1. Jósʼin tjínnele jchatokoán nga ma bʼetsʼoalee Niná.

 KUI kjoanda tsjoáná je Niná xi kisinda ngʼajmi kao Sonʼnde nga koa̱n chja̱kaonajmiá kʼianga kʼoétsʼoalee. Si̱kjaʼaitsjenjinla jebi: koaan kʼoétsʼoalee Jeobá tokʼiani mená kʼoa tojme én xi maná nokjoaa kʼianga kʼoéyanajmílee jotjín tokoán, kʼoa alikui machjén nga tongini si̱jékjoalee nga kʼoasʼiaan. Koaan kʼoétsʼoalee Niná ninga hospital tisojnaa kʼoa ninga ndoyá tijnaʼyaa nga̱ ʼyañá nga kjuinrʼoéná. Nʼio chjí ʼyatokoán je kjoanda xi tjínná nga ma bʼetsʼoalee Niná.

2. Jósʼin tsakakó David nga nʼio chjí tsabekon nga tsakʼétsʼoale Niná.

² Je rey David nʼio chjí tsabekon nga tsakʼétsʼoale Niná. I kitso kʼianga kisele je Jeobá: “Je kjoabʼetsʼoana kʼoasʼin katasʼejna joni tsa xongó ngixkuin” (Sal. 141:1, 2). Kʼianga kui nichxin xongó koanchjén nga kisʼetsʼoale Jeobá, xi je naʼmi tsakʼénda (Éx. 30:34, 35). Nga xongó kisikʼaxki̱ je David kui xi kitsonile nga títjonkjoanla nʼio nda kisikjaʼaitsjen jmeni xi kuitsole Niná kʼianga kʼoetsʼoale. Kʼoati mená kʼoasʼiaan tsanda ñá, nga̱ kui xi mená nga sa̱sénle Jeobá nga kʼoétsʼoalee.

3. Ánni machjénsíni nga koakoá kjoaxkóntokon kʼianga kʼoétsʼoalee je Jeobá.

³ Machjén nga kao kjoaxkóntokon kʼoétsʼoanilee Jeobá. Si̱kjaʼaitsjenjinla je sén xi tsabe Isaías, Ezequiel, Daniel kao Juan. Ningalani kjaʼaí kjaʼaí sén kisakole, je xi tsín tsʼantjaiya kuinga kui tsabe jokji jeya tíjna Jeobá nga Rey sʼin tíjna. Je Isaías kui sén kisakole nga tsabe Jeobá nga jngo yáxile xi ngʼa kji tíjnason kʼoa nga ngʼa tíjna (Is. 6:1-3). Je Ezequiel kui sén tsabe nga carro tíjnason je Jeobá  kʼoa nga fate sʼin matsen “jngotjondaile josʼin mafate je ʼya̱” (Ezeq. 1:26-28). Je Daniel kui tsabe je “Chjotajchínga xi jekjoatse tíjna” xi najñochxoa yʼakjá kʼoa xi ya tíjnason jngo yáxile xi lʼí tíbitjole (Dan. 7:9, 10). Kʼoa je Juan kui sén tsabe nga je Jeobá yaa tíjnason jngo yáxile kʼoa “jngo ʼya̱ xi ya séjnandaile je yáxile, xi kʼoakji joni tsa sénle la̱jao̱ xi esmeralda ʼmi” (Apoc. 4:2-4). Nga nikjaʼaitsjenjiaan jokji jeya tíjna Jeobá kui síkjaʼaitsjenjinná nga nʼio tse kjoanda tjínná nga ma bʼetsʼoalee kʼoa nga tjínnele koakolee kjoaxkóntokon. Jmé xi koa̱n kʼuínlee kʼianga kʼoétsʼoalee.

