1. Jmé xi tsoyanile nga ʼyaa je Énle Niná.

TSAKUI nichxin sakʼoa kui jebi kichjonanginá kʼoa tsa ñá xi i̱ tsakixoánje̱: “Jósʼin tsaʼyaxkonni je Énle Niná. A tokʼoa jekotʼaya xijcháli nga kitsin. Jójekjitse nga tichotʼayai”. Kʼianga Énle Niná nikʼaxkiaa kui nokjoañá tʼatsʼe xi makjainná, josʼin ʼyaxkoán Niná kʼoa josʼin mangínkoaa yaoná. Kʼianga kʼoabixoán nga makjainle jngo chjota tʼatsʼe Énle Niná kui xi tsonile nga be jmeni xi tsoya je Biblia kʼoa fitjenngi kjoafaʼaitsjen xi tsjoá. Kʼoa tsín tikui makjainnile jmeni xi tsoya je religión ndiso kʼoa ngisaa tsjoa sʼe kon (Juan 8:32).

2. Tojo tso Juan 13:34, 35, jméni xosíkaoná nga makjainniná je Énle Niná.

² Ánni nga kichotʼayañá je Énle Niná. Tsakui nichxin kuinga kisasenná josʼín je testigole Jeobá (1 Ped. 2:12). Nkjín ndsʼee xi kisasenle nga tosʼa kitítjon ya Ndʼia jña chotʼayá nga tsjoake xínkjín je testigole Jeobá kʼoa kui xi ngisa faʼaitsjenle tikʼoajinni jmeni xi kisakoya nga kʼia. Je Jesús kʼoakitso nga kʼoasʼin skoe̱ni chjota nga tsjoake xínkjín je xi ñaki chjotatjenngile mani (tʼexkiai Juan 13:34, 35). * Tonga tsa mená nga nʼio sʼe̱jna je kjoamakjainná tjínsa jmeni xi sʼiaan.

3. Jósʼin kuichomani tsa tokui koa̱nkjainniná nga ʼyaa nga tsjoake xínkjín je ndsʼee.

³ Tonga ali tsa tokuijin nga koa̱nkjainniná nga ʼyaa nga tsjoake xínkjín je chjotale Cristo. Ánni kʼoabixónñá. Tobʼelañá, tsa jngo ndsʼee kʼoa tsa saʼnda je xi chjotajchínga sʼin tíjna kʼoa tsa je xi precursor sʼin tísíxá ai jée koa̱njngí, tsa sikiʼaon  kjoafaʼaitsjenná kʼoa tsa yátsʼi̱n kuinyale Niná kʼoa kʼoakuitso nga tsín kʼoatjín jmeni xi makjainná, jósʼiaan, a kui sikaténginá kʼoa a tsín tije Jeobá si̱xánilee. Jebi kui bakóyaná nga tjínnele nʼio sʼe̱jna je kjoamakjainná kʼoa nga ñaki ni̱ma̱ná kjuinroajinni nga miyoná katama je Jeobá kʼoa tsín tokui kjuinñá jmeni xi sʼín xi kjaʼaí. Je kjoamakjainná yaa mangóson joni jngo ndʼia. Tsa mená nga nʼio sʼe̱ jngo ndʼia, alikui koa̱n nga kui kʼoéndañá jmeni xi tsín nʼio kʼoee, xi tsonile, tsín tokui kjuinñá josʼe tokoán, tjínnele kui kuenta sʼiaan ánni nga kinichriantʼanilee je Jeobá kao naxinandále. Kuinga nʼio tjínnile kjoandosin nga ntsjaintsjai chótʼayá je Biblia, si̱kjaʼaitsjenjiaan jmeni xi chotʼayá kʼoa ñaki kʼoakʼoé tokoán nga tʼatsʼe Jeobá tínroani. Ñaki kʼoéjngoaa tokoán nga kʼoatjín jmeni xi tsoyaná je Biblia xi tʼatsʼe Jeobá (Rom. 12:2).

