Je Jesús kui kitsoya nga nda kjuinkoaa xíngiaa. Tonga ñandia nga i̱ kitsole chjotatjenngile: “Ali nikjaʼaitsjenjion tsa nyʼán tjín xi jeʼe̱ sikʼéjnale i̱ sonʼndebi. Alikui jeʼe̱ nga sikʼéjna xi nyʼán tjín, tokjoajchán xi jeʼe̱ sikʼéjna. Kui xá jaʼainia, jméni nga je tibe kontra koaisínile nʼaile, kʼoa xi tsoti kontra koaile xi na̱le, kʼoa xi jaʼnda kontra koaile xi na̱chále” (Mat. 10:34, 35). Jmé xi kinchja̱ni Jesús nga kʼoakitso.

Je Jesús tsínkui xi koanmele nga xkoa̱ya koatio chjota ya yaniʼya. Tonga kʼoati koanjinle nga sakʼoa kʼoakoa̱n xi totʼatsʼe nga Énle Niná skótʼaya. Je xi chjotatjenngile Cristo mele koa̱n kʼoa xi koaisʼenngindá, machjén nga kuenta sʼin tsakui nichxin tsín sa̱sénle xínkjín nga Énle Niná skótʼaya. Tsa ʼyani xi xʼinle kʼoa tsa chjoónle kʼoéjnachjoa kʼoa tsa je xi xínkjín mani, ñʼaijin koa̱nle nga kʼoakjoansʼin koaitjenngi choa̱le Jesús.

Je Biblia kʼoatsole chjotale Cristo nga nda katafikao ngatsʼi chjota (Rom. 12:18). Tjínkʼa xi xkoa̱ya síkatío ya yaniʼya jmeni xi kitsoya Jesús. Kuinga kʼoamani nga̱ tjínkʼa xi kotʼaya Énle Niná, tonga je xínkjín batiochjoa kʼoa tsín sasénle. Tijéni xínkjín xi kontra batiole nga Énle Niná kotʼaya (Mat. 10:36).

Je chjotale Cristo xi kjaʼaí religión tjíojin xínkjín xi ya tjíoʼyakao yaniʼya sakʼoa kui kjoa faʼatojin nga chotʼayakao jokji tsjoake je Jeobá kao Jesús. Tsakui nichxin kʼoakuitsole xínkjín nga sʼuí katabʼasje, kʼiaa nga tjínnele sikjaʼaitsjenjin ʼyáni xi tsjoa koaya kon. Je Jesús i kitso: “Je xi ngisa tsjoake nʼaile kao na̱le kaoni tsa an, likui bakinle nga je xi tsʼan” (Mat. 10:37). Ali tsakuijin xi kitsonile Jesús nga tsín tsjoacha koaan je xijcháná kʼianga chjotatjenngile koaan. Kui kinchja̱ni jméni xi ngisa chjíle nga sʼiaan. Tojo tsjoachañá xíngiaa ninga je xi kaile nga je Jeobá jchaxkoán, tonga ʼyañá nga kui xi ngisa títjon tíjna nga tsjoacha koaan je Niná.

Ba sʼená kʼianga tsín sasénle xíngiaa nga Énle Niná chotʼayá. Tonga ñá xi chjotale Cristo maa ʼyañá nga tsín sa̱sénle Jesús nga chjotatjenngile koaan kʼiatsa tsín chjoé je yá kjoañʼainá (Mat. 10:38, TNM). Xi chjotale Cristo maa ʼyañá nga kjoa kuitjátojiaan kʼianga je Jesús kjuintjenngilee, jolani tsa xíngiaa koatiochjoaná. Kʼianga nda kjuinkoaa yaoná tsakui nichxin sikjaʼaitsjenjin je xíngiaa kʼoa koa̱nndosinle je Énle Niná (1 Ped. 3:1, 2).