1. Ánni tjínnenile tongini kuiyondaa nga kjesa fitjenngikejinná je chjota.

NITJE̱N nga kje nikʼienjin je Jesús kʼoakitso nga koa̱njticha ngatsʼi je xi chjotale koa̱n (Juan 17:14). Saʼnda ndʼaibi, je chjota xi tsín sasénle xi tʼatsʼe Niná fitjenngike je chjotale Cristo (2 Tim. 3:12). Nga toje kjoetʼa jmeni xi chon sonʼnde ngisaa nʼio koa̱njtikená je chjota (Mat. 24:9).

2, 3. 1) Ánni nga nʼio xkón tíjnasíni kʼiatsa kjoajkon kʼoetʼaná. 2) Jméni xi jchaa i̱ kjoaʼmiya jebi.

² Jósʼin kuiyondaa nga kjesa fitjenngikejinná chjota. Tsín koa̱n nga kui si̱kjaʼaitsjeen tsa jme xi koa̱nná. Tsa kʼoasʼiaan, tochale kuinókjoaan kʼoa kui xosikaoná nga tongini si̱kjinlee je Jeobá ninga kje jme kjoa bitjatojinjián (Prov. 12:25; 17:22). Kui kjoajkon síchjén je Na̱i kʼianga bʼetʼaná (1 Ped. 5:8, 9). Jméni xi sʼiaan nga nʼiojin koaan.

³ I̱ kjoaʼmiya jebi kui jchaa jme xi sʼiaan nga koa̱nmiyosaa je Jeobá kʼoa ánni nga nʼio chjínile. Kʼoati jchaa jósʼiaan nga nʼiojin katamaa kʼoa jósʼiaan kʼiatsa chjota koaitjenngikená.

4. Tojo tso Hebreos 13:5, 6, jméni xi tsín jao kʼoé tokoán, kʼoa ánni nga nʼio chjínile.

⁴ Ñaki kʼoakʼoé tokoán nga tsjoakená je Jeobá kʼoa nga tsínkʼia tsjiónkonná (tʼexkiai Hebreos 13:5, 6). * Jekjoan nkjín  nó nga i̱ kitso je revista La Atalaya: “Je chjota xi nda bexkon Niná jé ngisa sinʼiotʼa kʼianga kjoa kjoaʼatojin”. Nga chókjoajinná je kjoa xi kuitjátojiaan, machjén nga tsjoacha katamaa je Jeobá kʼoa je si̱nʼiotʼaa kao ngayeje ni̱ma̱ná kʼoa tsín jao kʼoé tokoán nga tsjoakená (Mat. 22:36-38; Sant. 5:11).

5. Jméni xi sʼiaan nga jchaa je kjoatsjoachale Jeobá.

⁵ Nyaon nyaon kʼoéxkiaa Biblia ánni nga ngisa koa̱nchriantʼanilee je Jeobá (Sant. 4:8). Kʼianga kʼoéxkiaa je Biblia, kuenta sʼiaan jokjoan je Niná, josʼin bakóná kjoatsjoacha tʼatsʼe jmeni xi sʼín kao jmeni xi tso (Éx. 34:6). Tsakui nichxin tjínkʼa xi kʼoasʼin síkjaʼaitsjen nga tsín tsjoake je Niná, nga̱ liʼya xi bakóle kjoatsjoacha. Tsa kʼoasʼin nikjaʼaitsjeen, koaan kʼoétʼaxoaan jokji kjoanda kao kjoamatokon bakóná je Jeobá nga nyaon nyaon (Sal. 78:38, 39; Rom. 8:32). Tsa si̱kjaʼaitsjenjiaan jmeni xi nʼia kʼoa kao jmeni xi chotʼayá nkjínjin koya jmeni xi koa̱n kʼoétʼaxoaan. Tsa jchachjiá jmeni xi sʼín je Jeobá, ngisajin koa̱nmiyosaa (Sal. 116:1, 2).

6. Tojo tso Salmo 94:17-19, jósʼin basenkaoná nga ñaki kao ni̱ma̱ná bʼetsʼoalee je Jeobá.

⁶ Kjitʼa kʼoétsʼoaa. Kuila cha̱niyaa jkoaa jngo tiʼndí xi tsoakjá je nʼaile kʼoa bʼéyanajmíle jmeni xi kamale kabʼajnda nichxin. Kʼoatisʼinni tsanda ñá xi kao Jeobá, tsa ñaki ni̱ma̱ná kjuinroajinni nga kʼoétsʼoalee ngisaa koa̱nmiyosaa kʼoa ngisaa koa̱nnʼiotʼaa (tʼexkiai Salmo 94:17-19). * Kʼoéyanajmílee ngayeje jmeni xi makjáojinná (Lam. 2:19). Tsa kʼoasʼiaan, je Biblia kʼoatso nga sʼe̱ná “je kjoanyʼántakonle Niná xi ñaki faʼatole ngayije kjoafaʼaitsjenle chjota” (Filip. 4:6, 7). Tsa kjitʼa kʼoétsʼoalee je Jeobá ngisaa koa̱nchriantʼalee (Rom. 8:38, 39).