4. Tojo tso Mateo 13:3-6, 20, 21, jóma kʼa kʼianga kjoa faʼaine.

⁴ Je Jesús kʼoakitso nga tjínkʼa xi nʼio tsjoa sa̱tío kon nga skótʼaya je Énle Niná, tonga kʼianga kjoa kjoaʼaíne kjuinroajen je kjoamakjainle (tʼexkiai Mateo 13:3-6, 20, 21). * Tsakui nichxin tsín majinle nga kjoa bitjatojiaan kʼianga Jesús mangíntjenngilee (Mat. 16:24). Kʼoa tsa kʼoasʼin síkjaʼaitsjen nga tsín jme kjoa sʼele je xi chjotale Cristo ma. Tonga nga i̱ Sonʼnde tiyoaa, toxá kjoa bitjatojinñá. Sakʼoaa toxijña bʼantjaiya josʼin tiyoaa kʼoa kui xosíkaoná nga tsín titsjoa satíoni tokoán (Sal. 6:6; Ecl. 9:11).

5. Jósʼin bakó je choʼndale Jeobá nga ñaki tjíojngo kon nga tʼatsʼe Niná nroani jmeni xi makjainle.

⁵ Me ngatsʼi je choʼndale Jeobá nga ñaki tjíojngo kon nga tʼatsʼe Niná nroani jmeni xi makjainle. Jósʼin ʼyañá jebi. Kuinga tsín tokui síkʼajennile kon tsa jngo ndsʼee sikiʼaon kjoafaʼaitsjenle kʼoa tsa tsín kixi tíjna jmeni xi sʼin tsa ʼyani (Sal. 119:165). Kʼianga kjoa faʼatojin sa nʼio sa nʼio sʼejna je kjoamakjainle (Sant. 1:2-4). Jmé xi sʼiaan kʼianga nʼio sʼe̱jna je kjoamakjainná.

6. Jñá tsakʼangini nga kisʼele kjoamakjain je chjotatjenngile Cristo xi tsakatio nga siglo 1.

⁶ Je chjotatjenngile Cristo xi tsakatio nga siglo 1 nʼio kisatio je kjoamakjainle nga̱ yaa tsakʼangini jme xi tso je Énle Niná kao “je kjoakixi xi tsʼe je énnda”, xi tsonile, jmeni xi tsakakóya je Jesús (Gál. 2:5). Je kjoakixi jebi kui xi makjainná xi chjotale Cristo maa, jolani je kjoabʼechjíntjaile Jesús kao nga jaʼáyanile. Je pastro Pablo kʼoatsakʼé kon nga ñaki kʼoatjín jebi. Nga̱ kui kisichjén je xo̱n Escritura nga “kitsoya, kʼoa kisikixiya kjoa nga koanchjén nga Cristo tsakjaʼá kjoañʼai, kʼoa nga jaʼáyajinle kʼen” (Hech. 17:2, 3). Je chjotale Cristo jebi koankjainle jme xi tsakʼinyale kʼoa kisijéle Niná je nganʼiotsjele nga koanjinle jotjínni je Énle. Tsakásjaiya tsa ya xo̱n Escritura yʼangini jmeni xi tsakʼinyale (Hech. 17:11, 12; Heb. 5:14). Chjota jebi ali tokui koankjainnile nga tsjoa kisatio kon, kʼoa ali tokui kisixánile Jeobá nga ya ñatjen koatio kao xi ngikʼa chjotale Cristo. Je kjoamakjain xi kisʼele yaa tsakʼangini jmeni xi tso je Énle Niná (Col. 1:9, 10).

7. Jósʼin koasenkaoná je kjoamakjainná.

⁷ Jmeni xi tso je Énle Niná alikʼia bʼantjaiya (Sal. 119:160). Tobʼelañá, alikui bʼantjaiya ningalani sikiʼaonná jme xi kuitsoná jngo ndsʼee kʼoa tsa ai jée koa̱njngí.  Kʼoati tsín bʼantjaiya kʼianga kjoa sʼená. Kuinga machjénni nga nda jchaa jotso je Énle Niná kʼoa kʼoéjngoaa tokoán nga ñaki kʼoatjín jme xi tso. Jngo yá xi na̱nga̱ kjio ja̱ma̱le alikui jme xi male ninga nʼio faʼa je ntjao̱. Kʼoatisʼinni, kʼiatsa ya Énle Niná chʼa̱ngiñá jmeni xi makjainná koasenkaoná kʼianga ñʼai tjín kjoa kuitjátojiaan. Jmé xi koa̱n sʼiaan nga ñaki sʼe̱jngo tokoán nga kʼoatjín jmeni xi makjainná.