4. Tojo kitso Jesús nga kitsoya josʼin tjínnele kʼoétsʼoaa, jméni xi bakóyaná je xi títjon kisikʼaxki̱ (Mateo 6:9, 10).

⁴ (Tʼexkiai Mateo 6:9, 10). * Kʼianga kinchja̱ya ya jngo sonnindo, je Jesús kui kitsoyale je chjotale josʼin tjínnele kʼoetsʼoa nga sa̱sénle Niná. Kʼianga i̱ kitso Jesús: “Jon kʼuisʼin tʼetsʼoao”. Kui títjon kisikʼaxki̱ xi kui nchja̱ni jmeni xi mele Jeobá: nga katabitjotsje jaʼaínle, nga katabatéxoma Chjotaxále xi sikjeson ngatsʼi kontrale Niná, nga katabitjoson jmeni xi kitso nga tse kjoanichikontʼain kjoaʼaíkao i̱ Sonʼnde kʼoa nga sichikontʼain je chjota. Tsakui jebi si̱kʼaxkiaa nga kʼoétsʼoaa, kʼoasʼin koakoñá nga chjí ʼyaa jmeni xi mele Niná.

5. Ánni kʼoabixónsíñá nga tsín chʼaotjín nga kui nijé jmeni xi machjénná kʼianga bʼetsʼoaa.

⁵ Kʼianga tsakakóya Jesús josʼin tjínnele kʼoétsʼoaa, kʼoati kitso nga tsín chʼaotjín nga kui si̱jé jmeni xi machjénná. Koaan si̱jélee Jeobá nga katatsjoáná jmeni xi chi̱nee nga nyaon nyaon, nga katasíchatʼaná, nga katabasenkaoná nga tsínkui kʼoasʼiaan xi chʼaotjín, kʼoa nga katasíkuindaná nga tsín jokatasíkaoná je Na̱i (Mat. 6:11-13). Nga kui jebi nijélee Jeobá kʼoasʼin bakoñá nga ʼyaa nga toje xi koa̱nle tsjoáná jmeni xi machjénná kʼoa nga mená nda kuiyoaa ngixko̱n.

6. Kʼianga kʼoétsʼoaa, a tokui xi machjén nga kui si̱kʼaxkiaa jokitso Jesús nga kitsoya josʼin tjínnele kʼoétsʼoaa.

 ⁶ Jmeni xi kitsole Jesús je chjotatjenngile josʼin tjínnele kʼoetsʼoa ali tsakuijin xi koanmele Jesús nga tokuikjoán én sikʼaxki̱ kʼianga kʼoetsʼoa. Kʼianga tsakʼétsʼoa Jesús nga kjaʼaí nichxin, kui kisikʼaxki̱ jmeni xi koankjáojinle nga kuikjoán nichxin (Mat. 26:39, 42; Juan 17:1-26). Kʼoati koa̱n sʼiaan tsanda ñá, koaan kui si̱kʼaxkiaa jmeni xi makjáojinná kʼianga kʼoétsʼoalee je Niná. Tobʼelañá, kʼianga kui tinikjaʼaitsjenjiaan jmeni xi mená sʼiaan, koaan si̱jélee Niná kjoachjine kao kjoankjíntokon (Sal. 119:33, 34). Tsa jme xá sʼe̱nená xi ñʼai koa̱nná, kʼoakʼuínlee Niná nga katatsjoáná kjoankjíntokon kʼoa nga katabasenkaoná nga koa̱nná si̱tjosoán xá jebi (Prov. 2:6). Je xi xijchá ma koaan kʼoetsʼoantjai je xtile, kʼoa je xti koaan kʼoetsʼoantjai je xijchále. Kʼoati koa̱n kʼoétsʼoantjé je chjota xi Biblia ʼmiyalee kao xi ʼmiyasonlee je Énle Niná. Kʼianga kʼoétsʼoaa ali tsa tokuijin xi machjén nga to si̱jé ʼndeʼndee jme xi mená.

7. Ánni tjínnenile chʼa̱sjengʼaa Jeobá kʼianga kʼoétsʼoalee.

⁷ Kʼianga kʼoétsʼoaa kʼoati machjén nga chʼa̱sjengʼaa Jeobá, nga̱ jé xi ngisa bakinle nga kuitjongʼa. Jngo xi kiski salmo i kitsole Jeobá: “Nda chjotai kʼoa tijnandaní nga nichatʼai”. Kʼoa i kitsosale: “Jngoní Niná xi tjínle kjoamatokon kʼoa xi mamachai chjota, tsejtaní kʼoa nʼio tjínli xi ñaki kjoatsjoacha kʼoa kao kjoakixi” (Sal. 86:5, 15). Nʼio nkjín koya anni nga chʼasjengʼañá je Jeobá tʼatsʼe jokjoan kao jmeni xi sʼín.