7. Ánni ñaki kʼoatjínni tokoán nga kuitjoson jmeni xi tjínndajinle je Niná xi kao Chjotaxále.

⁷ Ñaki kʼoéjngoaa tokoán nga tse kjoanichikontʼain kjoaʼaíkao je Chjotaxále Niná (Núm. 23:19). Tsa tsín nʼio tíjna kjoamakjainná xi tʼatsʼe jebi, je Na̱i kʼoa kao na̱i xi ndajin ngisajin choa ñʼai koa̱nle nga kuinyaxkónná (Prov. 24:10; Heb. 2:15). Jméni xi sʼiaan nga ngisa si̱nʼiotʼaa je Chjotaxále Niná. Si̱kʼayaa nichxin nga chótʼayajiaan jmeni xi tjínndajinle Jeobá xi kao Chjotaxále kʼoa ánni ñaki kʼoatjínni tokoán nga kuitjoson. Kʼianga koa̱njinná jebi, kataʼyala je choa̱le Stanley Jones, xi ñato nó nga ndoyá tsakʼejnaʼya xi totʼatsʼe kjoamakjainle. * Kʼoakitso jmeni xi tsakasenkao nga kixi koan. I kitso: “Je kjoankjíntokon xi tjínna xi tʼatsʼe je Chjotaxále Niná kui xi tsakasenkaona nga tsínkʼia jao kisʼe tokoan”. Kʼiatsa nʼio tíjna  kjoamakjainná tʼatsʼe jmeni xi tjínndajinle je Niná, ngisaa koa̱nchriantʼasalee kʼoa alikui kjoajkon sikinjená (Prov. 3:25, 26).

8. Tʼeyanajmí jósʼin basenkaoná je kjoajtín xi satíoná.

⁸ Tsín si̱chaa je kjoajtín xi satíoná. Nga mangián je kjoajtín xi satíoná, ngisaa machriantʼasalee je Jeobá. Jonʼia ndʼaibi kui xi koako tsa ska̱ná kʼoa tsa mai kʼianga chjota koaitjenngikená (Heb. 10:24, 25). Tsa totjín totjenni xi bʼéchjoaná ndʼaibi nga mangián je kjoajtínná, jósʼiaan kʼianga kjoaʼaí nichxin nga ngisa ñʼai koa̱nná nga kuiyojtián. Xi ijngosani, tsa kʼoatjín tokoán nga ntsjaintsjai koanngián je kjoajtínná, tosi tondajin kʼoasʼiaan ninga chjota koaitjenngikená. Tsa kʼoasʼiaan, tsín jme xi kʼoechjoaná nga tosi tonda je Niná si̱tjosonlee ninga chjota koa̱njtikená kʼoa ninga kʼoechjoaná je chjotaxá (Hech. 5:29).

9. Ánni ndatjínsíni nga kʼoéjintokoán textole Biblia nga kjesa chjota fitjenngikejinná.

⁹ Kʼoéjintokoán je textole Biblia (Mat. 13:52). Ningalani tsín sʼe̱jinyejená jmeni xi chotʼayá, tonga je Jeobá koa̱nle tsjoáná je nganʼiotsjele nga kjoaʼaítsjenná (Juan 14:26). Jngo ndsʼee xi ndoyá tsakʼejnaʼya ya Alemania, i kitso: “Nʼio tsakasenkaona nga tsʼato 200 textole Biblia tsakʼejinkoan, kʼoa kui kisikjaʼaitsjenjian jokjitse tsakatejnaʼya ndoyá”. Nga kʼoakisʼin je ndsʼee kui xi tsakasenkao nga ngisa koanchriantʼale Jeobá kʼoa nga kixi koan.

10. Ánni ndatjínsíni nga katamaná je canción xi jndalee Jeobá.

