KJOAʼMIYA XI CHOTʼAYA 29
Kʼoainganʼiolee Jesucristo, xi séntítjonná
“Ngayije kjoatéxoma kitsʼaina ngʼajmi, kʼoa i̱ sonʼnde” (MAT. 28:18).
KJOAJNDA 13 Choa̱ xi tsakʼéjnaná Cristo
XI TÍNCHJA̱NI *
1. Jméni xi mele Niná nichxin xi tiyoaa ndʼaibi.
JE XI mele Niná ndʼaibi kuinga kataʼmiyason jngo tjíjtsa Sonʼnde je Énle (Mar. 13:10; 1 Tim. 2:3, 4). Je xá jebi tsʼee Jeobá, kʼoa nʼio chjí be nga̱ jé Jesucristo kiskoéjin nga je koandiaale xá jebi. Nga je Jesús tíbándiaale tsjoajin sʼe̱ kon Jeobá jokji tsakʼinyason kʼianga jekjoetʼa jme xi chon sonʼnde (Mat. 24:14).
2. Jmé xi chótʼayajiaan i̱ kjoaʼmiya jebi.
2 I̱ kjoaʼmiya jebi kui chótʼayajiaan nga je “choʼnda xi nʼiotʼakon, xi nda be xá” tísíchjén Jesús nga tsoyaná xi tʼatsʼe Niná kʼoa nga je bʼéndajin josʼin sa̱kóyason je Énle Niná (Mat. 24:45). Kʼoati kui chótʼayajiaan jméni xi koa̱n sʼiaan nga jngó jngoá kʼianga kʼoainganʼiolee je Jesús kao “choʼnda xi nʼiotʼakon, xi nda be xá”.
JÉ JESÚS TÍBÁNDIAA NGA TÍSAKÓYASON
3. Jmé kjoatéxoma tsakʼaile Jesús.
3 Jósʼin ʼyañá nga je Jesús tíbándiaa nga tísakóyason. Kʼianga tojeme koai ya ngʼajmi yaa kisikatíoxkó kʼa je chjotatjenngile ya jngo nindo xi tíjna ya Galilea, kʼoa i kitsole: “Ngayije kjoatéxoma kitsʼaina ngʼajmi, kʼoa i̱ sonʼnde”. Kʼoa i kitsosale: “Kuinga tangínsíño, kʼoa chjotana tikao je chjota xi tjín ngakjijnda naxinandá” (Mat. 28:18, 19, TNM). Tojo tso én jebi, jé Jesús tsakʼaile kjoatéxoma nga koandiaa nga sa̱kóyason.
4. Ánni tsín jao tjínni tokoán nga je Jesús tíbándiaa nga tísakóyason.
4 Je Jesús kʼoakitso nga sa̱kóyason ngakjijnda kʼoa nga chjotatjenngile ni̱kao je chjota kʼoa nga ya tjen tíjnakao chjotatjenngile saʼnda nga kuichokjetʼa jme xi chon sonʼnde (Mat. 28:20). Kui jebi xi bakóná nga je Jesús tíbándiaale nga tíʼmiyason nichxin xi tiyoaa ndʼaibi.
5. Jósʼin bʼainganʼioá nga tíbitjoson jmeni xi tso Salmo 110:3.
5 Je Jesús be nga nkjín koa̱nni xi kuitsoyason kʼianga to jetífikjetʼa nichxin. Be nga kuitjoson én jebi: “Je naxinandáli tjíondaní nichxin nga kuise̱ntítjonlai je chjotakjoajchánli” (Sal. 110:3). Kʼiatsa ʼmiyasuin, tibʼainganʼiolai je Jesús kao “choʼnda xi nʼiotʼakon, xi nda be xá” kʼoa tinitjosonní jotso je én xi tongini kinokjoa. Tonga tjín jmeni xi sakʼoa ñʼai kjima nga tíʼmiyason.
