JE Biblia bʼéyanajmí tʼatsʼe je chjota xi kʼoakoankjoan “joni tsa ñá” (Sant. 5:17). Tobʼelañá, je pastro Pablo i kitso: “Kʼia nga mena an nga kʼoasʼian xi nda tjín, je xi chʼao tjín tíjnajinna. [...] Ma̱xónia anbi” (Rom. 7:21-24). Sakʼoaa kʼoati satío tokoán tsanda ñá nga̱ chjotajée maa, tonga jmeni xi kitso je Pablo nʼio tsjoánganʼioná.

Je Pablo kʼoakitso josʼin kisikjaʼaitsjen tʼatsʼe kjoabʼechjíntjaile Jesús. Ya Gálatas 2:20 i kitso: “Je ʼndíle Niná, xi koantsjoakena [...] kitsjoantjai yaole xi tʼatsʼan”. A kʼoatisʼin nikjaʼaitsjeen tojo kitso je pastro Pablo. Tsakui nichxin sakʼoa to jao sʼe tokoán.

Tsa sakʼoa ba satío tokoán tʼatsʼe jme jée xi tsakijnyaa, ñʼaijin maná nga kʼoasʼin nikjaʼaitsjeen nga jekisichatʼaná je Jeobá kʼoa nga nʼio tsjoakená. Kʼoa tochale ngisa ñʼai koa̱nná nga kʼoasʼin si̱kjaʼaitsjeen nga je Cristo tsakʼéchjíntjainá. Tonga, a kui xi mele je Jesús nga kʼoasʼin si̱kjaʼaitsjeen. Kʼoa jmé xi koasenkaoná nga kʼoasʼin si̱kjaʼaitsjeen. Kuila chótʼayajiaan nga jao koya jebi.

Je Jesús kui xi mele nga kʼoasʼin si̱kjaʼaitsjeen nga jngó jngoá nga kʼienntjainá. Jmeni xi koasenkaoná nga tsín jao kʼoé tokoán kui jmeni xi tso Lucas 23:39-43, TNM. Je chjota xi ñatjen kisʼetʼa yá je Jesús aijin jée xi tsakajngi kʼoa kuijin nga kui kjoañʼai tsakʼainile. Tonga kʼoakoannile jéele kʼoa i kitsole je Jesús: “Tikjaʼaitsjennái kʼianga jekoatexomai”.

Si̱kjaʼaitsjenla jebi, ninga tse kjoañʼai tíjnajin je Jesús kjomingʼa je jko̱ nga kotsenle je chjota xi kjitʼa yá, bijnokao kʼoa itsole: “Ñaki kʼoaxin kjoaixile ndʼaibi: Yaa kuijnakaonái ya ʼNdenaxó”. Koanjin nga tokʼoakitsole tsakai nga kui xá jaʼaini nga “tsjoá kjoabijnachonle nga nkjín chjota kʼoechjíntjai” (Mat. 20:28, TNM). Tonga je Jesús kʼoakitsole chjota jebi nga tsjoá kjoabijnachonle xi tʼatsʼe. Tsakakóle kjoatsjoacha kʼianga i̱ kitsole: “Yaa kuijnakaonái”, kʼoa kitsoyale jme kjoanda xi sʼe̱le xi totʼatsʼe kjoabʼechjíntjai kʼianga kʼoakitsole nga koa̱n kʼoéjna nga jeʼndenaxó koa̱n je Sonʼnde.

Chjota jebi alikui Niná kisixále, tonga je Jesús kuijin xi koanmele nga katamajinle nga tʼatsʼe nga tsjoá kjoabijnachonle. Tsa kʼoasʼin kisikjaʼaitsjen Jesús xi tʼatsʼe chjota jebi alikui jao tjínná nga kʼoatisʼin síkjaʼaitsjen tʼatsʼe choʼndale Niná xi jekisʼenngindá kʼoa xi je tjíosíxále. Tonga jméni xi koasenkaoná nga kʼoasʼin si̱kjaʼaitsjeen nga ñá tsakʼéchjíntjainá je Jesús ninga ai jée tsakijnyaa ngasʼa.

