1, 2. Jósʼin mangósoán xi chjotale Cristo maa je ndʼiangʼa xi tíjna ya Tokio (1 Corintios 15:58).

 KʼIANGA jetífikjetʼa nó 1970, kʼiaa kisʼenda jngo ndʼia xi 60 piso tjínle ya Tokio, (Japón). Je chjota kui kisikjaʼaitsjen tsa chókjoale ndʼia jebi kʼianga cháon kjoaʼa. Tonga ndʼia jebi likui jme xi koanle nga jaʼa cháon. Ánni. Je chjota kʼoasʼin tsakʼénda nga tsín kuixojen kʼoa nga tokuindíya kʼianga cháon kjoaʼa. Ñá xi chjotale Cristo maa yaa mangósoán ndʼia jebi. Ánni kʼoabixónsíñá.

² Ñá xi Jeobá nixálee kʼoati kixi mangíntʼalee ninga tse kjoa bitjatojiaan. Tobʼelañá, nitjosonñá ngantsjai je kjoatéxomale (tʼexkiai 1 Corintios 15:58). b Tsín koa̱n kuitjátoné jmeni xi tsoná, tonga kʼoati tjínnele chósonnilee josʼiaan kʼoa alikui koa̱n si̱kʼatoné choa̱le jmeni xi sʼiaan (Sant. 3:17). Kʼiatsa kʼoasʼiaan alikuijin si̱kʼatoné choa̱le josʼin si̱kjaʼaitsjeen. I̱ kjoaʼmiya jebi kui chótʼayajiaan kʼiáni machjén nga kixi koaan. Kʼoati aon koya che̱n jchaa xi síchjén Na̱i nga tsín tikixi koa̱nñá kʼoa jchañá jósʼiaan nga tsín ya ska̱yaa je che̱nle.

3. Jñánile je kjoatéxoma xi tsjoáná Jeobá tojo tso Hechos 15:28, 29.

³ Jé Jeobá xi nda male batéxoma kʼoa xi tsjoáná kjoatéxoma. Kʼoa tsjoále choʼndale je kjoatéxoma xi tjínnele koaitjenngi (Is. 33:22). Tobʼelañá, je cuerpo gobernante xi tsakʼejna nga siglo 1, jan koya tjínni kjoatéxoma xi kitsjoa xi tjínnele kjuintjenngiaa ngatsʼiaa. Xi títjon, kʼoakitso nga tsín xkóson kʼoétsʼoalee kʼoa nga toje Jeobá jchaxkoán. Xi  majaoni, nga tjínnele jchaxkoán je njín. Kʼoa xi majanni, nga si̱tjosoán je kjoatéxoma xi faʼaitʼa je Biblia xi kʼoatso nga tsín tjínnele si̱chajngiaa (tʼexkiai Hechos 15:28, 29). c Jméni xi sʼiaan nga si̱tjosoán nga jan koya jebi.

4. Jósʼin tíjna nga toje Jeobá ʼyaxkoán (Apocalipsis 4:11).

⁴ Tojé Jeobá ʼyaxkoán kʼoa alikui xkóson bʼetsʼoalee. Je Jeobá kʼoakitsole chjota israelita nga toje katabexkón (Deut. 5:6-10). Kʼianga koanmele je Na̱i tsakʼanachale je Jesús, je Jesús kʼoakitso nga toje Jeobá tjínnele jchaxkoán (Mat. 4:8-10). Kuinga tsín xkóson ʼyaxkónñá kʼoa kʼoati tsín chjota chʼasjengʼaa. Alikui jo niná sʼin ʼyatokoán je chjota xi nyatítjonle religión, chjota político, kʼoa kao chjota xi nʼio ʼyale, jolani je xi síská. Tosaa je Jeobá bʼainganʼiolee nga̱ jé kisinda ngayeje jmeni xi tjín (tʼexkiai Apocalipsis 4:11). d

5. Ánni nga ʼyaxkónsíñá je njín kao kjoabijnachon.

