Kʼiaa Naʼmitítjon koan je Jesús kʼianga kisʼenngindá nga nó 29. Kataʼyala ánni kʼoabixónsíñá. Nga kisʼenngindá je Jesús kʼoasʼin tsakakóni nga tíjnanda nga sitjoson josʼin mele Niná. Kʼoa kui kitsoyanile nga tíjnanda nga tsjoá kjoabijnachonle xi totʼatsaan nga kʼoechjíntjainá (Gál. 1:4; Heb. 10:5-10). Je sonxta kui tsoyanile josʼin mele Jeobá. Kʼianga kʼien je Jesús kui xi tsonile nga ya sonxta kinikʼienson. Je sonxta jebi kʼiaa saʼnda tíjnani nga kisʼenngindá je Jesús. Je yo̱ngo̱ kui tsoyanile josʼin tsakʼéndajin je Jeobá nga sʼe̱tsʼoale. Kʼoa je yo̱ngo̱ jebi kʼoati kʼia kisʼejna kʼianga kisʼenngindá je Jesús. Nga nʼio tjínle kjoandosin nga jngo sonxta sʼe̱le je yo̱ngo̱, kʼoatisʼin nʼio tjínle kjoandosin josʼin tjínndajinle je Jeobá nga kuitjoson josʼin mele (Mat. 3:16, 17; Heb. 5:4-6).

Nga jetsakʼéndajin je Jeobá josʼin sʼe̱tsʼoale xi totʼatsʼe nga kʼientjaininá je Jesús kui kitsoyanile je yo̱ngo̱. Tonga je yo̱ngo̱ jebi jngoo naʼmitítjon machjénle. Je Jeobá “kao Espíritu Santo kao nganʼio” kiskoejin je Jesús nga Naʼmitítjon koan (Hech. 10:37, 38; Mar. 1:9-11). Jósʼin ʼyañá nga tongini Naʼmitítjon koan je Jesús nga kjesa nikʼienjin. Yaa ʼyañá josʼin kitjoejin je Aarón kao xi naʼmitítjon koan nga koanskanni.

Je kjoatéxoma xi kitsjoa Jeobá kʼoatso nga toje naʼmitítjon xi koan jaʼasʼen ya ʼNde xi nʼio tsje ya ndʼianajño, yaa yo̱ngo̱ kisʼejna ʼNde xi nʼio tsje nga jekoanni. Jngoo najño kitsjenjchxo ya yo̱ngo̱ xi síjaoya je ʼNde xi nʼio tsje kao je ʼNdetsje, kʼoa je naʼmitítjon tokʼiaa faʼasʼen ya ʼNde xi nʼio tsje nichxin nga sítsje jéele chjota israelita (Heb. 9:1-3, 6, 7). Je Aarón kao xi naʼmitítjon koan nga koanskanni tongini kixinyanda nga kjesa faʼasʼenjin ya ʼNde xi nʼio tsje ya ndʼianajño. Tikʼoasʼinni je Jesús, kʼiaa kitjoejin nga Naʼmitítjon koan ya yo̱ngo̱ xi tsʼe Jeobá nga kjesa nikʼienjin, kʼoa kʼiaa jaʼasʼen ya ʼNde xi nʼio tsje kʼianga jekinikʼien nga ya ngʼajmi kʼoéjna (Heb. 10:20). Kuinga i̱ kitsoni je pastro Pablo: “Tonga kʼia nga jaʼai kasenbasen Cristo xi naʼmitítjonle je kjoanda xi kjoaʼaí, jaʼasʼen je ndʼianajño xi ngisa nʼio nda, kʼoa xi ngisa kixi, xi tsín ntsja chjota koanndani, kui xi tsoni nga likui tsʼe je sonʼndebi” (Heb. 9:11, 24).

Kʼiaa koanchjén je kjoa xi kisʼendajin chjotse kʼianga kicho je Jesús ya ngʼajmi nga kitsjoatʼale je Jeobá jokji chjíle je njínle. Jan koya tjínni josʼin kitsjoatʼa je kjoabijnachonle.

Xi títjon, yaa ngixko̱n Jeobá kichokasejna. Xi majaoni, kitsjoatʼale Jeobá jokji chjíle je njínle. Kʼoa xi majanni, je Jeobá kisasenle je kjoabʼechjíntjaile Jesús. Kʼiaa kitsʼiani nga koanchjén je kjoa xi kisʼendajin chjotse nga jekitjoson nga jan koya jebi.

Je Biblia alikui kʼoatso kʼiákjoánni kʼoakoan jebi, kuinga tsín koa̱n kʼoakuixónsíñá kʼiákjoánni kitsʼiani nga koanchjén je kjoa xi kisʼendajin chjotse. Tonga ʼyañá nga te nichxin tongini nga Pentecostés ki je Jesús ya ngʼajmi (Hech. 1:3). Ninga tsínkjoan ʼyaa kʼiani, tonga yaa jinle nichxin jebi kitsjoatʼa jokji chjíle je njínle Jesús, kʼoa je Jeobá kisasenle (Heb. 9:12). Kʼoa kʼiaa nga sʼuí Pentecostés tsaʼya sontsenle nga jekoanchjén je kjoa xi kisʼendajin chjotse (Hech. 2:1-4, 32, 33). Kʼoasʼin tsaʼyanile nga jekisʼetsʼiakao nga koanchjén je kjoa xi kisʼendajin chjotse.

Xi tochoa én, kʼiaa kisʼetsʼiakaoni nga koanchjén je kjoa xi kisʼendajin chjotse kʼianga kisasenle Jeobá je kjoabʼechjíntjaile Jesús kʼoa nga jaʼasʼenjin kjoasʼendajin jebi je chjotale Cristo xi ngʼajmi koatexomakao Jesús. Kʼoa nga Naʼmitítjon koan je Jesús, jé koanchjén kʼianga kisʼejnabasen je kjoa xi kisʼendajin chjotse (Heb. 7:25; 8:1-3, 6; 9:13-15).