1, 2. 1) Tojosʼin faʼaitʼa ya Mateo 28:18-20, jñánile je xá xi ngisa tjínle kjoandosin kjinele je chjotale Cristo tojo kitso je Jesús. 2) Jmé xi chótʼayajiaan i̱ kjoaʼmiya jebi.

NIOJIN tsjoa kisatio kon je pastro kʼianga ya koanxkó jngo sonnindo, nga̱ jé Jesús xi kʼoakitsole kʼianga jejaʼáyanile nga ya katamaña (Mat. 28:16). Tsakui nichxin kʼia tsʼatsenle Jesús je chjotale “xi tsʼato aon siento mani” (1 Cor. 15:6). Ánni nga kʼoasʼin kisikatíojtínni Jesús je chjotale. Kuinga jngo xá xi nʼio tjínle kjoandosin kitsjoale, i kitsole: “Kuinga tangínsíño, kʼoa chjotana tikao je chjota xi tjín ngakjijnda naxinandá” (tʼexkiai Mateo 28:18-20). *

² Je xi kinrʼoéle Jesús nga kui nichxin yaa tsakatiojin je jtínle Cristo nga siglo 1. Je xá xi ngisa tjínle kjoandosin xi kisʼenele kuinga chjotale Cristo sikao je chjota. * Nichxin xi tiyoaa ndʼaibi, jmi mani je jtínle Cristo jngo tjíjtsa Sonʼnde, kʼoa tojo kui xá jebi tjíosʼín ngatsʼi. I̱ kjoaʼmiya jebi ño koya tjínni xi chótʼayajiaan: “Ánni nga nʼio tjínnile kjoandosin nga chjotatjenngile Cristo si̱koaa je chjota. Jmé xi tsoyanile  nga chjotatjenngile Cristo nikoaa je chjota. A ngatsʼi je chjotale Cristo nga kui xá sʼín. Ánni nga tjínnenile tsejta koaan nga si̱tjosoán xá jebi”.

3. Tojo tso Juan 14:6 kao 17:3, ánni nga nʼio tjínnile kjoandosin nga chjotale Cristo si̱koaa je chjota.

³ Ánni nga nʼio tjínnile kjoandosin nga chjotale Cristo si̱koaa je chjota. Kuinga toje xi fitjenngile Cristo xi koa̱n miyole Niná koa̱n. Xi ijngosani, nda batio ndʼaibi kʼoa kui kjoachoya tjínle nga koa̱n koatio ngantsjai nichxin i̱ Sonʼnde (tʼexkiai Juan 14:6; * 17:3 *). Nʼio tjínle kjoandosin je xá xi tíbánená Jesús, tonga alikui toñá síkatíoná. Je Pablo kao chjotale Cristo xi ngikʼa kʼoakitso nga tojngo kisixákao Niná (1 Cor. 3:9). Je Jeobá kao Jesús nʼio tse kjoanda tjíotsjoáná ninga chjotajée maa.

4. Jmé xi bakóyaná jokoan je Iván kao Matilde.

⁴ Tsjoa satío tokoán kʼianga chjotale Cristo nikoaa je chjota. Kataʼyala jokoan je Iván kao Matilde, xi Colombia tsʼe. Kʼianga tjíotsoyason jngo ti kisatejin xi Davier ʼmi, xi i̱ kitsole: “Mena nga sikʼantjaiya yaona, tonga tsín kʼoamana”. Je Davier boxeador, droga kjen kʼoa nʼio ʼbi. Kʼoa kje bixankaojin je tsoti xi tíjnakao, xi Érika ʼmi. Je Iván itso: “Tsangínchonlaijin saʼnda jña tíjna. Bicicleta tsangínkoaijin kʼoa nʼio ndási chon je ndiaa. Kʼianga tsabe je Érika nga jetíbʼantjaiya jokjoan je Davier, kʼoati kiskotʼaya Biblia tsanda je”. Nga jeki nichxin, je Davier alikui tidroga kiskenni, alikui titsakʼini kʼoa kisikʼéjnaa je boxeo. Kʼoati chixankao je tsoti xi tíjnakao. Je Matilde itso: “Kʼianga kisʼenngindá je Davier kao Érika nga nó 2016 jaʼaitsjennajin nga i̱ kitsonajin: Mena nga sikʼantjaiya yaona, tonga tsín kʼoamana. Kʼoa ñaki kinroajen ndáxkuinjin”. Alikui jao tjínná nga nʼio tsjoa satío tokoán kʼianga binyakoaa je chjota nga chjotatjenngile Cristo katama.