8. Tojo tso 2 Timoteo 3:14, 15, ánni nga tsakʼéjngoni kon je Timoteo nga ñaki kʼoatjín jme xi koankjainle.

⁸ Ánni nga tsakʼéjngoni kon je Timoteo nga ñaki kʼoatjín jme xi koankjainle (tʼexkiai 2 Timoteo 3:14, 15). * Jé male kao majchále kitsoya títjonle “xo̱n Escritura”. Tonga kʼoati kisikʼaya nichxin je Timoteo nga kiskotʼayajin. Nga kʼoakisʼin, tsabe nga ñaki kʼoatjín jmeni xi kiskotʼaya. Xijekoanni, je Timoteo, male kao majchále chaan tsakʼinyale jmeni xi bakóya je chjotale Cristo. Tokʼoajinkoanle kʼianga tsabe nga tsjoake xínkjín je chjotale Cristo, kʼoa kui xi koanmele nga ya tsakʼejnakao kʼoa nga tsakasenkao je ndsʼe̱ ya jinjtín (Filip. 2:19, 20). Tonga je kjoamakjainle alikui ya tsakʼangini jokisʼe kon, yaa tsakʼangini jmeni xi tso je Énle Niná kʼoa kui xi tsakasenkao nga tosi tonda kisimiyo je Jeobá. Ñá kʼoati tjínnele chótʼayá je Biblia kʼoa si̱kjaʼaitsjenjiaan jmeni xi bakóyaná tʼatsʼe Jeobá.

9. Jñánile xi jan koya xi tsín jao kʼoé tokoán nga ñaki kʼoatjín.

⁹ Janla koya kataʼyaa xi tsín jao kʼoé tokoán nga ñaki kʼoatjín. Xi títjon, nga je Jeobá kisinda ngayeje jmeni xi tjín (Éx. 3:14, 15; Heb. 3:4; Apoc. 4:11). Xi majaoni, nga ya Biblia faʼaitʼa jme xi mele Niná nga katasʼejinle je chjota (2 Tim. 3:16, 17). Kʼoa xi majanni, nga jngo jtín mani chjota xi je Jeobá bexkón kʼoa xi je Jesucristo bándiaale, xi tsonile, je testigole Jeobá (Is. 43:10-12;  Juan 14:6; Hech. 15:14). Nga sʼe̱jngo tokoán xi tʼatsʼe jebi alikuikjoan machjén nga jchaa ngayeje jmeni xi bakóya je Biblia. Xi tjínnele sʼiaan kuinga si̱jinlee yaoná jmeni xi chotʼayá nga ngisa katasʼejngo tokoán nga ñaki kʼoatjín jmeni xi makjainná (Rom. 12:1, TNM).

10. Kʼianga ʼyaa jmeni xi bakóya je Biblia, jmé xi tjínnele sʼiaan.

¹⁰ Kʼianga jesʼe̱jngo tokoán jokjoantjínni tʼatsʼe Jeobá, tʼatsʼe Biblia kao tʼatsʼe naxinandále Niná, tjínnele koa̱nná si̱chjén je Énle Niná nga kʼuínyalee xi kjaʼaí chjota. Nga̱ kui xá kjinená xi chjotale Cristo maa nga koakoyalee xi kjaʼaí jmeni xi majinná tʼatsʼe Énle Niná (1 Tim. 4:16). * Kʼoa nga kʼoaʼmilee xi kjaʼaí nga ñaki kʼoatjín jmeni xi bakóya Biblia ngisaa nʼio sʼejna je kjoamakjainná.

11. Jmé choa̱ xi tsakʼéjnaná je Pablo josʼin koakoyalee xi kjaʼaí.

¹¹ Kʼianga kitsoyale chjota je pastro Pablo kui xi koanmele nga katamakjainle xi tʼatsʼe Jesús “jo tso kjoatéxomale Moisés kao xo̱nle je xi kinchja̱ya tʼatsʼe Niná” (Hech. 28:23). Jósʼin koa̱n chjénngiaa je choa̱le pastro Pablo kʼianga ʼmiyalee chjota xi tʼatsʼe Énle Niná. Alikui koa̱n nga tokui kʼuínyalee jmeni xi to jetjía jkoaa. Tjínnele nga kuinyakoaa nga katasíjinle yaole tʼatsʼe jmeni xi tíkotʼaya, nga̱ kʼoasʼin koa̱nchriantʼanile je Jeobá. Alikui koa̱n nga tokui skótʼayani je Énle Niná nga bexkónná, kui xi mená nga ñaki katasʼejngo kon nga ñaki kʼoatjín jmeni xi kjimajinle tʼatsʼe Niná.

