Tjínkʼa xi kjonangi
A koaan kui sichjén je testigole Jeobá je página xi toxá satíoni ya Internet nga koasjai ʼya xi kuixankao
Je Jeobá kui xi mele nga tsjoa katasatío kon je chjota xi bixan kʼoa nga tondiaa katabatiokao xínkjín (Mat. 19:4-6). Kʼiatsa kʼoasʼin tinikjaʼaitsjain nga meli kuixain, jósʼin koa̱nsjaili je xi kuixankoai. Nga je Jeobá kisindaná, ngisaa nda be jmeni xi machjén nga sʼiaan kʼianga tosʼa titsomakoaa xíngiaa kʼoa kʼia nga jekabixan. Ndasʼin bichómani nga nitjosoán je kjoafaʼaitsjen xi tsjoá Biblia. Kataʼyala jme xi tso.
Xi títjon, kuenta sʼiaan jebi: “Je ni̱ma̱ná ngisaa nʼio bʼanacha tikʼoajinni tojmeni, kʼoa matso maskále” (Jer. 17:9). Kʼianga tosʼa bʼetsomakao xínkjín je chjota, nʼio tsjoake ma xínkjín kʼoa tsakui nichxin kui xosikao nga tsín nda sikjaʼaitsjenni jmeni xi sʼin. Tsínjin ndasʼin kuichomani tsa tokui kuixankaoni xínkjín jotjío kon (Prov. 28:26). Kuinga tsín ndatjínni nga kui nʼio kjaoyani jotjío kon jngo xʼin jngo chjoón kʼianga tosʼa tjíobʼétsʼiakao nga tjíotsomakao xínkjín, kʼoa tsín ndatjín tsa jme xi kʼoendajin tsa kje bexkonjin xínkjín.
Ya Proverbios 22:3 itso: “Je xi sínkjínle kon be jmeni xi xkón tíjna kʼoa bʼejnaʼmale, tonga je xi tsínle kjoafaʼaitsjen alikui binya kʼoa kjoa tsaojin”. Jósʼin kuichomani kʼiatsa kui si̱chjén je página kao aplicación xi toxá satíoni ya Internet nga kjoásjee ʼyani xi mená kuixankoaa. Tjínkʼa xi tsínni nda satío kon nga ya Internet básjai ʼyani xi mele kuixankao. Xi ijngosani, tjínkʼa chjota xi Internet síchjén nga bʼanacha kʼoa xi to tao̱n xi sʼínnile. Kʼoa saʼnda tjínkʼa chjota jebi xi kʼoatso nga testigole Jeobá ma.
Tjínkʼa je página xi tsʼe Internet xi kui xá tjíoni nga ya tsaojin xínkjín je chjota xi mele kuixan. Tonga jebi alikui ʼyale tsa ndasʼin bichómani. Alikuijin ndatjín tsa tokui Internet si̱chjén nga kjoásjee ʼyani xi mená kuixankoaa. Je Internet alikui mangóson kao jmeni xi tso je kjoafaʼaitsjen xi tsjoá Biblia (Prov. 1:7; 3:5-7).
Ya Proverbios 14:15 itso: “Toʼyani xi tsín nkjín kon tomakjainyejele tojmeni xi ʼmile, tonga je xi sínkjínle kon kosonnile josʼin binyá ndso̱ko̱”. Machjén nga títjonkjoanla nda jchaxkoaan je chjota xi mená kuixankoaa. Tonga tsínjin nda jchaxkoaan je xíngiaa tsa tokui Internet si̱chjén nga cho̱banajmiá. Tjínkʼa chjota xi kʼoasʼin síkjaʼaitsjen nga jetsabexkon xínkjín kʼianga toya Internet tsakjáonajmí, tonga kʼianga ñaki kitsaojin xínkjín tokʼoanikoanle.
Jngo xi salmo kiski i kitso: “Alikui ya fajta je chjotandiso, kʼoa alikui ya sisinle je xi jaonkjaín” (Sal. 26:4). Nʼio nkjín chjota xi tobʼanacha jmeni xi tso ya Internet to jomani nga koa̱nkjainle xi ngikʼa jmeni xi tso. Kʼoa tsakui nichxin tsín kʼoatsokixi jokjoannikjoan. Kʼoa tsa tjínkʼa xi kʼoatso nga testigole Jeobá ma, a jekisʼenngindá chjota jebi, a nʼio tjío kjoamakjainle, a nda tjío ngixko̱n Jeobá, a nda bʼaxki̱ ya jinjtín, axo tsín nda choa̱ batío, a kʼoatso xi ngikʼa nga tsín je si̱miyoaa (1 Cor. 15:33; 2 Tim. 2:20, 21). A tiʼndele nga koa̱n kuixan chjota jebi. Nʼio tjínle kjoandosin nga jchaa jebi, tonga tsínjin josʼin jchañá tsa tsín chjónangilee je ndsʼee xi bexkon (Prov. 15:22). Jngo choʼndale Jeobá xi kixi tífitʼale alikuijin kuitso kon nga je kuixankao jngo chjota xi tsín mangóson kʼoa xi kje fisʼenngindájin (2 Cor. 6:14; 1 Cor. 7:39).
Nʼio xkón tíjna kʼiatsa kui página kao aplicación xi toxá satíoni ya Internet si̱chjén nga kjoásjee ʼyani xi mená kuixankoaa. Tonga jósʼin koa̱nsjaininá kʼoa jósʼin jchaxkonñá je chjota xi kuixankoaa. Kʼianga ma mangián kjoajtín kʼoa nga satíoná kjoajtíntse tsaojinñá je ndsʼee kao tichjaa xi ma chjakaonajmiá.
Nga sa nda sa nda bexkon xínkjín jngo chjoón jngo xʼin, ngisaa be tsa mangóson josʼín kʼoa jmeni xi mele kuichotjenngi nga jngó jngó
Kʼoa nga tsín ma bitjoaa, jolani xi totʼatsʼe chʼin COVID-19, tojo satíoná je kjoajtín kʼoa maa ʼyaxkoaan je ndsʼee kao tichjaa xi sʼa tjíotoje. Nga satíoná kjoajtín ʼyañá je ndsʼee kao tichjaa xi bʼakaole faʼa kʼoa ʼyañá jotso nga tsjoá comentariole (1 Tim. 6:11, 12). Kʼoati koa̱n kʼia cho̱banajmiá kʼianga jefetʼaná kjoajtín ninga to jao jan koa̱nñá. Ijngosa koya josʼin jchaxkoaan je ndsʼee kao tichjaa kʼiaa nga kʼoasʼin kʼoéndajiaan nga kui Internet si̱chjén nga cho̱banajmiá. Nga kʼoasʼin kuiyojtián jchañá josʼin bekon xi ngikʼa ndsʼee kʼoa jokjoannikjoan (1 Ped. 3:4). Kʼianga sa nda sa nda jchaxkoaan xíngiaa, jchañá tsa skénndiaaná kʼoa tsa mangóson jmeni xi mená kuichotjenngiaa.
Kʼiatsa koaitjenngi je kjoafaʼaitsjen xi tsjoá Biblia jngo ndsʼee kʼoa tsa jngo tichjaa xi sʼa tíjnatoje kʼianga koasjai ʼyani xi kuixankao ndasʼin kʼoéjna. Itso je Biblia: “Je xi masjaile jngo chjoón xi nda sʼín [kʼoa tsa xʼin xi nda sʼín], nʼio chjíle xi masjaile, kʼoa sokóle kjoandale Jeobá” (Prov. 18:22).