⁵ ʼYaxkónñá je njín kao kjoabijnachon. Je Jeobá kʼoatso nga je njín kjoabijnachon tsoyanile, kʼoa tʼatsʼe tínroani kjoanda jebi (Lev. 17:14). Nga kʼoakitso títjon Jeobá nga koa̱n chi̱nee yaole cho̱, kʼoakitso nga likui koa̱n chi̱nee je njín (Gén. 9:4). Kʼoati kitsongáni nga likui koa̱n chi̱nee je njín kʼianga kitsjoale kjoatéxoma je chjota israelita (Lev. 17:10). Kʼianga siglo 1, jé Jeobá xi kʼoasʼin koanmele nga kʼoakitso je cuerpo gobernante nga tsín koa̱n njín sichjén je chjotale Cristo (Hech. 15:28, 29). Kʼianga nixkiaa mangíntjenngiñá je kjoatéxoma jebi. e

6. Jméni xi sʼiaan nga tsín kuitjátoné kjoatéxomale Jeobá.

⁶ Nitjosonñá je kjoatéxomale Jeobá nga kʼoatsoná nga tsín tjínnele si̱chajngiaa (Heb. 13:4). Je pastro Pablo itso kjoafaʼaitsjen kitsjoa: “Tinyachʼaolao yaono, joni tsa tinikʼaon yaono”. Je kjoafaʼaitsjen jebi binyakaoná nga tsínkui nimetokoán je xi chʼaotjín. Tobʼelañá, alikui kui chotsenlee jmeni xi kjoachajngi ska̱nijinná (Col. 3:5; Job 31:1). Kʼianga kui sʼejnabasenná xi chʼaotjín, tokjoan bisenxinlee kʼoa tsínkui nikjaʼaitsjeen ánni nga tsín chʼaosʼin kuiyoñá ngixko̱n Jeobá.

7. Jméni xi machjén nga sʼiaan kʼoa ánni.

⁷ Je Jeobá kui xi mele nga ñaki ni̱ma̱ná kjuinroajinni nga si̱tjosoán kjoatéxomale (Rom. 6:17). Kʼoa kjoanda tsaanñá tsa kʼoasʼiaan (Is. 48:17, 18; 1 Cor. 6:9, 10). Kui xi mená nga kʼoasʼin kjuinkoaa yaoná josʼin sasénle Jeobá. Kʼoati tjín tokoán nga kʼoasʼiaan tojo kitso je xi kiski salmo, nga i̱ kitso: “Ñaki kʼoatjín tokoan nga sitjosoan ngantsjai je kjoatéxomali” (Sal. 119:112). Tonga kʼoati ʼyaa nga je Na̱i básjaile josíkaoná ánni nga tsín tikixi kjuintʼanilee Jeobá. Jméni xi sʼín je Na̱i.

8. Kʼianga chjota fitjenngikená, ánni nga kui che̱n jebi síchjénni je Na̱i.

⁸ Nga chjota fitjenngikená. Jé Na̱i xosʼín nga totaon bená je chjota kʼoa nga chʼao katasatío tokoán tojoni nga tsín tikixi kjuintʼanilee je Jeobá kʼoa nga tsín tinda  kuiyoñá ngixko̱n (1 Ped. 5:8). Nga kixi kitʼale Niná je chjotale Cristo xi tsakatio nga siglo 1, tjínkʼa xi totaon tsaʼya, xi kisatele kʼoa xi kinikʼien (Hech. 5:27, 28, 40; 7:54-60). Nichxin xi tiyoaa ndʼaibi, tojo kʼoatísʼín je Na̱i. Jé síchjén je chjota xi fitjenngikená. Tobʼelañá nga totaon tíʼya je ndsʼee xi Rusia tsʼe kʼoa jña xinsa naxinandá kʼoati tse kjoa tjíofaʼatojin je ndsʼee.