12, 13. Jmé xi tjínnele sʼin xi xijchá ma nga kuinyakao je ʼndíxtile nga tosi tonda Niná katasíxále.

¹² Jon xi xijchá mao kuijin xi meno nga tosi tonda Niná katasíxále je ʼndíxtino. Tsakui nichxin kʼoasʼin nikjaʼaitsjaon nga nʼio sa̱tío je kjoamakjainle tsa nda miyo sʼe̱le ya jinjtín, tonga ali tsa to miyojin xi machjénle je ʼndíxtino nga ñaki sa̱tíojngo kon. Machjén nga miyole Niná koa̱n kʼoa nga tsín jao katasatío kon nga ñaki Énle Niná jmeni xi tsoya je Biblia.

¹³ Kʼiatsa meno nda koakoyalao Énle Niná je ʼndíxtino tjínnele nda choa̱ kʼoéjnalao nga chótʼayao je Biblia. Chʼa̱sjeʼao nichxin nga si̱kjaʼaitsjenjion jmeni xi chotʼayao. Kʼoasʼin kʼuínyanilao je ʼndíxtino nga kʼoati katasʼín. Tojo nikao je xi ʼmiyalao Biblia kʼoati tikao je ʼndíxtino nga tʼinyalao josʼin sichjén je xo̱n kao video xi nichjén nga ʼmiyaa Énle Niná. Kʼoasʼin kuinyakaoño je ʼndíxtino nga tsjoake koa̱n Jeobá kʼoa nga koaitjenngi josʼin bándiaa je choʼnda xi nʼiotʼakon, xi nda be xá (Mat. 24:45-47). Ali tsa tokuijin ʼmiyalao je ʼndíxtino xi choa ñʼai tjín xi faʼaitʼa  Biblia. Tisenkao nga katamajinle jñanile xi “ñʼai tjín xi tsʼe Niná”, tonga kuenta tʼiaon jotjín nóle kʼoa jokji tjen majinle, nga kʼoasʼin kʼuínyalao nʼio sʼe̱jna je kjoamakjainle (1 Cor. 2:10).

14. Ánni nga tjínnenile chótʼayajiaan je én xi tongini kinokjoa xi faʼaitʼa Biblia (kʼoati chótsenlai je recuadro “ A koaanná kʼuínyaa josʼin tsoyanile jebi”).

¹⁴ Jmeni xi tso je én xi tongini kinokjoa xi faʼaitʼa Biblia basenkaoná nga nʼio sʼejna je kjoamakjainná xi kao Jeobá. Jñánile xi tíbasenkaoná nga nʼio tísʼejna je kjoamakjainná. Tsakui nichxin kui tíbasenkaoná xi nchja̱ni tʼatsʼe nichxin fetʼa (Mat. 24:3, 7; 2 Tim. 3:1-5). Ninga jekitjoson kʼa je én xi tongini kinokjoa tojo basenkaoná nga tosi tonda nʼio sʼe̱jna je kjoamakjainná. Tobʼelañá, a majinná josʼin kitjoson kʼoa josʼin tíbitjoson je én xi tongini kinokjoa xi faʼaitʼa ya capítulo 2 kao 11 xi tsʼe Daniel. * Tsakui chʼangiñá josʼin makjainná jmeni xi tso Biblia, chókjoajinná tojme kjoa xi kuitjátojiaan. Jngola choa̱ kataʼyaa, je ndsʼee xi Alemania tsʼe kichokjoajinle kʼianga chjota kitjenngike nga kisʼejna je Kjoajchántse xi majaoni. Koankjainle jmeni xi tso Énle Niná ningalani tsín koanjinle ngayeje josʼin kuitjoson je én xi tongini kinokjoa tʼatsʼe nichxin fetʼa.

15-17. Jósʼin tsakinyakao nga kiskotʼaya Biblia je ndsʼee kʼianga kitjenngike je chjota nazi.