6. Jñánile xi jngo koya anni nga ñʼai maniná nga ʼmiyasoán.
6 Ñʼai maná kʼianga chjota batiochjoa nga ʼmiyasoán. Énndiso kaníbason tʼatsʼe nga ʼmiyasoán je xi yátsʼi̱n binyále Niná, chjota político kao xi nyatítjonle religión. Tsa koa̱nkjainle énndiso jebi je xíngiaa, xi ʼyaxkoaan kao xi ñatjen nixá, tsakui nichxin kʼoechjoaná nga tsín tije Jeobá si̱xánilee kʼoa nga tsín tikʼuínyasonñá. Tjín naxinandá jñani binyáxkónná je kontraná, bʼetʼaná kʼoa tjínkʼa je ndsʼee kao tichjaa xi ndoyá nikatíoʼya. Tonga tsín tokʼoamaná nga kʼoamatʼeen, nga̱ je Jesús kʼoakitso nga koa̱njtikená chjota xi totʼatsʼe jaʼaínle (Mat. 24:9). Nga kʼoasʼin majtikená chjota kui bakó nga je Jesús tichjenngilee kʼoa nga nda tiyoaa ngixko̱n Jeobá (Mat. 5:11, 12). Jé Na̱i xosʼín nga chjota batiochjoaná, tonga alikui koa̱n sikinjele je Jesús. Nga je Jesús tíbándiaa, tísakóyason Énle Niná ngakjijnda.
7. Jmé choa̱ xi bakóná nga tíbitjoson Apocalipsis 14:6, 7.
7 Ijngo koya xi kʼoati ñʼai maná nga ʼmiyasoán kuinga nʼio nkjín koya én nokjoa. Kʼianga jngo sén tsakakóle Jesús je pastro Juan, kʼoakitsole nga tsín tsakui jebi kʼoechjoa nga sa̱kóyason Énle Niná (tʼexkiai Apocalipsis 14:6, 7). * Jméni xi tinʼia nga tsínkui jebi tíbʼéchjoaná. Ya página xi tíjnaná ya Internet ya jw.org tsʼato 1,000 én faʼaitʼa je xo̱n xi Énle Niná yʼangini. Kʼoa je Cuerpo Gobernante kʼoakitso nga koa̱n tsʼato 700 én kjoaʼatoya je libro Koaan nda kuiyoaa ngantsjai nichxin, xi nichjén kʼianga ʼmiyalee Biblia chjota. Kʼoati tíbitjo je video xi kotsenle chjota xi tsín nrʼoé kʼoa tjín xo̱n nga én braille xi síchjén xi tsín matsenle. Nga kʼoakjima ngisaa nʼio nkjín chjota tjíobe je Énle Niná. Ñaki xkoaan tiʼyañá josʼin tíbitjoson je én xi tongini kinokjoa xi faʼaitʼa Biblia. Je chjota xi kjaʼaí kjaʼaí én male kui kjimale “jngo én xi tsje”, xi tsonile, tjíobe jokjoantjínni jmeni xi bakóya je Biblia (Zac. 8:23; Sof. 3:9). Kuinga kʼoakjimani nga je Jesús tíbándiaa.
8. Jósʼin tíbichómani nga tíʼmiyason Énle Niná.
8 Nichxin xi tiyoaa ndʼaibi, je chjota xi Niná tjíosíxále tsʼato jin millón mani kʼoa 240 naxinandá kao ʼnde tjío. Kʼoa nga xki̱ nó jmi mani xi fisʼenngindá. Xi ngisa chjíle ali tsakuijin jotjín mani, kui xi ngisa chjíle nga tjíosíkʼantjaiya yaole kʼoa nga kʼoakjimakjoan josʼin mele Niná, nga tjíosʼele je “ni̱ma̱ xi chjotse” tsole Biblia (Col. 3:8-10). Tjíosíkatío jmeni xi kisʼin ngasʼa, jolani kjoachajngi, kjoatsʼen, nga xínkjín bʼasjengi kʼoa nga naxinandále nʼio fitʼale tsakai. Tíbitjoson je én xi tongini kinokjoa, tojo tso ya Isaías 2:4 nga tsín tikjoajchán skótʼayani. Nga bʼenelee yaoná nga kʼoamakjoaan josʼin mele Niná, je chjota faʼaikatiojin naxinandále Niná kʼoa kʼoasʼin bakoñá nga timangíntjenngilee je Jesús, xi tíbándiaaná (Juan 13:35; 1 Ped. 2:12). Kuinga kʼoakjimani nga je Jesús tíbasenkaoná.