9. Jngo choa̱ tʼejnai ánni nga si̱kuindasínilee yaoná kʼianga jme xi sʼenená nga kʼoasʼiaan.

⁹ Kʼianga kui sʼenená kʼoasʼiaan xi tsín sasénle Niná. Je Na̱i nkjínsa koya che̱n síchjén tojoni nga tsín tikixi kjuintʼanilee Niná (Efes. 6:11). Kataʼyala jokoan je Bob, tsʼe chjinexki kikajna nga jtíya. Kʼoakitsole je chjinexki nga tsín tsjoáʼnde nga njín xi̱nyále. Je chjinexki xi koateya kʼoakitso nga tsín njín sichjén nga sixkile. Jngo nitje̱n tongini nga kjesa tiyajin kʼoa nga jekini je xínkjín, je chjinexki xi ijngo kʼoakitsole nga be nga tsín njín xi̱nyále, tonga nga tokʼoejnandala je njín tsa totsejinni koa̱nchjénle. Chjinexki jebi kʼoajinsʼin kisikjaʼaitsjen nga tsjoáʼnde je Bob nga njín xi̱nyále nga̱ jetsín tiya tjíoni je xínkjín. Ndsʼee jebi ñaki kʼoatjín kon nga tsín njín xi̱nyále kʼoa kʼoakitso nga nitsejin tsjoáʼnde nga kʼoakoa̱ntʼain.

10. Ánni nga nʼio xkón tíjnasíni tsa je chʼa̱ʼénlee je chjota xi tsín Niná síxále (1 Corintios 3:19, 20).

¹⁰ Josʼin síkjaʼaitsjen je chjota. Kʼiatsa kʼoasʼin si̱kjaʼaitsjeen josʼin síkjaʼaitsjen je chjota xi tsín Niná síxále, kuijin xosikaoná nga tsín tije Jeobá si̱tjosonnilee kʼoa nga kuitjátoné kjoatéxomale (tʼexkiai 1 Corintios 3:19, 20). f “Je kjoachjinele sonʼndebi” kui tsoya nga koa̱n kʼoasʼiaan jmeni xi nimetokoán. Kataʼyala jokisʼin chjotale Cristo xi ya tsakatio ya jtín xi Pérgamo kao xi Tiatira tsakʼin. Tjínkʼa je chjotale Cristo xi kʼoati kisʼin josʼín je chjota xi xkóson bʼétsʼoale kʼoa xi síchajngi. Je Jesús kʼoakitsole nga jao jtín jebi nga tsín nda tjíosʼín nga tjíotsjoáʼndele je chjotale Cristo xi tjíosíchajngi (Apocalipsis 2:14, 20). Nichxin xi tiyoaa ndʼaibi, je chjota kʼoati kui xi mele nga kʼoasʼin si̱kjaʼaitsjeen josʼin síkjaʼaitsjen je. Tsakui nichxin tjínkʼa xíngiaa kʼoa tsa je chjota xi ʼyaxkoaan kʼoakuitsoná nga kui kʼoasʼiaan jotjín tokoán, nga tsín chʼaotjín nga kui kʼoasʼiaan jmeni xi nimetokoán, kʼoa nga tsín timachjénni je kjoatéxoma xi faʼaitʼa Biblia.

11. Jméni xi tsín koa̱n kʼoasʼiaan.

¹¹ Tsakui nichxin kʼoasʼin si̱kjaʼaitsjen sakʼoa nga tsín kʼoatsoyejená kjoatéxomale Jeobá jmeni xi sʼiaan. Kʼoa tsa saʼnda si̱kʼatoné choa̱le josʼiaan ninga tsínni kʼoatso je kjoatéxomale Niná (1 Cor. 4:6). Kʼianga tsakʼejna Jesús i̱ Sonʼnde kʼoakisʼin chjota xi tsakinyatítjonle je religión. Tojé tsakʼétʼasonle jotso je kjoatéxoma kʼoa nʼio ñʼai koanle chjota nga kisitjoson (Mat. 23:4). Tonga je Jeobá kui Biblia kao naxinandále síchjén nga tsjoáná kjoafaʼaitsjen, alikui timachjénni nga ñá kʼoétʼasonlee (Prov. 3:5-7). Kuinga tokuikjoan mangíntjenngiñá jmeni xi tso je Biblia kʼoa tsín ñá bʼetʼasoán jmeni xi ñá kjenndiaaná kʼoa tsín kʼoaʼmilee xi ngikʼa nga kui kʼoakatasʼín.