8. Kʼianga kʼoétsʼoaa, jméni xi koa̱n si̱kʼaxkiaa nga kʼoailee kjoanda Jeobá (Salmo 104:12-15, 24).

⁸ Kʼianga kʼoétsʼoalee Jeobá machjén nga chʼa̱sjengʼaa kʼoa nga kʼoailee kjoanda tʼatsʼe ngayeje jmeni xi tsjoáná, jolani nga naskásʼin matsen je naxó, nga nʼio nkjín koya tsojmi kitsjoaná xi ma chinee kʼoa nga nda satío tokoán nga ya biyokoaa je miyoná. Nʼiosa nkjín koya jmeni xi tsjoáná Niná nga̱ kui xi mele nga tsjoa sa̱tío  tokoán (tʼexkiai Salmo 104:12-15, 24). * Bʼailee kjoanda Jeobá nga tsoyaná xi tʼatsʼe, xi basenkaoná nga nʼio sʼejna kjoamakjainná kʼoa nga tsjoáná jngo kjoachoya.

9. Jméni xi sʼiaan nga tsín cha̱jinná nga kʼoailee kjoanda Jeobá (1 Tesalonicenses 5:17, 18).

⁹ Sakʼoa chajinná nga bʼailee kjoanda Jeobá xi totʼatsʼe jmeni xi tsjoáná. Jméni xi koa̱n sʼiaan nga tsín kʼoakatamaa. Koaan kʼoétʼaxoaan jmeni xi si̱jélee Jeobá, kʼoa nga koa̱nskanni si̱kjaʼaitsjenjiaan jósʼin kitsjoaná jmeni xi kinijélee. Xijekoa̱n, kʼoétsʼoalee nga kʼoailee kjoanda nga tsakasenkaoná (tʼexkiai 1 Tesalonicenses 5:17, 18). * Nda satío tokoán kʼianga ʼya xi tsjoáná kjoanda. Kʼoati tsjoa sʼe kon Jeobá nga bʼailee kjoanda tʼatsʼe josʼin basenkaoná (Col. 3:15). Tonga tjínsa jmeni xi nʼio chjíle anni nga kʼoainilee kjoanda Jeobá. Kataʼyala jmé tʼatsʼeni.

10. Ánni nga kʼoainilee kjoanda Jeobá nga kisikasén Jesús i̱ Sonʼnde (1 Pedro 2:21).

¹⁰ (Tʼexkiai 1 Pedro 2:21). * Machjén nga kʼoailee kjoanda je Jeobá nga kisikasén ʼNdíle nga jaʼai tsoyaná. Nga chotʼayajiaan xi tʼatsʼe Jesús nʼio tse xi ʼyaa xi tʼatsʼe Jeobá kʼoa jmeni xi machjén nga sʼiaan nga nda sʼe̱ kon. Nga makjainná nga tsakʼéchjíntjainá Jesús koaan miyoná koa̱nni je Jeobá kʼoa nda kuiyoaa ngixko̱n (Rom. 5:1).

11. Ánni nga kui jaʼaínle Jesús nichjénsíñá nga bʼetsʼoalee Jeobá.

¹¹ Bʼailee kjoanda Jeobá nga ma bʼetsʼoalee xi totʼatsʼe ʼNdíle, nga̱ totʼatsʼe Jesús nga tsjoáná jmeni xi nijélee. Kʼianga kui jaʼaínle Jesús nichjén nga bʼetsʼoalee Jeobá nrʼoéná kʼoa tsjoáná jmeni xi nijélee. Je Jesús i kitso: “Tojmeni xi si̱jélao Nʼainá kao jaʼaínna, kʼoasʼin sʼian, jméni nga kʼoasʼin Nʼainá kuitjojeya xi totʼatsʼe ʼndíle” (Juan 14:13, 14).

12. Ánsani nga kʼoainilee kjoanda Jeobá xi totʼatsʼe ʼNdíle.

