1. Ánni kʼoabixónsíñá nga tsʼe je Jeobá ngayeje jmeni xi tjín (chótsenlai sén xi faʼaitʼa ibi).

TSʼEE Jeobá ngayeje jmeni xi tjín ya ngʼajmi kao i̱ Sonʼnde (Deut. 10:14; Apoc. 4:11). Kʼoa nga je kisinda chjota, tsʼee tsoná ngatsʼiaa (Sal. 100:3). Tonga je Jeobá toxá tíkjoejinni je chjota xi naxinandále koa̱n.

2. ʼYá chjotani xi síkʼaxki̱ je Biblia xi ñaki toxá kjoejinni je Jeobá.

² Tobʼelañá, ya Salmo 135 kʼoatso nga je Niná toxá kiskoejinni je chjota israelita nga naxinandále koa̱n (Sal. 135:4). Kʼoa ya libro xi tsʼe Oseas kʼoatso nga kʼoati ya koatiojinle je naxinandále Jeobá ninga tsín chjota israelita mani (Os. 2:23). Je én jebi kʼiaa kitjoson kʼianga kiskoejin je Niná chjota xi tsín judío nga ya koatexomakao je Jesús ya ngʼajmi (Hech. 10:45; Rom. 9:23-26). Je chjota jebi, xi kao nganʼiotsje tjoejinni, “naxinandá xi tsje” ʼmile, kʼoa tsʼee Jeobá naxinandá jebi (1 Ped. 2:9, 10). Kʼoa je chjotale Cristo xi i̱ Sonʼnde koyale koatio ngantsjai nichxin, kʼoati naxinandále Niná ma, nga̱ jé Niná kjoéjin (Is. 65:22).

3. 1) ʼYáni je xi kui kjoanda tjínle ndʼaibi nga je Jeobá tjíobexkón. 2) Jméni xi chótʼayajiaan i̱ kjoaʼmiya jebi.

³ Nichxin xi tiyoaa ndʼaibi, je xi ya ngʼajmi tjínle kjoachoya  kʼoa kao je xi i̱ Sonʼnde tjínle kjoachoya, je xi “kjaʼaí barré” ʼmile, tojngo jtín mani nga tjíobexkón je Jeobá (Luc. 12:32; Juan 10:16). Mená koakolee je Jeobá nga chjí ʼyaa nga kʼoasʼin kiskoéjinná nga ya kuiyojiaan naxinandále. I̱ kjoaʼmiya jebi, kui chótʼayajiaan jósʼiaan nga koakolee je Jeobá kʼianga chjí ʼyaa nga kui kjoanda tjínná.

4. 1) Jósʼin bakoá nga bʼailee kjoanda je Jeobá nga títsjoáʼndená nga miyole maa. 2) Jméni xi kʼoati kisʼin je Jesús.

⁴ Kʼianga bʼaitʼalee yaoná je Jeobá kʼoa nga mangínsʼenngindá kʼoasʼin bakoñá nga bʼailee kjoanda. Kʼoasʼin bakonilee ngatsʼi je xi bená nga jetsakʼaitʼalee yaoná je Jeobá kʼoa nga tiyondaa nga si̱tjosonlee (Heb. 12:9). Kʼoakisʼin je Jesús. Ninga ya kitsinjin je naxinandále Jeobá, kʼianga kisʼenngindá kʼoasʼin tsakakóni nga tíjnanda nga kʼoasʼin josʼin mele Niná, joxi i kitsole je Nʼaile: “Kʼianga kʼoasʼian josʼin nga meli, ji Ninána, kui xi simetokoan” (Sal. 40:7, 8).

5, 6. 1) Jókisʼe kon Jeobá kʼianga kisʼenngindá je Jesús. 2) Jngo choa̱ tʼejnai xi bakó josʼe kon je Jeobá kʼianga bʼaitʼalee yaoná.

⁵ Jókisʼe kon je Jeobá nga kisʼenngindá je Jesús. Je Biblia itso: “Kʼianga jekichanisʼenngindá Jesús, kitjokajin ndi̱toonni nandá; kʼoa koeni, je ngʼajmi kitjoʼai, kʼoa tsabe je nganʼiole Niná xi kinroajen joni nisechxoa kʼoa yaa kinroajennele Jesús. Koeni, jngo jta̱ kinoʼyale xi kitso: Jébi ʼNdína xi tsjoake̱, jonda sʼe koan xi tʼatsʼe” (Mat. 3:16, 17, TNM). Nʼio tsjoa kisʼe kon je Jeobá kʼianga tíjnanda je ʼNdíle nga ñaki toje sixále. Tikʼoasʼinni, je Jeobá nʼio tsjoa sʼe kon nga bʼaitʼalee yaoná, kʼoa alikui jao tjínná nga sichikontʼainná (Sal. 149:4).