¹⁰ Kʼoéjintokoán je canción xi jndalee Jeobá. Kʼianga ndoyá tsakatioʼya je Pablo kao Silas ya Filipos, kisele je Jeobá (Hech. 16:25). Je ndsʼee xi Unión Soviética tsʼe xi ya kinikasén Siberia, kisele je Jeobá nga nʼio katasatío je kjoamakjainle. Je tichjaa Mariya Fedun i kitso: “Kui kijndalaijin Jeobá je canción xi tjínjinkuinjin”. Nga kʼoasʼin kise ngisaa koannʼiojin kʼoa ngisaa koanchriantʼasale je Jeobá. Kuinga ndatjínsíni nga kʼoéjinkoaan jotso je canción xi jndalee je Jeobá kʼoa kao xi faʼaitʼa ya página xi tíjnaná ya Internet (chótsenlai je recuadro “ Tʼainái je kjoanʼiojin”).

11, 12. 1) Tojo tso 1 Samuel 17:37, 45-47, ánni nga nʼiojin koanni je David. 2) Jméni xi bakóyaná je choa̱le David.

¹¹ Kʼianga koaitjenngikená chjota kjoanʼiojin koa̱nchjénná. Tonga jmé xi koa̱n sʼiaan  tsa tsín nʼiojiaan. Kʼianga nʼiojin maa alikui xi tsoni jokji nganʼio tjínná, jmeni xi maná nʼia kʼoa kao jokjoaan. Kataʼyala je choa̱le David. Kʼianga kiskan kao Goliat tosʼaa xti kʼoa tsín kʼoakji nganʼio tjínle joni chjota jebi. Xi ijngosani, alikui tongini tsakʼejnanda kʼianga kiskan kao Goliat kʼoa saʼnda tsínle espada, tonga nʼiojin koan kʼoa kinrʼoe chjota jebi nga kiskan.

¹² Nʼiojin koan je David nga̱ ñaki kʼoatsakʼé kon nga je Jeobá koasenkao (tʼexkiai 1 Samuel 17:37, 45-47). * Alikui tokui kini jokji je Goliat, kui ngisa kuenta kisʼin nga ngisa tse nganʼio tjínle je Jeobá tikʼoajinni Goliat. Nʼio tse jmeni xi bakóyaná choa̱ jebi. Tsa ñaki kʼoatjín tokoán nga je Jeobá koasenkaoná, alikui jme xi kuinókjonlee, nga̱ ʼyañá nga ngisa tse nganʼio tjínle je Niná tikʼoajinni je chjotakontraná (2 Crón. 20:15; Sal. 16:8). Jméni xi koa̱n sʼiaan nga katasʼená kjoanʼiojin tongini nga kje fitjenngikejinná je chjota.

13. Jméni xi sʼiaan kʼianga nʼiojin koaan.

¹³ Kʼianga ʼmiyasoán je Énle Niná ngisaa manʼiojiaan. Nga̱ jé Jeobá ninʼiotʼaa kʼoa tsín chjota nokjonlee (Prov. 29:25). Tojo ma kʼianga ngisa mataja yaoná nga ejercicio nʼia, ngisaa nʼiojin maa kʼianga ʼmiyasoán je Énle Niná nga xki̱ ndʼia xki̱ ndʼia, ya jñani nʼio tjín chjota kʼoa tojñani titsomaa. Kʼiatsa kao kjoanʼiojin kʼuínyasoán ndʼaibi, tosi tonda kʼoasʼiaan ninga sʼe̱chjoale je xále Niná (1 Tes. 2:1, 2).

14, 15. Jméni xi bakóyaná je choa̱le Nancy Yuen kʼoa kao Valentina Garnovskaya.

¹⁴ Tsee jmeni xi bakóyaná je choa̱le tichjaa xi tsakakó kjoanʼiojin. Kataʼyala je choa̱le Nancy Yuen, ningalani tsín nʼio ngʼa kisʼe tichjaa jebi, alikui jme xi kitsokjonle. * Nga tosi tonda kitsoyason xi tʼatsʼe Chjotaxále Niná kanla nó nga ndoyá tsakʼejnaʼya ya  China. Je chjota xi kisijtsoʼa kʼoakitso nga nʼio xíjin koan.

¹⁵ Je tichjaa xi ijngo jéní Valentina Garnovskaya. Jan kʼa nga ndoyá tsakʼejnaʼya ya Unión Soviética, kʼoa mela 21 nó nga kʼoasʼin ndoyá tsakʼejnaʼya. * Ñaki kʼoatsakʼé kon nga tosi tonda kuitsoyason, je chjotaxá kʼoakitso nga tífaʼatone je kjoatéxoma. Ánni nga nʼiojin koanni tichjaa jebi. Kuinga ñaki kʼoatsakʼé kon nga je Jeobá koasenkao.