12. Jósʼin síchjén je Na̱i kjoachjine xi to kjoandiso.

¹² Kjoachjine xi to kjoandiso. Nga bʼanachale chjota je Na̱i kui síchjén “kjoachjine xi tokjoandiso xi tsínjme chjíle” (Col. 2:8). Tobʼelañá kʼianga siglo 1, jé Na̱i xokisʼin nga kui kitjenngi chjota je kjoachjine xi tjín nga kʼia. Jolani nga kui tsakakóya chjota judío je kjoafaʼaitsjen xi tsín ya Biblia  yʼangini kʼoa nga kʼoakitso nga tjínnele kui kjoatéxomale Moisés koaitjenngi je chjota. Kʼoa je chjota tokui kuenta kisʼin kjoandiso jebi ʼndele nga kui kuenta sʼin je kjoachjine xi tʼatsʼe Jeobá tínroani. Nichxin xi tiyoaa ndʼaibi, je Na̱i tojo kʼoatísʼín, kui redes sociales síchjén kao noticia nga kaníbason je én xi tsín kʼoatjín xi tso je chjota político. Tobʼelañá kʼianga kisʼe chʼin COVID-19 nkjín énndiso kisʼe. g Nga tsangíntjenngiaa je kjoafaʼaitsjen xi kitsjoaná naxinandále Jeobá alikui kui kjoa kitjatojiaan je kjoa xi tsakatiojin je chjota xi kui kisisin je énndiso xi kisʼe (Mat. 24:45).

13. Ánni tsín kʼoaiʼndeñá nga totjín totjenni kjoa katasíchajinná xi nʼio tjínle kjoandosin.

¹³ Xi tonichxin faʼáná. ʼNdele nga totjín totjenni kjoa xi nichxinná si̱kʼayalee, tosa kui kʼoailee kjoandosin jmeni xi ngisa chjíle (Filip. 1:9, 10). Kʼianga tokui nikʼayalee nichxin jmeni xi tsín nʼio chjíle alikuini kui kʼoanʼia jmeni xi nʼio tjínle kjoandosin. Tobʼelañá, tsa tokui kuenta sʼiaan je xáná, nga bichaa, nga ʼyoá, kʼoa nga bʼetsaojiaan tokuijin si̱kʼayalee nichxin (Luc. 21:34, 35). Je chjota tokui fáoyani jmeni xi chon sonʼnde kʼoa kao kjoasi xi tjín. Kuinga si̱kuindanilee yaoná nga tsín kʼoati sʼiaan tsanda ñá. Alikui koa̱n kui si̱kjaʼaitsjeen kʼoa tsakui cho̱bayañá. Kuinga aon koya che̱n jebi síchjén je Na̱i tojoni nga tsín tikixi kjuintʼanilee je Jeobá. Kataʼyala jméni xi koasenkaoná nga kixi kjuintʼalee Niná.