⁶ Jngola choa̱ kataʼyaa nga ngisa nda katamajinná josʼe kon je Jeobá kʼianga bʼaitʼalee yaoná. Tobʼelañá, tsa jngo nʼai xi galleta tsjoále je tsotiʼndíle, kʼoa je tsotiʼndí jebi tsjoá choale je nʼaile kʼianga kjine je galleta. Ningalani tsʼe nʼaile je galleta kʼoa je katsjoále, tsjoa sʼe kon je nʼai jebi nga kʼoasʼín je tsotiʼndíle, nga̱ kʼoasʼin bakóni nga tsjoake. Tikʼoasʼinni, kʼianga bʼaitʼalee yaoná je Jeobá nʼio tsjoa sʼe kon (Éx. 34:14).

7. Jósʼin basenkaoná jmeni xi tso Malaquías nga majinná josʼe kon Jeobá tʼatsʼe je xi kao kjoatsjoa síxále.

⁷ (Tʼexkiai Malaquías 3:16). * Je xi kje tsjoátʼajinle yaole je Jeobá kʼoa xi kje fisʼenngindájin, machjén nga sikjaʼaitsjenjin nga kʼoasʼin. Tsʼee maa je Jeobá saʼnda nga kje tsinjián nga̱ jé tsjoáná kjoabijnachon. Nʼio tsjoa sʼe kon je Jeobá kʼianga bakoá nga mená je koatexomaná, nga bʼaitʼalee yaoná kʼoa kʼoanʼia josʼin mele (Prov. 23:15). Je Jeobá be ʼyani xi kao kjoatsjoa síxále kʼoa yaa bʼétʼa je jaʼaínle ya “libro” xi tíkijnale.

8, 9. Jméni xi síjéle Jeobá je xi ya tjíotʼa jaʼaínle ya “libro” xi tíkijnale.

⁸ Tsa mená nga ya sʼe̱tʼa je jaʼaínná ya “libro” xi tíkijnale Jeobá tjínnele kʼoasʼiaan jmeni xi tso Malaquías. Kʼoatso nga tjínnele kuijkónchaa je Niná kʼoa si̱kjaʼaitsjenjiaan je jaʼaínle. Tsa kjaʼaí xi kʼoétsʼoalee, je Jeobá sichajon je jaʼaínná ya libro xi tíkijnale (Éx. 32:33; Apoc. 3:5).

 ⁹ Kʼianga bʼaitʼalee yaoná je Jeobá kʼoa nga mangínsʼenngindá tojngokʼa kʼoanʼia. Tonga alikui xi tsonile nga tokʼoabixoán nga mená si̱tjosonlee je Niná. Nga mená je Jeobá kjuintʼalee kʼoa nga mená choʼndale koaan, machjén nga nyaon nyaon koakoá nga nitjosonlee (1 Ped. 4:1, 2).

10. Jósʼin ʼyanile nga tsín mangóson je chjota xi Jeobá síxále kʼoa kao xi mai.

¹⁰ Ya kjoaʼmiya xi jejaʼato kui kichotʼayá tʼatsʼe Caín, Salomón kao tʼatsʼe chjota israelita. Ngatsʼi kʼoakitso nga je Niná tsakʼétsʼoale, tonga tsínni ñaki toje Niná tsabexkón. Je choa̱ jebi kui bakóyaná nga tsín tsa tokui xi machjén nga kʼoakuixoán nga je Jeobá ʼyaxkoán, tjínnele nga jticha koaan je xi chʼaotjín kʼoa tsjoacha koaan je xi kixi tjín (Rom. 12:9). Je Jeobá kʼoakitso nga “tsín mangóson je chjota xi kixi kao chjotatsʼen, kao xi síxále Niná kʼoa kao xi tsín síxále” (Mal. 3:18).

11. Ánni nga tjínnenile skoe̱ xi kjaʼaí nga choʼndale Jeobá maa.