JE JESÚS JNGOO CHOʼNDA BASÉNNDA
9. Tojo tso Mateo 24:45-47, jméni xi kitso Jesús nga koa̱n nichxin xi totífikjetʼa.
9 (Tʼexkiai Mateo 24:45-47). * Je Jesús tongini kʼoakitso jokoa̱n nga to jetífikjetʼa nichxin. Kʼoakitso nga je koanele “choʼnda xi nʼiotʼakon, xi nda be xá” nga kuitsoyaná je Énle Niná, kʼoa choʼnda jebi nʼio tísíxá nichxin xi tiyoaa ndʼaibi. Je Jesús tojngo jao chjotale xi ya ngʼajmi koai tísíchjén nga tíbakóyaná je Énle Niná kʼoa nga kʼoati tíʼmiyale je chjota xi mandosinle. Chjota jebi alikui je batéxomale josʼin makjainle xi ngikʼa (2 Cor. 1:24). Be nga je Jesús séntítjonle je naxinandále Niná (Is. 55:4).
10. Jñánile je libro xi kichotʼayai nga tsaʼyai xi tʼatsʼe Jeobá tojosʼin faʼaitʼa ya sén.
10 Saʼnda tjen nó 1919, je “choʼnda xi nʼiotʼakon, xi nda be xá” nkjín koya xo̱n xi Énle Niná faʼaitʼa tsakʼasje nga tsakinyakao chjota nga tsabe títjon jokjoantjínni je Énle Niná. Kʼianga nó 1921, choʼnda jebi kui tsakʼasje je libro El Arpa de Dios nga én inglés nga kisakoyale chjota jmeni xi tso je Biblia. Kʼianga jejaʼato nichxin kjaʼaí libro kitjo. Jñánile libro xi kichotʼayai nga tsaʼyai xi tʼatsʼe Niná kʼoa nga tsjoacha koain. Tsakui nichxin kui kichotʼayai libro jebi: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, Jmé kjoanni xi bakóya je Biblia kʼoa ¿Qué nos enseña la Biblia? Tsakui tichotʼayaije̱ libro chjotse Koaan nda kuiyoaa ngantsjai nichxin. Libro jebi kui xá kitjoni nga kuinyakoaa chjota nga chjotatjenngile Cristo katama, kʼoa kʼiakjoán bitjo nga machjénná.
11. Ánni nga nʼio tjínnile kjoandosin nga tosi tonda jchaa xi tʼatsʼe Jeobá kao jmeni xi tso Biblia.
11 Ali tsa tojejin xi sʼa tjíokotʼaya Énle Niná xi machjénle nga nda skoe̱ xi tʼatsʼe Jeobá kao jmeni xi tso Biblia. Machjénná ngatsʼiaa. Je pastro Pablo i kitso: “Je tsojmi xi taja, kui xi machjénle je xi jekoanjchá”. Kʼoati kitso nga koa̱nná chjoéjiaan jmeni xi ndatjín tsa si̱tjosoán jotso je Énle Niná ánni nga tsínkui xi chʼaotjín kʼoasʼianñá (Heb. 5:14). Tsakui nichxin ñʼai koa̱nná nga si̱tjosoán jotso je kjoatéxomale Jeobá nga̱ tsín tichʼaosʼin beni chjota nga síchajngi. Tonga je Jesús basenkaoná nga majinsaná jotso je Énle Niná xi koasenkaoná nga nʼio sʼe̱jna kjoamakjainná. Jé Jesús bándiaale je “choʼnda xi nʼiotʼakon, xi nda be xá” nga batíonda jmeni xi tsoyaná xi tʼatsʼe Niná.