14. Jmé xi koasenkaoná nga kixi kjuintʼalee Jeobá.

¹⁴ Si̱kjaʼaitsjenjiaan ánni nga tsakʼaitʼanilee yaoná Jeobá kʼoa tsangínsʼenngindáñá. Kui kʼoakinʼiañá nga kui xi mená nga toje Jeobá si̱xálee. Si̱kjaʼaitsjenjiaan jméni xi tsakʼéjngo tokoán nga ñaki Énle Niná xi tichotʼayá. Kʼianga tsaʼyaa xi tʼatsʼe Jeobá ñaki Nʼainá sʼin tsaʼyatokoán, koantsjoachañá kʼoa tsaʼyaxkónñá. Kʼianga sa nʼio sa nʼio kisʼejna kjoamakjainná kui xi tsakasenkaoná nga kʼoakoanniná jéená kʼoa nga kui kʼoakinʼia jmeni xi sasénle Jeobá.  Kʼoa nda kisʼe tokoán nga koanjinná nga síchatʼaná je Niná (Sal. 32:1, 2). Tsangínñá je kjoajtín xi satío kʼoa kʼoasʼin tsakʼendajiaan nga kʼuínyalee xi kjaʼaí jmeni xi kjimajinná nga tichotʼayá Biblia. Ndʼaibi nga jechjotale Cristo maa yaa titomjeyá je ndiaa xi kuichokaoná kjoabijnachon xi tsínkʼia fetʼa kʼoa tsín mená nga si̱kʼéjnaa ndiaa jebi (Mat. 7:13, 14).

15. Jósʼin basenkaoná nga bʼexkiaa je Biblia kʼoa nga nikjaʼaitsjenjiaan jmeni xi tso.

¹⁵ Chótʼayá Énle Niná kʼoa si̱kjaʼaitsjenjiaan jmeni xi tso. Kʼianga nʼio sasénjna jngo yá tjínnele na̱nga̱ koai je ja̱ma̱le. Tikʼoasʼinni tsanda ñá, machjén nga ya Énle Niná chʼa̱ngiñá jmeni xi koa̱nkjainná ánni nga kixi kjuintʼanilee Jeobá. Kʼianga mangʼa jngo yá, sa na̱nga̱ sa na̱nga̱ fi je ja̱ma̱le kʼoa nʼio sasénjna. Kʼianga chotʼayá Biblia kʼoa nga nikjaʼaitsjenjiaan jmeni xi tso ngisaa nʼio sʼejna je kjoamakjainná, kʼoa ñaki sʼejngo tokoán nga ñaki kʼoatjín jmeni xi tso Énle Niná (Col. 2:6, 7). Si̱kjaʼaitsjenjiaan josʼin tsakinyakao je choʼndale Jeobá xi tsakatio nichxin kjoatse je kjoafaʼaitsjen xi kitsjoale, josʼin tsakándiaale kʼoa josʼin kisikuinda. Tobʼelañá, kʼianga jngo sén kisakole je Ezequiel kuenta kisʼin josʼin tsakʼécho̱ya ánkje je yo̱ngo̱. Ali tsa tojejin Ezequiel xi tsakasenkao sén jebi, kʼoati kui bakóyaná tsanda ñá josʼin tjínnele kjuintjenngiaa je kjoatéxomale Jeobá kʼoa nga ñaki toje jchaxkoán (Ezeq. 40:1-4; 43:10-12). h Kʼoati binyakaoná nga chotʼayá kʼoa nga nikjaʼaitsjenjiaan jmeni xi ñʼai tjín xi tʼatsʼe Niná.

16. Jósʼin tsakasenkao Bob nga kixi kitʼale Niná (Salmo 112:7).

¹⁶ Ñaki ni̱ma̱ná katanroajinni nga kixi kjuintʼalee Niná. Kʼianga kise rey David kʼoakitsole Niná nga tsjoake koa̱n ngantsjai. I kitso: “Kixi tíjna je ni̱ma̱na, ji Niná” (Sal. 57:7). Kʼoati koa̱n kʼoakʼoé tokoán tsanda ñá nga kixi kjuintʼalee je Jeobá kʼoa nga je si̱nʼiotʼaa (tʼexkiai Salmo 112:7). i Si̱kjaʼaitsjenla ijngokʼá xi tʼatsʼe Bob, xi kanikʼaxki̱ná ya párrafo 9. Jósʼin tsakasenkao nga kʼoatsakʼé kon nga kixi koaitʼale Niná. Kʼianga kʼoatsakʼinle nga  tosʼe̱jnandala je njín kʼiatsa koa̱nchjénnile kʼoakitso nga tokjoan koai tsa kʼoakoa̱ntʼain. I tso: “Nitséjinla jao tsakʼe tokoan. Kʼoati tsínkui kisikjáojian jmeni xi koa̱nna”.