16. Jméni xi tjínnele sʼiaan nga nʼiojin koaan.

¹⁶ Tojosʼin tiʼyaa, kʼianga nʼiojin koaan alikui tokui koanngínñá jokji nganʼio tjínná kʼoa kao jmeni xi maná nʼia. Jme xi tjínnele sʼiaan kuinga je Jeobá si̱nʼiotʼaa nga je koasenkaoná kʼoa sikuindaná (Deut. 1:29, 30; Zac. 4:6). Tsa kʼoasʼiaan nʼiojin koaan.

17, 18. Tojo tso Juan 15:18-21, jmé xi kitso je Jesús nga koa̱nná, kʼoa ánni.

¹⁷ Nda sʼe tokoán kʼianga bakóná kjoaxkóntokon je chjota xi kjaʼaí, tonga tsín koa̱n nga kʼoasʼin si̱kjaʼaitsjeen nga tsín jme chjíná kʼiatsa tsín bexkónná je chjota. Je Jesús i kitso: “Jó tondano kʼia nga chjota chʼao beno, kʼia nga faʼáxinno, kʼia nga nchja̱ʼaonno, kʼia nga bʼasjengi jaʼaínno joni tsa tsʼen, xi totʼatsʼe ʼndíle chjota” (Luc. 6:22). Ánni nga kʼoakitsosíni.

¹⁸ Ñá xi chjotale Cristo maa alikui sasénná nga chjota majtikená. Tonga nga kʼoasʼin mangínkoaa yaoná jokisʼin je Jesús kʼoa nga kui bakoyaa xi tʼatsʼe kui fitjenngikeniná je chjota (tʼexkiai Juan 15:18-21). * Xi mená kuinga tsjoa kjoáyaa kon je Jeobá. Tsakui jtikeniná je chjota nga tsjoachaa je Jeobá, to yaole xosíkao.

19. Jósʼin koa̱n kjuintjenngiaa je choa̱le pastro.

¹⁹ Nga testigole Jeobá maa, alikui tjínnele koa̱nsoaná ninga jokuitsoná kʼoa ninga  josikaoná je chjota (Miq. 4:5). Xi koasenkaoná nga tsín kuinókjoaan kui jmeni xi kisʼin je pastro kʼianga jekinikʼien je Jesús. Nʼio jtike koan je chjota xi nyatítjonle je religión (Hech. 5:17, 18, 27, 28). Ninga kʼoalani, ntsjaintsjai ki ya yo̱ngo̱ nga kikakóya, kʼoa kʼoakitso nga chjotale Cristo ma (Hech. 5:42). Alikui chjota kitsokjonle. Kʼoatisʼinni tsanda ñá, tsa kʼoakuixoán nga testigole Jeobá maa, alikuijin kjoajkon sikinjená ya tʼaxáná, ya ndʼiaskuela kʼoa tsa yaje̱ jñani tiyoaa (Hech. 4:29; Rom. 1:16).

20. Ánni nga tsjoa kisationile je pastro ninga chjota koanjtike.

²⁰ Je pastro tsjoa kisatio kon ninga chjota koanjtike. Nga kui kʼoakisʼin jmeni xi mele je Jeobá tsjoa kisatio kon ninga kjoañʼai tsakjaʼá (Luc. 6:23; Hech. 5:41). Je pastro Pedro itso xi kiski: “Tsa kjoañʼai chjaʼao xi totʼatsʼe xi nda nʼiao, jó tondano” (1 Ped. 2:19-21; 3:14). Tosi tonda kui kʼoasʼiaan je xi kixi tjín ninga koa̱njtikená je chjota, ʼyañá nga kui kʼoasʼínni nga je Jeobá nixálee.

21, 22. 1) Jósʼin tongini tibijnandai ndʼaibi nga kjesa fitjenngikejinná je chjota. 2) Jmé xi chótʼayajiaan ya kjoaʼmiya xi ijngo.

²¹ Alikui ʼyaa kʼiáni koaitjenngikená je chjota kʼoa kʼiáni kʼoakuitso je chjotaxá nga tsín tikoa̱n kʼuínyasonñá. Tonga jmeni xi koa̱n sʼiaan kuinga tongini kuiyondaa, tosi tonda si̱miyoaa je Jeobá, nʼiojin katamaa kʼoa kuiyondaa jósʼiaan kʼianga chjota koaitjenngikená. Tsa tongini kuiyondaa kui xi koasenkaoná nga kixi koaan nichxin xi nroaján.

²² Tonga jmé xi sʼiaan kʼiatsa je chjotaxá kʼoakuitso nga tsín tikoa̱n kʼuínyasonñá. Yaa kjoaʼmiya xi ijngo chótʼayajiaan jméni xi koasenkaoná nga tosi tonda je Jeobá si̱xálee ninga chjota koaitjenngikená.