¹² Je Jeobá síchatʼa je jéená xi totʼatsʼe nga tsakʼéchjíntjainá Jesús. Je Biblia itso xi tʼatsʼe Jesús: “Tjínná jngo naʼmitítjon xi tsakʼejna ngakixile je yáxile xi tsʼe xi jeya tíjna ya ngʼajmi” (Heb. 8:1). Kʼoati i̱ tso: “Tíjnajngoná xi fajinná ngixko̱n Nʼainá, je Jesucristo” (1 Juan 2:1). Bʼailee kjoanda Jeobá nga kitsjoaná jngo Naʼmitítjon xi mamakená, xi majinle jokji bichó nganʼioná kʼoa xi kʼoati “bʼétsʼoa xi tʼatsaan” (Rom. 8:34; Heb. 4:15). Tsa tsínlani tsakʼéchjíntjainá je Jesús nga chjotajée maa alikuijin koa̱n kʼoétsʼoalee je Jeobá. Nʼio bʼailee kjoanda Jeobá nga kʼoasikji kjoanda kitsjoaná nga kisikasén je ʼNdíle i̱ Sonʼnde.

13. Jngo nitje̱n tongini nga kjesa nikʼienjin, jósʼin tsakakó Jesús nga tsjoake chjotatjenngile.

¹³ Jngo nitje̱n tongini nga kjesa nikʼienjin je Jesús, tsakʼétsʼoantjai chjotatjenngile kʼoa kʼoakitsole je Nʼaile  nga katasíkuinda, i kitsole: “Jméni nga je xi tsʼen likui sikaosíni” (Juan 17:15). Je Jesús kʼoasʼin tsakakóni nga tsjoake chjotatjenngile. Ningalani be nga tojeme kjoañʼai ni̱kjaʼá, kui xi koanmele nga nda koatio je chjotatjenngile.

14. Jósʼin bakoñá nga tsjoachaa je ndsʼee.

¹⁴ Tojo kisʼin Jesús, alikui tokui mangínñá jmeni xi machjénná ñá, kʼoati bʼetsʼoantjé je ndsʼee. Nga kʼoanʼia kʼoasʼin nitjosonñá jmeni xi kitso Jesús nga tjínnele tsjoacha koaan xíngiaa, kʼoa kʼoasʼin bakonilee Jeobá jokji tsjoachaa je ndsʼee (Juan 13:34). Kʼoa ʼyañá nga tsín toxitsjoa nga bʼetsʼoantjé je ndsʼee. Je Biblia kʼoatso nga tse nganʼio tjínle je kjoabʼetsʼoale chjota xi kixi (Sant. 5:16).

15. Ánni machjénni nga kʼoétsʼoantjé je ndsʼee.

¹⁵ Machjén nga kʼoétsʼoantjé je ndsʼee nga̱ tsee kjoa faʼatojin. Koaan kʼoakʼuínlee Jeobá nga katabinyakao nga katachókjoajinle je kjoa xi faʼatojin, jolani chʼin, tsa kjoaxkón bichóne, tsa kjoajchán tjín jñani tsʼe kʼoa tsa chjota tjíofitjenngike. Kʼoati koa̱n kʼoétsʼoantjé je ndsʼee xi ya tsjoánganʼio jñani kjoaxkón sʼe. Tsakui nichxin ʼyaxkuin tsa ʼyani xi kui kjoa tífaʼatojin, koaan tikʼaxki̱ jaʼaínle nga kʼoétsʼoalai Jeobá nga toji. Kʼoasʼin bakoñá nga tsjoachaa je ndsʼee nga kʼoaʼmilee Jeobá nga tosi tonda katabinyakao nga katachókjoajinle je kjoa xi faʼatojin.

16. Ánni machjénni nga kʼoétsʼoantjé je ndsʼee xi bándiaa.

¹⁶ Kʼoati tsjoá kjoanda je ndsʼee xi bándiaa ya jinjtín kʼianga bʼetsʼoantjé, nga̱ nʼio binyakao nga kʼoanʼia. Kʼoakoan je pastro Pablo. I kitso: “Kʼoatisʼin tʼetsʼoao tʼatsʼan, jméni nga kʼoaisínina én nga skoʼe ndsoʼba, kʼoa jméni nga likui tsakjonsínia nga kuinchjaya je kjoaʼma xi tsʼe énnda tʼatsʼe Cristo” (Efes. 6:19). Nichxin xi tiyoaa ndʼaibi, kʼoati tjín je ndsʼee xi nʼio síxá kʼianga bándiaaná. Kʼoasʼin bakoñá nga tsjoachaa nga kʼoaʼmilee Jeobá nga katasíchikontʼain ngayeje jmeni xi sʼín.