17. Jmé xi bakóyaná jokisʼin je Bob (kʼoati chótsenlai sén xi faʼaitʼa).

¹⁷ Nʼio tongini kisikjaʼaitsjenjin jmeni xi sʼin je Bob, ali tokʼiajin kʼoakitso jokoa̱ntʼain kʼianga jeya kijna ya hospital. Kui xi mele nga tsjoa koaya kon je Jeobá. Kʼoati kiskotʼayajin jmeni xi tso je Biblia kao xo̱n xi Énle Niná yʼangini josʼin tjínnele jchatokoán je njín kao kjoabijnachon. Kʼoati ñaki tsakʼéjngo kon nga je Jeobá sichikontʼain kʼiatsa sitjoson jotso je kjoatéxomale. Tojo kisʼin je Bob, ñá kʼoati koa̱n kʼoakʼoé tokoán nga ñaki kixi kjuintʼalee Jeobá ninga tojme kjoa xi kuitjátojiaan.

18. Jmé xi bakóyaná je choa̱le Barac (chótsenlai sén xi faʼaitʼa ya portada).

¹⁸ Je Jeobá si̱nʼiotʼaa. Si̱kjaʼaitsjenjinla xi tʼatsʼe juez Barac. Ndasʼin kichomani nga kʼoakisʼin jokitsole Jeobá. Nga kui nichxin, je chjota israelita alikui tjíonda nga kjoajchán koai. Tsínle espada kʼoa tsínle je ki̱cha̱ xi bájchxochjoale yaole. Ninga kʼoalani, je Jeobá kʼoakitsole nga katafikján kao Sísara kao chjotakjoajchánle. Kʼoa chjota jebi ñaki yʼa ngayeje ki̱cha̱ xi síchjén nga fi kjoajchán (Juec. 5:8). Je Débora kʼoakitsole Barac nga katafijentʼa nindo Tabor kʼoa ya katafi jñani son chon nga katakján kao Sísara kao xi 900 carreta tjenkao. Nga son chon ngisajin ngotjo sikinjeni kontrale nga carreta tjenkao, tonga je Barac kisitjoson jotsakʼinle. Kʼianga sʼa tjíonroajentʼa nindo je Barac kao chjotakjoajchánle, je Jeobá jngo jtsí kisikʼa kʼoa je carretale kontrale yaa kisʼeyonʼiojin ndási. Kʼoa je Jeobá tsakasenkao Barac nga kisikinje (Juec. 4:1-7, 10, 13-16). Kʼoatisʼinni ñá, jé Jeobá koasenkaoná kʼiatsa je si̱nʼiotʼaa kʼoa tsa si̱tjosoán jmeni xi tsoná je naxinandále (Deut. 31:6).

19. Ánni menili nga kixi kʼuíntʼalai Niná.

¹⁹ Machjén nga tosi tonda kixi kjuintʼalee Niná josaʼnda nga kjoetʼa jme xi chon sonʼnde (1 Tim. 6:11, 12; 2 Ped. 3:17). Alikui kʼoaiʼndee nga kui katasíkinjená nga chjota fitjenngikená, nga kui sʼenená kʼoasʼiaan xi tsín sasénle Niná, josʼin síkjaʼaitsjen chjota, kjoachjine xi to kjoandiso tjenkao, kʼoa tsínkui kʼoasʼiaan xi tonichxin faʼáná (Efes. 4:14). Tosi tonda kixi kjuintʼalee Jeobá, kʼoa ñaki kʼoakʼoé tokoán nga tsjoacha koaan je Jeobá kʼoa nga si̱tjosoán kjoatéxomale. Tonga kʼoati machjén nga chósonnilee josʼiaan. Ya kjoaʼmiya xi ijngo kui jchaa nga je Jeobá kao Jesús nda kosonnile josʼín. Jósʼin koa̱n chjénngilee.