5. Jméni xi títjon sʼiaan nga chjotatjenngile Cristo si̱koaa je chjota.

⁵ Je xi títjon sʼiaan kuinga kjoásjee je chjota xi mele skoe̱ tʼatsʼe Jeobá (Mat. 10:11, TNM). Kʼianga chjakaonajmíñá Énle Niná ngatsʼi chjota xi satéjiaan kʼoasʼin bakoñá nga testigole Jeobá maa. Kʼoa kʼianga nitjosoán jmeni xi kitso je Jesús bakoñá nga ñaki chjotale Cristo maa.

6. Jméni xi koasenkaoná nga ndasʼin kʼuínyasoán.

⁶ Tjínkʼa je chjota xi mele nga skoe̱ jmeni xi bakóya je Biblia. Tonga kʼoati tjínkʼa xi tsín mandosinle, kʼoa tjínnele kuisenkoaa nga katamandosinle je Énle Niná. Nga koa̱nsjainá je chjota xi koakoyalee machjén nga jchaa jméni xi koa̱n kuixoán nga chja̱kaonajmiá. Kui chjoéjiaan jmeni xi koa̱nndosinle je chjota kʼoa si̱kjaʼaitsjeen josʼin chja̱kaonajmiá.

7. Jméni xi koa̱n kuixoán nga chja̱kaonajmíñá Énle Niná je chjota, kʼoa ánni nga nʼio tjínnile kjoandosin nga kuinóʼyalee kʼoa nga koakolee kjoaxkóntokon.

⁷ Tobʼelañá, koaan i̱ kuixoán: “Jósʼin nikjaʼaitsjenngái ji xi tʼatsʼe jebi. Nga kʼoasikji kjoa tjín ndʼaibi, a tsí jngo chjotaxá machjénná xi koa̱nle kʼoendajin je kjoa xi tjín”. Xijekoa̱n, koaan kʼoéxkialee Daniel 2:44 kʼoa kui chja̱kaonajmíñá. Kʼoa koaan tsa  i̱ kuixoán: “Jósʼin nikjaʼaitsjenngái ji, jmé xi machjén nga sʼiaan nga ndasʼin si̱jchá je ʼndíxtiná”. Kʼoa koaan kui chja̱kaonajmíñá jmeni xi tso Deuteronomio 6:6, 7. Ninga kjaʼaí kjaʼaísʼin chja̱kaonajmiá je chjota, kuenta sʼiaan jméni xi koa̱nndosinle. Si̱kjaʼaitsjenjiaan jósʼin kuinyakao jmeni xi bakóya je Biblia. Kʼianga chja̱kaonajmiá, nʼio tjínle kjoandosin nga nda kuinóʼyalee kʼoa koakolee kjoaxkóntokon. Tsa kʼoasʼiaan, ngisaa nda koa̱njinná josʼin síkjaʼaitsjen kʼoa kʼoajin tikjuinrʼoéná tsanda je.

8. Ánni machjénni nga kjitʼa kjuinnixatʼaa je chjota.

⁸ Kʼianga skótʼaya Biblia je chjota machjén nga si̱kʼayalee nichxin, koaan nkjín kʼa kjuinnixatʼaa. Ánni. Kuinga sakʼoa tsín tsaojiaan nga mangínchonlee kʼoa tsa tsín aleje̱. Xi ijngosani, kʼianga nkjín kʼa mangínnixatʼaa je chjota yaa nroani nga kotʼaya je Biblia. Tobʼelañá, kʼianga kjitʼa basenndálee jngo yá, ngisaa ngotjo mangʼani. Tikʼoasʼinni, kʼiatsa kjitʼa chja̱kaonajmíñá Énle Niná je chjota chanjin koa̱ntsjoake je Jeobá kao Jesús.

9, 10. Ánni kʼoabixónsíñá nga ngatsʼiaa fasjee je chjota xi mele skótʼaya je Biblia.

⁹ Ngatsʼiaa xi Énle Niná ʼmiyasoán binyakaoñá xíngiaa nga fasjee je chjota xi mele skoe̱ tʼatsʼe Niná. Je xá xi nʼia yaa mangóson joma kʼiatsa jngo tiʼndí kacha. Jngola choa̱ kataʼyaa jokoan ñandia kʼianga jngo tiʼndí xi jan nóle kicha. Nga kʼoakoan 500 koanni chjota xi tsakásjai. Kʼoa nga jekan hora jaʼato nga kicha tiʼndí jebi, yaa koansjai ya jinxjóe. Je chjota xi koansjaile alikui kʼoakitso nga toje tsakʼéngikjoama̱ nga koansjai je tiʼndí, tosaa i̱ kitso: “Kuinga nkjín kamañá nga kamasjaini”.