12. Jméni xi tinʼia nga tiʼyaxkoán je jaʼaínle Niná tojo kisʼin Jesús.
12 Tojo kisʼin Jesús, kʼoatisʼin ʼyaxkoán jaʼaínle Niná josʼin nga bakinle (Juan 17:6, 26). Tobʼelañá, kʼiaa nga nó 1931 nga testigole Jeobá tsakʼinná. Kʼoasʼin bakoñá nga ʼyaxkoán je jaʼaínle Niná nga̱ nʼio chjí ʼyatokoán (Is. 43:10-12). Kʼoa kʼianga sá octubre xi tikuini nó, jekui jaʼaínle Niná jaʼaitʼa ya portadale revista jebi nga én inglés. Xi ijngosani, je Biblia Traducción del Nuevo Mundo yaa faʼaitʼa jaʼaínle Niná jñani tjínnele kjoaʼaítʼa. Tonga je religión xi chjotale Cristo tsole yaole faʼáxinle je jaʼaínle Niná ya Biblia xi bʼasje.
JE JESÚS SÍKATÍONDA CHJOTATJENNGILE
13. Jméni xi bʼéjngo tokuin nga je “choʼnda xi nʼiotʼakon, xi nda be xá” tísíchjén Jesús ndʼaibi (Juan 6:68).
13 Jé “choʼnda xi nʼiotʼakon, xi nda be xá” tísíchjén Jesús nga tísíkatíoxkó je choʼndale i̱ Sonʼnde nga kʼoasʼin skoe̱xkón Niná josʼin mele. Nga ʼyai josʼin tísíxá naxinandále Niná i̱ Sonʼnde, tsakui nichxin kʼoatisi jokitso Pedro, nga i̱ kitso: “ʼYá xi koangínchonlaijin. Ji xi tjínli én xi tsjoá kjoabijnachon ngantsjai” (Juan 6:68). Likuijin kʼoasikji kjoanda tjínná tsa tsínlani tsaʼyaxkoaan je naxinandále Niná. Nga̱ jé naxinandá jebi tísíchjén Jesús kʼianga títsoyaná xi tʼatsʼe Niná kʼoa bakóyaná nga koa̱nná kʼuínyalee xi kjaʼaí. Kʼoati basenkaoná nga nindayaa yaoná nga kʼoati makjoaan josʼin mele Jeobá ánni nga tsjoa sʼe̱ni kon (Efes. 4:24).
14. Jósʼin tíbasenkaoli nga naxinandále Niná tijnajin kʼianga chʼin COVID-19 tsʼatsen.
14 Kʼianga ñʼai machon, je Jesús nʼio nda bándiaaná. Tobʼelañá, nga tsʼatsen je chʼin COVID-19, alikui titsabeni jokisʼin je chjota. Tonga je Jesús tsakándiaale naxinandále nga kitsjoaná kjoafaʼaitsjen josʼin si̱kuindaa yaoná. Kʼoatsakʼinná nga cubreboca si̱chjén jñani nʼio nkjín chjota tjín kʼoa nga kjin kuinyalee xíngiaa. Kʼoatsakʼinle je xi chjotajchínga sʼin tjío nga kjitʼa katanchja̱le je ndsʼee, ánni nga skoe̱ni tsa jme xi ñʼai kjimale, nga tsjoánganʼiole kʼoa nga kuinyakao nga tosi tonda sichriantʼale Niná (Is. 32:1, 2). Kʼoa je én xi bájinkonná Cuerpo Gobernante kʼoati tsjoásaná kjoafaʼaitsjen kʼoa nʼio binyakaoná.
15. Jmésa kjoafaʼaitsjen tsakʼainá nga chʼin tsʼatsen, kʼoa jósʼin tíbichómani.
15 Kʼianga chʼin tsʼatsen kʼoati tsakʼinná josʼin kuiyojtián kʼoa josʼin kʼuínyasoán. Kjitʼanangi videoconferencia kinichjén nga tsakiyojtián nga xki̱ xomana kʼoa nga kisʼená kjoajtíntse. Carta kichjiaa kʼoa teléfono kinokjoalee chjota nga tsakʼinyasoán. Je Jeobá tísíchikontʼain je xá xi tinʼia. Nkjín je sucursal xi kʼoatso nga ngisa kjimankjínya je xi tsoyason. Nkjín ndsʼee xi kʼoatso nga nʼio ndasʼin tíbichómani nga tjíotsoyason nichxin xi tiyoaa ndʼaibi (chótsenlai je recuadro “ Je Jeobá síchikontʼain nga tíʼmiyason”).