Je Pablo koanjinle nga je Jesús jé kʼienntjai nga̱ kui xá kitsjoale nga kuitsoyale  xi kjaʼaí. Je Pablo i kitso: “Tsjoale kjoanda je xi kitsjoana nganʼio, Cristo Jesús Nainá, nga̱ kʼoasʼin nʼiotʼakonna nga tsakaséjnana je xábi. Ngasʼa kinchjaʼoan Cristo, kitjenngikontrale, taon tsaʼbe” (1 Tim. 1:12-14). Je Jesús kui xá kitsjoale nga̱ koanmake, tjaoke koan kʼoa tsabe nga kuitjosonle jmeni xi tsakánele. Kʼoati kui xá títsjoáná nga jngó jngoá je Jesús nga kʼuínyasoán tʼatsʼe Chjotaxále Niná (Mat. 28:19, 20, TNM). A kʼoatisʼin nikjaʼaitsjeen tojosʼin kisikjaʼaitsjen je Pablo.

Je Albert tsʼato 34 nó nga tsakichonsjejin je naxinandále Niná kʼoa chriansʼaa jaʼaikʼejnajin ijngokʼa. Itso: “Nyaon nyaon faʼaitsjenna je jée xi tsakajngia. Tonga kʼianga xinyasoan kʼoasʼin sikjaʼaitsjen nga je Jesús xi kui xá títsjoána, tojo kisikao je Pablo. Nga kui sikjaʼaitsjen tsjoa sʼe tokoan tʼatsʼe jmeni xi tisʼian ndʼaibi kʼoa kao kjoatsjoa koyale jmeni xi koa̱n nichxin xi nroaján” (Sal. 51:3).

Je Allan nʼio tsʼen koan nga kjesa bejin tʼatsʼe Jeobá. Itso: “Tojo faʼaitsjenna jmeni xi kisʼian. Sakʼoaa nroajen tokoan. Tonga tsjoale kjoanda je Jeobá nga kui xá títsjoána nga xinyale je xi kjaʼaí chjota je énnda chjotse ninga nʼio tse jée tsakajngia ngasʼa. Kʼianga ʼbe josʼín je chjota nga sakóyale je Énle Niná majinna nga je Jeobá nʼio nda chjota. Kʼoasʼin sikjaʼaitsjen nga kui xi mele nga koasenkoa je chjota xi kʼoakjoan jokoankjoan an tsakai”.

Kʼianga ʼmiyasoán kui kʼoanʼia kʼoa kui nikjaʼaitsjeen jmeni xi ndatjín. Alikui jao sʼe tokoán nga je Jesús mamakená, tjaokená kʼoa be nga kuitjosonná je xá xi títsjoáná.

Nga kjesa fetʼajin jmeni xi chon sonʼndele Na̱i. Tsakui nichxin tosi tonda kui kjoaʼaítsjenná jmeni xi kinʼia ngasʼa kʼoa likui nda sa̱tío tokoán. Jméni xi koasenkaoná nga tsínkui katasíkinjená.

Je Jean kjitʼaa nga likui nda sʼe kon tʼatsʼe nga tsín nda kikao yaole kʼianga sʼa xti. Tonga itso: “Nʼio nda sʼe tokoán nga je Niná ngisaa ngʼa tíjna tikʼoajinni je ni̱ma̱ná” (1 Juan 3:19, 20). Kʼoati sínʼio tokoán nga ʼyaa nga je Jeobá kao Jesús majinle nga chjotajée maa. Si̱kjaʼaitsjeen nga kui kjoatsjoacha xokisikao nga tsakʼéchjíntjainá xi chjotajée maa (1 Tim. 1:15).

Kʼianga tsín jao sʼe̱ tokoán nga jngó jngoá nga tsakʼéchjíntjainá je Jeobá, jao koya tjínni jmeni xi sʼiaan. Xi títjon: Si̱kjaʼaitsjenjiaan josʼin tsakakóle kjoanda Jesús je chjota. Kʼoa xi majaoni: Nga tosi tonda si̱tjosoán je xá xi tsakánená. Tsa kʼoasʼiaan, kʼoati kuixoán jokitso je pastro Pablo: “Je Jesús koantsjoakena [...] kitsjoantjai yaole xi tʼatsʼan”.