¹⁰ Nʼio nkjín mani je chjota xi ya mangóson  je tiʼndí xi kicha. Nga tsín jme kjoachoya tjínle, mele nga tjín xi kuinyakao (Efes. 2:12). Tsʼato jin millón mañá jngo tjíjtsa Sonʼnde xi kʼoasʼin tifasjee chjota. Tsakui nichxin tsín ʼya chjota so̱kosjainá xi koa̱nmele skótʼaya je Biblia, tonga tjínjin je ndsʼee kao tichjaa xi koa̱nsjaile xi tiya tsoyasonni jñani bakoyasoán. Kʼianga jngo ndsʼee basenkao tsa ʼyani nga chjotatjenngile Cristo ma, ngatsʼiñá nga tsjoa satío tokoán.

11. Ningalani tsín ʼya chjota tiʼmiyalee je Énle Niná, jósʼin koa̱n kʼoainganʼioá nga chjotatjenngile Cristo katama je chjota.

¹¹ Ningalani tsín ʼya chjota tiʼmiyalee je Énle Niná, koaan kʼoainganʼioá nga chjotatjenngile Cristo katama je chjota. Tobʼelañá, kʼianga tokʼia bichótítjon jngo chjota ya Ndʼia jña chotʼayá, koaan ndasʼin chjoéyaa ánni nga nda sʼe̱ni kon. Kʼoasʼin binyakaoñá nga ngisa nda majinle nga tsjoachaa xíngiaa xi chjotale Cristo maa (Juan 13:34, 35). Xi ijngosani, jmeni xi bixoán kʼianga bʼé je énná ya jinjtín, kʼoati koasenkao nga kʼoakuitso jotjín kon. Kʼoati koa̱n ñatjen kʼuínyasoán kao jngo ndsʼee xi tosʼa tíbʼétsʼiakao nga títsoyason kʼoa kuisenkoaa josʼin sichjén Biblia nga kuitsoyale je chjota. Tsa kʼoasʼiaan, kui tiʼmiyalee nga je Cristo skénngile (Luc. 10:25-28).

12. A nʼio tse kjoachjine machjénná nga chjotatjenngile Cristo si̱koaa je chjota. Jngo choa̱ tʼejnai.

¹² Alikui koa̱n kʼoasʼin si̱kjaʼaitsjeen nga nʼio tse kjoachjine machjénná nga chjotatjenngile Cristo si̱koaa je chjota. Kataʼyala je choa̱le tichjaa xi Faustina ʼmi, xi Bolivia tsʼe. Kʼianga tosʼa kiskotʼaya je Énle Niná alikui male bʼéxkia xo̱n. Ndʼaibi, tosʼaa kjima choale kʼoa jekisʼenngindá kʼoa nʼio tsjoake nga bakóyale chjota je Énle Niná. Aon chjota tsoyale nga xki̱ xomana. Kʼoa ningalani tsín nanda male xo̱n, jaon mani chjota xi jekisʼenngindá xi je kitsoyale (Luc. 10:21).

13. Ningalani tsín nanda maʼaná, jmé kjoanichikontʼain xi sʼe̱ná kʼiatsa kjoásjee je chjota xi kʼuínyalee Biblia.

¹³ Nʼio nkjín je ndsʼee kao tichjaa xi tse xá kjinele kʼoa alikui nanda maʼale. Ninga kʼoalani, bʼasjeʼa nichxin nga bakóyale chjota je Énle Niná, kʼoa nʼio tsjoa satío kon nga kʼoasʼín. Kataʼyala choa̱le Melanie. Tojé tísíjchá je tsotiʼndíle xi jin nóle. Xi ijngosani, síxá bʼajnda xomana kʼoa kʼoati je síkuinda nʼaile xi cáncer tjínle. Ya jñani tsʼe tojé xi testigole Jeobá mani, jngo ʼnde xi tíjna ya Alaska. Nkjín kʼa kisijéle Niná nga katabasenkao nga koaitsoyason ningalani nʼio nyʼán chon, kʼoa kui xi koanmele nga koa̱nsjaile je xi kuitsoyale Énle Niná. Chaan kiskajin jngo chjoón xi Sara ʼmi, xi nʼio tsjoa kisʼe kon nga tsabe nga tjínle jaʼaín je Niná. Kʼoa nga jeki nichxin chaan kiskotʼaya je Biblia. Je Melanie itso:  “Kʼianga bixine maxon jenʼio kijtana. Tonga fikaoña je tsotiʼndína nga fixinyale je Sara, kʼoa nda satío tokuinjin. Basjaiyaníjin jmeni xi kjonangi je Sara, kʼoa nʼio tsjoa kisatio tokuinjin nga miyole Jeobá koanni”. Je Sara nʼiojin koan ninga tsakatiochjoale je xínkjín kao miyole, kisikʼéjnaa je yo̱ngo̱ jñani fi kʼoa kisʼenngindá.

