʼa ʼndí kjoan, kuinga ñʼai manile nga kʼoasʼin síkjaʼaitsjen jotso je Biblia. Tonga je Jeobá mele koasenkao. Jómani ʼyaa.

Kataʼyala jmeni xi koanle je chjota xi Nínive tsʼe, ningalani nʼio tsʼen koan je chjota xi ya tsʼe, je Jeobá i kitsole Jonás: “A tsí koa̱n nga kʼoati koa̱nmana naxinandáje Nínive, jñani tsʼato jngo siento kao kan jmi mani chjota xi saʼnda tsín be jñanile je ntsja ngakixi kʼoa jñanile ntsja ngʼaskón” (Jon. 4:11). Je Jeobá koanjinle nga je chjota xi Nínive tsʼe kjesa bejin xi tʼatsʼe. Kuinga tsakakónile kjoamatokon kʼoa jé Jonás kisikasén nga tsakájinkon jmeni xi sʼin je Jeobá.

Joni je Jeobá kʼoati chjí ʼyaa je chjota. Jé Jeobá chjénngilee tsa kʼoati mená kuinyakoaa je chjota nga kjuinrʼoé je Énle Niná, ninga je xi kʼoasʼin matsen nga tsín mandosinle.

Alikui tokui kjuinñá nga tsín nrʼoé chjota je Énle Niná, machjén nga si̱kjaʼaitsjenjiaan  ánni nga kʼoasʼínni. Tsakui nichxin tjínkʼa xi tsín makjainle jotso je Biblia xi totʼatsʼe nga tsín nda sʼín je chjota xi kʼoatso nga chjotale Cristo ma. Kʼoa tjínkʼa je xi to énndiso nrʼoé xi tʼatsaan. Kʼoa tsakui nichxinje̱ je xínkjín kʼoa tsa je chjotandaindʼiale tsokjónke.

Tjínkʼa xi tse kjoa faʼatojin kʼoa tsín tinda satíoni kon. Jngo misionera xi Kim ʼmi itso: “Tjín ʼnde jñani ʼmiyasuinjin jñani kjoajchán kisʼe kʼoa je chjota xi ya tsʼe kisichaa ngayeje jmeni xi tjínle. Kʼoa alikui tijme kjoachoya tjínnile. Alikui tsjoa tjío kon kʼoa alikui ʼya xi tibʼaʼénnile. Ya ʼnde jebi tsaojinníjin je chjota xi tsín sasénle je Énle Niná. Ñandia kʼianga tixinyasoan, kitsaojinña je chjota xi koantsʼen”.

Jméni xi sʼín je Kim nga tosi tonda bakó kjoamatokon. Itso: “Kʼianga tsín nda síkaona je chjota kui sikjaʼaitsjenjian jmeni xi tso Proverbios 19:11: Je chjota xi sínkjínle kon alikui tokjoán síjtile yaole. Kʼianga kui sikjaʼaitsjenjian jme kjoa xi tjíofaʼatojin je chjota kui xi basenkaona nga bakole kjoamatokon. Xi ijngosani, alikui tsa tongatsʼi je chjota nga tsín sasénle. Xi tikuini ʼnde tjín xi nʼio nda kotʼaya je Énle Niná”.

Kʼoati koa̱n si̱kjaʼaitsjenjiaan jósʼiaan tsa ñálani xi kui kjoa tibitjatojiaan kʼoa tsa ʼya xi Énle Niná kjoakaonajmíná. Tobʼelañá, kʼiatsa nkjín kʼa kinoʼyá je xi tsín ndatjín tʼatsʼe testigole Jeobá, kʼoajinti kuixoán tsanda ñá kʼoa koa̱nchjénjinná nga sa̱kóná kjoamatokon. Je Jesús kʼoakitso nga tjínnele kʼoasikoaa je chjota josʼin mená nga sikaoná. Machjén nga si̱jinlee yaoná jotjío kon ninga sakʼoa ñʼai koa̱nná (Mat. 7:12).

Je pastro Pablo tsakakóle kjoamatokon je chjota xi tsʼen koan, nga̱ be nga kʼoati kʼoakjoan je ngasʼa. I kitso: “Ngasʼa kinchjaʼoan Cristo, kitjenngikontrale, taon tsaʼbe, tonga tsabemakonna, nga̱ tjíchjoa xkoan nga kʼoakisʼian, nga̱ tsínkui koankjainna” (1 Tim. 1:13). Koanjinle nga tsakakóle kjoamatokon je Jeobá kao Jesús. Tsakui nichxin kʼoati tsabe kʼa je chjota xi kʼoati kjoan jokoankjoan je ngasʼa.

Je Pablo sakʼoaa kisatejin kʼa chjota xi nʼio ñʼai koanle nga kisikatío je kjoamakjain xi kisʼele. Ya Hechos 17:16 kʼoatso kʼianga ya Atenas tíjna je Pablo koanjtile “nga tsabe nga je naxinandábe kjaínga totjínle  xkóson”. Tonga tikui tsakʼangini nga tsakakóyale je Énle Niná (Hech. 17:22, 23). Je Pablo kuenta kisʼin josʼin koanjchá je chjota xi kitsoyale tojoni nga kuitjontjai kʼa (1 Cor. 9:20-23).

Kʼianga satéjiaan chjota xi tsín sasénle je Énle Niná kʼoa tsa xi kjaʼaí kjoamakjain tjínle, kʼoati sʼiaan jokisʼin je Pablo. Kuenta sʼiaan jmeni xi makjainle je chjota ánni nga koa̱n kuisenkaoñá nga skoe̱ je “énnda chjotse” (Is. 52:7). Tobʼelañá, jngo tichjaa xi Dorothy ʼmi itso: “Nʼio nkjín je chjota xi ʼmiyasonlee xi kʼoasʼin kisakoyale nga tsʼen Niná. Títjonkjoanla kʼoaxinle nga nʼio nda sʼín nga makjainle xi tʼatsʼe Niná, kʼoa xijema, kʼiaa xinyale jmeni xi tso je Biblia tʼatsʼe nga tsjoakená je Jeobá kʼoa kao jmeni xi tso tʼatsʼe nichxin xi nroaján”.

Kʼoati machjén nga si̱kjaʼaitsjeen josʼin tjínnele si̱nʼiojiaan je ndsʼee xi ñatjen ʼmiyasoán. Je Jessica itso: “Kʼiatsa tsín nda nrʼoé je chjota nga xinyale alikui kui fakaonajmíña je ndsʼee. Tosaa kui kʼoaxinle jósʼin binyakao chjota kʼianga ʼmiyasoán ninga sakʼoa tjínkʼa xi tsín sasénle”.

Je Jeobá nda be jme kjoani xi bitjatojiaan kʼianga ʼmiyasoán kʼoa alikui jao tjínná nga tsjoa sʼe kon kʼianga bakoá kjoamatokon josʼín je (Luc. 6:36). Je Niná alikui tongantsjai nga koako kjoamatokon. Be kʼiáni kjoetʼa jmeni xi chon sonʼnde. Tonga nga kjesa kʼoamajin, nʼio machjén nga tosi tonda kʼuínyasoán (2 Tim. 4:2). Kuinga tosi tonda kao kjoatsjoa kʼuínyasonñá kʼoa koakolee kjoamatokon toʼya chjotani.