¹⁵ Ya naxinandá Alemania, jmi ndsʼee xi kjoañʼai kisikjaʼá je chjota nazi. Je Hitler kao xi tsakasenjna títjonle je sondado xi Heinrich Himmler tsakʼin, nʼio jtike koan je testigole Jeobá. Jngo tichjaa tsakʼéyanajmí jokitsole Himmler je tichjaa xi ya tjío. I kitsole: “Jon kʼoabixón nga je Jeobá batéxoma ya ngʼajmi, tonga i̱ Sonʼnde jin batexomaijin. Kʼiajin jchale ʼyáni xi ngisa tse chókjoale, a jonñó axo jinníjin”. Jmé xi tsakinyakao choʼndale Jeobá nga kixi koan.

¹⁶ Nga kui nichxin, je choʼndale Niná koanjinle nga nó 1914 tsakʼétsʼiakao nga tsakatéxoma je Chjotaxále Niná. Kʼoa jebe  nga toxá koaitjenngikeni chjota. Koanjinle nga nijngojin chjotaxá sonʼnde koa̱nle kʼoechjoale nga kuitjoson josʼin mele Niná. Je Hitler alikui je kʼoakoa̱nle nga kʼoechjoale xále Niná kʼoa alikui ngisa tse nganʼio sʼe̱le tikʼoajinni je Chjotaxále Niná. Je choʼndale Niná alikui jao kisatio kon nga chan kjoetʼa josʼin tíbatéxoma Hitler.

¹⁷ Kʼoakoan kjoaixi. Tochoatsee jaʼato nga likui tije chjota nazi tsakatéxomani kʼoa tsakangaa je Heinrich Himmler, xi kʼoakitso nga je batéxoma i̱ Sonʼnde. Kʼianga tíbanga, jngo ndsʼee kiskajin xi Lübke ʼmi apellidole, xi ndoyá tsakʼejnaʼya. Je Himmler i kitsole je ndsʼee: “Kʼoa jmé xi koa̱n ndʼai”. Je ndsʼee Lübke kʼoakitsole nga tokʼoa jebe nga ska̱jenngi je chjotaxá nazi kʼoa nga ndái koatio je testigole Jeobá. Je Himmler tojyó tsakʼejna nga̱ tsín nda kisikʼaxki̱ tsakai je testigole Jeobá. Nga koanskanni kisikʼien yaole. Jebi kui bakóyaná nga nʼio sʼe̱jna je kjoamakjainná kʼoa chókjoajinná je kjoa xi kuitjátojiaan tsa chótʼayajiaan je én xi tongini kinokjoa kao jmesani xi tso je Biblia (2 Ped. 1:19-21).

18. Tojo tso Juan 6:67, 68, ánni nga tjínnenile sʼe̱ná je “kjoachjine kao kjoaʼisentakon” xi tsʼe Niná, tojo kitso Pablo.

¹⁸ Ngatsʼiaa xi chjotale Cristo maa tjínnele koakoá kjoatsjoacha. Tonga kʼoati tjínnele sʼe̱ná je “kjoachjine kao kjoaʼisentakon” xi tsʼe Niná (Filip. 1:9). Tsa tsín kʼoasʼiaan, kuijin kjoaʼasʼenjin kjoafaʼaitsjenná xi tsín kixi tjín kʼoa jejin kʼoanachaná je chjota xi yátsʼi̱n binyále Niná (Efes. 4:14). Kʼianga nʼio nkjín xi tsín tichjotatjenngile Jesús koanni nga siglo 1, je pastro Pedro ñaki tsakʼéjngo kon nga kui “én xi tsjoá kjoabijnachon ngantsjai” kitsoya je Jesús (tʼexkiai Juan 6:67, 68). * Ningalani tsín koanjinyejele Pedro nga kʼia jmeni xi kitsoya je Jesús, kixi kitʼale nga̱ kisijinle yaole jokjoantjínni xi tʼatsʼe Cristo. Tsa ñaki sʼe̱jngo tokoán tsanda ñá nga ñaki Énle Niná jmeni xi tsoya Biblia, nʼio sʼe̱jna je kjoamakjainná kʼianga kjoa kuitjátojiaan kʼoa kuinyakaoñá xi kjaʼaí nga nʼio katasatío je kjoamakjainle (2 Juan 1, 2).