14. 1) Jósʼin mangóson nga chjotatjenngile Cristo nikoaa je chjota kʼoa josʼín je xi jti̱ bʼasjengindá. 2) Jósʼin basenkaoná jmeni xi kitso Pablo tojosʼin faʼaitʼa ya 2 Timoteo 4:1, 2.

¹⁴ Ningalani tsín masjainá je chjota xi ʼmiyalee Biblia, alikui koa̱n kʼoasʼin si̱kjaʼaitsjeen nga tsínkʼia koa̱nsjainá je xi koa̱nmele skótʼaya. Si̱kjaʼaitsjeen nga je Jesús yaa kisingósonkao xá jebi kao josʼín je chjota xi jti̱ bʼasjengindá. Sakʼoaa nʼio nkjín hora nga tsín jme jti̱ sokóle. Kʼiaa nga jemanjio kʼoa tsa kʼia nga jenroasʼesén básjai, kʼoa sakʼoaa nʼio kjin fi (Luc. 5:5). Tikʼoasʼinni, tjínkʼa je ndsʼee xi tse nichxin síkʼaya nga tsoyason nga básjai je chjota, kjaʼaí kjaʼaí hora tsoyason kʼoa xinxin ʼnde fi. Kuinga kʼoasʼínni nga mele koa̱nsjaile je chjota xi kuitsoyale Biblia. ʼYani je xi kʼoasʼin bʼénele yaole, satéjin je chjota xi mandosinle je Énle Niná. Kʼoa ñá, a koaan kʼia kʼuínyasoán nga bele tokoán nga sa̱téjiaan je chjota (tʼexkiai 2 Timoteo 4:1, 2). *

15. Ánni machjénsíni nga tsejta koaan kʼianga ʼmiyalee Biblia je chjota.

 ¹⁵ Ánni machjénni nga tsejta koaan nga kʼuínyalee Biblia je chjota. Jngo koya anni kuinga tsín tokui xi machjén nga katabe jmeni xi tsoya je Biblia kʼoa nga tsjoake katama. Kʼoati machjén nga kuisenkoaa nga tsjoake katama je Jeobá. Xi ijngosani, ali tokuijin xi machjén nga katabe jmeni xi kitsoya je Jesús, kʼoati tjínnele kʼoasʼin koaikao yaole jotso je kjoatéxomale Niná. Machjén nga kuisenkoaa jñani ñʼai koa̱nle nga sitjoson jmeni xi kitso je Jesús. Tjínkʼa xi ngotjo síkʼantjaiyani josʼin síkjaʼaitsjen kʼoa josʼín, kʼoa tjínkʼa xi ngisa tse nichxin machjénle nga síkʼantjaiya yaole.

16. Jmé xi bakóyaná jokoan je Raúl.

¹⁶ Jokoan jngo misionero xi Perú tsʼe kui tsoyaná josʼin bichómani nga tsejta maa. Je ndsʼee jebi itso: “Ninga jejao libro kiskotʼaya jngo chjota xi Raúl ʼmi, tojo kjoa kisʼele kao chjoónle. Tojo énchi̱nga̱ kinchja̱ kʼoa je xtile alikui tsabexkón. Tonga tosi tonda kikonle ya niʼyale kao familiale nga̱ ntsjaintsjai ki je kjoajtín. Xijekoanni, kisikʼantjaiyaa yaole kʼoa tsʼato jan nó jaʼato nga kisʼenngindá”.

17. Jmé xi chótʼayajiaan ya kjoaʼmiya xi ijngo.

¹⁷ Je Jesús i kitso: “Chjotana tikao je chjota xi tjín ngakjijnda naxinandá”. Nga nitjosoán jmeni xi kitso je Jesús, sakʼoajin jtsaojiaan chjota xi tsín kʼoasʼin síkjaʼaitsjen joni ñá. Tobʼelañá, je chjota xi tsín jme religión tjíojin kʼoa xi tsín makjainle nga tíjna Niná. Yaa kjoaʼmiya xi ijngo kuitsoyaná jósʼin chja̱kaonajmíñá je Énle Niná chjota jebi.