JE CHJOTA arqueólogo millón ladrillo kjimasjaile ya jñani kisʼejna naxinandá Babilonia, xi koanchjén kʼianga kisʼenda naxinandá jebi. Tojo tso je arqueólogo xi Robert Koldewey ʼmi, yaa ndaile naxinandá kisatio nga̱já jñani koannda ladrillo, jñani tjín niʼnde xi mandani kao yá xi machjén nga sakángile je nga̱já.

Kjio xo̱n xi kʼoatso nga je chjota xi ngʼa xá kisʼele ya Babilonia nga kʼoatisʼin kisichjén je nga̱já nga chjota tsakaká. Je chjota xi Paul-Alain Beaulieu ʼmi, xi ya bakóya Universidad xi tíjna ya Toronto itso: “Nkjín xo̱n kjimasjai ya Babilonia xi kʼoatso nga je rey tsakʼéne nga kisaka je chjota xi tsín kisitjoson kʼoa xi tsín jme kjoaxkóntokon tsakakó. Jngo xo̱n xi kʼia saʼnda kijnani nga tsakatéxoma je rey Nabucodonosor, itso: Tikʼaon, takao, titsjo ya jinlʼí, niʼndi̱ katama. Ñaki katatijin tsjetsje je lʼí”.

Nga kʼoatso xi kjimasjaile chjota kui faʼaitsjenná jmeni xi tso capítulo 3 xi tsʼe Daniel. Tojo tso Biblia, je rey Nabucodonosor jngo xkóson xi tsʼe oro kʼoa xi nʼio jekji tsakasénjna ya ndaile naxinandá, ya jñani Dura ʼmi. Tonga je xti hebreo Sadrac, Mesac, kao Abednego alikui tsakinyaxkónyʼintʼale xkóson jebi. Nga kʼoakisʼin nʼio koanjtile je rey Nabucodonosor kʼoa kʼoakitso nga ngi ñatoya kʼoakji katanisje je nga̱já jokji sje tsakai kʼoa nga ya katanikʼatsaoya nga jan xti jebi. Tonga jngo ánkje kichokʼasjentjai xti jebi nga tsín jme xi koanle (Dan. 3:1-6, 19-28).

Je ladrillo xi kjimasjai ya Babilonia kui bakóná nga ñaki kʼoatjín jmeni xi tso je Biblia. Nkjín ladrillo xi kui én tjítʼa nga je rey bitjongʼa. Jngo jñani i̱ tso xi tjítʼa: “Nabucodonosor, rey xi tsʼe Babilonia. An tsakʼenda je ʼnde jñani koatejna nga koatexoma. Kʼoa je ntje̱na xi skan koatio ya katabatéxoma ngantsjai nichxin”. Én jebi mangóson jmeni xi tso ya Daniel 4:30 jñani i̱ tso je Nabucodonosor nga ngʼa bʼasje yaole: “A tsíkui jebi Babilonia xi Nʼioje, xi ansoa tsakʼenda kao nganʼiona nga i̱ tjen koatexomaña kʼoa nga jeya sʼin koatejna”.