16. Jméni xi tsín jao kʼoé tokoán.
16 Tsakui nichxin tjínkʼa ndsʼee xi kʼoakuitso nga síkʼatone choa̱le jotsoná je naxinandále Niná xi totʼatsʼe chʼin COVID-19. Tonga ʼyañá nga ndasʼin bichómani jotsoná je naxinandále Niná (Mat. 11:19). Tsa si̱kjaʼaitsjenjiaan nga nʼio ndasʼin tíbándiaaná je Jesús, ʼyañá nga kʼoati sikuindaná je Jeobá kao Jesús nichxin xi sʼa nroa tojme kjoa xi kuitjátojiaan (tʼexkiai Hebreos 13:5, 6). *
17. Jósʼe tokuin nga je Jesús tíbándiaaná josʼin tinixá.
17 Nʼio tsjoa tjío tokoán nga je Jesús tíbándiaaná. Je jtín xi tiyojiaan alikui xkoa̱ya sʼin tiyoaa ninga xinxin tsaan, ninga kjaʼaí kjaʼaí én maná kʼoa ninga kjaʼaí kjaʼaísʼin nganá jñani tsaan. Tíʼmiyaná xi tʼatsʼe Niná kʼoa tíʼmiyaná josʼin kʼuínyasoán. Kʼoa nga jngó jngoá tosi tonda tinindayaa yaoná nga kʼoakjimakjoaan josʼin mele Niná kʼoa nga tsjoacha kjimaa xíngiaa. Nʼio tsjoa tjín tokoán nga je Jesucristo xi séntítjonná.
KJOAJNDA 16 Chʼa̱sjengʼaa Jeobá xi totʼatsʼe ʼNdíle
^ Millón mani xi tsoyason Énle Niná nichxin xi tiyoaa ndʼaibi, xi xʼin, xi yánchjín kao xi ʼndíxti. Tsa ʼmiyasuin Énle Niná kʼoasʼin tiʼmitjenngi josʼin bándiaaná je Jesucristo. I̱ kjoaʼmiya jebi kui jchaa je choa̱ xi bakó nga je Jesús tíbándiaa nga tísakóyason. Nga kui chótʼayajiaan koasenkaoná nga tosi tonda si̱xálee Jeobá nga je Jesús tíbándiaaná.
^ Apocalipsis 14:6, 7: “Tsaʼbe ngijngoa ánkje xi kitjenjinbasenle ngʼajmi, xi tjínle je énnda xi tjín ngantsjai, nga kuinchja̱yajinle je xi tjío sonʼnde, kao ngayije nangi, kao ngayije ntje̱, kao ngayije én, kao ngayije naxinandá. 7 Nʼio kinchja̱: Jchaxkón Niná, chʼa̱sjejeyao, nga je orale nroachrian nga tsjoá kjoañʼai. Jchaxkón je xi kisinda ngʼajmi, kao sonʼnde, kao ndáchikon, kao nga̱jao̱ jña bitjo nandá”.
^ Mateo 24:45-47: “ʼYá ni tsokʼoa je choʼnda xi nʼiotʼakon, xi nda be xá, xi je naile kisikʼéjnaʼnda xikʼa choʼndale, jméni nga tsjoásínile xi koakje̱nni nga fichó choa̱le. 46 Jó tondale je choʼndabe, xi naile koa̱nsjaile kʼia nga kjoaʼaí nga kʼoatísʼín. 47 Xi kjoakixi xi xinno, nga je naile sikʼéjnaʼndale ngayije tsojmile”.
^ Hebreos 13:5, 6: “Kʼoasʼin tiyo ali kjoanyinájin nimetakon. Tʼejngo takon kao xi jetjínno, nga̱ Niná kʼoakitso: Likui xin koatejnale, nitsjionkonjinle. 6 Kʼoasʼin nga kʼoakuixónnía nga nʼiotakoán: Jé Nainá xi basenkaona, likui tsakjonnia. Jmé xi koa̱n sikaona chjota”.