17, 18. Kʼiáni nga sakʼoa kʼoakʼuínná nga ya jinle xíngiaa kʼoétsʼoaa, kʼoa jméni xi kuenta sʼiaan.

¹⁷ Sakʼoajin kʼoakʼuínná nga ya jinle xíngiaa kʼoétsʼoaa. Tobʼelañá, kʼianga Biblia  tsoyale chjota jngo tichjaa, tsakui nichxin je tichjaa xi koaikao kʼoakuitsole nga je katabʼétsʼoa. Tsakui nichxin tichjaa jebi tosa kʼoakuitso nga kʼia kʼoetsʼoa nga jekjoetʼale nga skótʼaya nga̱ tsín nanda bexkon je xi Biblia tíʼmiyale. Kʼoasʼin skoe̱ni jmeni xi machjénle je xi Biblia tíʼmiyale.

¹⁸ Jméni xi koa̱n sʼin jngo ndsʼee tsa je kʼoakʼuínle nga kʼoetsʼoa kʼianga satíoná kjoajtín kʼoa tsa kʼiaje̱ nga bitjokʼinyasoán. Je xi kui kjoanda jebi tjínle machjén nga kuenta sʼin ánni nga biyojtínñá. Je ndsʼee xi kʼoakaole kʼoetsʼoa alikui koa̱n nga kʼia tsjoá kjoafaʼaitsjen kʼoa tsa jme én xi koajinkon je ndsʼee. Kʼianga satíoná kjoajtín me tongantsjai nga aon minuto bʼainá nga jndaa kʼoa nga sʼetsʼoa. Kuinga tsín koa̱n nʼio tse kuinchja̱ni je ndsʼee xi kʼoakaole kʼoetsʼoa, ngisaa nga tosʼa tífitsʼia je kjoajtín (Mat. 6:7).

19. Jméni xi koasenkaoná nga kuiyondalee nichxinle Jeobá.

¹⁹ Nga jemachrianle nichxinle Jeobá, ngisaa machjén nga kʼoailee kjoandosin nga kʼoétsʼoaa. Nga kui kinchja̱ni Jesús xi tʼatsʼe jebi, i kitso: “Kjiatakon tiyoʼni, tʼetsʼoao ngantsjai nichxin, jméni nga sʼe̱sínino nganʼio nga kuinyaxinlao ngayije je kjoabi xi kjoaʼaí” (Luc. 21:36). Kʼiatsa ntsjaintsjai kʼoétsʼoaa ngisaa nʼio sʼe̱jna kjoamakjainná kʼoa tiyondañá nga kjoaʼaí nichxinle Jeobá.

20. Jméni xi sʼiaan nga ya koa̱nngóson nga kʼoétsʼoalee Niná joni tsa xongó xi naskánje̱ tibʼaitʼalee.

²⁰ Jmé xi kachotʼayajiaan i̱ kjoaʼmiya jebi. Nʼio chjí ʼyatokoán nga ma bʼetsʼoalee Jeobá. Je xi ngisa tjínle kjoandosin nga si̱kʼaxkiaa kʼianga kʼoétsʼoaa kui jmeni xi mele Jeobá. Kʼoati bʼailee kjoanda Niná xi totʼatsʼe ʼNdíle kao Chjotaxále kʼoa bʼetsʼoantjaiñá je ndsʼee. Kʼoati koa̱n kʼoétsʼoalee Jeobá nga katatsjoáná jmeni xi machjénná nga nyaon nyaon kʼoa nga nʼio sʼe̱jna kjoamakjainná. Kʼoasʼin bakoñá nga chjí ʼyaa nga ma bʼetsʼoalee Jeobá kʼianga nda nikjaʼaitsjeen jmeni xi bixoán nga bʼetsʼoalee. Tsa kʼoasʼiaan, yaa koa̱nngóson joni tsa xongó xi naskánje̱ tibʼaitʼalee Jeobá kʼoa sa̱sénle nga kʼoasʼiaan (Prov. 15:8).