¹¹ Ijngosa koya josʼin bakolee Jeobá nga bʼailee kjoanda nga choʼndale maa, kuinga katabe xi ngikʼa nga jekjimataja je kjoamakjainná (1 Tim. 4:15; Mat. 5:16). Chjónangilee yaoná jebi: “A be je chjota nga ñaki kixi fitʼale je Niná. A basjaile josʼian nga katabe xi kjaʼaí nga testigole Jeobá ma”. Bajin sʼe̱ kon Niná kʼiatsa kʼoéʼmaa nga choʼndale maa (Sal. 119:46; tʼexkiai Marcos 8:38 *).

12, 13. Ánni nga sakʼoa tsín ngotjo ʼyanile jokjoan xi testigole Jeobá ma.

¹² Xi tokʼoamaná kuinga tjínkʼa je testigole Jeobá xi kui fitjenngi je “espíritu xi tsʼe sonʼnde” kʼoa yaa mangóson kao je xi tsín Niná síxále (1 Cor. 2:12). Je chjota xi kʼoasʼín to yaole fini (Efes. 2:3). Tobʼelañá, ninga jekjoan nkjín kʼa bʼainá je kjoafaʼaitsjen, tjínkʼa xi tsín nda  fayo kʼoa xi tsín ndakjoan najño bʼakjá. Kui najño bʼakjá xi sʼeyanʼio yaoná, xi matsenya kʼoa tsa xi koto kjoan, kʼoa saʼnda kʼoafayo nga fi je kjoajtín. Tjínkʼa xi to batío tomani ntsja̱jko̱ (1 Tim. 2:9, 10). Kʼoa nga kʼoafayo alikui ʼyale tsa testigole Jeobá ma (Sant. 4:4).

¹³ Tjínkʼa je testigole Jeobá xi tojo kui kʼoasʼín jmeni xi sʼín je chjota xi tjín sonʼnde. Tobʼelañá, kʼiatsa jme sʼuí fi alikui kixi tíjna josʼín nga te kʼoa tokjaʼaíngá sʼín. Alikui bakinle jngo chjotale Cristo nga kʼoasʼin. Tjínkʼa xi ya redes sociales síkatíotʼa je fotole kʼoa jmeni xi kjitʼa alikui bakó nga choʼndale Niná ma. Tsakui nichxin likuikjoan kʼoasʼin kuichákjáyale ya jinjtín jonikao jngo xi ai jée bajngi, tonga alikui nda choa̱ batíole je xi tjíobʼénele yaole nga kui xi ndatjín kʼoatjíosʼín (tʼexkiai 1 Pedro 2:11, 12). *

14. Jméni xi tjínnele sʼiaan nga si̱kuindaa je kjoamiyo xi tjínná kao Jeobá.

¹⁴ Kui satíobasenná ngantsjai “je kjoachi̱nga̱ xi tjínle yaoná, kao kjoachi̱nga̱ xi tjínle xkoaan, kao kjoangʼatakon xi tsʼe je kjoabijnachonná” (1 Juan 2:16). Tonga ñá, jé Jeobá jetsakʼaitʼalee yaoná, kuinga kʼoatsoniná nga chja̱ʼaxinlee yaoná “kjoa xi tsín bexkón Niná” kao “kjoachi̱nga̱le sonʼnde”, ánni “nga nda kjuinkaosínía yaoná, jméni nga chjotakjoakixi koa̱nsínía”, kʼoa jchaxkoán Niná (Tito 2:12). Ngayeje jmeni xi nʼia tjínnele koako nga choʼndale Niná maa, jolani je én xi nokjoaa, jonʼia kʼianga bichaa kʼoa nga ʼyoá, jokjoan najño xi chʼakjá, josoyoaa kʼoa kao jonʼia nga nixá, ngayeje jebi tjínnele koako nga je Jeobá jetsakʼaitʼalee yaoná (tʼexkiai 1 Corintios 10:31, 32). *

15. Ánni nga tjínnenile tsjoacha koaan je ndsʼee.

¹⁵ Kʼoatisʼin bakoñá nga chjí ʼyaa je kjoamiyo xi tjínná kao Jeobá kʼianga nda nikoaa je ndsʼee kao tichjaa. Nga̱ jé Jeobá xi kʼoasʼin mele nga ya tjíojin naxinandále. Tsa kuenta sʼiaan jebi, ndajin si̱koaa ngantsjai je ndsʼee kao tichjaa kʼoa tsjoachajin koaan (1 Tes. 5:15). Je Jesús i kitsole je chjotatjenngile: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35).

16. Jñánile je kjoatéxoma xi faʼaitʼa je Kjoatéxomale Moisés xi tsoyaná josʼin bekon Jeobá je choʼndale.

¹⁶ Jngola choa̱ kataʼyaa xi koasenkaoná jósʼin tjínnele si̱koaa je ndsʼee ya jinjtín. Jmeni xi koanchjén nichxin kjoatse ya yo̱ngo̱le Jeobá, ñaki tokui xá kisationi nga ya koanchjén nga tsaʼyaxkón je Jeobá. Je Kjoatéxomale Moisés kitsoyaa josʼin tjínnele koa̱nkuinda, kʼoa tjínnele kinikʼien je xi jaʼatoné kjoatéxoma jebi (Núm. 1:50, 51). Tsa nʼio nda kisikuinda Jeobá jmeni xi koanchjén ya yo̱ngo̱ nga tsaʼyaxkón, a tsíkui xi tsoyaná jebi nga ngisa nda síkuinda je choʼndale xi kixi fitʼale. Je xi bakóná nga nʼio chjí bekon Jeobá je choʼndale kuinga itso: “Je xi jon síkaono jéni tolʼíxkoan síkao” (Zac. 2:8).

17. Jméni je xi kuenta sʼín je Jeobá.

¹⁷ Je libro xi tsʼe Malaquías kʼoatso nga je Jeobá basénñole kʼoa nrʼoéle je choʼndale kʼianga batiojtín (Mal. 3:16). Alikui jao tjínná nga “Jeobá bení je xi tsʼe” (2 Tim. 2:19, TNM). Nʼio mandosinle jmeni xi bixoán kʼoa jmeni xi nʼia (Heb. 4:13). Je Jeobá be kʼianga tsín bakolee kjoanda je ndsʼee. Tonga kʼoati kuenta sʼín kʼianga nichatʼalee xíngiaa, nga chjoeyaa, nga tjotʼaa, kʼoa nga ndʼé nikoaa (Heb. 13:16; 1 Ped. 4:8, 9).

18. Jósʼin bakolee kjoanda je Jeobá nga naxinandále tiyojiaan.

¹⁸ Mená nga koakolee je Jeobá nga bʼailee kjoanda nga ya naxinandále tiyojiaan. Je xi ngisasa ndatjín xi kinʼia kuinga tsakʼaitʼalee yaoná je Jeobá. Ningalani i̱ tiyojinlee “chjotasonʼnde xi tsʼen”, kui xi mená nga katabe nga nda mangínkoaa yaoná. Je Biblia itso: “Kʼoasʼin tiyojin ʼisenʼisaon i̱ sonʼndebi joni tsa lʼí” (Filip. 2:15). Chʼasjengiñá je xi chʼaotjín (Sant. 4:7). Xi ijngosani, tsjoachañá kʼoa ʼyaxkónñá je ndsʼee, nga̱ kʼoati choʼndale Jeobá mani (Rom. 12:10).

19. Jósʼin síchikontʼain Jeobá je choʼndale.

¹⁹ Je Biblia kʼoatso nga tsín tsjiónkon Jeobá je naxinandále (Sal. 94:14). Alikui jao tjínná nga bitjoson én jebi. Ningalani kuiyá alikui sichajinná Jeobá (Rom. 8:38, 39). Je Biblia itso: “Tsa tiyochonnía, totʼatsʼe Nainá nga tiyochoán. Tsa biyaa, totʼatsʼe Nainá nga biyaa. Kʼoasʼin tsa biyochonnía axo biyanía, tsʼe nía Nainá” (Rom. 14:8). Nʼio tsjoa maná nga kjoaʼaí je nichxin kʼianga sikjaʼáyanile Jeobá je miyole xi jekʼien (Mat. 22:32). Nichxin xi tiyoaa ndʼaibi jenʼio tse kjoanichikontʼain títsjoána je Jeobá. Tojo tso je Biblia, “tsjoa tjínle je naxinandá xi je Jeobá Ninále, je naxinandá xi je kiskoejin nga tsʼe koa̱n” (Sal. 33:12).